Siammone Xayalath
ປະຫວັດຄວາມເປັນມາຂອງຖໍ້າກະສິກໍາ ແລະ ຜົນງານກະຊວງກະສິກໍາ ແລະ ປ່າໄມ້ ປີ ຄ.ສ 1965- ປີ ຄ.ສ2024
ປື້ມປະຫວັດຄວາມເປັນມາຂອງຖໍ້າກະສິກໍາ ແລະ ຜົນງານກະຊວງກະສິກໍາ ແລະ ປ່າໄມ້ ປີ ຄ.ສ 1965 – ປີ ຄ.ສ 2024
ດາວໂຫລດຟາຍ:ປະຫວັດຄວາມເປັນມາຂອງຖໍ້າກະສິກໍາ ແລະ ຜົນງານກະຊວງກະສິກໍາ ແລະ ປ່າໄມ້ ປີ ຄ.ສ 1965- ປີ ຄ.ສ 2024
ສາມາດເຂົ້າອ່ານປື້ມສະບັບເຕັມໄດ້ທີ່ລິ້ງດ້ານລຸ່ມນີ້https://www.maf.gov.la/%e0%ba%a7%e0%ba%b2%e0%ba%a5%e0%ba%b0%e0%ba%aa%e0%ba%b2%e0%ba%99/
ເມື່ອຫວນຄືນເຖິງຂະບວນວິວັດແຫ່ງການຂະຫຍາຍຕົວຂອງຂະແໜງການກະສິກຳ ແລະ ປ່າໄມ້ ໄລຍະ 59 ປີຜ່ານມາ ເຫັນວ່າ ໄດ້ມີການເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ ເຊິ່ງໄດ້ຕິດພັນກັບການດໍາລົງຊີວິດຂອງປະຊາຊົນລາວ, ຕິດພັນຢ່າງແໜ້ນແຟ້ນກັບຂະບວນ ການຕໍ່ສູ້ກູ້ຊາດໃນທຸກຍຸກທຸກສະໄໝ ໄດ້ປະກອບສ່ວນສໍາຄັນຕໍ່ຜົນ ສຳເລັດຂອງການປະຕິວັດໃນແຕ່ລະໄລຍະຕະຫຼອດມາ. ພາຍຫຼັງປະ ເທດຊາດໄດ້ຮັບການສະຖາປະນາເປັນ ສາທາລະນະລັດ ປະຊາທິ ປະໄຕ ປະຊາຊົນລາວ ໃນວັນທີ 02 ທັນວາ 1975, ເປັນໄລຍະແຫ່ງ
ການປົກປັກຮັກສາ ແລະ ສ້າງສາພັດທະນາປະເທດຊາດ ຂະແໜງການກະສິກຳ ແລະ ປ່າໄມ້ ໄດ້ຕອບສະໜອງຄວາມຮຽກຮ້ອງຕ້ອງການອັນຮີບດ່ວນ ແນໃສ່ຮັບໃຊ້ແນວທາງນະໂຍບາຍຂອງພັກ ແລະ ລັດ, ຮັບໃຊ້ການສ້າງຕັ້ງອໍານາດການປົກຄອງໃໝ່, ຟື້ນຟູເສດຖະກິດ, ຮຳບາດແຜສົງຄາມ, ຂະແໜງຜະລິດກະສິກຳ, ປ່າໄມ້ ແລະ ຊົນລະປະທານ ໃນເວລານັ້ນໄດ້ກຳນົດໜ້າທີ່ການເມືອງ ແລະ ຈັດຕັ້ງປະຕິບັດການປະຕິວັດທັງ 3 ປະການໄປພ້ອມໆກັນຄື: 1) ການປະຕິວັດແຫ່ງການຜະລິດ, 2) ການປະຕິວັດທາງດ້ານວິທະຍາສາດ-ເຕັກນິກ, 3) ການປະຕິວັດທາງດ້ານແນວຄິດ-ວັດທະນະທໍາ, ອອກແຮງຟື້ນຟູ ແລະ ຂະຫຍາຍເສດຖະກິດ, ຈັດຕັ້ງການຜະລິດຄືນໃໝ່ໂດຍຖືເອົາກະສິກໍາ-ປ່າໄມ້ ເປັນພື້ນຖານເພື່ອຂະຫຍາຍອຸດສາຫະກໍາ, ເຊິ່ງໄດ້ຫັນເອົາການຜະລິດແບບທໍາມະຊາດກະແຈກກະຈາຍຫັນມາເປັນການຜະລິດຂະໜາດໃຫຍ່ ນໍາໃຊ້ເຕັກນິກວິຊາການທາງດ້ານກະເສດສຸມເທື່ອລະກ້າວ, ໂດຍຖືເອົາການຫັນເປັນອຸດສາຫະກໍາເປັນໜ້າທີ່ໃຈກາງຕະຫຼອດໄລຍະຂ້າມຜ່ານຂຶ້ນສູ່ສັງຄົມນິຍົມ, ກໍ່ສ້າງລະບອບເປັນເຈົ້າລວມໝູ່ສູ່ສັງຄົມນິຍົມ, ໄດ້ເອົາໃຈໃສ່ຜັນຂະຫຍາຍແນວທາງນະໂຍບາຍ, ມະຕິຄໍາສັ່ງຂອງພັກ ເຂົ້າສູ່ການເຄື່ອນໄຫວວຽກງານຕົວຈິງຂອງຂະແໜງການກະສິກຳ ແລະ ປ່າໄມ້, ສາມາດປະຕິບັດໜ້າທີ່ການເປັນເສນາທິການດ້ານການຜະລິດກະສິກຳ ພ້ອມທັງປະກອບສ່ວນໃນການຜະລິດສະບຽງອາຫານ, ວຽກງານຫຼຸດຜ່ອນຄວາມທຸກຍາກ, ວຽກງານຄຸ້ມຄອງປ່າໄມ້. ຕະຫຼອດໄລຍະຜ່ານມາ ສາມາດເວົ້າໄດ້ວ່າ ພວກເຮົາມີຄວາມເອກອ້າງຕໍ່ບັນດາຜົນສໍາເລັດແຫ່ງການເຄື່ອນໄຫວວຽກງານຂອງຂະແໜງການກະສິກຳ ແລະ ປ່າໄມ້ ທີ່ໄດ້ຮັບການພັດທະນາ ແລະ ມີບາດກ້າວຂະຫຍາຍຕົວຢ່າງຕໍ່ເນື່ອງ.
