ຂ່າວ
ກອງປະຊຸມສຳມະນາລະດັບຊາດ ການພັດທະນາຊົນນະບົດແບບມີສ່ວນຮ່ວມຢູ່ ສປປ ລາວ
ອົງການກອຍກາ ຮ່ວມກັບ ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມສຳມະນາລະດັບຊາດ ການພັດທະນາຊົນນະບົດແບບມີສ່ວນຮ່ວມຂຶ້ນ ໃນວັນທີ 15-17 ພຶດສະພາ 2019 ທີ່ໂຮງແຮມແລນມາກ, ນະຄອນຫຼວງວຽງຈັນ. ໂດຍການເປັນປະທານ ຂອງທ່ານ ສົມດີ ດວງດີ ຮອງນາຍົກ ລັດຖະມົນຕີ ແຫ່ງ ສປປ ລາວ, ໃຫ້ກຽດເຂົ້າຮ່ວມໂດຍທ່ານ ລຽນ ທີແກ້ວ ລັດຖະມົນຕີກະຊວງ ກປ, ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງ ກປ, ທ່ານ ນາງ ລີທີຢຸນ ປະທານອົງການກອຍກາ ແຫ່ງ ສ.ເກົາຫຼີ, ມີບັນດາຮອງລັດຖະມົນຕີ, ຮອງເຈົ້າຄອງນະຄອນ, ຮອງເຈົ້າແຂວງ, ຫົວໜ້າ-ຮອງຫົວໜ້າຫ້ອງການ, ກົມ, ສະຖາບັນ ແລະ ພະແນກ ກປ ແຂວງ, ນະຄອນຫຼວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. Continue reading
ພິທີເຊັນບົດບັນທຶກຄວາມເຂົ້າໃຈ ການສ້າງລະບົບການເກັບກຳຂໍ້ມູນຟາມລ້ຽງສັດ ໂດຍຜ່ານທາງໂທລະສັບມືຖື
ເພື່ອສາມາດຄຸ້ມຄອງ, ວາງແຜນພັດທະນາ ແລະ ຄວບຄຸມການລະບາດຂອງພະຍາດຢູ່ໃນຟາມລ້ຽງສັດ ໂດຍຜ່ານລະບົບແອັບພລີເຄຊັນທາງໂທລະສັບມືຖື ເຊິ່ງເປັນການລາຍງານທີ່ແນ່ນອນ ແລະ ລາຍງານຈາກຟາມໂດຍກົງ ໄດ້ທຸກເວລາທີ່ຕ້ອງການ ແລະ ຂໍ້ມູນທີ່ໄດ້ຈາກລະບົບນີ້ມີຄວາມ ປອດໄພສູງ ທັງໃນດ້ານການປ້ອງກັນການລັກລອບຂໍ້ມູນ ແລະ ການປ່ຽນແປງຂໍ້ມູນ. ຈຸດປະສົງກໍ່ເພື່ອໃຫ້ມິຂໍ້ມູນສະຖິຕິຝູງສັດ ຈາກການລ້ຽງແບບເປັນຟາມມີຄວາມຖືກຕ້ອງ, ວ່ອງໄວ ແລະ ຊັດເຈນ ເພື່ອສະໜອງໃນການວາງແຜນພັດທະ ນາ ແນໃສ່ເຮັດໃຫ້ບັນລຸໄດ້ການຜະລິດຊີ້ນ ຮັບປະກັນດ້ານສະບຽງອາຫານ, ຜະລິດເປັນສິນຄ້າມີຄວາມປອດໄພ ເຊິ່ງກິດຈະກຳ ຫຼື ໂຄງການດັ່ງກ່າວ ຈະມີໄລຍະເວລາ 5 ປີ. ໃນປີທຳອິດຈະເລີ່ມທົດລອງກັບຟາມລ້ຽງໝູ ແລ້ວຈຶ່ງກ້າວໄປຟາມລ້ຽງສັດປະ ເພດອື່ນໆ ໃນ ສປປ ລາວ.
