Khemmalay SONDAVANH
ພິທີສະເຫຼີມສະຫຼອງວັນເດັກນ້ອຍສາກົນ, ວັນປູກຕົ້ນໄມ້, ວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ ແລະ ການໃສ່ຝຸ່ນປັບປຸງດິນນາ ປະຈຳປີ 2018.
ພະແນກກະສິກຳ ແລະ ປ່າໄມ້ແຂວງສະຫວັນນະເຂດ ຮ່ວມກັບສຶກສາ ແລະ ກິລາແຂວງ, ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກຂັ້ນແຂວງ ພ້ອມດ້ວຍອົງການປົກຄອງເມືອງ ຈຳພອນ ແລະ ຈຸດສຸມກຸ່ມບ້ານຄຳປ່າແໜ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ, ວັນປູກຕົ້ນໄມ້, ວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ ແລະ ການໃສ່ຝຸ່ນປັບປຸງດິນນາ ປະຈຳປີ 2018 ຂຶ້ນ ທີ່ບ້ານ ຄຳປ່າ ແໜ, ເມືອງ ຈຳພອນ, ແຂວງ ສະຫວັນນະເຂດ. ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າ ແຂວງໆສະຫວັນນະເຂດ, ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງຄຶກຄື້ນ. Continue reading
ກະຊວງກະສິກຳ ແລະ ປ່າໄມ້ ຈັດພິທີປູກຕົ້ນໄມ້ 4.400 ເບ້ຍ ທີ່ສູນຄົ້ນຄວ້າປ່າໄມ້ ນໍ້າຊວງ
ເພື່ອເປັນການສ້າງຂະບວນການປູກຕົ້ນໄມ້ເນື່ອງໃນວັນປູກຕົ້ນໄມ້ແຫ່ງຊາດ ແລະ ສະເຫຼີມສະຫຼອງວັນເດັກນ້ອຍສາກົນ ຄົບຮອບ 38 ປີ (1 ມິຖຸນາ 1980-1 ມິຖຸນາ 2018) ໃຫ້ເປັນຂະບວນຟົດຟື້ນ ເພື່ອແນ່ໃສ່ບັນລຸເປົ້າໝາຍໃຫ້ມີປ່າປົກຫຸ້ມ 70 ສ່ວນຮ້ອຍ ແລະ ປູກໄມ້ໃຫ້ໄດ້ 500.000 ເຮັກຕາ ໃນປີ 2020 ຕາມຍຸດທະສາດພັດທະນາປ່າໄມ້ຂອງລັດຖະບານ ກໍຄືຕາມທິດການພັດທະນາສີຂຽວ ແລະ ຍືນຍົງ. ໃນວັນທີ 31 ພຶດສະພາ ຜ່ານມານີ້, ກະຊວງກະສິກຳ ແລະ ປ່າໄມ້ ໄດ້ຈັດພິທີປູກຕົ້ນໄມ້ຂື້ນທີ່ສູນຄົ້ນຄວ້າປ່າໄມ້ ນໍ້າຊວງ, ໂດຍການເຂົ້າຮ່ວມຂອງ ທ່ານ ປອ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ບັນດາຮອງລັດຖະມົນຕີ, ຮອງເຈົ້າເມືອງ, ອຳນາດການປົກຄອງທ້ອງຖິ່ນ, ນັກທຸລະກິດ, ອົງການຈັດຕັ້ງສາກົນ, ຊາວໜຸ່ມ ແລະ ນ້ອງນ້ອຍເຍົາວະຊົນເຂົ້າຮ່ວມຢ່າງເປັນຂະບວນຟົດຟື້ນ.
ເບ້ຍໄມ້ທີ່ນໍາມາປູກໃນຄັ້ງນີ້ມີທັງໝົດ 4.400 ເບ້ຍ, ຊຶ່ງແມ່ນໄມ້ພື້ນເມືອງທີ່ມີຄ່າຂອງລາວເຮົາເຊັ່ນ: ໄມ້ຂະຍຸງ, ໄມ້ດູ່, ໄມ້ແຕ້ຂ່າ, ໄມ້ແຄນ ແລະ ໄມ້ຍາງ ເບ້ຍໄມ້ດັ່ງກ່າວໄດ້ປູກໃນເຂດຄຸ້ມຄອງຂອງສູນຄົ້ນຄວ້າປ່າໄມ້ນໍ້າຊວງໃນເນື້ອທີ່ປະມານ 4 ເຮັກຕາ, ໂດຍມີຈຸດປະສົງແນໃສ່ປູກເພື່ອໃຫ້ກາຍເປັນປ່າ ແລະ ເປັນແຫລ່ງຕົ້ນໄມ້ພໍ່ພັນແມ່ພັນສະໜອງແກ່ນໄມ້ໃຫ້ແກ່ການປູກໄມ້ໃນອານາຄົດ.
ໃນພິທີທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ລາຍງານກ່ຽວກັບສະພາບການເຄື່ອນໄຫວ ແລະ ຜົນງານການປູກໄມ້ໃນໄລຍະຜ່ານມາວ່າ: ຜ່ານການເຄື່ອນໄຫວວຽກງານປູກໄມ້ຕົວຈິງໃນໄລຍະທີ່ຜ່ານມາ ໄດ້ເຮັດໃຫ້ເນື້ອທີ່ໄມ້ປູກເພີ່ມຂຶ້ນຈາກ 452 ເຮັກຕາ ໃນປີ 1978 ມາເປັນ 1.384 ເຮັກຕາ ໃນປີ 1985 ເພີ່ມຂຶ້ນປະມານ 3 ເທົ່າ ເມື່ອທຽບກັບຕົວເລກການປູກໄມ້ກ່ອນການກຳນົດວັນປູກຕົ້ນໄມ້ແຫ່ງຊາດ ແລະ ຈາກນັ້ນມາ ດ້ວຍການນຳພາຢ່າງໃກ້ຊິດຂອງການນຳພັກ-ລັດຂັ້ນຕ່າງໆ ບວກກັບຄວາມຕື່ນຕົວຂອງປະຊາຊົນບັນດາເຜົ່າ ແລະ ການເປີດກວ້າງການລົງທຶນ ໄດ້ເຮັດໃຫ້ເນື້ອທີ່ການປູກໄມ້ ນັບມື້ເພີ່ມຂຶ້ນຢ່າງຕໍ່ເນື່ອງ. ມາເຖິງປີ 2018 ພວກເຮົາມີເນື້ອທີ່ປູກໄມ້ທັງໝົດໃນທົ່ວປະເທດ ເຖິງ 478.557 ເຮັກຕາ ຫລື ເທົ່າກັບ 95,7 ສ່ວນຮ້ອຍ ຂອງແຜນການປູກໄມ້ຮອດປີ 2020 ຂອງລັດຖະບານ, ອັນພົ້ນເດັ່ນ ແມ່ນຂະບວນການປູກໄມ້ເປັນສິນຄ້າເຊັ່ນ: ໄມ້ສັກ, ໄມ້ວິກ, ໄມ້ເກດສະໜາ ແລະ ຢາງພາລາ ຂອງຊາວກະສິກອນ ຂອງພະນັກງານ, ທະຫານ, ຕຳຫລວດ, ກໍຄືນັກລົງທຶນທັງພາຍໃນ ແລະ ຕ່າງປະເທດ.
ໃນໂອກາດດັ່ງກ່າວນີ້, ທ່ານ ປອ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ພ້ອມດ້ວຍການນໍາກະຊວງກະສິກໍາ ແລະ ປ່າໄມ້ກໍ່ໄດ້ຮ່ວມການປູກຕົ້ນໄມ້, ຈາກນັ້ນກໍ່ໄດ້ໄປຢ້ຽມຢາມ ແລະ ຮັບຟັງການລາຍງານການຈັດຕັ້ງປະຕິບັດວຽກງານຂອງສູນຄົ້ນຄວ້າປ່າໄມ້ທ່ຽວຊົມແຫຼ່ງຕົ້ນໄມ້ພໍ່ແມ່ພັນ, ສວນປູກຫວາຍ ແລະ ຟາມລ້ຽມໝູ UDA ທີ່ ບ້ານໃໝ່ ເມືອງ ໂພນໂຮງ ແຂວງວຽງຈັນ ນໍາອີກ.