ດັ່ງນັ້ນ, ໃນໂອກາດ ຮຽບຮຽງປະຫວັດຄວາມເປັນມາຂອງ ຖໍ້າກະສິກໍາ ແລະ ຜົນງານກະຊວງກະສິກຳ ແລະ ປ່າໄມ້, ພວກເຮົາຈຶ່ງໄດ້ຮຽບຮຽງຈັດພິມເຜີຍແຜ່ປື້ມຫົວນີ້ອອກມາເປັນຄັ້ງທໍາອິດເພື່ອເປັນການຫວນຄືນປະຫວັດສາດແຫ່ງການກຳເນີດ ແລະ ຂະຫຍາຍຕົວຂອງຂະແໜງການກະສິກຳ ແລະ ປ່າໄມ້ ເຊິ່ງແມ່ນຜົນງານການປະກອບສ່ວນຢ່າງໃຫຍ່ຫຼວງ ຂອງພະນັກງານການນໍາທຸກຂັ້ນ, ພະນັກງານລັດຖະກອນທັງໝົດໃນຂະແໜງການກະສິກຳ ແລະ ປ່າໄມ້ ແຕ່ອາດີດມາເຖິງປັດຈຸບັນ ແລະ ເພື່ອເປັນການສະແດງຄວາມຮູ້ບຸນຄຸນ ມາຍັງການນໍາຂັ້ນສູງຂອງພັກ-ລັດ ທີ່ຍາມໃດກໍໍ່ໄດ້ໃຫ້ ການຊີ້ນໍາຢ່າງໃກ້ຊິດແກ່ຂະແໜງການກະສິກຳ ແລະ ປ່າໄມ້ ຂອງພວກເຮົາຕະຫຼອດມາ, ເຮັດໃຫ້ພວກເຮົາສາມາດປະຕິບັດໜ້າທີ່ການເມືອງຂອງຕົນໄດ້ຢ່າງມີຜົນສໍາເລັດອັນຈົບງາມ, ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງນະໂຍບາຍຂອງພັກ-ລັດ ທີ່ກຳນົດໄວ້. ພວກເຮົາຂໍຢືນຢັນວ່າພາຍໃຕ້ການຊີ້ນໍາຂອງຄະນະພັກ-ຄະນະນໍາທຸກຂັ້ນ ແລະ ຄວາມບຸກບືນຫ້າວຫັນຂອງພະນັກງານຂະແໜງການກະສິກຳ ແລະ ປ່າໄມ້, ພວກເຮົາຈະສືບຕໍ່ເສີມຂະຫຍາຍບົດຮຽນ ແລະ ແບບຢ່າງອັນດີງາມ ຂອງບັນດາພະນັກງານການນໍາຫຼັກແຫຼ່ງຮຸ່ນກ່ອນທີ່ໄດ້ສ້າງໄວ້ໃຫ້ກາຍເປັນມູນເຊື້ອອັນດີງາມ ແລະ ກາຍເປັນມູນມໍລະດົກຕົກທອດແກ່ພະ ນັກງານຂອງຂະແໜງການກະສິກຳ ແລະ ປ່າໄມ້ ໃນຮຸ່ນຕໍ່ໄປ.
ພວກເຮົາເຊື່ອໝັ້ນວ່າ ປື້ມຫົວນີ້ຈະເປັນແຫຼ່ງຂໍ້ມູນທີ່ສໍາຄັນ ແລະ ເປັນຊັບສົມບັດທີ່ມີຄ່າ ໃຫ້ແກ່ການຮຽນຮູ້ ແລະ ສ້າງຄວາມເຂົ້າໃຈຢ່າງເລິກເຊິ່ງ ກ່ຽວກັບຂະບວນວິວັດແຫ່ງການກຳເນີດ ແລະ ການຂະຫຍາຍຕົວຂອງຂະແໜງການກະສິກຳ ແລະ ປ່າໄມ້ ໂດຍສະເພາະພະນັກງານ ໃນຂົງເຂດກະສິກຳ ແລະ ປ່າໄມ້ ກໍ່ຄືປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ເພື່ອເປັນບົດຮຽນໝູນໃຊ້ເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ. ພ້ອມນີ້, ກ່ໍຫວັງວ່າປື້ມຫົວນີ້ຈະເປັນແຮງກະຕຸກຊຸກຍູ້ໜຶ່ງເຮັດໃຫ້ພະນັກງານຮຸ່ນປັດຈຸບັນ ແລະ ຮຸ່ນສືບທອດສືບຕໍ່ພາລະກິດໃນການພັດທະນາຂະແໜງການກະສິກຳ ແລະ ປ່າໄມ້ ເພື່ອປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມ ໃຫ້ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະ ສາມາດເຊື່ອມໂຍງກັບພາກພື້ນ ແລະ ສາກົນໄດ້ດີຍິ່ງຂຶ້ນໄປໃນອະນາຄົດ.
ປື້ມເຫຼັ້ມນີ້ ແມ່ນໝາກຜົນຂອງການລວມຍອດຂອງການຂຸດຄົ້ນ, ເກັບກໍາ, ຄົ້ນຄວ້າວິໄຈ ເລືອກເຟັ້ນ ແລະ ສັງລວມບັນດາຂໍ້ມູນຈາກຫຼາຍພາກສ່ວນ, ການຈັດຕັ້ງ ແລະ ລວມທັງຈາກບຸກ ຄົນທີ່ໄດ້ເຄື່ອນໄຫວວຽກງານດັ່ງກ່າວໃນເວລານັ້ນ ລວມທັງຄໍາເຫັນສໍາພາດຕ່າງໆ ແຕ່ກໍ່ຄົງປາສະ ຈາກບໍ່ໄດ້ຂໍ້ຜິດພາດຂາດຕົກບົກຜ່ອງ.
