Siammone Xayalath
ວາງສີລາລືກ ໂຄງການກໍ່ສ້າງສູນຄົ້ນຄວ້າວິໄຈຢາງພາລາ ແລະ ພືດກະສິກໍາລາວ
ໃນວັນທີ 20 ມັງກອນ 2019 ນີ້, ກະຊວງກະສິກໍາ ແລະ ປ່າໄມ້ ຮ່ວມກັບ ກຸ່ມບໍລິສັດພັດທະນາກະສິກໍາ ຢຸນນານ ສປ ຈີນ ໄດ້ຈັດພິທີວາງສີລາລຶກໂຄງການກໍ່ສ້າງສູນຄົ້ນຄ້ວາວິໄຈຢາງພາລາ ແລະ ພືດກະສິກໍາລາວ ຂື້ນ ທີ່ບ້ານ ໂນນສະອາດ, ເມືອງ ໄຊທານີ, ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໂດຍ ທ່ານ ທອງພັດ ວົງມະນີ ຮອງລັດຖະມົນຕີກະຊວງ ກະສິກໍາ ແລະ ປ່າໄມ້, ອົງການປົກຄອງເມືອງໄຊທານີ, ຫົວໜ້າ-ຮອງຫົວໜ້າຫ້ອງການ, ກົມ, ສະຖາບັນອ້ອມຂ້າງກະຊວງ ກະສິກໍາ ແລະ ປ່າໄມ້, ທ່ານ ເຢ້ຍເຊນຢວນ ຮອງຫົວໜ້າພະແນກຄະນະກໍາມະການ ຄຸ້ມຄອງຊັບສິນລັດ ແຂວງ ຢຸນນານ ແລະ ທ່ານ ຖາງຊື້ມິງ ຕາງໜ້າປະທານ ບໍລິສັດ ກຸ່ມພັດທະນາກະສິກໍາ ຢຸນນານ ຈໍາກັດພ້ອມດ້ວຍແຂກທີ່ຖືກເຊີນຈາກທັງສອງຝ່າຍເຂົ້າຮ່ວມ.
ທ່ານ ຄໍາພອນ ມູນລະໄມ ຮອງຫົວໜ້າສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດໄດ້ ລາຍງານໃຫ້ຮູ້ວ່າ: ໂຄງການຮ່ວມມື ສ້າງສູນຄົ້ນຄວ້າວິໄຈຢາງພາລາ ແລະ ພືດກະສິກໍາລາວ ແມ່ນໂຄງການຮ່ວມມືດ້ານ ວິຊາການ ມີຈຸດປະສົງເພື່ອກໍ່ສ້າງພື້ນຖານໂຄງລ່າງ, ຫ້ອງວິໄຈຢາງພາລາ, ຫ້ອງວິໄຈພືດກະສິກໍາ, ຫ້ອງຝຶກອົບຮົມ ຂໍ້ມູນ. ຂ່າວສານ, ປະກອບອຸປະກອນເຄື່ອງມືເຄື່ອງວິໄຈ ແລະ ສິ່ງອໍານວຍຄວາມສະດວກອື່ນໆທີ່ກ່ຽວຂ້ອງເພື່ອ ດໍາເນີນການ ວິໄຈຄຸນນະພາບ ແລະ ກໍານົດມາດຕະຖານຢາງພາລາ ແລະ ພືດກະສິກໍາ ຂອງລາວພ້ອມທັງອອກໃບຢັ້ງ ຢືນຜົນການວິໄຈ ແລະ ມາດຕະຖານ ໃຫ້ເປັນທີ່ຍອມຮັບຂອງພາກພື້ນ ແລະ ສາກົນ, ເປັນບ່ອນພັດທະນາຄວາມ ສາມາດ ແລະ ຝຶກອົບຮົມ ພະນັກງານ ແລະ ວິຊາການລາວຈາກການແລກປ່ຽນປະສົບປະການ ແລະ ບົດຮຽນຈາກວິຊາການ ແລະ ຊ່ຽວຊານຂອງ ສປ ຈີນ ໃນການຜະລິດ, ການວິໄຈຄຸນນະພາບ ແລະ ການກໍານົດມາດຕະຖານຢາງພາລາ ແລະ ພືດກະສິກໍາ. ເຊິ່ງໂຄງ ການດັ່ງກ່າວ ມີມູນຄ່າການກໍ່ສ້າງ 10 ລ້ານ ໂດລາສະຫະລັດ ເຊິ່ງເປັນເງິນປະກອບສ່ວນຂອງຝ່າຍຈີນ, ສ່ວນເນື້ອທີ່ກໍ່ສ້າງໂຄງການ 20.040 ຕາແມັດ ເປັນພື້ນທີ່ປະກອບສ່ວນຂອງກະຊວງ ກະສິກໍາ ແລະ ປ່າໄມ້ ກໍ່ຄືຝ່າຍລາວ.
