ກອງປະຊຸມ ຄະນະກໍາມະການ ແຜນງານຄູ່ຮ່ວມກາກບອນປ່າໄມ້ (FCPF)
ໃນລະຫວ່າງວັນທີ 25-27 ກັນຍາ 2017 ກົມປ່າໄມ້, ກະຊວງກະສິກໍາ ແລະ ປ່າໄມ້ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບກຽດເປັນເຈົ້າພາບ ຈັດກອງປະຊຸມ ຄະນະກໍາມະການ ຂອງແຜນງານຄູ່ຮ່ວມກາກບອນປ່າໄມ້ (FCPF)ຄັ້ງທີ 24ຂຶ້ນທີ່ ໂຮງແຮມສັນຕິ ຣີສອດ, ແຂວງ ຫຼວງພະບາງ ໃຫ້ກຽດເປັນປະທານຮ່ວມໂດຍທ່ານ ປອ. ພວງປາຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະປ່າໄມ້, ທ່ານ ວົງສະຫວັນ ເທບພະຈັນ ຮອງເຈົ້າແຂວງໆ ຫຼວງພະບາງ, ທ່ານ ຊ່ອງ ຄຣິດສະຕອບ ກາເຣ ຫົວໜ້າທະນາຄານໂລກ ປະຈໍາລາວ. ພ້ອມນີ້ ມີແຂກທີ່ຖືກເຊີນມາຈາກ 5 ທະວີບ ມີ 60 ປະເທດ ເຂົ້າຮ່ວມທັງໝົດ 100 ກວ່າທ່ານ. ຈຸດປະສົງປະສົງກອງປະຊຸມໃນຄັ້ງນີ້ເພື່ອເປັນການ ຮັບຮອງເອົາແຜນງານ ຄົບຊຸດ ຂອງການກຽມຄວາມພ້ອມຂອງປະເທດສະມາຊິກ ຄື: ເອທິໂອເປັຍ, ອິນໂດເນເຊຍ, ລີເບີເຣຍ, ມາດາກາສກາ ແລະ ນີກາລາກົວ ແນ່ໃສ ຊຸກຍູ້ ແລະ ສະໜັບສະໜູນ ໃຫ້ປະເທດດັ່ງກ່າວ ສາມາດນໍາສົ່ງ ບົດສະເໜີໂຄງການ ສ້າງສິນເຊື່ອກາກບອນປ່າໄມ້ ໃຫ້ແກ່ ກອງທຶນກາກບອນປ່າໄມ້; ຮັບຮອງເອົາ ການສະເໜີເພີ່ມງົບປະມານ ໃຫ້ແກ່ປະເທດສະມາຊິກ ຄື: ແອວສາວາດໍ້, ໄນຈີເຣຍ ແລະ ໂຕໂກ; ປະເມີນບົດສະເໜີໂຄງການສ້າງຄວາມພ້ອມ ກ່ຽວກັບວຽກງານຫຼຸດຜ່ອນອາຍເຮືອນແກ້ວ ຈາກການທໍາລາຍປ່າໄມ້. ພ້ອມນີ້, ໃນທີປະຊຸມຍັງໄດ້ສະເໜີຂໍ້ມູນລ້າສຸດ ກ່ຽວກັບງົບປະມານ ສໍາລັບການກຽມຄວາມພ້ອມ ຂອງຄູ່ຮ່ວມກາກບອນປ່າໄມ້ສາກົນ, ຜົນການທົບທວນ ກອບວຽກທາງດ້ານການຕິດຕາມ ກວດກາ ແລະ ປະເມີນຜົນ ຂອງຄູ່ຮ່ວມກາກບອນປ່າໄມ້ສາກົນ ແລະ ສະເໜີຜົນການຈັດຕັ້ງປະຕິບັດວຽກງານປະຈໍາປີ 2017 ທາງດ້ານວິຊາການ, ສະຫຼຸບລາຍງານດ້ານງົບປະມານ ລວມທັງ ສະຖານະພາບ, ແຜນງານການສ້າງຄວາມເຂັ້ມແຂງ ໃຫ້ແກ່ປະຊາຊົນບັນດາເຜົ່າ ແລະ ອົງການຈັດຕັ້ງທາງສັງຄົມ ນໍາອີກ.
ຂຽນຂ່າວໂດຍ: ສອນເພັດ ສຸລິພອນ 25/ 09/ 2017
ກວດແກ້ໂດຍ: ທ່ານ ເຂັມພອນ ທິພົມມະຈັນ