ສະຫະພັນແມ່ຍິງກະຊວງ ກະສິກໍາ ແລະ ປ່າໄມ້ ຢ້ຽມຢາມຄອບຄົວຕົວແບບໃນການຜະລິດລູກກົບ
ເພື່ອສືບຕໍ່ອະນຸລັກຮັກສາມູນເຊື້ອດຸໝັ່ນຂອງແມ່ຍິງລາວ, ສ້າງທຸກເງື່ອນໄຂອໍານວຍຄວາມສະດວກໃຫ້ສະມາ ຊິກໃນຄອບຄົວຕັ້ງໜ້າປະກອບສ່ວນເຂົ້າໃນພາລະກິດລວມຂອງຊາດແນໃສ່ປະຕິບັດຂໍ້ແຂ່ງ ຂັນ 3 ດີ ຂອງແມ່ຍິງ ລາວ ຄື ພົນລະເມືອງດີ, ພັດທະນາດີ ແລະ ສ້າງຄອບຄົວດີ,ໃນວັນທີ 25 ເມສາ 2019 ສະຫະພັນແມ່ຍິງກະຊວງ ກະສິກໍາ ແລະ ປ່າໄມ້ ນໍາໂດຍທ່ານ ນ. ບຸນທຽນ ວົງໄກສອນ ປະທານສະຫະພັນແມ່ຍິງ ກະຊວງ ກະສິກໍາ ແລະ ປ່າໄມ້ພ້ອມດ້ວຍຄະນະໄດ້ໄປຢ້ຽມຢາມຄອບຄົວຂອງ ທ່ານ ນາງ ສາລາວົງ ທໍາມະເຈດີ ອາຍຸ 39 ປີ ຕົວແບບ ໃນການຜະລິດລູກກົບທີ່ ບ້ານ ໜອງສະ, ເມືອງ ນາຊາຍທອງ ນະຄອນຫຼວງວຽງຈັນ,
ທ່ານ ນາງ ສາລາວົງ ທໍາມະເຈດີ ໄດ້ໃຫ້ຮູ້ວ່າໃນຄອບຄົວມີສະມາຊິກ 3 ຄົນ ຜົວເມຍ ແລະ ລູກ 1 ຄົນ, ຕົນເອງໄດ້ເລີ່ມຜະລິດລູກກົບຂາຍ ມາແຕ່ປີ 2006 ເປັນອາຊີບເສີມໃນເວລາຫວ່າງນອກໂມງການ ນອກຈາກການເປັນພະນັກງານລັດສັງກັດ ໜ່ວຍງານ ບໍລິຫານງານ ແລະ ຂໍ້ມູນຂ່າວສານ ທີ່ສູນພັດທະນາການປະມົງນໍ້າຊ່ວງ, ໂດຍອີງໃສ່ພື້ນຖານ ແລະ ໄດ້ບົດຮຽນຈາກ ການຮຽນຮູ້ ແລະ ຝຶກອົບຮົມຈາກບ່ອນທີ່ຕົນເຮັດວຽກ ເປັນແຮງ ບັນດານໃຈໜຶ່ງ ແລະ ອີງໃສ່ຄວາມມັກຮັກ ແລະ ຢາກພັດທະນາຊີວິດຄອບຄົວຕົນເອງໃຫ້ດີຂື້ນເລື້ອຍໆນັ້ນຕົນເອງ ແລະ ຄອບຄົວຈຶ່ງຕັດສິນໃຈມາຜະລິດລູກກົບເພື່ອ ຈໍາໜ່າຍຍ້ອນການຜະລິດລູກກົບແມ່ນໃຊ້ຕົ້ນທືນຕໍາ.
ເບື້ອງຕົ້ນທາງຄອບຄົວແມ່ນລົງທຶນ 10 ລ້ານ ກີບໃນການສ້າງ ອ່າງ ແລະ ຊື້ພໍ່ແມ່ພັນ 200 ໂຕ, ໃນປີທໍາອິດໄດ້ກໍາໄລຈາກການຂາຍ 15 ລ້ານກີບ ແລະ ເພີ່ມຂື້ນ ເລື້ອຍໆຈົນ ຮອດປະຈຸບັນ ໄດ້ສ້າງລາຍຮັບໃຫ້ແກ່ຄອບຄົວສູງເຖິງ 30 ລ້ານກີບຕໍ່ປີຫຼັງຫັກຄ່າໃຊ້ຈ່າຍທັງໝົດ. ການຜະລິດລູກກົບ ແມ່ນໄດ້ຜະລິດແບບເຄິ່ງທໍາມະຊາດ, ປີໜຶ່ງສາມາດຜະລິດໄດ້ 3 ຊຸດ, ຊຸດໜຶ່ງມີພໍ່ແມ່ພັນ 15 ຄູ່ ແລະ ໄດ້ລູກ ກົບທັງໝົດ 15 ພັນໂຕ. ລູກຄ້າຫຼັກໆທີ່ມາຊື້ລູກກົບແມ່ນພໍ່ແມ່ປະຊາຊົນທົ່ວໄປ ແລະ ອ້າຍເອື້ອຍນ້ອງທະຫານ, ການຂາຍແມ່ນຂາຍໃນລາຄາ 500 ກີບຕໍ່ໂຕ. ການຜະລິດ ລູກກົບນີ້ເຖິງແມ່ນວ່າຈະຜະລິດໄດ້ຫຼາຍແຕ່ກໍ່ຍັງບໍ່ທັນພຽງ ພໍກັບຄວາມຕ້ອງ ການຂອງຕະຫຼາດເທື່ອເພາະທາງຕະຫຼາດຍັງມີຄວາມຕ້ອງການຫຼາຍແຜນການຕໍ່ໜ້າທາງຄອບຄົວຈະ ໄດ້ຂະຫຍາຍພື້ນທີ່ລ້ຽງຕື່ມອີກ ເພື່ອສະໜອງລູກກົບ ໃຫ້ພຽງພໍ, ພ້ອມກັນນີ້ຍັງໄດ້ລິເລີ່ມບຸກເບີກເນື້ອທີ່ຜະລິດລູກປາ ນ້ອຍອີກຈໍານວນ 11 ໜອງ ແລະ ລ້ຽງໝູຈໍານວນ ໜື່ງເຊິ່ງຄາດວ່າໃນປີຕໍ່ໄປຈະສາມາດສ້າງລາຍຮັບອີກທາງໜຶ່ງໃຫ້ກັບ ຄອບຄົວຕື່ມອີກ.