ໂດຍຈະປຸກສ້າງ ອາຄານ 4 ຫຼັງປະກອບດ້ວຍອາຄານຫ້ອງການ ແລະ ຫ້ອງຝຶກອົບຮົມ 1 ຫຼັງ, ອາຄານຫ້ອງທົດລອງ 2 ຫຼັງ ແລະ ອາຄານຫໍພັກ 1 ຫຼັງ ເຊິ່ງມີໄລຍະການຈັດຕັ້ງປະຕິບັດແບ່ງອອກເປັນ 2 ໄລຍະຄື: ໄລຍະທີ 1 ແຕ່ປີ 2018-2020 ເປັນໄລຍະການກໍ່ສ້າງຕຶກອາຄານ ແລະ ກໍ່ສ້າງພະນັກງານວິຊາການລາວ, ສ່ວນໄລຍະທີ 2 ແຕ່ປີ 2021-2051 ເປັນໄລຍະການຮ່ວມມືດ້ານວິຊາການໂດຍທັງສອງຝ່າຍຈະຮ່ວມມືກັນຄົ້ນຄວ້າວິໄຈລົງເລິກດ້ານແນວພັນ, ດ້ານການ ປູກ, ການບົວລະບັດຮັກສາ, ການຂີດຢາງ, ການປຸງແຕ່ງ, ການຄົ້ນຄວ້າວິໄຈຄຸນນະພາບ ແລະ ການກໍານົດມາດ ຕະຖານຢາງພາລາລາວ ແລະ ພືດກະສິກໍາລາວ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງກວດກາປ່າໄມ້ແຂວງຊຽງຂວາງ ຍຶດໄມ້ ຢູ່ດ່ານສາກົນນໍ້າກັ່ນ
ເພື່ອຮັບປະກັນການຈັດຕັ້ງຜັນຂະຫຍາຍ ຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 13 ພຶດສະພາ 2016 ໃຫ້ປະກົດຜົນເປັນຈິງ ແລະເຮັດໃຫ້ການຈັດຕັ້ງປະຕິບັດວຽກງານຄຸ້ມຄອງປ່າໄມ້, ການຂຸດຄົົ້ນໄມ້, ທຸລະກິດໄມ້ ແລະການສົ່ງອອກໄມ້ ໃຫ້ມີຄວາມເຂັ້ມງວດຕາມລະບຽບກົດໝາຍ. ໃນວັນທີ 2 ມັງກອນ 2019 ຢູ່ທີ່ດ່ານສາກົນ ນໍ້າກັ່ນ ເຈົ້າໜ້າທີ່ກອງກວດກາປ່າໄມ້ແຂວງຊຽງຂວາງ ພ້ອມດ້ວຍເຈົ້າໜ້າທີ່ກ່ຽວຂ້ອງ ໄດ້ສົມທົບກັນກວດກາລົດ 6 ລໍ້ທີ່ຕ້ອງສົງໄສ ໝາຍເລກທະບຽນ 37c 29168 ຊື່ງຄົນຂັບຊື່ ທ. ເລວັນຢຸ່ງ ແລະ ທ. ຫງຽນດຶກຕ້ວນ (ເຈົ້າຂອງລົດ)ພາຍຫຼັງກວດກາໄດ້ພົບເຫັນໄມ້ (ຄ້າຍຄືໄມ້ຂະຍຸງ) ຊຸກເຊືອງຢູ່ໃນຖັງນໍ້່າ ແລະຖັງນໍ້າມັນ ທີ່ດັດແປງ ຈໍານວນ 62 ຕັບ/ທ່ອນ, ນໍ້າໜັກ 687 ກິໂລ ຕາມການໃຫ້ການໃນເບື້ອງຕົ້ນຂອງຄົນຂັບລົດ ໃຫ້ຮູ້ວ່າ: ໄມ້ຈໍານວນດັ່ງກ່າວແມ່ນໄດ້ເຄື່ອນຍ້າຍມາແຕ່ພາກໃຕ້ ຂອງປະເທດລາວ ໂດຍບໍ່ມີເອກະສານອະນຸຍາດຈາກພາກສ່ວນທີ່ກ່ຽວຂ້ອງ ຈຸດປະສົງແມ່ນຈະເອົາໄມ້ຈໍານວນດັ່ງກ່າວຂ້າມໄປ ສ.ສ ຫວຽດນາມ ພາຍຫຼັງຢຶດໄມ້ ແລະກັກໂຕຜູ້ຕ້ອງຫາແລ້ວ, ເຈົ້າໜ້າທີ່ຈາກກົມກວດກາປ່າໄມ້(ຈາກສູນກາງ) ຮ່ວມກັບພາກສ່ວນທີ່ກ່ຽວຂ້ອງຂອງແຂວງ ໄດ້ນໍາເອົາຜູ້ຖືກຫາທັງ2ຄົນ ມາສືບສວນ-ສອບສວນ ຊື່ງ ທ. ຫງຽນດຶກຕ້ວນ (ເຈົ້າຂອງລົດ) ໄດ້ຮັບສາລະພາບວ່າເປັນຄົນຊື້ໄມ້ຂະຍຸງດັ່ງກ່າວ ໂດຍໄດ້ຮັບຊື້ຕໍ່ຈາກ ພໍ່ຄ້າໄມ້ ຊາວຫວຽດນາມ ຢູ່ໃນເຂດເມືອງໜອງແຮດ, ແຂວງ ຊຽງຂວາງ ເພື່ອທີ່ຈະນໍາໄປຂາຍຕໍ່ຢູ່ ຫວຽດນາມ ແຕ່ໄດ້ຖືກເຈົ້າໜ້າທີ່ກອງກວດກາປ່າໄມ້ແຂວງ ທີ່ປະຈໍາຢູ່ດ່ານຍຶດໄດ້ກ່ອນ.