ພາບ ແລະ ຂ່າວໂດຍ: ພະແນກ ຂ່າວສານກະສິກໍາ ແລະ ປ່າໄມ້
ຝຶກອົບຮົມວິທີການປະເມີນສະພາບພົ້ນທຸກ ແລະ ພັດທະນາ ຕາມດໍາລັດ 348/ລບ
ເພື່ອສືບຕໍ່ຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII 2016-2020 ແລະ ການຈັດຕັ້ງປະຕິບັດ 3 ເສົາຄໍ້າ ຂອງກະຊວງກະສິກໍາ ແລະ ປ່າໄມ້, 4 ແຜນງານ ແລະ 10 ແຜນດໍາເນີນງານຂອງຂົງເຂດກະສິກໍາ ແລະ ປ່າໄມ້ ແລະ ພັດທະນາຊົນນະບົດ, ໃນວັນທີ 30 ພຶດສະພາ 2018 ນີ້, ກົມພັດທະນາຊົນນະບົດ ແລະ ສະຫະກອນ, ກະຊວງກະສິກໍາ ແລະ ປ່າໄມ້ ໄດ້ຈັດຝຶກອົບຮົມວິທີການປະເມີນສະພາບພົ້ນທຸກ ແລະ ພັດທະນາ ຕາມດໍາລັດ 348/ລບ ແລະ ບົດແນະນໍາເລກທີ 0830/ກປ ຂື້ນ, ທີ່ສູນຝຶກອົບຮົມເຕັກນິກກະສິກໍາ ແລະ ພັດທະນາຊົນນະບົດລາວ-ເກົາຫຼີ, ພາຍໃຕ້ການເປັນປະທານຂອງ ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ມີຫົວໜ້າຫ້ອງການ, ຫົວໜ້າກົມ, ຮອງກົມ, ພ້ອມດ້ວຍຜູ້ຕາງໜ້າຈາກບັນດາກົມ, ສະຖາບັນ ອ້ອມຂ້າງກະຊວງເຂົ້າຮ່ວມ.
ຈຸດປະສົງຂອງການເປີດຊຸດຝຶກອົບຮົມໃນຄັ້ງນີ້ເພື່ອເປັນການແນະນໍາເຄື່ອງມືວິທີເກັບກໍາຂໍ້ມູນ, ປະເມີນມາດຕະຖານການພົ້ນທຸກ ແລະ ການພັດທະນາແລ້ວມາທົດລອງປະຕິບັດຕົວຈິງ, ປະເມີນໄດ້ເຖິງຄວາມເໝາະສົມກ່ອນມີການເຜີຍແຜ່ ແລະ ນໍາໃຊ້ໃນຂອບເຂດທົ່ວປະເທດ. ໂດຍເນື້ອໃນການຝຶກອົບຮົມໃນຄັ້ງນີ້ແບ່ງອອກເປັນ 3 ພາກຄື: ພາກທິດສະດີ ແລະ ພາກນິຕິກໍາ, ພາກປະຕິບັດຕົວຈິງກ່ຽວກັບການສໍາພາດ ແລະ ການປ້ອນຂໍ້ມູນໃສ່ແບບຟອມ ແລະ ພາກສະໜາມລົງທົດສອບເກັບກໍາຂໍ້ມູນຕົວຈິງທີ່ແຂວງໄຊຍະບູລີ ຊຸດຝຶກອົບຮົມດັ່ງກ່າວໄດ້ດໍາເນີນໄປເປັນເວລາ 3 ວັນ, ເລີ່ມແຕ່ວັນທີ 30 ພຶດສະພາ ຫາວັນທີ 1 ມິຖຸນາ 2018.
ໃນໂອກາດດຽວກັນນີ້ເພື່ອເປັນການສ້າງຂະບວນການຂໍ່ານັບຮັບຕ້ອນ ແລະ ສະເຫຼີມສະຫຼອງເນື່ອງໃນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ 1 ມິຖຸນາ 2018 ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ເປັນກຽດປູກຕົ້ນໄມ້ທີ່ ສູນຝຶກອົບຮົມດັ່ງກ່າວນໍາອີກ.