ພາບ ແລະ ຂ່າວໂດຍ: ພະແນກ ໂຄສະນາ ແລະ ຂ່າວສານ
ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ເຂົ້າຮ່ວມກອງປະຊຸມໃຫຍ່ສາກົນ
ໃນທ້າຍເດືອນ ມີນາ 2019, ທ່ານ ປອ ພວງປາຣິສັກ ປຣະວົງວຽງຄຳ, ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ເຂົ້າຮ່ວມກອງປະຊຸມໃຫຍ່ສາກົນ ທີ່ບາງກອກ ປະເທດໄທ. ເພື່ອປຶກສາຫາລື ແລະ ແລກປ່ຽນບົດຮຽນ ຕາມການເຊີນຂອງປະທານອົງການເວທີທຸລະກິດຮັບຜິດຊອບດ້ານສະບຽງອາຫານ ແລະ ການກະສິກຳ, ຫົວໜ້າສະຖາບັນຄົ້ນຄວ້າສິ່ງແວດລ້ອມສະຕອ໋ກໂຮມ. ກອງປະຊຸມດັ່ງກ່າວມີຜູ້ເຂົ້າຮ່ວມ ຈາກຫຼາຍພາກສ່ວນ ຊຶ່ງປະກອບດ້ວຍຜູ້ກຳນົດ ແລະ ຜູ້ຈັດຕັ້ງປະຕິບັດນະໂຍບາຍ ໃນນີ້ລວມມີ ພາກລັດ, ອົງການຈັດຕັ້ງສາກົນ, ຜູ້ປະກອບການ, ອົງການຈັດຕັ້ງທາງສັງຄົມ ແລະ ອື່ນໆ ປະມານ 400 ກວ່າທ່ານ. ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອປຶກສາຫາລື-ຖອດຖອນບົດຮຽນ ແລະ ແລກປ່ຽນປະສົບການ ໃນການເສີມສ້າງຄວາມເຂັ້ມເເຂງ ແລະ ສ້າງກາລະໂອກາດໃນການຮ່ວມມືທາງດ້ານນະໂຍບາຍ ໂດຍການສະໜັບສະໜູນຈາກນະໂຍບາຍດ້ານຍຸດທະສາດ ໃນອາຊີ ທີ່ນອນຢູ່ໃນຂອບການຮ່ວມມືຂົງເຂດພາກພື້ນ ແລະ ເປົ້າໝາຍການພັດທະນາແບບຍືນຍົງຮອດປີ 2030 (SDGs). ໃນໂອກາດເຂົ້າຮ່ວມກອງປະຊຸມທີ່ສຳຄັນດັ່ງກ່າວ, ທ່ານ ປອ ພວງປາຣິສັກ ປຣະວົງວຽງຄຳ, ຮອງລັດຖະມົນຕີກະຊວງກະສິກຳ ແລະ ປ່າໄມ້ ກໍ່ໄດ້ຮັບກຽດຂຶ້ນນຳສະເໜີບາງນະໂຍບາຍຂອງລັດຖະບານ ສປປລາວ ໃນການຊຸກຍູ້ສົ່ງເສີມການລົງທຶນດ້ານການຜະລິດສະບຽງອາຫານ ແລະ ການຜະລິດກະສິກຳສະອາດເປັນສິນຄ້າ ຕໍ່ທີ່ປະຊຸມ ເພື່ອເປັນການແລກປ່ຽນ ແລະ ຂົນຂວາຍຍາດເເຍ່ງການຊ່ວຍເຫຼືອ ແລະ ດຶງດູດການລົງທຶນ ຈາກພາກເອກະຊົນ, ຜູ້ປະກອບການ ແລະ ພາກສ່ວນອື່ນ ມາລົງທຶນດ້ານກະສິກຳ ຢູ່ສປປ ລາວ.