ກ່ຽວກັບຄະດີການລັກລອບ ຊື້-ຂາຍ ເຄື່ອນຍ້າຍໄມ້ຂະຍຸງ ຊື່ງເປັນໄມ້ປະເພດຫວງຫ້າມປະເພດ I ສາມາດຕີລາຄາໄດ້ດັ່ງນີ້: 1. ທ. ເລວັນຢຸ່ງ (ໂຊເຟີ)ແມ່ນໄດ້ມີສ່ວນຮ່ວມໃນການລັກລອບຊຸກເຊື່ອງ ແລະເຄື່ອນຍ້າຍໄມ້ ຊະນິດໄມ້ຫວງຫ້າມ ເຫັນວ່າຜິດຕໍ່ກົດໝາຍວ່າດ້ວຍປ່າໄມ້ຕາມມາດຕາ 101 ຂໍ້ 8 ເຄື່ອນຍ້າຍໄມ້ທີ່ບໍ່ຖືກຕ້ອງຕາມກົດໝາຍ. 2. ທ. ຫງຽນດຶກຕ້ວນ (ເຈົ້າຂອງລົດ) ແມ່ນໄດ້ທໍາການຊື້-ຂາຍ ເຄື່ອນຍ້າຍໄມ້ປະເພດຫວງຫ້າມ ຊະນິດໄມ້ຂະຍຸງ ທີ່ບໍ່ມີເອກະສານໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງ ຊື່ງຜິດຕໍ່ກົດໝາຍວ່າດ້ວຍປ່າໄມ້ຕາມມາດຕາ 101 ຂໍ້ຫ້າມສໍາລັບນັກທຸລະກິດຊື້-ຂາຍໄມ້ ທີ່ບໍ່ຖືກຕ້ອງຕາມກົດໝາຍ ສໍາລັບຜູ້ກະທໍາຜິດແມ່ນໄດ້ສືບຕໍ່ສືບສວນ-ສອບສວນ ດໍາເນີນຄະດີກ່ຽວກັບການກະທໍາຜິດຕາມກົດໝາຍ ແລະລະບຽບການຂອງ ສປປລາວ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ວາງສີລາລຶກໂຄງການຮ່ວມມືກ່ຽວກັບການຜະລິດພືດຜັກ ແລະ ໝາກໄມ້ສະອາດ
ເພື່ອຈັດຕັ້ງຜັນຂະຫຍາຍແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 8, ທິດທາງແຜນດໍາເນີນ ງານຂອງຂະແໜງການກະສິກໍາ ແລະ ປ່າໄມ້ 5 ປີ 2016-2020 ໃຫ້ໄດ້ຮັບຜົນສໍາເລັດຕາມຈຸດປະສົງ ແລະ ຄາດໝາຍ, ຜັນຂະຫຍາຍຍຸດທະສາດຂອງການປູກຝັງຮອດປີ 2025 ແລະ ວິໄສທັດຮອດປີ 2030 ລວມທັງ ແຜນດໍາເນີນງານຍຸດ ທະສາດດ້ານກະສິກໍາອິນຊີ ໃຫ້ປະກົດຜົນເປັນຈິງ, ໃນວັນທີ 11 ມັງກອນ 2019 ນີ້, ກົມ ປູກຝັງ, ກະຊວງກະສິກໍາ ແລະ ປ່າໄມ້ ຮ່ວມມືກັບບໍລິສັດ ໄໝສຽງພັດທະນາກະສິກໍາ ແຂວງ ໄຮ່ລົງຈ່ຽງ ຈໍາກັດ ໄດ້ຈັດພິທີວາງສີລາລຶກໂຄງການ ຮ່ວມມືຄົ້ນຄວ້າ ແລະ ຜະລິດດ້ານກະສິກໍາລາວ-ຈີນ ຂື້ນ ທີ່ສູນກະສິກໍາ ແລະ ປ່າໄມ້ ນະຄອນຫຼວງວຽງຈັນ ບ້ານ ຊຽງດາ, ເມືອງ ໄຊເສດຖາ,
ໃຫ້ກຽດເຂົ້າຮ່ວມໂດຍທ່ານ ປອ ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງ ກະສິກໍາ ແລະ ປ່າໄມ້, ອໍານາດການປົກຄອງນະຄອນຫຼວງວຽງຈັນ, ຮອງເຈົ້າເມືອງ 3 ເມືອງຄື: ຫາດຊາຍຟອງ, ໄຊທານີ ແລະ ໄຊເສດຖາ, ຫົວໜ້າ ພະແນກກະສິກໍາ ແລະ ປ່າໄມ້ນະຄອນຫຼວງ, ຫົວໜ້າກົມ-ຮອງຫົວໜ້າຫ້ອງການ, ກົມ, ປະທານບໍລິສັດພ້ອມດ້ວຍຜູ້ຕາງໜ້າ ສປ ຈີນ ແລະ ຝ່າຍລາວເຂົ້າຮ່ວມຢ່າງພ້ອມພຽງ.
