ກອງປະຊຸມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ
ໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ ໄດ້ດຳເນີນໜ້າງວຽກໄປຈຳນວນໜຶ່ງແລ້ວ ເຊິ່ງຄະນະຮັບຜິດຊອບກະກຽມໂຄງການຂັ້ນສູນກາງ ໄດ້ປະສານສົມທົບ ແລະ ປຶກສາຫາລືກັບທະນາຄານພັດທະນາອາຊີ(ADB) ກໍ່ຄືບັນດາຄູ່ຮ່ວມພັດທະນາຕ່າງໆ ແລະ ບັນດາຂະແໜງການທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນ ແລະ ຊາວກະສິກອນໃນກຸ່ມເປົ້າໝາຍ.
ໃນວັນທີ 13 ມີນາ 2018 ກົມຊົນລະປະທານ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມລິເລີ່ມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງຂຶ້ນ ທີ່ໂຮງແຮມຫຼວງພະບາງວິວ, ແຂວງ ຫຼວງພະບາງ ໂດຍການເປັນປະທານຂອງ ທ່ານ ປອ ພວງປາຣິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້, ເຊິ່ງມີທ່ານຮອງເຈົ້າແຂວງໆໄຊຍະບູລີ, ຊຽງຂວາງ ແລະ ແຂວງຫົວພັນ; ການນຳກົມອ້ອມຂ້າງກະຊວງ ກປ; ພະແນກ ກປ ແຂວງ; ຜູ້ໃຫ້ທຶນ, ອົງການຈັດຕັ້ງສາກົນ ແລະ ຊ່ຽວຊານທັງພາຍໃນ ແລະ ຕ່າງປະເທດ; ຜູ້ປະສານງານໂຄງການຂັ້ນສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມເພື່ອເປັນການເປີດບັ້ນລິເລີ່ມການກະກຽມຂຽນບົດສະເໜີໂຄງການ ໃຫ້ສຳເລັດຕາມແຜນການທີ່ວາງໄວ້ ແລະ ເພື່ອເປັນການແຈ້ງໃຫ້ທຸກພາກສ່ວນຮັບຊາບຢ່າງເປັນທາງການ. ໂຄງການດັ່ງກ່າວໄດ້ກຳນົດເອົາ 4 ແຂວງເປົ້າໝາຍຄື: ແຂວງ ຫົວພັນ, ຊຽງຂວາງ, ຫຼວງພະບາງ ແລະ ແຂວງ ໄຊຍະບູລີ ເນື່ອງຈາກວ່າບັນດາແຂວງ ດັ່ງກ່າວນອນໃນມາດຖານເງື່ອນໄຂໃນການກຳນົດເຂດເປົ້າໝາຍໂຄງການຂອງ ADB ແລະ ເປັນແຂວງທີ່ ADB ເຄີຍສະໜັບສະໜູນໂຄງການພັດທະນາຊົນລະປະທານຂະໜາດນ້ອຍ. ນອກຈາກນີ້, ກໍ່ແມ່ນແຂວງທີ່ນອນໃນ 10 ແຂວງເປົ້າໝາຍໃນການຊຸກຍູ້ສົ່ງເສີມການຜະລິດສະບຽງອາຫານ ແລະ ການຜະລິດກະສິກຳເປັນສິນຄ້າຂອງລັດຖະບານ.
ໃນຕອນທ້າຍຂອງກອງປະຊຸມກໍ່ໄດ້ມີການເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງກະສິກຳ ແລະ ປ່າໄມ້ ຕາງໜ້າເຊັນໂດຍ ທ່ານ ປອ ພວງປາຣິສັກ ປຣະວົງວຽງຄຳ ຮອງລັດຖະມົນຕີກະຊວງ ກປ, ແຂວງເປົ້າໝາຍຕາງໜ້າເຊັນໂດຍ ທ່ານ ປອ ບົວຄົງ ນາມມະວົງ ຮອງເຈົ້າແຂວງໆຫຼວງພະບາງ, ທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ, ທ່ານ ປອ ຄຳປາວ ມົວ ຮອງເຈົ້າແຂວງໆຊຽງຂວາງ, ທ່ານ ພັນທອງ ເພັດໄຊສົມພັນ ຮອງເຈົ້າແຂວງໆຫົວພັນ; ຕາງໜ້າທະນາພັດທະນາອາຊີ (ADB) ເຊັນໂດຍ ທ່ານ ເດວິດ ຊໍເຕີ (Dvid Salter) ໂດຍມີຜູ້ເຂົ້າຮ່ວມກອງປະຊຸມທັງໝົດເປັນສັກຂີພະຍານ.
ພາບ ແລະ ຂ່າວໂດຍ: ພະແນກຂ່າວສານ ກປ.