ດັ່ງນັ້ນ, ຄະນະຮຽບຮຽງ ແລະ ຈັດພິມປື້ມເຫຼັ້ມນີ້ຫວັງຢ່າງຍິ່ງວ່າ ຈະໄດ້ຮັບຄໍາຕໍານິຕິຊົມຈາກຜູ້ອ່ານເພື່ອຊ່ວຍປັບປຸງໃຫ້ມີຄວາມສົມບູນກວ່າເກົ່າ.
ພິທີເຊັນສັນຍາ MOA ຮ່ວມມືລາວ-ຈີນ ດ້ານການກວດກາ ແລະຢັ້ງຢືນຜະລິດຕະພັນກະສິກໍາ,ປ່າໄມ້ ແລະ ສະບຽງອາຫານ
ໃນວັນທີ 8 ຕຸລາ 2024 ນີ້, ກົມແຜນການ ແລະ ການຮ່ວມມື ກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ແລະ ກຸ່ມບໍລິສັດ ກວດກາ ແລະ ຢັ້ງຢືນ ຈີນ ແຂວງກວາງຊີ ຈໍາກັດ (ສໍານັກງານໃຫຍ່ພາກຕາເວັນຕົກສຽງໃຕ້ ສປ ຈີນ) ໄດ້ຈັດພິທີລົງນາມໃນສັນຍາຮ່ວມມືຍຸດທະສາດ ດ້ານການກວດກາ ແລະ ຢັ້ງຢືນ ຜະລິດຕະພັນກະສິກຳ, ປ່າໄມ້ ແລະ ສະບຽງອາຫານ ທີ່ນະຄອນຫຼວງວຽງຈັນ. ໂດຍການເຂົ້າຮ່ວມເປັນສັກຂີພິຍານ ຂອງ ທ່ານ ຮສ. ປອ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້ ແລະ ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້. ນອກນີ້, ຍັງມີບັນດາທ່ານຫົວໜ້າ ຫ້ອງການ,ຫົວໜ້າ ກົມປູກຝັງ, ກົມລ້ຽງສັດ, ກົມປ່າໄມ້, ສະຖາບັນຄົ້ນຄ້ວາກະສິກໍາ, ປ່າໄມ້ ແລະ ພັດທະນາຊົນນະບົດ, ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ເຂົ້າຮ່ວມ ແລະ ເປັນສັກຂີພິຍານໃນຄັ້ງນີ້.
ໃນພິທີລົງນາມຕາງໜ້າກະຊວງກະສິກໍາ ແລະ ປ່າໄມ້ ເຊັນໂດຍ ທ່ານ ປອ. ບຸນເດດ ສຸດທະວິໄລ ຫົວໜ້າກົມແຜນການ ແລະ ການຮ່ວມມື ແລະ ຕາງໜ້າກຸ່ມບໍລິສັດເຊັນໂດຍ ທ່ານ ແຢນຊ່ຽງສຸຍ (Mr. YAN XIANGSHUAI) ຜູ້ຕາງໜ້າ ກຸ່ມບໍລິສັດ ກວດກາ ແລະ ຢັ້ງຢືນ ຈີນ ປະຈຳພາກຕາເວັນຕົກສ່ຽງໃຕ້ ສປ ຈີນ) ແລະ ເຊັນເປັນພະຍານຂອງທ່ານ ບຸນຈັນກົມ ບຸນຍະສິດ ຫົວໜ້າກົມປູກຝັງ ແລະ ທ່ານ ປອ ກາວີພອນ ພຸດທະວົງ ຫົວໜ້າກົມລ້ຽງສັດ ແລະ ການປະມົງ ເປົ້າໝາຍຂອງການເຊັນສັນຍາຄັ້ງນີ້ ແມ່ນເພື່ອແນ່ໃສ່ເພີ່ມທະວີການພົວພັນຮ່ວມມືສາກົນລະຫວ່າງສອງປະເທດໃນຂົງເຂດກະສິກໍາ, ການຜະລິດກະສິກໍາເພື່ອຄໍ້າປະກັນດ້ານສະບຽງອາຫານ ແລະ ໂພຊະນາການ, ການຜະລິດກະສິກໍາ ເພື່ອເປັນສິນຄ້າຊົມໃຊ້ພາຍໃນ ແລະ ສົ່ງອອກ, ເປີດກວ້າງການແລກປ່ຽນ ແລະ ການຮ່ວມມືດ້ານຍຸດທະສາດລະຫວ່າງສອງປະເທດໃນຂົງເຂດກະສິກໍາໃຫ້ເລິກເຊິ່ງ ແລະ ກວ້າງຂວາງ ຊຸກຍູ້ການຮ່ວມມືຕ່າງຝ່າຍຕ່າງມີຜົນປະໂຫຍດ ແລະ ການພົວພັນມິດຕະພາບທີ່ເປັນມູນເຊື້ອໃຫ້ໄດ້ຮັບຜົນດີ, ຮ່ວມກັນສ້າງລະບົບຕິດຕາມກວດກາສິນຄ້າກະສິກຳ, ປ່າໄມ້ ແລະ ສະບຽງອາຫານຢູ່ ສປປ ລາວ. ບໍລິສັດ ກວດກາ ແລະ ຢັ້ງຢືນຈີນ ແຂວງກວາງຊີ ຈໍາກັດ (ສໍານັກງານໃຫຍ່ພາກຕາເວັນຕົກສ່ຽງໃຕ້ ສປ ຈີນ) ເປັນບໍລິສັດລູກລະດັບທໍາອິດຂອງກຸ່ມບໍລິສັດ CCIC ແລະ ເປັນໜື່ງໃນແປດພາກພື້ນພາຍໃນຂອງກຸ່ມ CCIC, ມີສໍານັກງານໃຫຍ່ແມ່ນຕັ້ງຢູ່ເມືອງໜານໜິງ ແຂວງກວາງຊີ, ເຂດທີ່ຂື້ນກັບການຄຸ້ມຄອງຂອງພາກພື້ນຕົນປະກອບມີ: ກວາງຊີ, ຢຸນນານ, ກຸຍໂຈ່, ເຊຊວນ ແລະ ຊົງຊິງ ຈໍານວນ 5 ແຂວງ ແລະ ໄດ້ຂະຫຍາຍວຽກງານການຮ່ວມມືກັບຫຼາຍປະເທດ, ຂອບເຂດການບໍລິການກວມເອົາຂະແໜງກະສິກໍາ, ອຸດສາຫະກໍາ ແລະ ຂະແໜງບໍລິການ. ຄວາມສາມາດດ້ານວິຊາການກວມເອົາຂົງເຂດແຮ່ທາດ, ກະສິກໍາ, ອາຫານ, ນໍ້າມັນເຊື້ອໄຟ, ພະລັງງານ, ສິ່ງແວດລ້ອມ, ການວັດແທກ, ການປ້ອງກັນຟ້າຜ່າ, ຄວາມປອດໄພ, ອາຊີບສຸຂະພາບ ແລະ ອື່ນໆ. ເປັນວິສາຫະກິດພາກສ່ວນທີສາມທີ່ໃຫຍ່ທີ່ສຸດ ແລະ ມີອໍານາດທີ່ສຸດໃນພາກຕາເວັນຕົກສ່ຽງໃຕ້ຂອງ ສປ ຈີນ. ຝ່າຍກຸ່ມບໍລິສັດຈະໝູນໃຊ້ທ່າແຮງຂໍ້ໄດ້ປຽບຂອງຕົນໃນດ້ານຄວາມໜ້າເຊື່ອຖືດ້ານຊື່ສຽງ (ຍີ່ຫໍ້), ດ້ານບຸກຄະລາກອນ, ຄວາມສາມາດທາງດ້ານເຕັກນິກ ແລະ ເຄືອຂ່າຍທົ່ວໂລກ ເພື່ອຮ່ວມມືກັບກະຊວງກະສິກຳ ແລະ ປ່າໄມ້ ສປປ ລາວ ຮ່ວມກັນສົ່ງເສີມການນຳໃຊ້ການບໍລິການ “ຕິດຕາມແຫຼ່ງທີ່ມາ + ຢັ້ງຢືນການກວດກາ (TIC)” ໃນການນຳເຂົ້າ ແລະ ສົ່ງອອກຜະລິດຕະພັນກະສິກຳ, ປ່າໄມ້, ແລະ ສະບຽງອາຫານ ລາວ – ຈີນ ເພື່ອຮັບປະກັນຄຸນນະພາບຂອງຜະລິດຕະພັນ, ຍົກສູງຄ່ານິຍົມຂອງຍີ່ຫໍ້, ສ້າງຄວາມໜ້າເຊື່ອຖືໃນການບໍລິໂພກ ແລະ ປະກອບສ່ວນເພື່ອການພັດທະນາການຄ້າ ທີ່ມີທ່ວງທ່າດີຂື້ນລະຫວ່າງສອງປະເທດ.
ພາບ ແລະ ຂ່າວ ໂດຍ: ນ. ສີອໍາມອນ ໄຊຍະລາດ
ໜັງສືແຈ້ງເຊີນເຂົ້າຮ່ວມປະມູນໂຄງການສໍາຫຼວດອອກແບບລະບົບຊົນລະປະທານ
- ສະຖານທີຊື້ເອກະສານປະມູນ: ຫ້ອງການບໍລິຫານ ແລະ ແຜນການ, ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ບ້ານນາຍາງ, ເມືອງ ນາຊາຍທອງ, ນະຄອນຫຼວງວຽງຈັນ
- ເບີໂທຕິດຕໍ່ສອບຖາມ:
ທ່ານ ພອນມະນີ ໄຊຍະເສດຖາ 020 55699445 (ຫົວໜ້າຂະແໜງຊົນລະປະທານ)
ທ່ານ ຄໍາປັນ ສິດທິວົງ 020 22337849 (ຫົວໜ້າຂະແໜງບໍລິຫານ ແລະ ແຜນການ)
ຫນັງສືແຈ້ງເຊີນປະມູນ”ໂຄງການກໍ່ສ້າງສ້ອມແປງ ແລະ ຕໍ່ເຕີມອາຄານໃຫ້ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ”
ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ຂໍເຊີນບັນດາບໍລິສັດທີ່ສົນໃຈ ແລະມີຄຸນນະວຸດທິເຫມາະສົມເຂົ້າຍື່ນຊອງປະມູນສໍາລັບການກໍ່ສ້າງໂຄງການກໍ່ສ້າງສ້ອມແປງ ແລະ ຕໍ່ເຕີມອາຄານໃຫ້ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ກຳນົດໄລຍະກໍ່ສ້າງ 10 ເດືອນ.
ບໍລິສັດໃດທີ່ຕ້ອງການຊື້ເອກະສານປະມູນຕ້ອງຍື່ນຫນັງສືຫາຫ້ອງການບໍລິຫານ ແລະ ແຜນການສູນພັດທະນາ ແລະ ບໍລິການດ້ານການກະເສດຫ້ວຍ-ຊອນຫ້ວຍຊົ້ວໃນໂມງລັດຖະການ ເລີ່ມແຕ່ວັນທີ 12 ກໍລະກົດ 2023 ເປັນຕົ້ນໄປ ເຊິ່ງຊອງປະມູນຕ້ອງສົ່ງ ໃນເວລາ ຫລື ກ່ອນເວລາ 14:00 ໂມງ ຂອງວັນທີ 16 ສິງຫາ 2023 ທີ່ຫ້ອງການບໍລິຫານ ແລະ ແຜນການ ສູນພັດທະນາແລະບໍລິການດ້ານການກະເສດຫ້ວຍຊອນ-ຫ້ວຍຊົ້ວ, ບ້ານນາຍາງ, ເມືອງນາຊາຍທອງ, ນະຄອນຫລວງວຽງຈັນ.
