Khemmalay SONDAVANH
ພິທີເປີດງານຕະຫຼາດນັດແມ່ຂອງບູຮານລາວ
ເພື່ອເປັນການສົ່ງເສີມວັດທະນາທໍາ ແລະປົກປັກຮັກສາຮີດຄອງປະເພນີອັນດີຂອງຊາດລາວໄວ້ ໃນວັນທີ 08 ກຸມພາ 2018 ນີ້, ພັດຕະຄານແມ່ຂອງ ໄດ້ຈັດພິທີເປີດຕະຫຼາດນັດແມ່ຂອງບູຮານລາວ ຂຶ້ນທີເດີ່ນ ພັດຕະຄານ. ໂດຍການເປັນປະທານຂອງ ທ່ານ ນ. ຈັນທະວອນ ປຣະວົງວຽງຄໍາ ຜູ້ອໍານວຍການພັດຕະ ຄານແມ່ຂອງ, ໃຫ້ກຽດເຂົ້າຮ່ວມໃນຄັ້ງນີ້ມີ ທ່ານຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ບຸນ ເມກ ວິໄລແສງ ຮອງເຈົ້າເມືອງໆ ສີສັດຕະນາກ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຈັດງານ, ເພື່ອເປັນການເປີດໂອກາດ ໃຫ້ນັກທຸລະກິດຂະໜາດນ້ອຍຫາກາງໄດ້ມາ ພົບປະ ແລະ ປ່ຽນບົດຮຽນນໍາກັນ. ນອກນັ້ນ, ກໍ່ເພື່ອເປັນການປຸກລະດົມໃຫ້ຄົນຮຸ່ນໃໝ່ໄດ້ຮັບຮູ້ ແລະ ເອົາ ໃຈໃສ່ໃນການຮັກສາສິ່ງແວດລ້ອມໂດຍເນັ້ນການໃຊ້ວັດສະດຸທາງທໍາມະຊາດ. ສໍາຄັນງານຄັ້ງນີ້ຍັງເປັນການ ປະກອບສ່ວນໃນການສົ່ງເສີມປີທ່ອງທຽວລາວນໍາອີກ. ເພື່ອເຮັດໃຫ້ພິທີດັ່ງກ່າວມີຄວາມສໍາຄັນ ໃນພິທີ ທ່ານ. ຈັນທະວອນ ປຣະວົງວຽງຄໍາ ຜູ້ອໍານວຍການພັດຕະຄານແມ່ຂອງ ໄດ້ຂຶ້ນລັ່ນຄອງ ເກົ້າບາດເພື່ອເປັນສິ ລິມຸງຄຸນ ແລະ ເປີດງານຕະຫຼາດນັດແມ່ຂອງບູຮານລາວ ພ້ອມທັງເລາະທ່ຽວຊົມການວາງ ສະແດງສິນຄ້າພາຍ ໃນງານນໍາອີກ. ຊື່ງງານຕະຫຼາດນັດດັ່ງກ່າວ ມີຮ້ານຄ້າເຂົ້າຮ່ວມວາງສະແດງສິນຄ້າ ທັງໝົດ 57 ຫົວໜ່ວຍ, ປະກອບມີ: ປະເພດເຄື່ອງນຸ່ງຮົມ, ເຄື່ອງປະດັບ, ສິນຄ້າກະສິກໍາ, ເຄື່ອງຫັດຖະກໍາ ຈັກສານ, ລາຍການອາຫານ ແບບພື້ນເມືອງລາວ ແລະ ສິນຄ້າອື່ນໆ. ງານດັ່ງກ່າວໄດ້ເປີດເປັນ ເວລາ 3 ວັນ ເລີິ່ມແຕ່ວັນທີ 08 ຫາ 10 ເດືອນ ກຸມພາ 2018 ຈຶ່ງສໍາເລັດລົງ.
ພາບ ແລະ ຂ່າວໂດຍ ພະແນກຂ່າວສານ ກະສິກໍາ ແລະ ປ່າໄມ້
ພິທີເຊັນສັນຍາທຶນກູ້ຢືມ ລະຫວ່າງ ລັດຖະບານ ແຫ່ງ ສປປ ລາວ ກັບ ທະນາຄານສົ່ງອອກນໍາເຂົ້າ ສ. ຮົງກາລີ
ເພື່ອເປັນການເສີມຂະຫຍາຍວຽກງານການຮ່ວມມື ແລະ ຮັດແໜ້ນການພົວພັນ, ລະຫວ່າງ ລັດຖະບານລາວ ແລະ ລັດຖະບານ ຮົງກາລີ. ໃນຕອນບ່າຍ ຂອງວັນທີ 30 ມັງກອນ 2018 ນີ້, ໄດ້ມີພິທີເຊັນສັນຍາທຶນກູ້ຢືມ ລະຫວ່າງ ລັດຖະບານ ແຫ່ງ ສປປ ລາວກັບ ທະນາຄານສົ່ງອອກນໍາເຂົ້າ ສ. ຮົງກາລີ ຂຶ້ນທີ່ ຫ້ອງຮັບແຂກກະຊວງການເງິນ. ໃຫ້ກຽດເປັນປະທານໂດຍ ທ່ານ ນ. ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ, ທ່ານ ນ. ຊິນເວຍ ເນເມດິ-ວາກາ ຮອງຜູ້ອໍານວຍການ ທະນາຄານສົ່ງອອກນໍາເຂົ້າ ສ. ຮົງກາລີ. ພ້ອມນີ້, ມີຮອງລັດຖະມົນຕີ ຈາກກະຊວງກະສິກໍາ ແລະ ປ່າໄມ້, ກະຊວງປ້ອງກັນຄວາມສະຫງົບ, ຮອງເຈົ້າຄອນນະຄອນຫຼວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງເຊັນສັນຍາໃນຄັ້ງນີ໊ ເພື່ອເປັນການສືບຕໍ່ໃຫ້ການຊ່ວຍເຫຼືອເປັນຄັ້ງທີ 3 ມູນຄ່າ 160 ລ້ານໂດລາສະຫາລັດ, ປະກອບມີ 3 ໂຄງການຄື: 1, ໂຄງການ ຄຸ້ມຄອງພົນລະເມືອງທັນສະໄໝ ມີມູນຄ່າ 25 ລ້ານໂດລາສະຫາລັດ ໂດຍກະຊວງປ້ອງກັນຄວາມສະຫງົບ ເປັນຜູ້ຄຸ້ມຄອງການຈັດຕັ້ງປະຕິບັດ ເພື່ອຂະຫຍາຍຖານຂໍ້ມູນການຄຸ້ມຄອງສໍາມະໂນຄົວ ແລະບັດປະຈໍາຕົວພົນລະເມືອງ 18 ແຂວງໃນທົ່ວປະເທດ. 2, ໂຄງການພັດທະນາໂຄງລ່າງພື້ນຖານກະສິກໍາ ມູນຄ່າ 35 ລ້ານໂດລາສະຫາລັດ, ໂດຍກະຊວງກະສິກໍາ ແລະ ປ່າໄມ້ ເປັນຜູ້ຄຸ້ມຄອງໃນການຈັດຕັ້ງປະຕິບັດ ໂດຍຈະໄດ້ດໍາເນີນຢູ່ 6 ແຂວງຄື: ນະຄອນຫຼວງວຽງຈັນ, ຫຼວງພະບາງ, ວຽງຈັນ, ໄຊສົມບູນ ໄຊຍະບູລີ ແລະ ແຂວງຊຽງຂວາງ ໂດຍເນັ້ນໃສ່ກິດຈະກໍາ ການປັບປຸງການຄຸ້ມຄອງດິນ, ການປູກພືດ, ສົ່ງເສີມພັດທະນາການລ້ຽງສັດທີ່ເປັນທ່າແຮງ ແລະວຽກງານອື່ນ ທີ່ນອນຢູ່ໃນເງື່ອນໄຂຂອງໂຄງການ. 3 ໂຄງການບໍາບັດນໍ້າເປື້ອນແບບລວມສູນ ມູນຄ່າ 100 ລ້ານໂດລາສະຫາລັດ ໂດຍນະຄອນຫຼວງ ເປັນຜູ້ຄຸ້ມຄອງການຈັດຕັ້ງປະຕິບັດ ເພື່ອກໍ່ສ້າງໂຄງລ່າງພື້ນຖານ ແລະໂຮງງານບໍາບັດນໍ້າເປື້ອນ ເພື່ອກັ່ນຕອງນໍ້າເປື້ອນ ທີ່ບັນດາຄົວເຮືອນ, ໂຮງງານ ປ່ອຍລົງສູ່ຮ່ອງນໍ້າ ກ່ອນຈະໄຫຼ່ລົງສູ່ຮ່ອງນໍ້າທໍາມະຊາດ ໃຫ້ມີຄຸນນະພາບດີກວ່າເກົ່າ, ຫຼຸດຜ່ອນສານເຄມີ ແລະສິ່ງເປິເປື້ອນອື່ນໆ.
ເພື່ອເຮັດພິທີດັ່ງກ່າວມີຄວາມໝາຍສໍາຄັນ ໄດ້ມີພິທີເຊັນສັນຍາທຶນກູ້ຢືມດັ່ງກ່າວ ໃຫ້ກຽດເຊັນໂດຍ ທ່ານ ນ. ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ, ທ່ານ ນ. ຊິນເວຍ ເນເມດິ-ວາກາ ຮອງຜູ້ອໍານວຍການ ທະນາຄານສົ່ງອອກນໍາເຂົ້າ ສ. ຮົງກາລີ ແລະ ທ່ານ ກາໂບ ຊ໋ອກ ຜູ້ປະສານງານອຳນວຍຄວາມສະດວກຂະແໜງຜູ້ປະກອບການສຳລັບທະນະຄານໂລກ, ຫ້ອງການອົງການຈັດຕັ້ງສາກົນ ແລະ ພົວພັນຕ່າງປະເທດ ໂດຍຊ່ອງໜ້າຜູ້ເຂົ້າຮ່ວມເປັນສັກຂີພິຍານ.
ຂ່າວໂດຍ : ສອນເພັດ ສຸລິພອນ
ກວດແກ້ໂດຍ: ທ່ານ ນ. ປ້ອມ ພັນທະວົງ
ທ່ານ ຮອງລັດຖະມົນຕີກະຊວງກະສິກຳ ສປ ຈີນ ພ້ອມດ້ວຍຄະນະເຂົ້າຢ້ຽມຂໍານັບ ທ່ານ ຮອງນາຍົກລັດຖະມົນຕີ ແຫ່ງ ສປປ ລາວ.