ພາບ ແລະ ຂ່າວໂດຍ: ແພກຂ່າວສານກະສິກໍາ ແລະ ປ່າໄມ້
ງານວາງສະແດງຕົ້ນໄມ້ ແລະ ເບ້ຍໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມີຖຸນາ
ເພື່ອສືບຕໍ່ປະຕິບັດນະໂຍບາຍຂອງພັກ ແລະ ແຜນຍຸດທະສາດ ໃນການພັດທະນາຕາມທິດສີຂຽວ ແລະ ຍືນຍົງຂອງລັດຖະບານ ໂດຍສະເພາະຍຸດທະສາດຮອດປີ 2020. ໃນຕອນບ່າຍວັນທີ 25 ພຶດສະພາ 2018 ນີ້ ກະຊວງກະສິກໍາ ແລະ ປ່າໄມ້ ຮ່ວມກັບນະຄອນຫຼວງວຽງຈັນ ໄດ້ຈັດງານວາງສະແດງເບ້ຍໄມ້ຂຶ້ນ ຢູ່ເດີ່ນພະທາດຫຼວງ, ນະຄອນຫຼວງວຽງຈັນ. ໃຫ້ກຽດເປັນປະທານຮ່ວມໂດຍ ທ່ານ ປອ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້. ພ້ອມນີ້ຍັງມີ ຮອງລັດຖະມົນຕີ, ແຂກຖືກເຊີນ ຈາກບັນດາກະຊວງ, ອົງການທຽບເທົ່າ, ຫົວໜ້າກົມ-ຮອງກົມ ອ້ອມຂ້າງກະຊວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງເປັນຂະບວນຟົ້ດຟື້ນ.
ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ຂຶ້ນລາຍງານວ່າ: ຈຸດປະສົງ ແມ່ນເພື່ອເປັນການສ້າງຂະບວນການ ແລະ ປູກຈິດສຳນຶກ ໃຫ້ແກ່ສັງຄົມ ໂດຍສະເພາະແມ່ນ ເຍົາວະຊົນ ແລະ ອະນຸຊົນລຸ້ນຫຼັງ ໃຫ້ຮູ້ຈັກຄຸນປະໂຫຍດຂອງປ່າໄມ້ ເປັນຕົ້ນແມ່ນວຽກງານການປູກໄມ້, ໃຫ້ຮູ້ຈັກຫວງແຫນ, ອະນຸລັກ ພ້ອມທັງ ປົກປັກຮັກສາປ່າໄມ້ ແລະ ຊັບພະຍາກອນປ່າໄມ້ ຊື່ງເປັນຊັບສົມບັດຂອງຊາດ ແລະເພື່ອເປັນການສ້າງຂະບວນການ ຂໍ່ານັບຮັບຕ້ອນວັນປູກຕົ້ນໄມ້ແຫ່ງຊາດ ຄົບຮອບ 38 ປີ ໂດຍຕິດພັນກັບການສະເຫຼີມສະຫຼອງວັນເດັກນ້ອຍສາກົນ ວັນທີ 1 ມີຖຸນາ. ນອກນັ້ນ, ຍັງເປັນການຊຸກຍູ້ດ້ານທຸລະກິດກ້າເບ້ຍໄມ້ ໃຫ້ມີການຂະຫຍາຍຕົວຢ່າງກວ້າງຂວາງ. ສໍາລັບງານວາງສະແດງເບ້ຍໄມ້ຄັ້ງນີ້ ມີຜູ້ເຂົ້າຮ່ວມທັງພາກລັດ, ບັນດາບໍລິສັດ ຫ້າງຮ້ານ, ຜູ້ປະກອບການ ທັງໝົດ 78 ພາກສ່ວນ, ເບ້ຍໄມ້ທີ່ນໍາມາວາງສະແດງ 30 ຊະນິດ ຊື່ງເປັນປະເພດໄມ້ພື້ນເມືອງເຊັ່ນ: ໄມ້ຂະຍຸງ, ໄມ້ຄໍາພີ້, ໄມ້ດູ່ລາຍ, ໄມ້ດູ່, ໄມ້ແຕ້ຂ່າ,ໄມ້ຍາງ ໄມ້ແຄນເຮືອ, ໄມ້ແຄນຂະຍອມ, ສີໄຄຕົ້ນ, ຈໍາປີປ່າ, ສະຝາງ, ໄມ້ຕິ້ວເປັນຕົ້ນ. ນອກນັ້ນ, ຍັງມີ ປະເພດໄມ້ໃຫ້ໝາກ,ໄມ້ປະດັບ, ຜະລິດຕະພັນໄມ້ ລວມທັງຜະລິດຕະພັນກະສິກໍາ ນໍາອີກ. ເພື່ອເຮັດໃຫ້ງານດັ່ງກ່າວມີຄວາມໝາຍສໍາຄັນ ຄະນະປະທານ ພ້ອມດ້ວຍບັນດາແຂກທີ່ເຂົ້າຮ່ວມ ໄດ້ໃຫ້ກຽດຂຶ້ນຕັດແຖບຜ້າ ເປີດງານ ພ້ອມທັງ ທ່ຽວຊົມການວາງສະແດງເບ້ຍໄມ້ ແລະ ສິນຄ້າຕ່າງໆ ພາຍໃນງານນໍາອີກ.