#ເບີໂທຕິດຕໍ່:020 22337849 (ທ່ານ ຄໍາປັນ ສິດທິວົງ)
#ລາຍລະອຽດເພີ່ມຕື່ມອ່ານໄດ້ໃນເອກະສານດ້ານລຸ່ມນີ້:
ຄໍາແນະນໍາ ກ່ຽວກັບເງື່ອນໄຂສຸຂານາໄມ ພືດ ສໍາລັບການສົ່ງອອກໝາກກ້ວຍ ຈາກ ສປປ ລາວ ໄປ ສປ ຈີນ
ຄໍາແນະນໍາ ກ່ຽວກັບເງື່ອນໄຂສຸຂານາໄມ ພືດ ສໍາລັບການສົ່ງອອກໝາກກ້ວຍ ຈາກ ສປປ ລາວ ໄປ ສປ ຈີນ
#ສາມາດາວໂຫຼດຟາຍເອກະສານໄດ້ທີ: https://www.maf.gov.la/wp-content/uploads/2023/01/ຄຳແນະນຳກ່ຽວກັບເງື່ອນໄຂສຸຂານາໄມພືດ-ສຳລັບການສົ່ງອອກໝາກກ້ວຍ-ຈາກ-ລາວໄປຈີນ.pdf
ຂໍ້ກໍານົດ ເງື່ອນໄຂສຸຂານາໄມ ກ່ຽວກັບການກັກກັນ ແລະ ກວດສຸຂະພາບສັດໃຫຍ່ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ
ຂໍ້ກໍານົດ ເງື່ອນໄຂສຸຂານາໄມ ກ່ຽວກັບການກັກກັນ ແລະ ກວດສຸຂະພາບສັດໃຫຍ່ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ລະຫວ່າງ ກະຊວງກະສິກໍາ ແລະ ປ່າໄມ້ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ກົມໃຫຍ່ ພາສີ ແຫ່ງ ສາທາລະນະລັດ ປະຊາຊົນຈີນ ຄັ້ງວັນທີ 30 ເມສາ 2019
ຄໍາແນະນໍາວ່າດ້ວຍມາດຕະຖານສັດໃຫຍ່ ແລະ ມາດຕະຖານຟາມລ້ຽງສັດໃຫຍ່ ທີ່ຈະສົ່ງອອກຈາກ ສປປ ລາວ ໄປ ສປ ຈີນ
ໃນ ປີ 2020 ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ໄດ້ອອກແນະນໍາ ເລກທີ 0807/ກລປ, ລົງວັນທີ 07 ເມສາ 2020,
ວ່າດ້ວຍມາດຕະຖານສັດໃຫຍ່ ແລະ ມາດຕະຖານຟາມລ້ຽງສັດໃຫຍ່ ທີ່ຈະສົ່ງອອກຈາກ ສປປ ລາວ ໄປ ສປ ຈີນ ມີເນື້ອໃນດັ່ງນີ້້:
ພິທີເປີດຝຶກອົບຮົມສ້າງຄູຝຶກດ້ານເຕັກນິກວິຊາການກະສິກໍາ ແລະ ປ່າໄມ້ ໃຫ້ພະນັກງານວິຊາການສູນ ແລະ ສະຖານີບໍລິການດ້ານເຕັກນິກກະສິກໍາ ແລະ ປ່າໄມ້ ຂັ້ນແຂວງ ແລະ ເມືອງ
ໃນວັນທີ 29 ກໍລະກົດ 2019 ນີ້, ທີ່ສູນພັດທະນາ ແລະ ບໍລິການດ້ານການກະເສດຫ້ວຍຊອນຫ້ວຍຊົ້ວ, ກະຊວງກະສິກໍາ ແລະ ປ່າໄມ້ ໄດ້ຈັດພິທີເປີດຊຸດຝຶກອົບຮົມເພື່ອສ້າງຄູຝຶກດ້ານເຕັກນິກ ວິຊາການ ກະສິກໍາ ແລະ ປ່າໄມ້ ໃຫ້ພະນັກງານວິຊາການສູນ, ສະຖານີບໍລິການສົ່ງເສີມເຕັກນິກກະສິກໍາ ແລະ ປ່າໄມ້ ຂັ້ນແຂວງ ແລະ ຂັ້ນເມືອງ ຂື້ນ, ໃຫ້ກຽດເປັນປະທານເປີດຊຸດຝຶກອົບຮົມໂດຍ ທ່ານ ປອ ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງ ກະສິກໍາ ແລະ ປ່າໄມ້, ໂດຍມີຄະນະນໍາກະຊວງ, ຫົວໜ້າກົມ, ຮອງກົມ, ຕາງໜ້າ 3 ອົງການຈັດຕັ້ງມະຫາຊົນ, ພ້ອມດ້ວຍວິທະຍາກອນ, ພະນັກງານຫຼັກແຫຼ່ງວິຊາການຈາກພະແນກ ກະສິກໍາ ແລະ ປ່າໄມ້ ແຂວງເປົ້າໝາຍເຂົ້າຮ່ວມ. ຈຸດປະສົງຂອງການຝຶກອົບຮົມໃນຄັ້ງນີ້ເພື່ືອເປັນການສ້າງຄູຝຶກໂດຍການສ້າງພະນັກງານວິຊາການຂັ້ນແຂວງແລະ ເມືອງ ໃຫ້ກາຍເປັນຜູ້ຖ່າຍທອດບົດຮຽນພ້ອມທັງເປັນຜູ້ນໍາພາຊ່ວຍເຫຼືອທາງດ້ານເຕັກນິກໃຫ້ແກ່ພະນັກງານປະຈໍາກຸ່ມບ້ານ ແລະ ຊາວກະສິກອນໃນຂັ້ນຕໍ່ໄປ, ນັກສໍາມະນາກອນຈະຮັບຮູ້ເຖິງຄວາມໝາຍ, ຄວາມສໍາຄັນຂອງນິຕິກໍາໃຕ້ກົດໝາຍຂອງຂະແໜງ ກະສິກໍາ ແລະ ປ່າໄມ້, ຮັບຮູ້ຢ່າງເລິກເຊິ່ງກ່ຽວກັບດໍາລັດວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາເພື່ອ ເຜີຍແຜ່ ແລະ ເປັນບ່ອນອີງໃນການວາງແຜນຈັດຕັ້ງປະຕິບັດວຽກງານຂອງຕົນ. ການຝຶກອົບຮົມນີ້ແມ່ນ ເລີ່ມແຕ່ວັນທີ 29 ກໍລະກົດ ຫາ 15 ສິງຫາ 2019 ລວມທັງໝົດ 15 ວັນ, ປະກອບມີ 4 ພາກໃຫຍ່, 12 ຫົວຂໍ້. ໂດຍມີຜູ້ເຂົ້າຮ່ວມຝຶກທັງໝົດ 40 ຄົນມາຈາກ 6 ແຂວງຄື: ແຂວງຜົ້ງສາລີ, ອຸດົມໄຊ, ຫຼວງນໍາທາ, ບໍ່ແກ້ວ, ຫຼວງພະບາງ ແລະ ແຂວງ ວຽງຈັນ.
ທ່ານປະທານໄດ້ກ່າວໃນພິທີເປີດຝຶກອົບຮົມຄັ້ງນີ້ວ່າ: ການຝຶກອົບຮົມຄັ້ງນີ້ແມ່ນສຸດທີ່ມີຄວາມໝາຍສໍາຄັນແລະ ເປັນບາດລ້ຽວໃໝ່ຂອງການສ້າງພະນັກງານນໍາພາ ການປູກ-ການລ້ຽງຂອງຂະແໜງພວກເຮົາ ແລະ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ກໍ່ຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ແລະ ແຜນພັດທະນາຊັບພະຍາກອນມະນຸດຂອງກະຊວງ ຄືສ້າງນັກພັດທະນາຂັ້ນບ້ານໃຫ້ໄດ້ 3-5 ຄົນຕໍ່ບ້ານ, ຄາດວ່າຮອດປີ 2020 ຈະໃຫ້ໄດ້ 60-70% ແລະ ຮອດປີ 2025 ໃຫ້ໄດ້ 100%, ທັງເປັນການຜັນຂະຫຍາຍຂໍ້ຕົກລົງ 837/ກປໃຫ້ປະກົດຜົນເປັນຈິງ. ໃນຕອນທ້າຍທ່ານຍັງໄດ້ເນັ້ນໜັກຕ່ືມໃຫ້ບັນດານັກສໍາມະນາກອນທຸກຄົນຈົ່ງສຸມຈິດສຸມໃຈເຮັດໃຫ້ຊຸດຝຶກອົບຮົມນີ້ໃຫ້ໄດ້ຮັບຜົນດີເພ່ືອເຮັດແນວໃດຈະໃຫ້ຄວາມຮູ້ເຫຼົ່ານີ້ໄປເຖິງຊາວກະສິກອນ ແລະ ນໍາໃຊ້ເຂົ້າໃນການຜະລິດກະສິກໍາ ແລະ ປ່າໄມ້ ເພື່ອສ້າງຄອບຄົວຕົວແບບດ້ານກະສິກໍາ, ບ້ານແບບຢ່າງດ້ານກະສິກໍາ ແລະ ປ່າໄມ້ ແລະ ເມືອງກະສິກໍາພັດທະນາໃຫ້ປະກົດຜົນເປັນຈິງ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ພິທີເຊັນສັນຍາ ວ່າດ້ວຍການຈັດຕັ້ງປະຕິບັດມາດຕະການດ້ານສຸຂານາໄມຂອງໂຄງການລ້ຽງງົວຊີ້ນເປັນສິນຄ້າ ແລະ ສ້າງສະຖານທີ່ກັກກັນສັດ ຢູ່ເມືອງສິງ ແຂວງ ຫຼວງນໍ້າທາ.