ໃນວັນທີ 24 ມັງກອນ 2018 ທີ່ຜ່ານມາ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກຳ ສປ ຈີນ ພ້ອມດ້ວຍຄະນະເຂົ້າຢ້ຽມຂໍານັບ ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງສປປ ລາວ ການເຂົ້າຢ້ຽມໃນຄັ້ງນີ້ທັງ 2 ຝ່າຍໄດ້ໂອ້ລົມກ່ຽວກັບການພັດທະນາການຮ່ວມມືທາງດ້ານວຽກງານກະສິກຳ ແລະ ປ່າໄມ້ ເຊີ່ງທ່ານ ອູຊີງຫຼົງ ໄດ້ສະແດງຄວາມຮູ້ສຶກເປັນກຽດຢ່າງຍິ່ງທີ່ໄດ້ເຂົ້າພົບປະໃນຄັ້ງນີ້ ສປ ຈີນ ເປັນປະເທດນື່ງທີ່ມີຕະຫຼາດກ້ວາງໃຫຍ່ ແລະ ສປປ ລາວ ແມ່ນມີຊັບພະຍາກອນທີ່ຫຼວງຫຼາຍສາມາດຮ່ວມມືພາຍໃຕ້ກອບຕ່າງຝ່າຍຕ່າງໄດ້ຮັບຜົນປະໂຫຍດ. ທ່ານ ຮອງນາຍົກລັດຖະມົນຕີແຫ່ງ ສປປ ລາວ ໄດ້ໂອ້ລົມເຖີງການຮ່ວມມື2ຝ່າຍໃນການພັດທະນາພື້ນຖານໂຄງລ່າງເຊັ່ນ: ສືບຕໍ່ໃຫ້ການຊ່ວຍເຫລືອການສ້າງທາງລົດໄຟຄວາມໄວສູງ ແລະ ໃຫ້ການຊ່ວຍເຫຼືອສ້ອມແປງເສັ້ນທາງເຂົ້າສູ່ເຂດການຜະລິດກະສິກຳ ຂອງຊາວກະສິກອນ, ເພື່ອເຮັດໃຫ້ຜົນຜະລິດຂອງຊາວກະສິກອນອອກສູ່ຕະຫຼາດໄດ້ຫຼາຍ ສາມາດສ້າງລາຍຮັບໃຫ້ແກ່ຄອບຄົວເພີ້ມຂື້ນ ແລະ ສືບຕໍ່ໃຫ້ການຊ່ວຍເຫຼືອທາງດ້ານເຕັກນິກວິຊາການທີ່ທັນສະໄໝ ໃນການປູກ-ການລ້ຽງ ໂດຍສະເພາະການປູກພືດ, ຜັກ ທີ່ປອດສານພິດ ແລະ ການຮ່ວມມືໃນຫຼາຍໆດ້ານ ບົນພື້ນຖານການຜັນຂະຫຍາຍສາຍພົວພັນທີ່ເປັນມູນເຊື້ອ ບົນຈິດໃຈຄູ່ຮ່ວມມືແບບເພື່ອນມິດຍຸດທະສາດຮອບດ້ານຍາວນານເຊີ່ງກັນ ແລະ ກັນ ຮັບປະກັນ 4 ດີ(ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມຍຸດທະສາດທີ່ດີ)ລະຫວ່າງສອງລັດຖະບານ ສປປ ລາວ ແລະ ສປ ຈີນ.
ຂຽນໂດຍ: ທ. ອາລົງກອນ ສຸວັນນະສຸກ
ກວດແກ້ໂດຍ: ທ່ານ ເຂັມພອນ ທິພົມມະຈັນ
ລັດຖະມົນຕີ ກະຊວງກະສິກໍາ ແລະປ່າໄມ້ ຕ້ອນຮັບຄະນະຜູ້ແທນ ສປຈີນ
ເພື່ອເປັນການເສີມຂະຫຍາຍສາຍພົວພັນ ທີ່ເປັນມູນເຊື້ອບົນຈິດໃຈຄູ່ຮ່ວມມືແບບເພື່ອນມິດຍຸດທະສາດຮອບດ້ານ, ຍາວນານ ແລະຮັບປະກັນ 4 ດີຄື: ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະຄູ່ຮ່ວມຍຸດທະສາດທີ່ດີ ລະຫວ່າງສອງລັດຖະບານ ສປປ ລາວ ແລະ ສປ ຈີນ. ໃນຕອນຄໍ່າວັນທີ 23 ມັງກອນ 2018 ຢູ່ທີ່ ໂຮງແຮມແລນມາກ, ນະຄອນຫຼວງວຽງຈັນ ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ກຽດຕ້ອນຮັບການເຂົ້າພົບປະຂອງ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ ໂດຍມີຄະນະພັກ, ຄະນະນໍາ ຈາກສອງກະຊວງເຂົ້າຮ່ວມ.
ໂອກາດນີ້, ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ຕີລາຄາສູງຕໍ່ກັບວຽກງານການຮ່ວມມືໃນຂະແໜງການກະສິກໍາ ແລະປ່າໄມ້ ໃນໄລຍະຜ່ານມາ ແລະ ສະແດງຄວາມຍ້ອງຍໍຊົມເຊີຍຕໍ່ການເຂົ້າມາຊ່ວຍເຫຼືອລ້າ ໃນດ້ານຕ່າງໆ ຂອງລັດຖະບານ ສປ ຈີນ ໂດຍສະເພາະແມ່ນການຊ່ວຍ ເຫຼືອໃນຂະແໜງການກະສິກໍາ ແລະປ່າໄມ້ ລວມທັງການເຂົ້າມາລົງທຶນທຸລະກິດ ຊື່ງເຫັນໄດ້ວ່າມີບາດກ້າວທີ່ຂະຫຍາຍຕົວໄປໃນທາງທີ່ດີ. ພ້ອມນີ້, ທ່ານ ລັດ ຖະມົນຕີ ຍັງໄດ້ສະເໜີພາກສ່ວນທີ່ກ່ຽວຂ້ອງ ຂອງກະຊວງກະສິກໍາ ສປ ຈີນ ສືບຕໍ່ໃຫ້ການຊ່ວຍເຫຼືອ ທາງດ້ານເຕັກນິກວິຊາການ, ຜູ້ຊ່ຽວຊານດ້ານກະສິກໍາ ທັງເປັນການຊຸກຍູ້ສົ່ງເສີມໃຫ້ປະຊາຊົນສອງຊາດໃຫ້ໄດ້ຮັບອາຫານທີ່ດີຕໍ່ສຸຂະພາບ ແລະມີສຸຂະອະນາໄມທີ່ດີ ນໍາອີກ. ພ້ອມນີ້, ທ່ານ ອູຊີງຫຼົງ ຮອງລັດຖະ ມົນຕີ ກະຊວງກະສິກໍາ ສປ ຈີນ ໄດ້ສະແດງຄວາມຊື່ນຊົມຍິນດີ ທີ່ການນໍາຂອງລາວ ໄດ້ອໍານວຍຄວາມສະດວກໃນການເຂົ້າມາລົງທຶນ ຂອງນັກທຸລະກິດຈາກ ສປ ຈີນ ແລະ ຍິນດີສືບຕໍ່ວຽກງານດັ່ງກ່າວໃຫ້ມີການຂະຫຍາຍຕົວ ຢ່າງກວ້າງຂວາງໃນຕໍ່ໜ້າ.