ໂຄງການຮ່ວມມື ກ່ຽວກັບການຜະລິດພືດຜັກ ແລະ ໝາກໄມ້ສະອາດ ເປົ້າໝາຍຫຼັກ ແມ່ນເພື່ອຍົກລະດັບການຜະລິດກະສິກໍາສະອາດ ຈາກການຜະລິດເຮືອນຮົ່ມແບບທົ່ວໄປມາ ເປັນການຜະລິດເຮືອນຮົ່ມ ທີ່ສາມາດຄວບຄຸມດ້ວຍອຸນຫະພູມຕາມຄວາມຕ້ອງການຂອງແຕ່ລະພືດແຕ່ລະຊະນິດ, ເພື່ອການ ຜະລິດພືດຜັກ ແລະ ໝາກໄມ້ສະອາດທີ່ໄດ້ມາດຕະຖານສາກົນໃນເຮືອນຮົ່ມທີ່ທັນສະໄໝເປັນບ່ອນຖ່າຍ ທອດເຕັກນິກ ແລະ ຄວາມຮູ້ດ້ານເຕັກນິກການພືດຜັກໃນເຮືອນຮົ່ມທີ່ທັນສະໄໝ ເພື່ອໃຫ້ກາຍເປັນຕົວແບບໃນ ເຂດນະຄອນຫຼວງວຽງຈັນ,ເຊິ່ງໂຄງການດັ່ງກ່າວມີໄລຍະການຈັດຕັ້ງປະຕິບັດ 9 ປີ, ດ້ວຍເງິນລົງທຶນສະໜັບສະ ໜຸນຂອງຝ່າຍຈີນ 90 ລ້ານຢວນ, ໂດຍຈະສ້າງເຮືອນຮົ່ມ 5 ຫຼັງ ຂະໜາດ 50 x 60 ແມັດ ແລະ ຄາດວ່າຈະປູກພືດຜັກໃຫ້ໄດ້ 20-30 ຊະນິດ. ແລະ ໃນອານາຄົດຫາກໂຄງການໄດ້ຮັບຜົນສໍາເລັດດີ ທາງໂຄງການ ແມ່ນມີແຜນການຂະຫຍາຍໄປໃນຂອບເຂດທົ່ວປະເທດ ໂດຍສະເພາະບັນດາແຂວງຕາມແລວເສັ້ນທາງລົດໄຟລາວ-ຈີນ ເພື່ອຜະລິດສິນຄ້າໃຫ້ໄດ້ທັງປະລິມານ ແລະ ຄຸນນະພາບຈໍາໜ່າຍທັງພາຍໃນ ແລະ ສົ່ງອອກໄປຕ່າງປະເທດ ນໍາອີກ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສະໄໝສາມັນ ຄັ້ງທີ XVI ຂອງສະພາບໍລິຫານອົງການຄຸ້ມຄອງ ແລະ ປົກປັກຮັກສາເຂດແຫຼ່ງນໍ້າ ນ້ຳເທີນ 2
ໃນວັນທີ 7 ມັງກອນ 2019 ນີ້ ທີ່ຫ້ອງການປົກຄອງເມືອງຄຳເກີດ ແຂວງ ບໍລິຄຳໄຊ, ສະພາບໍລິຫານອົງການຄຸ້ມຄອງ ແລະ ປົກປັກຮັກສາເຂດແຫຼ່ງນໍ້າ ນ້ຳເທີນ 2 (ອຄປ.ທ2) ໄດ້ຈັດກອງປະຊຸມສະໄໝສາມັນ ຄັ້ງທີ XVI ຂຶ້ນ. ໂດຍການເປັນປະທານຂອງທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ທັງເປັນປະທານສະ ພາບໍລິຫານ ອຄປ.ທ2, ເຊິ່ງມີທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ຮອງປະ ທານສະພາບໍລິຫານ ອຄປ.ທ2; ທ່ານ ບຸນເສັງ ປະທຳມະວົງ ຮອງເຈົ້າແຂວງໆບໍລິຄຳໄຊ, ຮອງປະທານສະພາບໍລິຫານ ອ ຄປ.ທ2, ທ່ານເຈົ້າເມືອງໆຄຳເກີດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ 29 ທ່ານ.
ໃນທີ່ປະຊຸມໄດ້ຮັບຟັງ, ພິຈາລະນາ ແລະ ຮັບຮອງເອົາຮ່າງບົດສະຫຼຸບລາຍງານ ຜົນການຈັດ ຕັ້ງປະຕິບັດແຜນການ-ງົບປະມານ ປະຈຳປີ 2018; ຮ່າງແຜນການ ປະຈຳປີ 2019-2020; ບົດລາຍງານຂອງຄະນະກວດກາເອກະລາດຄື: ຄະນະຊ່ຽວຊານທີ່ປຶກສາ (POE), ຄະນະກວດກາເອກະ ລາດຂອງອົງການ IMA, ການກວດສອບບັນຊີປະຈຳປີ 2016 ແລະ 2017, ການຄັດເລືອກພະນັກງານ, ສະເໜີຜົນງານຂອງກຸ່ມຊ່ຽວຊານ. ຫຼງຈາກນັ້ນ, ກໍ່ໄດ້ປຶກສາຫາລື ແລະ ປະກອບຄຳຄິດຄຳເຫັນຢ່າງກົງໄປກົງມາ.