ເພື່ອເປັນການຊຸກຍູ້ການສ້າງສະຖານທີ່ກັກກັນສັດເພື່ອສົ່ງອອກໃຫ້ຖືກຕ້ອງຕາມກົດໝາຍ, ລະບຽບການ, ກໍານົດໝາຍເຕັກນິກ ຂອງ ສປປ ລາວ ແລະ ຄໍາແນະນໍາຂອງອົງການສຸຂະພາບສັດສາກົນກໍານົດອອກ, ແນໃສ່ປະກອບສ່ວນຈັດຕັ້ງປະຕິບັດຂໍ້ກໍານົດເງື່ອນໄຂດ້ານສຸຂານາໄມ ກ່ຽວກັບການກັກກັນ ແລະ ກວດສຸຂະພາບສັດໃຫຍ່ທີ່ຈະສົ່ງຈາກ ສປປ ລາວ ໄປ ສປ ຈີນ ໃຫ້ເປັນຮູບປະທໍານັ້ນ, ໃນວັນທີ 24 ກໍລະກົດ 2019 ນີ້, ທີ່ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ໄດ້ຮ່ວມກັບບໍລິສັດ ລາວໂກທົງພັດທະນາກິດຈະການລ້ຽງສັດ ຈໍາກັດ ຂອງ ສປ ຈີນ, ໄດ້ຈັດພິທີເຊັນສັນຍາວ່າດ້ວຍການຈັດຕັ້ງປະຕິບັດມາດຕະການດ້ານສຸຂານາໄມຂອງໂຄງການລ້ຽງງົວຊີ້ນເປັນສິນຄ້າ ແລະ ສ້າງສະຖານທີ່ກັກກັນສັດທີ່ເມືອງ ສິງ ແຂວງ ຫຼວງນໍ້າທາຂື້ນ,
ໃນພິທີດັ່ງກ່າວທ່ານປະທານບໍລິສັດລາວໂກງທົງໄດ້ໃຫ້ຮູ້ວ່າ: ປີ 2018 ຜ່ານມາໄດ້ເຊັນສັນຍາລົງທຶນການຈັດຕັ້ງປະຕິບັດໂຄງການລ້ຽງງົວຊີ້ນເປັນສິນຄ້າ ແລະ ສ້າງສູນກັກກັນສັດພາຍໃຕ້ມາດຕະການດ້ານສຸຂານາໄມສັດ ແລະ ສຸຂານາໄມພືດທີ່ດີ ກັບພະແນກແຜນການ ແລະ ການລົງທຶນແຂວງຫຼວງນໍ້າທາ, ຈາກນັ້ນບໍລິສັດໄດ້ເລີ່ມ ຈັດຕັ້ງປະຕິບັດໂຄງການໂດຍສ້າງຟາມລ້ຽງງົວຊີ້ນ ແລະ ສູນກັກກັນສັດຂື້ນ ຊຶ່ງມາຮອດປັດຈຸບັນໄດ້ສ້າງຟາມງົວຊີ້ນໄລຍະທໍາອິດສໍາເລັດແລ້ວ 3 ແຫ່ງສາມາດທອມງົວໄດ້ 4.000 ໂຕ ແລະ ກໍ່ສ້າງສູນກັກກັນສັດສໍາເລັດ 90 ສ່ວນຮ້ອຍ, ເຊິ່ງໃນຕໍ່ໜ້າທາງບໍລິສັດຈະສຸມຄວາມພະຍາຍາມເພື່ອເຮັດໃຫ້ສໍາເລັດດ້ານວຽກງານດັ່ງກ່າວເພື່ອໃຫ້ບັນລຸ ແລະ ສາມາດສົ່ງອອກງົວພັນຊີ້ນໄປຍັງ ສປ ຈີນ ທີ່ໄດ້ທັງປະລິມານ ແລະ ຄຸນນະພາບ, ເພື່ອໃຫ້ສໍາເລັດຕາມແຜນການ ແລະ ຖືກຕ້ອງ ຕາມລະບຽບກົດໝາຍ ຂອງ ສປປ ລາວ ໂດຍສະເພາະດ້ານການບໍລິຫານຄຸ້ມຄອງ, ການຕິດຕາມດ້ານເຕັກນິກທີ່ຕິດພັນກັບວຽກງານກັກກັນສັດ ແລະ ເພື່ອຮັບຮອງເອົາແບບຂອງສູນກັກກັນສັດທີ່ກໍາລັງດໍາເນີນການກໍ່ສ້າງຢູ່ຈຶ່ງໄດ້ຈັດພິທີດັ່ງກ່າວນີ້ຂື້ນ, ເຊິ່ງການລົງນາມໃນສັນຍາໂຄງການດັ່ງກ່າວນີ້ ຕາງໜ້າຝ່າຍລາວເຊັນໂດຍທ່ານ ນາງ ວິໄລພອນ ວໍລະພີມ ຫົວໜ້າກົມລ້ຽງສັດ ແລະ ການປະມົງ, ກະຊວງກະສິກໍາ ແລະ ປ່າໄມ້, ແລະ ຕາງໜ້າຝ່າຍຈີນເຊັນໂດຍທ່ານ ຫວາງເຊີນລີ ປະທານບໍລິສັດໂກທົງ ພັດທະນາກິດຈະການລ້ຽງສັດ ຈໍາກັດໂດຍມີທ່ານຫົວໜ້າຫ້ອງການກະຊວງກະສິກໍາ ແລະ ປ່າໄມ້, ຮອງຫົວໜ້າກົມ, ຫົວໜ້າພະແນກ, ຮອງພະແນກ ແລະ ວິຊາການທີ່ກ່ຽວຂ້ອງຈາກທັງສອງຝ່າຍເຂົ້າຮ່ວມເປັນສັກຂີພະຍານ.
ພາບ ແລະ ຂ່າວໂດຍ: ພະແນກ ໂຄສະນາ ແລະ ຂ່າວສານ
ກອງປະຊຸມວິຊາການກ່ຽວກັບສະພາບການລະບາດຂອງພະຍາດຫ່ຽວເຫຼືອງຂອງກ້ວຍ
ໃນວັນທີ 11-12ກໍລະກົດ 2019, ທີ່ສໍານັກງານປົກຄອງເມືອງວັງວຽງ ແຂວງວຽງຈັນ, ສູນປ້ອງກັນພືດສາລະຄໍາ ກົມປູກຝັງກະຊວງກະສິກໍາ ແລະ ປ່າໄມ້ໄດ້ຈັດກອງປະຊຸມວິຊາການກ່ຽວກັບລາຍງານສະພາບການລະບາດ, ການປ້ອງ ກັນ ແລະ ກໍາຈັດພະຍາດຫ່ຽວເຫຼືອງກ້ວຍ, ໂດຍການເປັນປະທານຂອງ ທ່ານ ສິລິພົນ ພິທັກສູນ ຫົວໜ້າສູນປ້ອງກັນ ພືດສາລະຄໍາ, ມີຮອງຫົວໜ້າພະແນກ ກະສິກໍາ ແລະ ປ່າໄມ້ ແຂວງ ສາລະວັນ, ຫົວໜ້າ ແລະ ຮອງຂະແໜງປູກຝັງຈາກ 12 ແຂວງ ທົ່ວປະເທດ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 34 ຄົນຍິງ 11 ຄົນ.