ເພື່ອເຮັດໃຫ້ການພົບປະກັນໃນຄັ້ງນີ້, ມີຄວາມໝາຍສໍາຄັນ ການນໍາທັງສອງຝ່າຍ ໄດ້ຈັດພິທີເຊັນບົດບັນທຶກຄວາມເຂົ້າໃຈ ກ່ຽວກັບການຮ່ວມມືວຽກງານປ້ອງກັນພືດ. ຕາງໜ້າຝ່າຍລາວເຊັນໂດຍ ທ່ານ ປອ. ພວງປາຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ແລະ ຝ່າຍຈີນ ເຊັນໂດຍ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ. ໂດຍຊ້ອງໜ້າຄະນະພັກ, ຄະນະນໍາທັງສອງຝ່າຍເປັນສັກຂີພິຍານ. ຈາກນັ້ນ, ໄດ້ເປີດປ້າຍ ຫ້ອງ ການໂຄງການ ເພື່ອສ້າງຕັ້ງສວນພັດທະນາອຸດສາຫະກໍາ-ກະສິກໍາທັນສະໄໝ ນໍາອີກ.
ຂ່າວໂດຍ : ສອນເພັດ ສຸລິພອນ
ກວດແກ້ຂ່າວໂດຍ :. ທ່ານ ຂັນຄໍາ ອ້ວນອູດົມ
ກອງປະຊຸມພົບປະ 2 ຝ່າຍ ລາວ-ຈີນ ວ່າດ້ວຍການຮ່ວມມືດ້ານກະສິກໍາ
ເພື່ອເປັນການທົບທວນຄືນການຮ່ວມມືສອງຝ່າຍດ້ານກະສິກໍາ ລະຫວ່າງ ລາວ ແລະ ສປຈີນ. ໃນວັນທີ 23 ມັງກອນ ຜ່ານມາ, ກະຊວງກະສິກໍາ ແລະປ່າໄມ້ ສປປລາວ ຮ່ວມກັບ ກະຊວງກະສິກໍາ ສປຈີນ ໄດ້ຈັດກອງປະຊຸມພົບປະ 2 ຝ່າຍ ລາວ-ຈີນ ວ່າດ້ວຍການຮ່ວມມືດ້ານກະສິກໍາ ຂຶ້ນທີ່ຫ້ອງປະຊຸມ ໂຮງແຮມແລນມາກ, ນະຄອນຫຼວງວຽງຈັນ. ໃຫ້ກຽດເປັນປະທານໂດຍ ທ່ານ ຄໍາບຸນນັດ ໄຊຍະນົນ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ. ພ້ອມນີ້ມີ ຜູ້ແທນທັງສອງຝ່າຍເຂົ້າຮ່ວມຢ່າງພ້ອມພຽງ.
ຈຸດປະສົງ ຂອງກອງປະຊຸມພົບປະ 2 ຝ່າຍໃນຄັ້ງນີ້ ເພື່ອເປັນການສະຫຼຸບ, ຕີລາຄາຄືນການຈັດຕັ້ງປະຕິບັດວຽກງານການຮ່ວມມືໃນໄລຍະຜ່ານມາ ຂອງສອງລັດຖະບານ ໂດຍສະເພາະແມ່ນການຮ່ວມມືໃນຂະແໜງການກະສິກໍາ ແລະ ປ່າໄມ້. ຊື່ງຜ່ານມາ, ລັດຖະບານ ສປ ຈີນ ໄດ້ເອົາໃຈໃສ່ສະໜັບສະໜູນ ແລະໃຫ້ການຊ່ວຍເຫຼືອທາງດ້ານທຶນຮອນ ແລະວິຊາການໃຫ້ແກ່ຂະແໜງການກະສິກໍາ ແລະ ປ່າໄມ້ ສປປ ລາວ ຊື່ງສະແດງອອກບັນດາໂຄງການຕ່າງໆເຊັ່ນ: ໂຄງການສ້າງສູນສາທິດ ແລະບໍລິການເຕັກນິກກະສິກໍາຮ່ວມມືລາວ-ຈີນ ມີມູນຄ່າ 41,9 ລ້ານຢວນ ແລະ ໂຄງການສ້າງໂຮງງານຜະລິດຫົວອາຫານສັດ ມູນຄ່າ 5.250.000 ໂດລາ ທີ່ແຂວງອຸດົມໄຊ, ສ້າງສູນເຝົ້າລະວັງ ແລະຄວບຄຸມພະຍາດສັດຂ້າມຊາຍແດນ ຢູ່ນະຄອນຫຼວງວຽງຈັນ, ຫຼວງນໍ້າທາ ແລະ ຜົ້ງສາລີ ມູນຄ່າ 39.060.000 ຢວນ, ໂຄງການສ້າງຕົວແບບບ້ານຊົນນະບົດໃໝ່ ຢູ່ເມືອງສັງທອງ ນະຄອນຫຼວງວຽງຈັນ ແລະ ແຂວງຫຼວງພະບາງ ດ້ວຍມູນຄ່າ 33 ລ້ານຢວນ. ນອກນີ້, ຍັງໄດ້ຮ່ວມມືກັບບໍລິສັດຊວນເຢ ໂຄງການຜະລິດເຂົ້າສະອາດສົ່ງໄປ ສປ ຈີນ ຢູ່ແຂວງສະຫວັນນະເຂດ. ໃນທີ່ປະຊຸມ, ຜູ້ແທນທັງສອງຝ່າຍ, ຍັງໄດ້ປຶກສາຫາລືແນວທາງ ເພື່ອສືບຕໍ່ວຽກງານການຮ່ວມມືໃນຕໍ່ໜ້າ.
