ປະກາດແຕ່ງຕັ້ງລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ຄົນໃໝ່
ພິທີປະກາດແຕ່ງຕັ້ງທ່ານ ດຣ ບຸນຂວາງ ຄຳບຸນເຮືອງ ແລະ ທ່ານ ທອງພັດ ວົງມະນີເປັນລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ຄົນໃໝ່ ແລະ ໃຫ້ທ່ານ ດຣ ຕີ ພົມມະສັກ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ອອກຮັບນະໂຍບາຍບຳນານ, ພ້ອມແຕ່ງຕັ້ງທ່ານ ສົມພັນ ຈັນເພັງໄຊ ເປັນຫົວໜ້າກົມລ້ຽງສັດ ແລະ ການປະມົງ ແລະ ທ່ານຊຸຊາດ ໄຊຍະກຸມມານ ເປັນຫົວໜ້າກົມປ່າໄມ້ຄົນໃໝ່, ໄດ້ຈັດຂຶ້ນໃນບ່າຍວັນທີ 6 ພະຈິກຜ່ານມານີ້, ໂດຍການເຂົ້າຮ່ວມຂອງທ່ານລັດຖະມົນຕີວ່າການກະຊວງກະສິກໍາ ແລະ ປ່າໄມ້ ດຣເພັດ ພົມພິພັກ ແລະ ພະນັກງານຂັ້ນນຳຂອງກະຊວງດັ່ງກ່າວ, ເພື່ອປະຕິບັດຕາມລັດຖະດຳລັດຂອງນາຍົກລັດຖະມົນຕີແຫ່ງ ສປປ ລາວ.
ໃນໂອກາດນີ້, ທ່ານລັດຖະມົນຕີວ່າການກະຊວງກະສິກໍາ ແລະ ປ່າໄມ້ ກໍໄດ້ໂອ້ລົມຕໍ່ພິທີວ່າ: ຂໍໃຫ້ຜູ້ທີ່ໄດ້ຮັບການແຕ່ງຕັ້ງໜ້າທີ່ໃໝ່ຄັ້ງນີ້, ຈົ່ງສືບຕໍ່ເອົາໃຈໃສ່ຊີ້ນຳ-ນຳພາວຽກງານໃຫ້ມີການພັດທະນາກ້າວຂຶ້ນຢ່າງບໍ່ຢຸດຢັ້ງ ແລະ ປະສົບຜົນສຳເລັດຫລາຍກວ່າເກົ່າ.