ພາບແລະຂ່າວໂດຍ: ພະແນກໂຄສະນາ ແລະ ຂ່າວສານ
ພິທີເປີດ ອຸທິຍານແຫ່ງຊາດ ນາກາຍ-ນ້ຳເທີນ
ໂດຍເຫັນໄດ້ຄວາມໝາຍຄວາມສຳຄັນຂອງປ່າໄມ້ ແລະຊັບພະຍາກອນປ່າໄມ້ຕໍ່ກັບການພັດທະນາເສດຖະກິດ-ສັງຄົມແຫ່ງຊາດ, ການປົກປັກຮັກສາສິ່ງແວດລ້ອມກໍ່ຄືການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ ລັດຖະບານຈຶ່ງໄດ້ປະກາດສ້າງຕັ້ງ ປ່າສະຫງວນແຫ່ງຊາດຂຶ້ນ ໃນຂອບເຂດທົ່ວປະເທດ ຕາມດຳລັດຂອງນາຍົກລັດຖະມົນຕີ ສະບັບເລກທີ 164/ນຍ, ລົງວັນທີ 29 ຕຸລາ 1993, ຈຳນວນ 18 ແຫ່ງ ໜຶ່ງໃນນັ້ນແມ່ນປ່າສະຫງວນແຫ່ງຊາດ ນາກາຍ-ນ້ຳເທີນ ເຊິ່ງມີເນື້ອທີ່ທັງໝົດ 353.200 ເຮັກຕາ. ຈຸດປະສົງແມ່ນເພື່ອຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ຊັບພະຍາກອນປ່າໄມ້ ແລະ ທີ່ດິນປ່າໄມ້ ໂດຍສະເພາະແມ່ນປ່າໄມ້, ສັດນ້ຳ-ສັດປ່າ ແລະ ຊີວະນາໆພັນ ທີ່ເປັນຊັບພະຍາກອນທີ່ສຳຄັນຂອງຊາດ ໃຫ້ມີຄວາມສົມບູນ ແລະ ຍືນຍົງຕະຫຼອດໄປ. Continue reading
ແຈ້ງການ ຂອງລັດຖະມົນຕີ ກະຊວງກະສິກຳ ແລະ ປ່າໄມ້ ກ່ຽວກັບການສະກັດກັ້ນ ຫ້າມນຳເຂົ້າ ໝູ ແລະ ຜະລິດຕະພັນໝູ ທຸກຊະນິດ ລວມທັງຜະລິດຕະພັນ ປຸງແຕ່ງເບື້ອງຕົ້ນ ຈາກ ສປ ຈີນ ແລະ ສສ ຫວຽດນາມ ເຂົ້າ ສູ່ ສປປ ລາວ
ແຈ້ງການ ຂອງລັດຖະມົນຕີ ກະຊວງກະສິກຳ ແລະ ປ່າໄມ້ ກ່ຽວກັບການສະກັດກັ້ນ ຫ້າມນຳເຂົ້າ ໝູ ແລະ ຜະລິດຕະພັນໝູ ທຸກຊະນິດ ລວມທັງຜະລິດຕະພັນ ປຸງແຕ່ງເບື້ອງຕົ້ນ ຈາກ ສປ ຈີນ ແລະ ສສ ຫວຽດນາມ ເຂົ້າ ສູ່ ສປປ ລາວ
ຂໍ້ມູນ ໂດຍ: ພະແນກໂຄສະນາ ແລະ ຂ່າວສານ
ກອງປະຊຸມເປີດໂຄງການປູກຈິດສໍານຶກດ້ານກະສິກໍາ-ໂພຊະນາການ