ຂ່າວໂດຍ : ສອນເພັດ ສຸລິພອນ
ກວດແກ້ຂ່າວໂດຍ: ທ່ານ ນ. ປ້ອມ ພັນທະວົງ
ມົງໂກລີ ປະດັບຫຼຽນໃຫ້ບຸກຄົນທີ່ມີຜົນງານດີເດັ່ນ
ໃນຕອນຄໍາ ວັນທີ 21 ມັງກອນ ຜ່ານມາ, ກະຊວງກະສິກໍາ ແລະ ປ່າໄມ້ ໄດ້່ຈັດພິທີປະດັບຫຼຽນໄຊ-ຫຼຽນກາໃຫ້ແກ່ບຸກຄົນທີ່ມີຜົນງານປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ ແລະ ມົງໂກລີ ຢູ່ພັດຕະຄານແມ່ຂອງ 1, ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍທ່ານ ປອ. ລຽນ ທິແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ນາງ ຈານິມຄານ ຊາອູເລ ຮອງລັດຖະມົນຕີ ກະຊວງສະບຽງອາຫານ ກະສິກໍາ ແລະ ອຸດສາຫະກໍາເບົາ ມົງໂກລີ ພ້ອມດ້ວຍບັນດາຄະນະນໍາຈາກກະຊວງກະສິກໍາ ແລະປ່າໄມ້ ແລະ ກະຊວງປ້ອງກັນປະເທດ, ທູດມົງໂກລີປະຈໍາ ສປປ ລາວ ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ລ. ກາລບັດຣັກ ເອກອັກຄະລັດຖະທູດ ມົງໂກລີປະຈໍາລາວ ໄດ້ຂຶ້ນຜ່ານບົດບັນຍັດວັກທີ 7 ຂໍ້ທີ 1 ມາດຕາທີ 33 ຂອງລັດຖະທໍາມະນູນ ແຫ່ງ ມົງໂກລີ ແລະ ຂໍ້ທີ 1 ມາດຕາທີ 15 ຂອງກົດໝາຍວ່າດ້ວຍປະທານາທິບໍດີ ແຫ່ງ ມົງໂກລີ ແລະ ເນື່ອງໃນໂອກາດ ຄົບຮອບ 55 ປີ ແຫ່ງການສ້າງຕັ້ງສາຍພົວພັນທາງການທູດລະຫວ່າງ ມົງໂກລີ ແລະ ລາວ ເພື່ອເປັນການຕີລາຄາສູງຕໍ່ຄວາມພະຍາຍາມ ແລະ ການປະກອບສ່ວນໃນການເສີມຂະຫຍາຍຮັດແໜ້ນສາຍພົວພັນ ແລະ ການຮ່ວມມືລະຫວ່າງສອງປະເທດ ຈຶ່ງໄດ້ຕົງລົງຍ້ອງຍໍຫຼຽນໄຊແຫ່ງລັດ, ແຫ່ງມົງໂກລີ ຍ້ອງຍໍຫຼຽນໄຊດາວພະສຸກ ແກ່ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ປະທານສະມາຄົມມິດຕະພາບລາວມົງໂກລີ. ທ່ານ ຄໍາໄສ ສີສະຫວັດ ຜູ້ແປພາສາ ເລຂານຸການປະຈໍາສະຖານເອກອັກຄະລັດຖະທູດ ແຫ່ງ ມົງໂກລີ ປະຈໍາ ສປປ ລາວ ແລະ ຍ້ອງຍໍຫຼຽນໄຊມິດຕະພາບ ແກ່ທ່ານ ສຸກຖາວອນ ແກ້ວລາ ອາດີເອກອັກຄະລັດຖະທູດ ສປປ ລາວ ຜູ້ທໍາອິດທີ່ປະຈໍາຢູ່ມົງໂກລີ ອາດີດຫົວໜ້າກົມປະຈໍາຄະນະພົວພັນຕ່າງປະເທດສູນກາງພັກ ແລະ ກະຊວງການຕ່າງປະເທດ ທ່ານ ພັນດວງຈິດ ວົງສາ ອາດີດປະທານສູນກາງແນວລາວສ້າງຊາດ ອະດີດປະທານສະມາຄົມມິດຕະພາບລາວ-ມົງໂກລີ. ໃຫ້ກຽດຂຶ້ນປະດັບຫຼຽນໂດຍທ່ານ ນາງ ຈານິມຄານ ຊາອູເລ ຮອງລັດຖະມົນຕີ ກະຊວງສະບຽງອາຫານ ກະສິກໍາ ແລະ ອຸດສາຫະກໍາເບົາ ມົງໂກລີ ແລະ ທ່ານ ລ ກາລບັດຣັກ ເອກອັກຄະລັດຖະທູດ ມົງໂກລີ ປະຈໍາລາວ.
ຂ່າວໂດຍ: ສອນເພັດ ສຸລິພອນ
ກວດແກ້ໂດຍ: ທ່ານ ເຂັມພອນ ທິພົມມະຈັນ
ຄະນະຜູ້ແທນ ກະຊວງ ກະສິກຳ ແລະ ປ່າໄມ້ ສປປ ລາວ ເຂົ້າຮ່ວມກອງປະຊຸມ ລັດຖະມົນຕີ ກະສິກຳ ແລະ ປ່າໄມ້ ອາຊຽນ-ອິນເດຍ ຄັ້ງທີ 4
ຄະນະຜູ້ແທນ ກະຊວງ ກະສິກຳ ແລະປ່າໄມ້ ສປປ ລາວ ໄດ້ເດີນທາງໄປເຂົ້າຮ່ວມກອງປະຊຸມ ລັດຖະມົນ ຕີກະສິກຳ ແລະປ່າໄມ້ ອາຊຽນ-ອິນເດຍ ຄັ້ງທີ 4 ຈັດຂື້ນໃນວັນທີ 12 ມັງກອນ 2018 ທີ່ນະຄອນຫລວງນິວເດລີ, ປະເທດອິນເດຍ, ໂດຍແມ່ນ ທ່ານ ປອ. ລຽນ ທິແກ້ວ ລັດຖະມົນຕີກະຊວງ ກະສິກຳ ແລະ ປ່າໄມ້ ເປັນຫົວໜ້າຄະນະ. ການຮ່ວມມືດ້ານກະສິກຳ ແລະ ປ່າໄມ້ ລະຫວ່າງ ອາຊຽນ ແລະ ອິນເດຍ ແມ່ນໄດ້ຮັບຜົນສຳເລັດເປັນກ້າວໆ, ປະເທດສະມາຊິກ ອາຊຽນ ແລະ ອິນເດຍ ໄດ້ຜັດ ປ່ຽນກັນເປັນເຈົ້າພາບ ຈັດກອງປະຊຸມເຊັ່ນ: ກອງປະຊຸມຄັ້ງທີ 1 ຈັດໃນວັນທີ 8 ຕຸລາ 2011 ທີ່ ນະຄອນຫລວງຈາກາກຕາ, ປະເທດອິນໂດເນເຊຍ; ຄັ້ງທີ 2 ຈັດໃນວັນທີ 17 ຕຸລາ 2012 ທີ່ ນະຄອນຫລວງນິວເດລີ, ປະເທດອິນເດຍ; ຄັ້ງທີ 3 ຈັດຂື້ນໃນວັນທີ 28 ກັນຍາ 2013 ທີ່ ນະຄອນຫລວງ ກົວລາລໍາເປີ, ປະເທດມາເລເຊຍ. ໃນໄລະຍະຜ່ານມາ ບັນດາທ່ານລັດຖະມົນຕີ ໄດ້ຮັບຮອງເອົາ ແຜນປະຕິບັດງານ ໄລຍະ 2011-2015 ຊຶ່ງແມ່ນຂອບການຮ່ວມມື ຂະແໜງການກະສິກຳ ແລະ ປ່າໄມ້ ລະຫວ່າງ ອາຊຽນ ແລະ ອິນເດຍ ໂດຍໄດ້ກຳນົດ 4 ໜ້າວຽກຕົ້ນຕໍ: 1) ຍົກສູງສະມັດຕະພາບການຜະລິດກະສິກຳ ເພື່ອຮັບປະກັນ ການຄໍ້າປະກັນສະບຽງອາຫານ, 2) ສົ່ງເສີມການແລກປ່ຽນຂໍ້ມູນຂ່າວສານ ແລະເຕັກໂນໂລຢີ, 3) ສົ່ງເສີມວຽກງານຄົ້ນຄວ້າ ແລະພັດທະນາ ສ້າງເປັນໂຄງການຮ່ວມມືຕ່າງໆ ແລະ 4) ຮັດແໜ້ນການຮ່ວມມື ດ້ານການສ້າງຄວາມອາດສາມາດ ໃຫ້ແກ່ບຸກຄະລາກອນ. ຜ່ານການ ຈັດຕັ້ງປະຕິບັດ ບັນດາກິດຈະກຳຕ່າງໆ ໃນຂອບວຽກທີ່ໄດ້ກຳນົດໄວ້ ໃນໄລຍະເວລາດັ່ງກ່າວນັ້ນ, ມາຮອດປັດຈຸບັນນີ້ ເຫັນວ່າ ມີໝາກຜົນສຳເລັດໃນຫລາຍດ້ານ, ຊຶ່ງປະເທດສະມາຊິກອາຊຽນ ແລະ ອິນເດຍ ໄດ້ຕີລາຄາສູງ ຕໍ່ຜົນສໍາເລັດເຫລົ່ານັ້ນ.
ຈຸດປະສົງຕົ້ນຕໍ ຂອງກອງປະຊຸມ ລັດຖະມົນຕີ ກະສິກຳ ແລະ ປ່າໄມ້ ອາຊຽນ-ອິນເດຍ ຄັ້ງທີ 4 ນີ້ ແມ່ນ: 1) ເພື່ອພ້ອມກັນຕີລາຄາ ແລະຮັບຮອງເອົາ ບົດລາຍງານຜົນສຳເລັດ ຂອງການຈັດຕັ້ງປະຕິບັດ ແຜນປະຕິບັດງານ 2011-2015 ໃນໄລຍະຜ່ານມາ, ແລະ 2) ເພື່ອຄວາມເປັນເອກະພາບ ໃນການກຳນົດ ຂອບການຮ່ວມມື ແລະຮັບຮອງເອົາແຜນປະຕິບັດງານ 2016-2020 ຢ່າງເປັນທາງການ, ຊຶ່ງເນື້ອໃນຕົ້ນຕໍຂອງແຜນປະຕິບັດງານ 2016-2020 ແມ່ນສຶບຕໍ່ຜັນຂະຫຍາຍ 4 ໜ້າວຽກຕົ້ນຕໍ ທີ່ໄດ້ຈັດຕັ້ງປະຕິບັດ ໃນໄລຍະ 2011-2015 ຜ່ານມານັ້ນ ແລະ ກຳນົດເພີ່ມຕື່ມອີກ 4 ໜ້າວຽກໃໝ່ ແລະ ລວມທັງໝົດ ມີ 8ໜ້າວຽກ. 4 ໜ້າວຽກເພີ່ມເຕີມເຂົ້າໃໝ່ ມີ: 1) ສະໜັບສະໜູນການຈັດຕັ້ງປະຕິບັດ ແຜນຍຸດທະສາດ ການເຊື່ອມໂຍງການຄໍ້າປະກັນດ້ານສະບຽງອາຫານ ອາຊຽນ, 2) ສົ່ງເສີມເຕັກ ນິກດ້ານຕ່າງໆ ເພື່ອຊ່ວຍໃຫ້ຊາວກະສິກອນ ມີຄວາມສາມາດ ປັບຕົວເຂົ້າໄດ້ກັບ ສະພາບການປ່ຽນແປງ ດ້ານດິນຟ້າອາກາດ, 3) ເອົາໃຈໃສ່ໃນການຄຸ້ມຄອງນຳໃຊ້ ຊັບພະຍາກອນທຳມະຊາດ ໃຫ້ມີຄວາມຍືນຍົງ ເຊັ່ນ: ທີ່ດິນກະສິກຳ, ແຫລ່ງນໍ້າ ແລະ ປ່າໄມ້, ແລະ 4) ສົ່ງເສີມການແລກປ່ຽນຢ້ຽມຢາມ ຊຶ່ງກັນແລະກັນ ໂດຍສະເພາະແມ່ນ ບັນດາຊາວກະສິກອນຜູ້ໜຸ່ມນ້ອຍ.
ຄະນະຜູ້ແທນ ຂອງ ສປປ ລາວ ກໍໄດ້ສະແດງຄວາມຊົມເຊີຍ ຕໍ່ຜົນສຳເລັດ ຂອງການຮ່ວມມື ໃນຂະແໜງການກະສິກຳ ແລະປ່າໄມ້ ລະຫວ່າງ ອາຊຽນ ແລະ ອິນເດຍ ໃນຊຸມຜ່ານມາ ແລະ ໄດ້ສະແດງຄວາມເຫັນດີ ເປັນເອກະພາບ ແລະ ໃຫ້ການສະໜັບສະໜູນ ຕໍ່ກັບ ແຜນການຮ່ວມມື, ເພາະວ່າ ບັນດາຂອບວຽກເຫລົ່ານັ້ນ ກໍລ້ວນແລ້ວແຕ່ສອດ ຄ່ອງ ກັບແຜນຍຸດທະສາດ ການພັດທະນາ ຂະແໜງການກະສິກຳ, ປ່າໄມ້ ແລະ ພັດທະນາຊົນນະບົດ ຂອງ ສປປ ລາວ ພວກເຮົາ.