ໃນຕອນທ້າຍຂອງກອງປະຊຸມ ທ່ານປະທານໄດ້ເນັ້ນໜັກບາງບັນຫາເຊັ່ນ: ໃນປີ 2019-2020 ນີ້ຕາມແຜນຈະຕ້ອງໄດ້ແກ້ໄຂຊີວິດການເປັນຢູ່ຂອງປະຊາຊົນໃນ 50 ບ້ານ ໂດຍໃຫ້ທ້ອງຖິ່ນ ແລະ ປະຊາຊົນເປັນເຈົ້າ ສິ່ງສຳຄັນຈັດຕັ້ງປະຕິບັດແຜນການໃຫ້ສຳເລັດ ຕ້ອງກຳນົດມາດຕະການໃຫ້ລະອຽດ ໂດຍສະເພາະແມ່ນການປັບປຸງຊີວິດການເປັນຢູ່ ແລະ ການປູກຈິດສຳນຶກໃຫ້ອະນຸຊົນລຸ້ນຫຼັງຮູ້ຈັກປົກປັກຮັກສາຊັບພະຍາກອນທຳມະຊາດ, ຖອດຖອນບົດຮຽນນຳພາກສ່ວນອື່ນ, ສົ່ງທີມງານລົງສົມທົບກັບເມືອງ, ເລັ່ງສ້າງປ່າສະຫງວນແຫ່ງຊາດນາກາຍ-ນໍ້າເທີນ ເປັນອຸທິຍານ ແຫ່ງຊາດ ໂດຍມອບໃຫ້ກົມປ່າໄມ້ຄົ້ນຄ້ວາ ແລະ ສ້າງດຳລັດ ໃນການຄຸ້ມຄອງບໍລິຫານຢ່າງເປັນລະບົບ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ຂະບວນການແຂ່ງຂັນກິລາຊິງຂັນປະທານສູນກາງແນວລາວສ້າງຊາດ
ເພື່ອເປັນການສະເຫຼີມສະຫຼອງ ແລະ ຂໍ່ານັບຮັບຕ້ອນວັນສ້າງຕັ້ງກອງທັບຄົບຮອບ 70 ປີ (20 ມັງກອນ 1949 ຫາ 20 ມັງກອນ 2019) ໃຫ້ເປັນຂະບວນຟົດຟື້ນ, ໃນວັນທີ 4 ມັງກອນ 2019 ນີ້, ສູນກາງຊາວ ໜຸ່ມປະຊາຊົນປະຕິວັດໄດ້ຮ່ວມກັບບໍລິສັດດວງພະສຸກກໍ່ສ້າງ ຈັດຂະບວນການແຂ່ງຂັນກິລາຂື້ນຢູ່ທີສູນກາງຊາວໜຸ່ມ ປະຊາຊົນປະຕິວັດລາວເພື່ອຊິງຂັນປະທານສູນກາງແນວລາວສ້າງຊາດ, ເຊິ່ງການແຂ່ງຂັນດັ່ງກ່າວປະກອບມີ 4 ປະເພດ ກິລາໄດ້ແກ່: ກິລາເປ່ຕັງ, ກິລາດອກປີກໄກ່, ກິລາແລ່ນໄຖ່ ແລະ ກິລາດຶງເຊືອກ, ໂດຍມີນັກກິລາ 200 ກວ່າຄົນເຂົ້າຮ່ວມໂດຍມາຈາກ 8 ພາກສ່ວນຄື: ສູນກາງແນວລາວສ້າງຊາດ, ສູນກາງສະຫະພັນນັກຮົບເກົ່າແຫ່ງຊາດ, ສູນກາງສະຫະພັນແມ່ຍິງລາວ, ສູນກາງສະຫະພັນກໍາມະບານລາວ, ສູນກາງຊາວໜຸ່ມປະຊາຊົນປະຕິວັດລາວ, ກໍາມະ ບານປ້ອງກັນປະເທດ, ກໍາມະບານກະຊວງກະສິກໍາ ແລະ ປ່າໄມ້ ແລະ ບໍລິສັດດວງພະສຸກກໍ່ສ້າງ.
