ພິທີເປີດປ້າຍວັງສະຫງວນອ່າງນ້ຳຊວງ
ໃນວັນທີ 31 ຕຸລາ 2018 ນີ້ ກົມລ້ຽງສັດ ແລະ ການປະມົງ, ກະຊວງກະສິກຳ ແລະ ປ່າໄມ້ ໄດ້ຈັດພິທີເປີດປ້າຍວັງສະຫງວນອ່າງນ້ຳຊວງຂຶ້ນ ທີ່ບ້ານ ແຈ້ງສະຫວ່າງ, ເມືອງ ໂພນໂຮງ, ແຂວງ ວຽງຈັນ. ໂດຍການເຂົ້າຮ່ວມຂອງ ທ່ານ ບຸນທອງ ຊາພັກດີ ຮອງຫົວໜ້າກົມລ້ຽງສັດ ແລະ ການປະມົງ,ທ່ານ ອາກິໂຕະ ຊາໂຕະ ຮອງອົງການ ເຊັບເດຼັກ (SEAFDEC), ທ່ານ ຕາກູໂຣະ ຊີບູໂນະ ຮອງອົງການປະມົງນ້ຳຈືດ, ພ້ອມດ້ວຍອຳນາດການປົກຄອງບ້ານ, ປະຊາຊົນບ້ານແຈ້ງສະຫວ່າງ, ທະ ຫານ, ຕຳຫຼວດ ແລະປະຊາຊົນ 15 ບ້ານອ້ອມຂ້າງເຂົ້າຮ່ວມ.
ໂຄງການຄຸ້ມຄອງຊັບພະຍາກອນປະມົງ ແມ່ນໂຄງການໜຶ່ງທີ່ໄດ້ເລີ່ມສຳຫຼວດເກັບກຳຂໍ້ມູນໃນເດືອນ ມີນາ 2016 ເພື່ອຊອກຫາພື້ນທີ່ ທີ່ເໝາະສົມ ລະຫວ່າງ 2 ອ່າງຄື: ນ້ຳຫຸມ ແລະນ້ຳຊວງ, ຊຶ່ງຜ່ານການສຳຫຼວດ ໄດ້ເຫັນດີຄັດເລືອກເອົາອ່າງນ້ຳຊວງທີ່ຂຶ້ນກັບ 2 ເມືອງຄື: ເມືອງ ໂພນໂຮງ, ແຂວງ ວຽງຈັນ ແລະ ເມືອງນາຊາຍທອງ, ນະຄອນຫຼວງວຽງຈັນ, ພາຍຫຼັງທີ່ໄດ້ເປີດກອງປະຊຸມວາງແຜນຮ່ວມກັນ ລະຫວ່າງ ສູນກາງ (ກົມ), ນະຄອນຫຼວງ, ແຂວງວຽງຈັນ ແລະ 2 ເມືອງທີ່ເປັນທີ່ຕັ້ງຂອງໂຄງການໃນເດືອນພຶດສະພາ ປີ 2016, ໂດຍກຳນົດເວລາຂອງໂຄງການແມ່ນ 3 ປີ (ເດືອນພຶດສະພາ 2016 ເຖິງເດືອນເມສາ ປີ 2019), ສ່ວນລກິດຈະກຳຂອງໂຄງການແມ່ນປະກອບມີ: ຈັດກອງປະຊຸມສ້າງຕັ້ງຄະນະກໍາມະການຄຸ້ມຄອງອ່າງຂຶ້ນ 2 ຄະນະ (ແຕ່ສຳລັບນ້ຳຊວງຕອນລຸ່ມ ມີຄະນະກຳມະການ ທີ່ສ້າງຕັ້ງໂດຍ MRC), ຈັດກອງປະຊຸມຮ່າງກົດລະບຽບ (ນ້ຳຊວງຕອນເທິງ), ກອງປະຊຸມຜ່ານກົດລະບຽບຮ່ວມກັນ (2 ນ້ຳຊວງ), ພ້ອມທັງ ຈັດຝຶກອົບຮົມການຄຸ້ມຄອງປະມົງທີ່ດີໃຫ້ແກ່ພະນັກງານ 2 ແຂວງ ແລະ 2 ເມືອງ, ຈັດຝຶກອົບຮົມການປະສົມພັນປາ ແລະ ຟັກໄຂ່ປາ ໂດຍນຳໃຊ້ເຄື່ອງຟັກໄຂ່ແບບເຄື່ອນທີ່, ຄະນະກຳມະການໄດ້ທົດລອງປະສົມພັນ ໂດຍນຳໃຊ້ເຄື່ອງຟັກໄຂ່ແບບເຄື່ອນທີ່ 2 ເທື່ອ ແລະປະກອບເຄື່ອງປະສົມພັນປາ, ປັກຫຼັກໝາຍວັງສະຫງວນ 2 ວັງ ແລະ ປັກປ້າຍນ້ອຍໃສ່ວັງສະຫງວນຕາມລະດູການ.ນອກນັ້ນ, ຍັງຈັດກິດຈະກໍາເກັບກຳຂໍ້ມູນເສດດ້ານຖະກິດ ຂອງຄອບຄົວຊາວປະມົງໃນສອງອ່າງ ແລະ ສົ່ງໃຫ້ວິຊາການຂອງໂຄງການວິເຄາະວິໄຈຂໍ້ມູນດັ່ງກ່າວ.
ໂດຍ: ພະແນກໂຄສະນາ ແລະ ຂ່າວສານ.