ຂ່າວໂດຍ: ກົມແຜນການ ແລະ ການເງິນ
ກວດແກ້ໂດຍ: ທ່ານ ໄຊປລາເດດ ຈຸນລະມະນີ
ກອງປະຊຸມຄັ້ງທີ 22 ຂອງໜ່ວຍງານອາຊຽນກ່ຽວກັບການຄວບຄຸມ ການຕົກຄ້າງສູງສຸດຂອງຢາປາບສັດຕູພືດ
ໃນວັນທີ 22 ມັງກອນນີ້, ທີ່ໂຮງແຮມລາວພຣາຊາ, ກົມປູກຝັງ, ກະຊວງ ກະສິກໍາ ແລະ ປ່າໄມ້ ໄດ້ຈັດກອງປະຊຸມຄັ້ງທີ 22 ຂອງໜ່ວຍງານຊ່ຽວຊານດ້ານການເຊື່ອມໂຍງການຄວບຄຸມການຕົກຄ້າງສູງສຸດຂອງຢາປາບສັດຕູພືດອາຊຽນຂື້ນ, ໂດຍການເຂົ້າຮ່ວມຂອງທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ແລະ ທ່ານ ດຣ ຫງ່ານ ໄຈກ໋ອງ ປະທານຄະນະຊ່ຽວຊານສາພິດຕົກຄ້າງອາຊຽນພ້ອມດ້ວຍພະນັກງານວິຊາການ ຈາກບັນດາສະມາຊິກອາຊຽນເຂົ້າຮ່ວມ50 ກວ່າທ່ານ. ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອທົບທວນຄືນການຈັດຕັ້ງປະຕິບັດວຽກງານຂອງໜ່ວຍງານດັ່ງກ່າວ ໃນປີ 2017 ທີ່ຜ່ານມາໂດຍສະເພາະການຈັດຕັ້ງປະຕິບັດຜົນຂອງກອງປະຊຸມຄັ້ງທີ 21 ທີ່ໄດ້ຈັດຂື້ນທີ່ປະເທດມາເລເຊຍ ແລະ ນອກຈາກນັ້ນກອງປະຊຸມຄັ້ງທີ 22 ນີ້, ບັນດາຊ່ຽວຊານຈາກບັນດາປະເທດສະມາຊິກຍັງໄດ້ປຶກສາຫາລືການຄວບຄຸມການຕົກຄ້າງສູງສຸດຂອງຢາປາບສັດຕູພືດໂດຍເປົ້າໝາຍແມ່ນໃນພືດ ແລະ ຜະລິດຕະພັນພືດທີ່ມີການຄ້າຂາຍຮ່ວມກັນໃນອາຊຽນເປັນຕົ້ນແມ່ນໝາກເພັດ, ໝາກເຂືອ, ໝາກມັງກອນ, ມັງຄຸດ, ລໍາໄຍ, ໝາກຫຸ່ງ ແລະ ອື່ນໆ. ກອງປະຊຸມຄັ້ງນີ້ມີຄວາມສໍາຄັນຫຼາຍເນື່ອງຈາກເປັນການຈັດຕັ້ງປະຕິບັດຂອງວຽກງານດ້ານຄວາມປອດໄພຂອງອາຫານອາຊຽນໃຫ້ປາກົດຜົນເປັນຈິງເທື່ອລະກ້າວ.
ຂຽນໂດຍ: ທ. ອາລົງກອນ ສຸວັນນະສຸກ
ກວດແກ້ໂດຍ: ທ່ານ ເຂັມພອນ ທິພົມມະຈັນ
ກອງປະຊຸມຄະນະກຳມະທິການຊີ້ນໍາລະດັບຊາດຄັ້ງທີ 3 ຂອງແຜນງານຈັດຕັ້ງປະຕິບັດກົດໝາຍປ່າໄມ້
ໃນອາທິດທີ່ຜ່ານມາຢູ່ທີ່ຫ້ອງປະຊຸມຂອງ ໂຮງແຮມ ຈໍາປາສັກແກຣນ ເມືອງປາກເຊ ແຂວງ ຈໍາປາສັກ ກົມປ່າໄມ້ ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມຄະນະກຳມາທິການຊີ້ນໍາລະດັບຊາດກ່ຽວກັບການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ເພື່ອຈະເປັນຄູ່ຮ່ວມສັນຍາການຄ້າໄມ້ແບບສະມັກໃຈລະຫວ່າງ ສປປ ລາວ ແລະ ສະຫະພາບເອີລົບ. ໂດຍການເຂົ້າເປັນປະທານຮ່ວມຂອງທ່ານ ປອ ພວງປາລິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ໄຊຄໍາ ອຸ່ນມີໄຊ ຮອງປະທານອົງການກວດກາລັດຖະບານ, ທ່ານ ສົມໃຈ ເພັດສີນວນ ປະທານສະພາປະຊາຊົນ ແຂວງຄໍາມ່ວນ, ທ່ານ ບົວສອນ ວົງສອງຄອນ ຮອງເຈົ້າແຂວງ ແຂວງຈຳປາສັກ, ທ່ານ ສຸກສະໄໝ ຈັນທະມາດ ຮອງເຈົ້າແຂວງ ແຂວງ ອັດຕະປື ພ້ອມດ້ວຍ ບັນດານັກວິຊາການທີ່ກ່ຽວຂ້ອງ ແລະ ຜູ້ປະກອບການໂຮງເລື່ອຍເຂົ້າຮ່ວມ 60ກວ່າທ່ານ. ໂດຍຈຸດປະສົງຂອງກອງປະຊຸມໃນຄັ້ງນີ້ ເພື່ອທົບທວນຄວາມຄືບໜ້າ ແລະ ຜົນສຳເລັດຂອງການຈັດຕັ້ງປະຕິບັດແຜນງານປີ 