ຜ່ານການ ແຂ່ງຂັນປາກົດວ່າປະເພດກິລາເປ່ຕັງລາງວັນຊະນະເລີດປະເພດທີມຊາຍແມ່ນສະຫະພັນນັກຮົບເກົ່າແຫ່ງຊາດ ແລະ ປະ ເພດທີມຍິງແມ່ນສູນກາງສະຫະພັນແມ່ຍິງລາວ, ກິລາຕີດອກປີກໄກ່ປະເພດທີມຊາຍລາງວັນຊະນະເລີດແມ່ນກະຊວງ ກະສິກໍາ ແລະ ປ່າໄມ້ ແລະ ປະເພດທີມຍິງແມ່ນສູນກາງ ສະຫະພັນນັກຮົບເກົ່າ, ກິລາແລ່ນໄຖປະເພດຊາຍ ລາງວັນ ຊະນະເລີດແມ່ນກໍາ ມະບານກະຊວງປ້ອງກັນປະເທດປະເພດຍິງແມ່ນສູນກາງສະຫະພັນນັກຮົບເກົ່າແຫ່ງຊາດ ແລະ ກິລາດຶງເຊືອກປະສົມຍິງ-ຊາຍ ລາງວັນຊະນະເລີດແມ່ນສູນກາງຊາວໜຸ່ມປະຊາຊົນປະຕິວັດລາວເຊິ່ງ
ໃຫ້ກຽດ ມອບຮັບ ລາງວັນ ຊະນະເລີດຄັ້ງນີ້ໂດຍ ທ່ານ ໄຊສົມພອນ ພົມວິຫານ ກົມການເມືອງສູນກາງພັກປະທານສູນກາງແນວ ລາວສ້າງຊາດ, ລາງວັນຮອງຊະນະເລີດອັນດັບ 2 ມອບໂດຍທ່ານ ຄໍາຫຼ້າ ດວງຜາສຸກ ປະທານບໍລິສັດດວງພະສຸກ ກໍ່ສ້າງຈໍາກັດ ແລະ ລາງວັນຮອງຊະນະເລີດອັນດັບ 3 ມອບໂດຍ ທ່ານ ພົນຈັດຕະວາ ຄໍາຫອມ ແສງບົວລົມ ຮອງປະທານສະຫະ ພັນນັກຮົບເກົ່າແຫ່ງຊາດລາວ, ການແຂ່ງຂັນຄັ້ງນີ້ກໍາມະບານ ກະຊວງກະສິກໍາ ແລະ ປ່າໄມ້ ນອກຈາກຍາດມາໄດ້ລາງວັນຊະນະເລີດດອກປີກໄກ່ປະເພດ ທີມຊາຍແລ້ວຍັງສາມາດຍາດໄດ້ຮອງຊະນະເລີດອັນດັບ 2 ກິລາເປ່ຕັງປະເພດທີມຊາຍ ແລະ ຮອງຊະນະເລີດອັນດັບ 3 ກິລາແລ່ນ ໄຖ່ປະເພດຍິງນໍາອີກ.
ພາບ ແລະ ຂ່າວໂດຍ: ພະແນກ ໂຄສະນາ ແລະ ຂ່າວສານ
ລັດຖະມົນຕີກະຊວງ ກປ ລົງຕິດຕາມຊຸກຍູ້ວຽກງານ ແລະ ມອບເຄື່ຶອງຊ່ວຍເຫຼຶອ ທີ່ບ້ານ ຈຸດສຸມ ເມືອງ ບໍ່ແຕນ ແຂວງ ໄຊຍະບູລີ.
ໃນວັນທີ 26 ທັນວາ 2018 ຜ່ານມານີ້, ທ່ານປອລຽນທີແກ້ວລັດຖະມົນຕີກະຊວງກະສິກໍາແລະປ່າໄມ້ພ້ອມດ້ວຍການນໍາກະຊວງ, ຫົວໜ້າກົມແລະຮອງກົມ, ຮອງຫົວໜ້າຫ້ອງການ, ສະຖາບັນ, ຫົວໜ້າພະແນກກປແຂວງໄຊຍະບູລີ, ຫ້ອງການກະສິກໍາແລະປ່າໄມ້ເມືອງບໍ່ແຕນແລະພະນັກງານວິຊາການໄດ້ເດີນທາງໄປຢ້ຽມຢາມ ແລະ ຕິດຕາມວຽກງານກະສິກໍາ, ປ່າໄມ້ ແລະ ພັດທະນາຊົນນະບົດ ແລະ ລືບລ້າງຄວາມທຸກຍາກຢູ່ທີ່ບ້ານນໍ້າພຽງເມືອງບໍ່ແຕນ ແຂວງໄຊຍະບູລີ, ເຊິ່ງເປັນບ້ານໜຶ່ງທີ່ນອນໃນ 4 ບ້ານຈຸດສຸມຈັດສັນພູມລໍາເນົາແລະອາຊີບໝັ້ນຄົງຂອງລັດຖະບານທີ່ຈະຕ້ອງເຮັດໃຫ້ສໍາເລັດໃນປີ 2020, ບ້ານນໍ້າພຽງເປັນບ້ານທີ່ຂື້ນກັບກຸ່ມບ້ານພັດທະ ນານາບໍ່ນ້ອຍແລະເປັນບ້ານຕິດກັບເຂດຊາຍແດນລາວ-ໄທ ແລະ ຕິດກັບເຂດປ່າປ້ອງກັນແຫ່ງຊາດ, ໂດຍບ້ານດັ່ງ ກ່າວໄດ້ປະກາດແຕ່ງຕັ້ງເປັນຢ່າງທາງການໃນວັນທີ 1 ກຸມພາ 2017 ເພື່ອຊ່ວຍປົກປັກຮັກສາຊາຍແດນໃຫ້ກໍາລັງ ປ້ອງກັນຊາດປ້ອງກັນຄວາມສະຫງົບໂດຍສະເພາະແມ່ນກອງພັນ 413 ກອງຮ້ອຍຊາຍແດນ.