ໃນອາທິດຜ່ານມາ ກົມແຜນການ ແລະການເງິນກະຊວງກະສິກໍາ ແລະປ່າໄມ້ ໄດ້ຈັດກອງປະຊຸມເປີດໂຄງການປູກຈິດສໍານຶກດ້ານກະສິກໍາ-ໂພຊະນາການ ຂຶ້ນຢູ່ສະໂມສອນກະຊວງກະສິກໍາ ແລະປ່າໄມ້ ໃຫ້ກຽດເປັນປະທານໂດຍ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະປ່າໄມ້. ພ້ອມນີ້ມີທ່ານ ຮອງເຈົ້າແຂວງ 4ແຂວງເປົ້າໝາຍຂອງໂຄງການ, ຫົວໜ້າຝ່າຍການຮ່ວມມື ຂອງສໍານັກງານຜູ້ຕາງໜ້າສະຫະພາບເອີຣົບ ແລະ ທີ່ປຶກສາເອກ ຂອງສະຖານທູດຝລັ່ງປະຈໍາລາວ. ມີຫົວໜ້າພະແນກກະສິກໍາ ແລະປ່າໄມ້ແຂວງ, ຫ້ອງການກະສິກໍາ ແລະປ່າໄມ້ເມືອງ ຂອງແຂວງເປົ້າໝາຍໂຄງການ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງກອງປະຊຸມເພື່ອເປີດໂຄງການປູກຈິດສໍານຶກດ້ານກະສິກໍາ-ໂພຊະນາການ ຢ່າງເປັນທາງການ, ລາຍງານສະພາບລວມຂອງໂຄງການ ໃນການກະກຽມເນື້ອໃນຕ່າງໆເພື່ອຈັດຕັ້ງປະຕິບັດໂຄງການ ແລະ ປຶກສາຫາລື ລະຫວ່າງຜູ້ໃຫ້ທຶນ ກັບບັນດາຄະນະຊີ້ນໍາໂຄງການ ແຕ່ລະຂັ້ນເພື່ອຄວາມເປັນເອກະພາບກອບແນວຄວາມຄິດຂອງໂຄງການກໍ່ຄືວິທີການຈັດຕັ້ງປະຕິບັດໃນຕໍ່ໜ້າໃຫ້ບັນລຸເປົ້າໝາຍທີ່ວາງໄວ້. ທ່ານ ຄອນສະຫວັນ ວົງໄຊ ຫົວໜ້າຜູ້ປະສານງານໂຄງການຂັ້ນສູນກາງ ໄດ້ຂຶ້ນລາຍງານວ່າ: ໂຄງການດັ່ງກ່າວໄດ້ຮັບການສະໜັບສະໜູນທຶນຊ່ວຍເຫຼືອລ້າຈາກສະຫະພາບເອີຣົບ ຈໍານວນ 4,7 ລ້ານເອີໂຣ, ອົງການພັດທະນາປະເທດຝລັ່ງ 1 ລ້ານເອີໂຣ ເພື່ອສະໜັບສະໜູນການຈັດຕັ້ງປະຕິບັດວຽກງານກະສິກໍາ-ໂພຊະນາການ4 ມາດຕະການໃນຍຸດທະສາດໂພຊະນາການແຫ່ງຊາດຂອງຂະແໜງການກະສິີກໍາ ແລະປ່າໄມ້ ຢູ່ 4 ແຂວງເປົ້າໝາຍຄື ແຂວງຜົ້ງສາລີ 2 ເມືອງ, ແຂວງຫົວພັນ 1 ເມືອງ ແລະແຂວງຫຼວງພະບາງ 7 ເມືອງ ແລະແຂວງຫຼວງນໍ້າທາ 1 ເມືອງ. ສໍາລັບປີທີ 1-2 ແມ່ນຈະຈັດຕັ້ງປະຕິບັດທົດລອງຢູ່ 7 ເມືອງຂອງແຂວງຫຼວງພະບາງ ສໍາລັບປີທີ 3 ແມ່ນຈະຈັດຕັ້ງປະຕິບັດບັນດາເມືອງເປົ້າໝາຍທີ່ຍັງເຫຼືອ ຊື່ງມີໄລຍະການຈັດຕັ້ງປະຕິບັດໂຄງການ 4 ປີ ເລີ່ມແຕ່ປີ 2018-2022. ນອກນັ້ນ ກອງປະຊຸມຍັງໄດ້ມີການປຶກສາຫາລື ແລະແລກປ່ຽນຄໍາຄິດຄໍາເຫັນ ໃນການເຮັດວຽກໃນຕໍ່ໜ້າ ໃຫ້ໄດ້ຮັບປະສິດທິພາບ ແລະປະສິດທິຜົນ ຕາມແຜນການຂອງໂຄງການໄດ້ວາງໄວ້.
