ກອງປະຊຸມທົບທວນການຈັດຕັ້ງປະຕິບັດວຽກງານຄວາມກ້າວໜ້າແມ່ຍິງ ແລະ ແມ່-ເດັກ ປະຈໍາປີ 2017
ເພື່ອເປັນການທົບທວນຄືນກ່ຽວກັບການເຄື່ອນໄຫວ ແລະ ຄວາມຄືບໜ້າໃນການຈັດຕັ້ງປະຕິບັດວຽກງານຄວາມກ້າວໜ້າຂອງແມ່ຍິງ ແລະ ແມ່ ແລະ ເດັກ ໃນໄລຍະຜ່ານມາ, ໃນວັນທີ 18-19 ມັງກອນນີ້, ຫ້ອງການກະຊວງ, ກະຊວງກະສິກຳ ແລະ ປ່າໄມ້ໄດ້ຈັດກອງປະຊຸມທົບທວນຄືນວຽກງານຄວາມກ້າວໜ້າແມ່ຍິງ ແລະ ແມ່-ເດັກ ປະຈຳປີ 2017 ຂື້ນ, ທີໂຮງແຮມທະວີສຸກ, ເມືອງ ວັງວຽງ, ແຂວງວຽງຈັນ, ໂດຍການເປັນທານຂອງທ່ານ ຄຳບຸນນັດ ໄຊຍະນົນ ຮອງລັດຖະມົນຕີ ກະຊວງ ກະສິກຳ ແລະ ປ່າໄມ້, ທັງເປັນຫົວໜ້າຄະນະກຳມາທິການຄວາມກ້າວໜ້າແມ່ຍິງ ແລະ ແມ່-ເດັກ, ມີຮອງຫົວໜ້າຫ້ອງການ, ຮອງກົມ, ຫົວໜ້າພະແນກ, ຮອງພະແນກ ຕາງໜ້າຈາກບັນດາກະຊວງອ້ອມຂ້າງ, ໂຄງການ ແລະ ແຂກຖືກເຊີນເຂົ້າຮ່ວມ 116ທ່ານ, ຍິງ 59 ທ່ານ.
ຈຸດປະສົງເພື່ອເປັນການສະຫຼຸບການຈັດຕັ້ງປະຕິບັດວຽກງານຄວາມກ້າວໜ້າຂອງແມ່ຍິງ ແລະ ແມ່-ເດັກປະຈຳປີ 2017 ແລະ ທິດທາງແຜນການປີ 2018, ພ້ອມທັງຖອດຖອນບົດຮຽນວຽກງານດັ່ງກ່າວໃນຂະແໜງການກະສິກຳ ແລະ ປ່າໄມ້ ເປັນຕົ້ນ ການມີສ່ວນຮ່ວມຂອງແມ່ຍິງໃນວຽກງານປູກຝັງລ້ຽງສັດ, ຊົນລະປະທານ, ວຽກງານປ່າໄມ້, ວຽກພັດທະນາຊົນນະບົດ, ວຽກງານຈັດຕັ້ງ ແລະ ພະນັກງານ, ການວາງແຜນ ແລະ ອື່ນໆ, ພ້ອມນີ້ໃນທີ່ປະຊຸມຍັງໄດ້ສົນທະນາ ແລກປ່ຽນບົດຮຽນ ແລະ ໄດ້ຍົກບາງບັນຫາກ່ຽວກັບການປົກປ້ອງແຮງງານແມ່ຍິງ ແລະ ເດັກ, ຄວາມບໍ່ສະເໝີພາບຂອງຍິງ-ຊາຍໃນຂົງເຂດຂະແໜງການກະສິກໍາ ແລະ ປ່າໄມ້ ແລະ ເພື່ອເປັນການຊຸກຍູ້ສົ່ງເສີມໃຫ້ແມ່ຍິງໄດ້ຮັບການພັດທະນາໃນທຸກໆດ້ານນັ້ນ, ໃນຕອນທ້າຍທ່ານປະທານໄດ້ເນັ້ນບາງບັນຫາທີ່ຕ້ອງໄດ້ເອົາໃຈໃສ່ ແລະ ໜ້າວຽກທີ່ຕ້ອງໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າຄື: ສືບຕໍ່ຜັນຂະຫຍາຍວິໄສທັດ 2030 ຍຸດທະສາດເພື່ອຄວາມສະເໝີພາບຍິງ-ຊາຍຂອງຂະແໜງກະສິກໍາ, ປ່າໄມ້ ແລະ ພັດທະນາຊົນນະບົດ ແຕ່ປີ 2016-2025 ຕິດພັນກັບແຜນງານລະອຽດສາມາດເຊື່ອມເຂົ້າກັບ 3 ເສົາຄ້ຳ ແລະ ເປົ້າຫມາຍສອດຄ່ອງກັບຂະບວນການຈັດຕັ້ງວຽກງານສາມສ້າງຂອງກົມການເມືອງສູນກາງພັກຕາມ 4 ບາດກ້າວບຸກທະລຸ, ສືບຕໍ່ສ້າງ ແລະ ປັບປຸງການ ຈັດຕັ້ງວຽກງານຄວາມກ້າວໜ້າແມ່ຍິງ ແລະ ແມ່-ເດັກແຕ່ລະຂັ້ນໃຫ້ມີຄວາມເຂັ້ມແຂງ, ເອົາໃຈໃສ່ຄົ້ນຄວ້າບັນຫາທີເປັນຂໍ້ຈຳກັດຕໍ່ບົດບາດຍິງ-ຊາຍ ແລະ ການສົ່ງເສີມ ຄວາມກ້າວໜ້າແມ່ຍິງເພື່ອຊອກຫາວິທີແກ້ໄຂ, ປະສານສົມທົບກັບກອງເລຂາຄະນະກຳມະການແຫ່ງຊາດຄວາມກ້າວໜ້າແມ່ຍິງ ແລະ ແມ່ - ເດັກ ແລະ ແຕ່ລະຂັ້ນເພື່ອສືບຕໍ່ແຜນຍຸດທະສາດຄວາມສະເໝີພາບຍິງ-ຊາຍຂະແໜງ ກະສິກໍາ ແລະ ປ່າໄມ້, ໃຫ້ບັນລຸຕາມເປົ້າໝາຍ, ຄະນະຊີ້ນຳແຕ່ລະຂັ້ນຕ້ອງສ້າງແຜນງານປະຈຳປີພ້ອມນຳສະເໜີການນຳຂັ້ນຂອງຕົນເພື່ອຈັດແບ່ງງົບປະມານໃຫ້ວຽກງານໄດ້ເຄື່ອນໄຫວຕິດພັນກັບວຽກງານອື່ນຄຽງຄູ່ກັນ. ກອງປະຊຸມໄດ້ດໍາເນີນໄປເປັນເວລາ 2 ວັນຈຶ່ງໄດ້ອັດລົງດ້ວຍຜົນສໍາເລັດອັນຈົບງາມ.
ຂຽນໂດຍ: ນ. ສີອໍາມອນ ໄຊຍະລາດ
ກວດແກ້ໂດຍ: ທ່ານ ຂັນຄໍາ ອ້ວນອຸດົມ