ໃນໄລຍະຜ່ານມາການປູກກ້ວຍຂອງຊາວກະສິກອນ ໃນຂອບເຂດທົ່ວປະເທດແມ່ນເປັນຂະບວນຟົດຟື້ນໂດຍສະເພາະການປູກກ້ວຍຫອມຈີນຢູ່ແຂວງພາກເໜືອ, ພາກກາງ ແລະ ພາກໃຕ້ ເພື່ອສົ່ງອອກລວມເນື້ອທີ່ປູກ 19.375ເຮັກຕາ ການລົງທຶນ ແລະ ຂະຫຍາຍພື້ນທີ່ການຜະລິດໄດ້ເຮັດໃຫ້ມີການນໍາເຂົ້າໜໍ່ພັນກ້ວຍ ແລະ ດິນທີ່ຕິດມາຈາກໜໍ່ພັນຈາກ ສປ ຈີນ ທີ່ມີການລະບາດຂອງພະຍາດຫ່ຽວເຫຼືອງຂອງກ້ວຍ, ພະຍາດຫ່ຽວເຫຼືອງກ້ວຍ ຫຼື TR4 ນີ້ແມ່ນມີຜົນກະທົບ ສູງຕໍ່ການຜະລິດກ້ວຍພື້ນທີ່ທີ່ມີການລະບາດຕົ້ນກ້ວຍຈະຫ່ຽວເຫຼືອງ ແລະ ຢືນຕົ້ນຕາຍໃນທີ່ສຸດ, ສາມາດອາໃສ ໃນດິນໄດ້ຫຼາຍກວ່າ 30ປີ ແລະ ມີພືດອາໃສຫຼາຍຊະນິດ ເຊັ່ນ: ກ້ວຍຫອມ, ກ້ວຍເລັບມືນາງ, ກ້ວຍນໍ້າ, ໄມ້ປະດັບ ແລະ ຫຍ້າຕ່າງໆ ການກະຈາຍຂອງເຊື້ອແມ່ນມີຫຼາຍທາງເຊັ່ນ: ໜໍ່ພັນທີ່ນໍາມາປູກ, ດິນ, ນໍ້າ, ອຸປະກອນລວມເຖິງລະບົບການຈັດການຟາມ ແລະ ອຶ່ນໆ, ຈາກຜົນການສໍາຫຼວດຂອງສູນປ້ອງກັນພືດໃນ 12 ແຂວງທີ່ມີການປູກກ້ວຍຫຼາຍທີ່ສຸດໄດ້ພົບເຫັນພະຍາດຫ່ຽວເຫຼືອງກ້ວຍລະບາດໃນຈໍານວນ 7 ແຂວງໂດຍ ໃນປີ 2017 ພົບການລະບາດຢູ່ ແຂວງ ບໍ່ແກ້ວ ແລະ ແຂວງ ຫຼວງນໍ້າທາ, ມາຮອດປີ 2019 ກໍ່ມີການ ແຜ່ໄປສູ່ພື້ນທີ່ອື່ນຄື ແຂວງ ໄຊຍະບູລີ, ຫຼວງພະບາງ, ອຸດົມໄຊ, ວຽງຈັນ ແລະ ນະຄອນຫຼວງວຽງຈັນ ລວມເປີເຊັນການລະບາດທັງໝົດ ທຽບໃສ່ຈໍານວນແຂວງທີ່ມີການປູກກ້ວຍທົ່ວປະເທດກວມເອົາ 58,33 %, ເພື່ອເຮັດໃຫ້ຫຼຸດ ຜ່ອນການລະບາດຂອງ ພະຍາດດັ່ງກ່າວໄປສູ່ແນວພັນກ້ວຍພື້ນເມືອງ ແລະ ພືດ ອື່ນໆ, ເລັ່ງໃສ່ການຮັບປະກັນຄວາມໝັ້ນຄົງທາງດ້ານສະບຽງອາຫານ, ຄວາມໝັ້ນຄົງທາງດ້ານຊີວະນາໆພັນພືດ ແລະ ເພີ່ມການເຝົ້າລະວັງການລະບາດພະຍາດຫ່ຽວເຫຼືອງ ຂອງກ້ວຍໄປສູ່ເຂດພື້ນທີ່ການຜະລິດອື່ນໆຈື່ງຈັດກອງປະຊຸມ ດັ່ງກ່າວນີ້ຂື້ນເພື່ອໃຫ້ພະນັກງນປ້ອງກັນພືດຂັ້ນທ້ອງ ຖິ່ນເຂົ້າໃຈສະພາບການລະບາດ, ສາຍເຫດການລະບາດ ແລະ ມາດຕະການປ້ອງກັນ ແລະ ກໍາຈັດພະຍາດຫຼ່ຽວ ເຫຼືອງຂອງກ້ວຍ. ເຊິ່ງໃນໂອກາດນີ້ບັນດາຜູ້ເຂົ້າຮ່ວມກອງປະຊຸມ ຍັງໄດ້ລົງຢ້ຽມຢາມສວນສາທິດການທົດສອບ ການນໍາໃຊ້ເຊື້ອຊີວະວິທະຍາໃນການປ້ອງການ ແລະ ກໍາຈັດພະຍາດຫ່ຽວເຫຼືອງຂອງກ້ວຍທີ່ບ້ານວັງໝ້ຽງ, ເມືອງ ວັງວຽງ, ແຂວງ ວຽງຈັນ ໂດຍເຊື້ອຊີວະວິທະຍາທີ່ມີການທົດລອງຢູ່ນີ້ຫາກໄດ້ຮັບຜົນດີແມ່ນຈະມີປະໂຫຍດຫຼາຍ ຕໍ່ການປ້ອງກັນ ແລະ ກໍາຈັດພະຍາດດັ່ງກ່າວໃນອານະຄົດ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