ພາບແລະຂ່າວໂດຍ: ພະແນກໂຄສະນາ ແລະ ຂ່າວສານ
ປິດຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ຊຸດທີ XVI ແລະຝຶກອົບຮົມວຽກງານພັກ-ພະນັກງານ ຫຼັກສູດ 5 ວັນຊຸດທີ XII
ໃນຕອນບ່າຍວັນທີ 25 ກຸມພາ 2019 ຢູ່ສະໂມສອນກະຊວງກະສິກໍາ ແລະປ່າໄມ້, ກົມຈັດຕັ້ງ ແລະພະນັກງານ, ກະຊວງກະສິກໍາ ແລະປ່າໄມ້ ໄດ້ຈັດພິທີປິດຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນຊຸດທີ XVI ແລະຝຶກອົບຮົມວຽກງານພັກ-ພະນັກງານ ຫຼັກສູດ 5 ວັນຊຸດທີ XII ໃຫ້ແກ່ພະນັກງານຫຼັກແຫຼ່ງອ້ອມຂ້າງອົງຄະນະພັກກະຊວງກະສິກໍາ ແລະປ່າໄມ້ ຂຶ້ນ ໃຫ້ກຽດເປັນປະທານໂດຍ ສະຫາຍ ປອ. ລຽນ ທີແກ້ວ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງກະສິກໍາ ແລະປ່າໄມ້. ເປັນກຽດເຂົ້າຮ່ວມໂດຍສະຫາຍ ປອ. ນ. ໄກສອນ ຈັນສີດາ ຫົວໜ້າກົມວິຊາການ, ສະຖາບັນການເມືອງ ແລະການປົກຄອງແຫ່ງຊາດ. ພ້ອມດ້ວຍແຂກຖືກເຊີນ ແລະນັກສໍາມະນາກອນເຂົ້າຮ່ວມ.
ສະຫາຍ ເພັດສະໝອນ ຖານາສັກ ຮອງຫົວໜ້າກົມຈັດຕັ້ງ ແລະພະນັກງານ ໄດ້ຂຶ້ນຜ່ານບົດສະຫຼຸບໃຫ້ຮູ້ວ່າ: ຊຸດຝຶກອົບຮົມໃນຄັ້ງນີ້ ໄດ້ເລີ່ມແຕ່ວັນທີ 17 ທັນວາ 2018 ຫາ 25 ກຸມພາ 2019 ເປັນເວລາ 50 ວັນມີນັກສໍາມະນາກອນເຂົ້າຮ່ວມທັງໝົດ 50 ສະຫາຍ, ຍິງ 18 ສະຫາຍ ຊື່ງມາຈາກສະມາຊິກພັກ, ພະນັກງານຫຼັກແຫຼ່ງຂອງບັນດາຄະນະພັກຮາກຖານ, ໜ່ວຍພັກຮາກຖານ ແລະ 3 ອົງການຈັດຕັ້ງມະຫາຊົນ ອ້ອມຂ້າງອົງຄະນະພັກກະຊວງກະສິກໍາ ແລະປ່າໄມ້. ດ້ານເນື້ອໃນຫຼັກສູດແບ່ງອອກເປັນ 5 ພາກວິຊາ, ມີ 37 ບົດຄື: ພາກວິຊາປັດຊະຍາ, ເສດຖະສາດການເມືອງ, ລັດທິສັງຄົມນິຍົມວິທະຍາສາດ, ບໍລິຫານສາດ ແລະວິີຊາກໍ່ສ້າງພັກ. ສໍາລັບຝຶກອົບຮົມວຽກງານພັກ-ພະນັກງານ ຫຼັກສູດ 5 ວັນ ປະກອບມີເອກະສານວຽກພັກ-ພະນັກງານ, ວຽກແຂ່ງຂັນຍ້ອງຍໍ, ວຽກງານປະກັນສັງຄົມ ແລະວຽກງານການປະຕິບັດນະໂຍບາຍຊື່ງມີທັງໝົດ 14 ບົດ. ໃນພິທີສະຫາຍ ປອ. ນ. ໄກສອນ ຈັນສີດາ ຫົວໜ້າກົມວິຊາການ, ສະຖາບັນການເມືອງ ແລະການປົກຄອງແຫ່ງຊາດ ໄດ້ໃຫ້ກຽດຂຶ້ນມອບໃບຢັ້ງຢືນການຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ແລະ ຕໍ່ມາ ສະຫາຍ ປອ. ລຽນ ທີແກ້ວ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງກະສິກໍາ ແລະປ່າໄມ້ ໄດ້ໃຫ້ກຽດຂຶ້ນມອບໃບຢັ້ງຢືນການຝຶກອົບຮົມວຽກງານພັກ-ພະນັກງານ ຫຼັກສູດ 5 ວັນຊຸດທີ XII ພ້ອມທັງໃຫ້ກຽດໂອ້ລົມຊີ້ນໍາໃຫ້ ນັກສໍາມະນາກອນທີ່ໄດ້ເຂົ້າຮ່ວມການຝຶກອົບຮົມໃນຄັ້ງນີ້ ຈົ່ງກໍາແໜ້ນແນວຄິດການເມືອງຢ່າງໜັກແໜ້ນ ເພື່ອຍົກລະດັບວິຊາຄວາມຮູ້ຂອງຕົນ ພ້ອມທັງນໍາເອົາບົດຮຽນທີ່ໄດ້ຮຽນມາໄປຜັນຂະຫຍາຍໃນໜ້າວຽກທີ່ຕົນເອງຮັບຜິດຊອບໃຫ້ໄດ້ຮັບຜົນສໍາເລັດໃນຕໍ່ໜ້າ.
ຂ່າວແລະພາບໂດຍ: ພະແນກໂຄສະນາ ແລະ ຂ່າວສານ
ປຶກສາຫາລືກ່ຽວກັບການວາງແຜນການຮ່ວມມື ກັບຊ່ຽວຊານ ອົງການສະຫະປະຊາຊາດ
ໃນວັນທີ 16 ກຸມພາ 2018 ຫ້ອງການກະຊວງກະສິກໍາ ແລະປ່າໄມ້ ຮ່ວມກັບກົມປູກຝັງ, ກະຊວງກະສິກໍາ ແລະປ່າໄມ້ ໄດ້ຈັດກອງປະຊຸມປຶກສາຫາລືກ່ຽວກັບການວາງແຜນການຮ່ວມມືຮ່ວມກັບຊ່ຽວຊານອົງການສະຫະປະຊາຊາດ ຢູ່ສະໂມສອນກະຊວງກະສິກໍາ ແລະປ່າໄມ້ ໃຫ້ກຽດເປັນປະທານໂດຍ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປລາວ. ເຂົ້າຮ່ວມໂດຍທ່ານ ບຸນຂວາງ ຄໍາບຸນເຮືອງ ຮອງລັດຖະມົນກະຊວງກະສິກໍາ ແລະປ່າໄມ້, ມີຜູ້ຕາງໜ້າຈາກອົງການສະຫະປະຊາຊາດ, ຜູ້ຄົ້ນຄິດເຕັກໂນໂລຊີ ຈຸນສາວ, ຫົວໜ້າກົມ-ຮອງຫົວໜ້າກົມ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບຸນຈັນ ກົມບຸນຍະສິດ ຮອງຫົວໜ້າກົມປູກຝັງ ໄດ້ລາຍງານວ່າ: ຈຸດປະສົງຕົ້ນຕໍຂອງການມາເຮັດວຽກໃນຄັ້ງນີ້ ແມ່ນເພື່ອເກັບກໍາຂໍ້ມູນເບື້ອງຕົ້ນ ກ່ຽວກັບຄວາມເປັນໄປໄດ້ໃນການຖ່າຍທອດເຕັກໂນໂລຊີ ຈຸນສາວ ເຂົ້າມານໍາໃຊເຂົ້າໃນການຜະລິດກະສິກໍາ ຢູ່ ສປປ ລາວ ໂດຍແນໃສ່ເພື່ອຫຼຸດຜ່ອນຄວາມທຸກຍາກ ແລະການຜະລິດກະສິກໍາເປັນສິນຄ້າ ເພື່ອສົ່ງອອກໄປຍັງ ສປ ຈີນ. ສໍາລັບເຕັກໂນໂລຊີ ຈຸນສາວ ເປັນເຕັກໂນໂລຊີດ້ານການປູກຫຍ້າ ເພື່ອລ້ຽງສັດ, ປູກເຫັດ, ເຮັດແຜນຟາຍບອດ, ປ້ອງກັນການເຊາະເຈື່ອນ, ຫຼຸດຜ່ອນອາຍພິດເຮືອນແກ້ວ ແລະອື່ນໆ ຊື່ງເຕັກໂນໂລຊີ ດັ່ງກ່າວ ກໍາລັງນໍາໃຊ້ຢ່າງມີຜົນສໍາເລັດໃນຫຼາຍເຂດພື້ນທີ່ ຢູ່ ສປ ຈີີນ ແລະໄດ້ຖ່າຍທອດໄປຍັງຫຼາຍປະເທດທີ່ກໍາລັງພັດທະນາ. ໃນກອງປະຊຸມ ຊ່ຽວຊານ ຍັງໄດ້ຂຶ້ນສະເໜີກ່ຽວກັບປະຫວັດຄວາມເປັນມາຂອງເຕັກໂນໂຍຊີ ດັ່ງກ່າວ. ໂອກາດນີ້, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປລາວ ໄດ້ໃຫ້ທິດຊີ້ນຳແກ່ການນໍາກະຊວງກະສິກໍາ ແລະປ່າໄມ້ ເອົາໃຈໃສ່ຊີ້ນຳໆພາ ວຽກງານການຮ່ວມມືດັ່ງກ່າວ ໂດຍໃຫ້ມີແຜນດໍາເນີນການຢ່າງລະອຽດ, ແລະໃຫ້ກົມປູກຝັງກະກຽມວິຊາການທີ່ກ່ຽວຂ້ອງເພື່ອສົມທົບ ແລະອໍານວຍຄວາມສະດວກໃຫ້ແກ່ຝ່າຍຈີນ ເພື່ອເຮັດໃຫ້ວຽກງານການຮ່ວມມືໃນຄັ້ງນີ້ ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