ໃນໂອກາດ ການໄປຢ້ຽມ ຢາມ ແລະ ຕິດຕາມຄວາມຄືບໜ້າຄັ້ງນີ້ ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຮັບຟັງການລາຍງານສະພາບຄວາມຄຶບໜ້າ ຂອງການຈັດຕັ້ງປະຕິບັດວຽກງານຮອບດ້ານຂອງບ້ານດັ່ງກ່າວໂດຍການ ລາຍງານຂອງ ທ່ານ ສົມພົງ ສີສຸວົງ ເລຂາພັກບ້ານ ນາຍບ້ານບ້ານນໍ້າພຽງ. ຈາກນັ້ນໃນນາມຕາງໜ້າຄະນະພັກ, ຄະນະ ນໍາກະຊວງກະສິກໍາ ແລະ ປ່າໄມ້ແລະພະນັກງານທຸກຄົນ ທ່ານລັດຖະມົນຕີກະຊວງ ກະສິກໍາ ແລະ ປ່າໄມ້ໄດ້ມອບເຄື່ອງຊ່ວຍເຫຼືອເຊິ່ງປະກອບດ້ວຍ ເຄື່ອງສຽງ, ເຄື່ອງນຸ່ງກັນໜາວເດັກນ້ອຍ, ເຄື່ອງກິລາ, ອຸປະກອນການຮຽນ ແລະ ເຄື່ອງບໍລິໂພກ ໃຫ້ກັບບ້ານນໍ້າພຽງລວມມູນຄ່າ 11.835.000 ກີບແລະເງິນເພື່ອສ້າງກອງທຶນອີກຈໍານວນ 58.500.000 ກີບ ຕາງໜ້າຮັບ ໂດຍຄະນະບ້ານ ບ້ານ ນໍ້າພຽງ, ຈາກນັ້ນກໍ່ໄດ້ສືບຕໍ່ມອບເຄື່ອງຊ່ວຍເຫຼືອເພື່ອເປັນ ຂັວນກໍາລັງໃຈໃຫ້ອ້າຍນ້ອງທະຫານກອງພັນ 413, ທະຫານຊາຍແດນ 519, ແລະກອງບັນຊາການທະຫານເມືອງບໍ່ແຕນ ເພື່ອເປັນການສ້າງຂະບວນການຂໍ່ານັບຮັບຕ້ອນແລະສະເຫຼີມສະຫຼອງ ວັນສ້າງຕັ້ງ ກອງທັບຄົບຮອບ 70 ປີ 20 ມັງກອນ1949 ຫາ 20 ມັງກອນ 2019 ໃຫ້ເປັນບວນຟົດຟື້ນ.ໂດຍໄດ້ມອບເຄື່ອງອຸປະໂພກ ແລະ ບໍລິໂພກ ຈໍານວນໜຶ່ງລວມມູນຄ່າ 12.050.000 ກີບ ຕາງໜ້າຮັບໂດຍທ່ານພັນໂທພູເງິນຈັນທະຄູນຫົວໜ້າກອງບັນຊາການ ທະຫານເມືອງບໍ່ແຕນ ໂດຍມີອໍານາດປົກຄອງແຂວງ, ເມືອງພ້ອມດ້ວຍພໍ່ແມ່ປະຊາຊົນບ້ານດັ່ງກ່າວເຂົ້າຮ່ວມ. ໂອກາດດຽວກັນນີ້ທ່ານ ລັດຖະມົນຕີກະຊວງ ກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະໄດ້ລົງພົບປະກັບປະຊາຊົນພາຍໃນບ້ານດັ່ງກ່າວພ້ອມທັງລົງສໍາຫຼວດເບິ່ງແບບແຜນການດໍາລົງຊີວິດຂອງປະຊາຊົນນໍາອີກ.
ພາບ ແລະ ຂ່າວໂດຍ: ພະແນກ ໂຄສະນາ ແລະ ຂ່າວສານ
ທ່ານລັດຖະມົນຕີກະຊວງກະສິກໍາ ແລະ ປ່າໄມ້ຕ້ອນຮັບບໍລິສັດກິໂລສະກາປະເທດອິນເດຍ
ໃນວັນທີ 16 ພະຈິກ 2018 ນີ້, ກະຊວງກະສິກໍາແລະປ່າໄມ້, ທ່ານປອລຽນທີແກ້ວລັດຖະມົນຕີກະຊວງກະສິກໍາແລະປ່າໄມ້ພ້ອມດ້ວຍຮອງຫົວໜ້າຫ້ອງການ, ຮອງກົມແລະພະແນກການທີ່ກ່ຽວຂ້ອງໄດ້ຕ້ອນຮັບການເຂົ້າຢ້ຽມຂໍ່ານັບ ແລະພົບປະຂອງທ່ານຜູ້ອຳນວຍການບໍລິສັດກິໂລສະກາປະເທດອິນເດຍພ້ອມດ້ວຍຄະນະ, Continue reading
ປິດຝຶກອົບຮົມດ້ານເຕັກນິກວິຊາການກະສິກໍາ ແລະ ປ່າໄມ້ຂັ້ນບ້ານ ແລະ ຊາວສິກອນ