2017 ລວມທັງການປະເມີນຜົນການຈັດຕັ້ງປະຕິບັດຂອງອົງການຈັດຕັ້ງທີ່ກ່ຽວຂ້ອງ. ແຜນງານ ຂອງແຜນງານ , FLEGT/VPA ລະຫວ່າງ ສປປ ລາວ ແລະ ສະຫະພາບເອີລົບ ແລະ ແຜນວຽກປະຈໍາປີ 2018 ເຊີ່ງແຜນງານ FLEGT ໄດ້ສະໜັບສະໜູນການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີສະບັບເລກທີ 15/ນຍ ມີຈຸດປະສົງເພື່ອເພີ້ມທະວີໃນການຄຸ້ມຄອງປ່າໄມ້ ແລະ ສະກັດກັ້ນທຸລະກິດທີ່ກ່ຽວຂ້ອງກັບການຄ້າໄມ້ຜິດກົດໝາຍ. ໃນກອງປະຊຸມຄະນະປະທານໄດ້ໃຫ້ທິດຊີ້ນຳໃນການຫັນປ່ຽນເນື້ອທີ່ດີນປ່າໄມ້ເປັນເຂດດີນພັດທະນາຄວນໃຫ້ມີເຂດແດນລະອຽດ, ຄວນມີການກວດກາປະເມີນຜົນໃນການຂຸດຄົ້ນໄມ້ ແລະ ການປະຕິບັດຄຳສັ່ງເລກທີ 15/ນຍ ໃຫ້ເກີດຜົນສູງ, ເຂັ້ມງວດກັບບັນດາໂຮງເລື່ອຍຕ່າງໆ ໃຫ້ໄປຕາມລະບົບ ແລະ ບົດລົງໂທດຕໍ່ພະນັກງານທີ່ກະທຳຜິດ. ກອງປະຊຸມໄດ້ດຳເນີນໄປເປັນເວລາ 1 ວັນເຕັມ ແລະ ປິດລົງໃນຕອນແລງຂອງວັນດຽວກັນ.
ຂຽນໂດຍ: ທ.ອາລົງກອນ ສຸວັນນະສຸກ
ກວດແກ້: ທ່ານ ເຂັມພອນ ທິພົມມະຈັນ
ທ່ານ ລັດຖະມົນຕີ ກະຊວງກະສິກໍາ ແລະ ປ່າໄມ້ ຕ້ອນຮັບ ຄະນະຜູ້ແທນຈາກ ປະເທດມົງໂກລີ
ໃນທ້າຍ ອາທິດຜ່ານມາ, ຢູ່ຫ້ອງຮັບແຂກກະຊວງກະສິກໍາ ແລະປ່າໄມ້ ທ່ານ ປ.ອ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ກຽດຕ້ອນຮັບ ຄະນະຜູ້ແທນຈາກ ປະເທດມົງໂກລີ ນໍາໂດຍ ທ່ານ ນ. ຈານິມຄານ ຊາອຸເລ ຮອງລັດຖະມົນຕີ ກະຊວງສະບຽງອາຫານ, ກະສິກໍາ ແລະ ອຸດສາຫະກໍາເບົາ ປະເທດມົງໂກລີ, ພ້ອມດ້ວຍແຂກ ທັງສອງຝ່າຍເຂົ້າຮ່ວມ.
ໂອກາດນີ້, ທ່ານ ຮອງລັດຖະມົນຕີ ກະຊວງສະບຽງອາຫານ, ກະສິກໍາ ແລະ ອຸດສາຫະກໍາເບົາ ປະເທດມົງໂກລີ ໄດ້ສະແດງຄວາມ ຍ້ອງຍໍຊົມເຊີຍ ຕໍ່ລັດຖະບານລາວ ເວົ້າລວມ, ເວົ້າສະເພາະແມ່ນ ການນໍາຂອງກະຊວງກະສິກໍາ ແລະ ປ່າໄມ້ ທີ່ອໍານວຍຄວາມສະດວກຕໍ່ການຮ່ວມມື້ໃນຂົງເຂດ ວຽກງານ ກະສິກໍາ ແລະ ປ່າໄມ້ ໄລຍະຜ່ານມາ ຊື່ງມີບາດກ້າວຂະຫຍາຍຕົວ ທັງໄດ້ຮັບການຕ້ອນຮັບ ຢ່າງອົບອຸ່ນ. ທັງສອງຝ່າຍໄດ້ປຶກສາຫາລືກັນກ່ຽວກັບ ການຮ່ວມມື ວຽກວຽກງານ ໃນຂະແໜງ ການກະສິກໍາ ແລະ ປ່າໄມ້. ພ້ອມນີ້, ລັດຖະບານ ແຫ່ງມົງໂກລີ ຍັງໄດ້ກະກຽມສັດລ້ຽງ ປະເພດແກະ ຈໍານວນ 8.000 ໂຕ ເພື່ອມອບໃຫ້ແກ່ຝ່າຍລາວເພື່ອເອົາມາລ້ຽງ ແລະ ວິຊາການ ອີກຈໍານວນໜຶ່ງ ເພື່ອມາເບິ່ງແຍງ ສຸຂະພາບສັດດັ່ງກ່າວ. ໃນຕອນທ້າຍ, ທ່ານ ປ.ອ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ສະແດງຄວາມຊົມເຊີຍຕໍ່ວຽກງານການຮ່ວມມື ຂອງລັດຖະບານ ສອງປະເທດ ໂດຍສະເພາະ ແມ່ນການຮ່ວມມືຂອງການນໍາທັງສອງກະຊວງ ລະຫວ່າງ ລາວ-ມົງໂກລີ ທີ່ມີສາຍພົວພັນອັນດີງາມ ແລະ ຫວັງວ່າຈະໄດ້ຮັບການສືບຕໍ່ວຽກງານ ຮ່ວມມືກັນໃນຕໍ່ໜ້າໃຫ້ຫຼາຍຂຶ້ນ ກວ່າເກົ່າ.
ຂ່າວໂດຍ: ສອນເພັດ ສຸລິພອນ
ກວດແກ້ໂດຍ:. ທ່ານ ນ. ປ້ອມ ພັນທະວົງ