ພາບແລະຂ່າວໂດຍ: ພະແນກໂຄສະນາ ແລະ ຂ່າວສານ
ພິທີມອບ-ຮັບເງິນສົມທົບທຶນປູກສ້າງສ້ອມແປງເຮືອນ
ໃນວັນທີ 18 ກຸມພາ 2019 ກົມຈັດຕັ້ງ ແລະພະນັກງານ, ກະຊວງກະສິກໍາ ແລະປ່າໄມ້ ໄດ້ຈັດພິທີມອບ-ຮັບເງິນສົມທົບທຶນປຸກສ້າງສ້ອມແປງເຮືອນ ໃຫ້ແກ່ພະນັກງານປະຕິວັດອາວຸໂສບໍານານ ປະຈໍາປີ 2018 ຢູ່ຫ້ອງປະຊຸມກົມຈັດຕັ້ງ ແລະ ພະນັກງານ ໃຫ້ກຽດເຂົ້າຮ່ວມໂດຍທ່ານ ປອ. ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກໍາ ແລະປ່າໄມ້. ມີຫົວໜ້າກົມ, ຮອງກົມ, ຫ້ອງການກະຊວງ, ພະນັກງານອາວຸໂສບໍານານ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມປອງ ສຸວັນນະເມທີ ຫົວໜ້າພະແນກນະໂຍບາຍ, ກົມຈັດຕັ້ງ ແລະພະນັກງານ ໄດ້ຂຶ້ນຜ່ານຂໍ້ຕົກລົງວ່າດ້ວຍການປະຕິບັດນະໂຍບາຍກູ້ຍືມເງິນເພື່ອປູກສ້າງ-ສ້ອມແປງເຮືອນ ປະຈໍາປີ 2018 ຕາມດໍາລັດ 272/ລບ, ລົງວັນທີ 16 ກັນຍາ 2015ວ່າດ້ວຍການປະຕິບັດນະໂຍບາຍຕໍ່ຜູ້ທີ່ມີຜົນງານ ແລະຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ກ່ຽວກັບເງິນ, ພະນັກງານບໍານານ ສົມທົບປູກສ້າງສ້ອມແປງເຮືອນ ປະຈໍາປີ 2018 ຈາກພັກ-ລັດຖະບານ ໃຫ້ພະນັກງານອາວຸໂສບໍານານ ຂອງບັນດາກະຊວງເວົ້າລວມ, ເວົ້າສະເພາະ ກະຊວງກະສິກໍາ ແລະປ່າໄມ້ ທີີ່ໄດ້ຮັບເງິນ ຈໍານວນ 02 ທ່ານ ເປັນເງິນຈໍານວນ 60 ລ້ານກີບ ຄື: ທ່ານ ສາຍຄໍາ ພົນທະລີຫານ, ທ່ານ ອ່ຽນ ເລືອງວັນແອງ. ເພື່ອເຮັດໃຫ້ພິທີດັ່ງກ່າວມີຄວາມໝາຍຄວາມສໍາຄັນ ທ່ານ ປອ. ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກໍາ ແລະປ່າໄມ້ ໃຫ້ກຽດມອບເງິນ ໂດຍຊ້ອງໜ້າຜູ້ເຂົ້າຮ່ວມ ແລະໄດ້ໂອ້ລົມ ຊື່ງທ່ານໄດ້ສະແດງຄວາມດີໃຈ ຕໍກັບພະນັກງານບໍານານທັງສອງທ່ານ ທີ່ໄດ້ຮັບເງິນສົມທົບທຶນໃນຄັ້ງນີ້ ແລະໃຫ້ນໍາໃຊ້ເງິນດັ່ງກ່າວແກ້ໄຂຊີວິດການເປັນຢູ່, ຍົກລະດັບຖານະຄອບຄົວໃຫ້ດີຂຶ້ນເທື່ອລະກ້າວ.
ພາບແລະຂ່າວໂດຍ: ພະແນກໂຄສະນາ ແລະ ຂ່າວສານ