ພາບ ແລະ ຂ່າວໂດຍ: ພະແນກຂ່າວສານກະສິກໍາ ແລະ ປ່າໄມ້
ກອງປະຊຸມປຶກສາຫາລືເນື້ອໃນ “ຮ່າງ” ກົດໝາຍວ່າດ້ວຍປ່າໄມ້ ສະບັບປັບປຸງ
ເພື່ອປະຕິບັດຕາມຂໍ້ຕົກລົງສະບັບເລກທີ 1113/ກປ, ລົງວັນທີ 21 ພຶດສະພາ 2018. ວ່າດ້ວຍການອະນຸມັດເປີດກອງປະຊຸມ ທາບທາມຮ່າງກົດໝາຍວ່າດ້ວຍປ່າໄມ້ ສະບັບປັບປຸງ, ໃນວັນທີ 23 ພຶດ ສະພາ 2018 ກົມປ່າໄມ້ໄດ້ຈັດກອງປະຊຸມປຶກສາຫາລືເນື້ອໃນ “ຮ່າງ” ກົດໝາຍວ່າດ້ວຍປ່າໄມ້ ສະບັບປັບປຸງ ຂຶ້ນ ທີ່ສະໂມສອນກະຊວງກະສິກຳ ແລະ ປ່າໄມ້ ໃຫ້ກຽດເປັນປະທານໂດຍ ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ມີ່ທານຮອງລັດຖະມົນຕີກະຊວງ ກປ, ບັນດາທ່ານ ຮອງລັດຖະມົນຕີຈາກກະຊວງທີ່ກ່ຽວຂ້ອງ, ຕາງໜ້າຄະນະກຳມະທິການສະພາແຫ່ງຊາດ, ທ່ານຫົວ ໜ້າ-ຮອງຫົວໜ້າ ຫ້ອງການ, ກົມ, ສະຖາບັນ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ. Continue reading
ລັດຖະມົນຕີກະຊວງ ກະສິກໍາ ແລະ ປ່າໄມ້ ຕ້ອນຮັບເອກອັກຄະລັດຖະທູດ ເວເນຊູເອຣາ ປະຈໍາລາວ
ໃນຕອນບ່າຍຂອງວັນທີ 18 ພຶດສະພາ ທີ່ກະຊວງກະສິກໍາ ແລະ ປ່າໄມ້ ທ່ານ ປອ ລຽນ ທີແກ້ວ ລັດຖະມົນຕີກະຊວງ ກະສິກໍາ ແລະ ປ່າໄມ້, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຈອດສ ຣອນດອນ ອຸດສກາເຕີກີ (Jorge RondOn Uzcategui) ເອກອັກຄະລັດຖະທູດ ແຫ່ງ ສາທາລະນະລັດ ໂບລິວາຣຽນ ແຫ່ງເວເນຊູເອຣາ ປະຈໍາ ສປປ ລາວ, ເນື່ອງໃນໂອກາດເຂົ້າດໍາລົງຕໍາແໜ່ງເປັນເອກອັກຄະລັດຖະທູດຄົນໃໝ່ປະຈໍາ ສປປ ລາວ, ໃນໂອກາດດັ່ງກ່າວນີ້ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ແຫ່ງ ສປປ ລາວ ໄດ້ໃຫ້ການຕ້ອນຮັບຢ່າງອົບອຸ່ນພ້ອມທັງຕີລາຄາສູງຕໍ່ການມາຢ້ຽມຢາມຂອງທ່ານ ເອກອັກຄະລັດຖະທູດໃນຄັ້ງນີ້ເຊິ່ງເປັນການປະກອບສ່ວນອັນສໍາຄັນ ເຂົ້າໃນວຽກງານເສີມຂະຫຍາຍສາຍພົວພັນຮ່ວມມືລະ ຫວ່າງສອງປະເທດໃຫ້ມີຄວາມໜັກແໜ້ນ, ເຂັ້ມແຂງຍິ່ງຂຶ້ນ, ໃນການພົບປະຄັ້ງນີ້ທັງສອງຝ່າຍໄດ້ປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນໃນຫຼາຍໆດ້ານໂດຍໄດ້ເນັ້ນໃສ່ວຽກງານຂອງຂະແໜງກະສິກໍາ, ການສົ່ງເສີມຜະລິດຕະພັນກະສິກໍາ ແລະ ວຽກການພັດທະນາປັບປຸງຊີວິດການເປັນຢູ່ຂອງປະຊາຊົນໃນເຂດຊົນນະບົດໃຫ້ດີຂື້ນ, ໂດຍໃນຕອນທ້າຍລັດຖະມົນຕີກະຊວງກະສິກໍາ ແລະ ປ່າໄມ້ໄດ້ສະແດງຄວາມຍ້ອງຍໍ ແລະ ຂອບໃຈຕໍ່ການມາຢ້ຽມຢາມໃນຄັ້ງນີ້ ແລະ ຫວັງວ່າໃນໄລຍະຂອງການດໍາລົງຕໍາແໜງຂອງທ່ານອັກຄະລັດຖະທູດຈະເຮັດໃຫ້ການຮ່ວມມື, ສາຍພົວພັນລະຫວ່າງ 2 ປະເທດນັບມື້ນັບຂະຫຍາຍຕົວຫຍິ່ງໆຂື້ນ.
ພາບ ແລະ ຂ່າວໂດຍ: ພະແນກຂ່າວສານກະສິກໍາ ແລະ ປ່າໄມ້
ທ່ານ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ລົງຊຸກຍູ້ຕິດຕາມການກໍາຈັດ ຕັກແຕນຝຸງໄມ້ປ່ອງ ຢູ່ແຂວງຫົວພັນ
ໃນທ້າຍອາທິດຜ່ານມາ, ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ລົງຊຸກຍູ້ ການກໍາຈັດຕັກແຕນຝຸງໄມ້ປ່ອງ ຢູ່ເມືອງຮ້ຽມ, ແຂວງຫົວພັນ ໃຫ້ກຽດຕ້ອນຮັບໂດຍ ທ່ານ ລາຄອນ ວົງລາສີ ຮອງເຈົ້າເມືອງ-ເມືອງຮ້ຽມ. ເຂົ້າຮ່ວມມີ ທ່ານ ບຸນຄໍາ ສີດາວົງ ຫົວໜ້າພະແນກກະສິກໍາ ແລະປ່າໄມ້ແຂວງຫົວພັນ, ຫ້ອງການກະສິກໍາ ແລະ ປ່າໄມ້ເມືອງຮ້ຽມ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. Continue reading
ການນໍາກະຊວງກະສິກໍາ ແລະປ່າໄມ້ ລົງຊຸກຍູ້ການຜະລິດກະສິກໍາ ຢູ່ແຂວງ ຊຽງຂວາງ
ໃນລະຫວ່າງວັນທີ 1-2 ພຶດສະພາ ນີ້ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ ໄດ້ລົງຊຸກຍູ້ການຜະລິດກະສິກໍາ ຢູ່ພະແນກກະສິກໍາ ແລະ ປ່າໄມ້ ແຂວງຊຽງຂວາງ ໃຫ້ກຽດເຂົ້າຮ່ວມໂດຍທ່ານ ຄໍາປາວ ມົວ ຮອງເຈົ້າແຂວງ ແຂວງຊຽງຂວາງ ມີບັນດາຫົວໜ້າຂະແໜງ-ຮອງຂະແໜງ ພ້ອມດ້ວຍວິຊາການພາຍໃນພະແນກເຂົ້າຮ່ວມ. ໂອກາດນີ້, ທ່ານ ວຽງຄໍາ ຈັນທະລາ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ ໄດ້ລາຍງານຜົນການຈັດຕັ້ງປະຕິບັດວຽກງານໃນໄລຍະ 3 ເດືອນຕົ້ນປີ 2018 ວ່າ: ຜ່ານມາ ການນໍາພະແນກໄດ້ເອົາໃຈໃສ່ຕໍ່ວຽກງານແຜນງານຄໍ້າປະກັນຄວາມໝັ້ນຄົງທາງດ້ານສະບຽງອາຫານ ສາມາດສະໜອງຊີ້ນ, ປາ ແລະໄຂ່ ໃຫ້ຕະຫຼາດເທດສະບານແຂວງ, ບັນດາເມືອງ ໄດ້ພຽງພໍໂດຍພື້ນຖານ ແລະສາມາດແກ້ໄຂຄວາມທຸກຍາກຂອງຄອບຄົວອາຊີບເຮັດໄຮ່ໃນຊົນນະບົດໄດ້ເທື່ອລະກ້າວ, ແຜນງານການຜະລິດເປັນສິນຄ້າ ສາມາດສົ່ງສິນຄ້າອອກ ສາລີແຂງ ຈໍານວນ 122.600 ກວ່າໂຕນ, ຖົ່ວດິນ 125 ໂຕນ, ຂິງ 253 ໂຕນ, ເຂົ້າເປືອກ 4 ພັນກວ່າໂຕນ, ເຂົ້າສານ 45 ໂຕນ ແລະ ງ່າໝາກຄາຍ ໄດ້ 2 ພັນກວ່າງ່າ. Continue reading
ກອງປະຊຸມປຶກສາຫາລືເນື້ອໃນຮ່າງກົດໝາຍ ວ່າດ້ວຍປ່າໄມ້ສະບັບປັບປຸງ
ໃນລະຫວ່າງວັນທີ 7-8 ພຶດສະພາ ກະຊວງກະສິກໍາ ແລະປ່າໄມ້ ໄດ້ເປີດກອງປະຊຸມປຶກສາຫາລືເນື້ອໃນຮ່າງກົດໝາຍ ວ່າດ້ວຍປ່າໄມ້ສະບັບປັບປຸງ ປະຈໍາພາກເໜືອ ຢູ່ຫ້ອງປະຊຸມພະແນກ ກະສິກໍາ ແລະປ່າໄມ້ ແຂວງອຸດົມໄຊ. ໃຫ້ກຽດເປັນປະທານຮ່ວມໂດຍ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງ ກະສິກໍາ ແລະ ປ່າໄມ້, ທ່ານ ສົມຈິດ ປັນຍາສັກ ຮອງເຈົ້າແຂວງ-ແຂວງອຸດົມໄຊ. ມີຜູ້ແທນມາຈາກສະພາປະຊາຊົນຂັ້ນແຂວງ, ໄອຍະການແຂວງ, ພະແນກກະສິກໍາ ແລະ ປ່າໄມ້ ແຂວງ, ກະຊວງຊັບພະຍາກອນ ແລະສິ່ງແວດລ້ອມ ພ້ອມດ້ວຍພາກສ່ວນກ່ຽວຂ້ອງ ທີ່ມາຈາກ 7 ແຂວງພາກເໜືອເຂົ້າຮ່ວມ. Continue reading
ທ່ານລັດຖະມົນຕີຊຸກຍູ້ວຽກງານກະສິກຳ, ປ່າໄມ້ ແລະ ພັດທະນາຊົນນະບົດ
ໃນວັນທີ 11 ພຶດສະພາ 2018 ທ່ານ ລຽນທີແກ້ວລັດຖະມົນຕີກະຊວງກະສິກຳ ແລະປ່າໄມ້, ພ້ອມດ້ວຍຄະນະລົງຊຸກຍູ້ວຽກງານກະສິກຳ, ປ່າໄມ້ ແລະພັດທະນາຊົນນະບົດທີ່ພະແນກກະສິກຳ ແລະປ່າໄມ້ແຂວງບໍລິຄຳໄຊ. ມີຫົວໜ້າ, ຮອງຫົວໜ້າພະແນກກປ ແລະພະນັກງານວິຊາການເຂົ້າຮ່ວມຢ່າງພ້ອມພຽງ. Continue reading