ໃນວັນທີ 15 ພະຈິກ 2018 ນີ້,ທີ່ສູນພັດທະນາແລະບໍລິການດ້ານການກະເສດຫ້ວຍຊອນ- ຫ້ວຍຊົ້ວບ້ານນາຍາງ, ເມືອງນາຊາຍທອງນະຄອນຫຼວງວຽງຈັນ, ກະຊວງກະສິກໍາແລະປ່າໄມ້ໄດ້ຈັດພິທີປິດຝຶກອົບຮົບການສ້າງຄູຝຶກເພື່ອກະກຽມສ້າງຄວາມເຂັ້ມແຂງດ້ານເຕັກນິກວິຊາການກະສິກໍາແລະປ່າໄມ້ Continue reading
ແຂວງວຽງຈັນເປີດຂະບວນການຜະລິດລະດູແລ້ງປີ 2018-2019
ແຂວງວຽງຈັນເປັນແຂວງໜື່ງທີ່ໄດ້ຮັບຜົນກະທົບຈາກໄພພິບັດທາງທໍາມະຊາດຢ່າງຮ້າຍແຮງເປັນຕົ້ນຜົນກະທົບຈາກອິດທິພົນຂອງພາຍຸເຊິນຕິນ, ພາຍຸບິນກາ ແລະ ການປ່ອຍເຂື່ອນນໍ້າງື່ມ 1, ເຂື່ອນນໍ້າລີກເຮັດໃຫ້ພາຍໃນແຂວງ ໄດ້ຮັບຜົນກະທົບກວມເອົາ 7 ເມືອງ 43 ບ້ານ, 3.008 ຄອບຄົວມີເນື້ອທີ່ຖືກຜົນກະທົບ ແລະ ເສຍຫາຍຄື: ດ້ານຊົນລະປະທານເປ່ເພ່ 27 ໂຄງການມູນຄ່າເສຍຫາຍ 12,6 ຕື້ກີບ, ເນື້ອທີ່ເຂົ້ານາປີ ຖືກກະທົບ 3.896 ເຮັກຕາ ເສຍຫາຍ 3.882 ເຮັກຕາ, ເນື້ອທີ່ປູກພືດຕ່າງໆທັງໝົດ 1.493,64 ເຮັກຕາ ເສຍຫາຍ 1.493,64 ເຮັກຕາ, ສັດໄດ້ຮັບຜົນກະທົບດ້ານສຸຂະພາບ ແລະ ຂາດອາຫານມີຄວາຍ 10.601 ໂຕ, ງົວ 37.989 ໂຕ, ໝູ 19.057 ໂຕ, ແບ້ 6.008 ໂຕ, ສັດປີກ 567.121 ໂຕ, ໜອງປາ 150 ໜອງ, ຄັງລ້ຽງສັດ 1.300 ເຮັກຕາ, ທົ່ງຫຍ້າປູກ 464 ເຮັກຕາ ແລະ ຟາມໝູຈໍານວນໜຶ່ງ. Continue reading
ກອງປະຊຸມປຶກສາຫາລືການຈັດຕັ້ງປະຕິບັດກິດຈະກໍາຂອງໂຄງການຢູ່ ສປປ ລາວ ພາຍໃຕ້ໂຄງການພັດທະນາກະສິກໍາ ແລະ ການເຊື່ອມໂຍງດ້ານການຕະຫຼາດຢູ່ອາຊຽນ
ໃນວັນທີ 12 ພະຈິກ 2018 ທີ່ໂຮງແຮມວຽງຈັນພລາຊາ, ນະຄອນຫຼວງວຽງຈັນ, ກົມປູກຝັງ, ກະຊວງກະສິກໍາ ແລະ ປ່າໄມ້ ຮ່ວມກັບສູນຄົ້ນຄວ້າກະສິກໍາພາກພື້ນອາຊີຕາເວັນອອກສ່ຽງໃຕ້ໄດ້ ຈັດກອງປະຊຸມປຶກສາຫາລື ກ່ຽວກັບການຈັດຕັ້ງປະຕິບັດກິດຈະກໍາຂອງໂຄງການພາຍໃຕ້ການພັດທະ ນາກະສີກໍາ ແລະ ເຊື່ອມໂຍງດ້ານການ ຕະຫຼາດຢູ່ອາຊຽນຂື້ນ, ໂດຍການເປັນປະທານຮ່ວມຂອງທ່ານ ບຸນຈັນ ກົມບຸນຍະສິດ ຮອງຫົວໜ້າກົມ ປູກຝັງ ກະຊວງ ກະສິກໍາ ແລະ ປ່າໄມ້, ພ້ອມດ້ວຍຜູ້ຕາງໜ້າ ຈາກກອງທຶນພັດທະນາກະສິກໍາ, ສະຖາບັນຄົ້ນຄວ້ານະໂຍບາຍອາຫານສາກົນ ແລະ ຈາກສູນຄົ້ນຄວ້າ ກະສິກໍາພາກພື້ນອາຊີຕາເວັນອອກສ່ຽງໃຕ້, ເຊິ່ງໃນກອງປະຊຸມດັ່ງກ່າວນີ້ມີຜູ້ເຂົ້າຮ່ວມ ຈາກພາກສ່ວນ ທີ່ກ່ຽວຂ້ອງອ້ອມຂ້າງກະຊວງກະສິກໍາ ແລະ ປ່າໄມ້, ຂະແໜງການທີ່ກ່ຽວຂ້ອງເປັນຕົ້ນ ມະຫາວິທະ ຍາໄລແຫ່ງຊາດທັງໝົດ 20 ທ່ານ. Continue reading
