
Khemmalay SONDAVANH
ກອງປະຊຸມປຶກສາຫາລື ເນື້ອໃນຮ່າງກົດຫມາຍວ່າດ້ວຍປ່າໄມ້ ສະບັບປັບປຸງ
ໃນວັນທີ 7 ພຶດສະພາ 2018, ທີ່ຫ້ອງປະຊຸມຂອງຫ້ອງວ່າການປົກຄອງແຂວງຈຳປາສັກ ຫລັກ 4, ກະຊວງກະສິກຳ ແລະ ປ່າໄມ້ ໄດ້ສືບຕໍ່ຈັດກອງປະຊຸມທາບທາມກົດຫມາຍວ່າດ້ວຍປ່າໄມ້ ສະບັບປັບປຸງເພື່ອປ່ຽນແທນກົດຫມາຍວ່າດ້ວຍປ່າໄມ້ ສະບັບເລກທີ 06/ສພຊ, ລົງວັນທີ 24 ທັນວາ 2007ຂື້ນ, ໂດຍການເປັນປະທານຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງ ກະສິກຳ ແລະ ປ່າໄມ້ ແລະ ທ່ານ ບົວສອນ ວົງສອງຄອນ ຮອງເຈົ້າແຂວງໆຈຳປາສັກ. ມີບັນດາຫົວຫນ້າກົມ, ຮອງກົມ, ຫົວຫນ້າ ແລະ ຜູ້ຕາງຫນ້າຈາກ ສານປະຊາຊົນແຂວງ, ໄອຍະການ,ສະພາປະຊາຊົນທ້ອງຖິ່ນ, ຫ້ອງການແນວລາວສ້າງຊາດ, ພະແນກ ກະສິກຳ ແລະ ປ່າໄມ້ແຂວງຈາກ 4 ແຂວງພາກໃຕ້, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ 80 ກ່ວາທ່ານ. ຈຸດປະສົງເພື່ອລະດົມແນວຄວາມຄິດຈາກທຸກພາກສ່ວນເຂົ້າໃສ່ຮ່າງກົດໝາຍວ່າດ້ວຍປ່າໄມ້ສະບັບປັບປຸງ ແນໃສ່ເຮັດໃຫ້ເນື້ອໃນຂອງກົດຫມາຍດັ່ງກ່າວ ມີເນື້ອໃນຄົບຖ້ວນ, ສົມບູນ ແລະ ມີປະສິດທິຜົນ ໃນເວລານຳໄປຈັດຕັ້ງປະຕິບັດຕົວຈິງ ພ້ອມທັງແທດ ເໝາະກັບຍຸດທະສາດ, ນະໂຍບາຍການຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ຂອງພັກ ແລະ ລັດຖະ ບານ ທັງແນໃສ່ແກ້ໄຂປະກົດການຫຍໍ້ທໍ້ທີ່ພົ້ນເດັ່ນໃນຂົງເຂດການຄຸ້ມຄອງປ່າໄມ້ ແລະ ຊັບພະຍາ ກອນທຳມະຊາດ. ໂດຍຮ່າງກົດຫມາຍວ່າດ້ວຍປ່າໄມ້ທີສະເໜີຜ່ານກອງປະຊຸມທາບທາມຄັ້ງນີ້ ມີ 13 ພາກ, 17 ໝວດ, 150 ມາດຕາ ແລະ ເພີ່ມໃໝ່ 1 ພາກ, 4 ໝວດ ແລະ 20 ມາດຕາ. ທັງເປັນການກະກຽມນຳສະເຫນີໃນກອງປະຊຸມລັດຖະບານໃນເດືອນມິຖຸນາ 2018 ແລະ ມີກຳນົດເຂົ້າສະ ເໜີຕໍ່ສະພາໃນທ້າຍປີ 2018 ນີ້ນຳອີກ.
ພາບ ແລະ ຂ່າວໂດຍ: ພະແນກຂ່າວສານ ກະສິກໍາ ແລະ ປ່າໄມ້
ກະຊວງກະສິກໍາ ແລະ ປ່າໄມ້ຈັດກອງປະຊຸມເຊື່ອມຊືມຄໍາສັ່ງນາຍົກລັດຖະມົນຕີ ແລະ ວຽກງານ 3 ສ້າງ
ໃນວັນທີ 03 ພຶດສະພາ 2018 ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມເຊື່ອມຊຶມ ແລະ ຊີ້ນຳການຈັດຕັ້ງປະຕິບັດຄຳສັ່ງນາຍົກລັດຖະມົນຕີວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດ ຕັ້ງ ແລະ ການບັນຈຸລັດຖະກອນໃໝ່, ສະບັບເລກທີ 03/ນຍ, ລົງວັນທີ 09 ກຸມພາ 2018, ສະຫຼຸບປີ 2016-2017, ທິດທາງແຜນການປີ 2018 ແລະ ຊີ້ນຳການຈັດຕັ້ງປະຕິບັດວຽກງານ 03ສ້າງ ຂອງຂະແໜງກະສິກຳ, ປ່າໄມ້ ແລະ ພັດທະນາຊົນນະບົດ. ໃຫ້ກຽດເປັນປະທານໂດຍທ່ານ ປອ. ພວງປາຣິສັກ ປຣະວົງວຽງຄຳຮອງລັດຖະ ມົນຕີກະຊວງກະສິກໍາ ແລະ ປ່າໄມ້, ທ່ານຮອງລັດຖະມົນຕີ, ຫ້ອງການ, ກົມ, ສະຖາບັນ, ພະແນກ, ສູນ ແລະໂຮງຮຽນຊົນລະປະທານຊັ້ນສູງທ່າງ່ອນ ເຂົ້າຮ່ວມທັງໝົດ 82 ທ່ານ, ຍິງ 41 ທ່ານ.
ທ່ານ ນ. ພວງເພັດ ປູ່ວັງ ຫົວໜ້າກົມຈັດຕັ້ງ ແລະ ພະນັກງານ ໄດ້ລາຍງານກ່ຽວກັບການປັບປຸງກົງຈັກການຈັດຕັ້ງຂອງກະຊວງກະສິກໍາ ແລະ ປ່າໄມ້ໃນໄລຍະຜ່ານມາວ່າ: ຄະນະພັກ, ຄະນະນຳແຕ່ລະຂັ້ນໄດ້ເອົາໃຈໃສ່ນຳພາການປັບປຸງພາລະບົດບາດ ເຊິ່ງໄດ້ສຳເລັດການປັບປຸງພາລະບົດໂດຍພື້ນຖານ, ທົບທວນ ແລະ ປັບປຸງຄືນໃໝ່ ໂດຍເນັ້ນໃສ່ແບ່ງຂັ້ນຄຸ້ມຄອງມະຫາພາກ ແລະຈຸລະພາກ, ມີການຄຸ້ມຄອງຕາມທິດ 03 ສ້າງ.
ທ່ານ ຄຳພັນ ເໝືອນສິດທິດາ ຫົວໜ້າຫ້ອງການກະຊວງ, ທັງເປັນຫົວໜ້າກອງເລຂາ 03 ສ້າງໄດ້ລາຍງານການຈັດຕັ້ງປະຕິບັດວຽກງານ 03 ສ້າງໃນສົກປີຜ່ານມາຂອງຂະແໜງການກະສິກໍາ, ປ່າໄມ້ ແລະ ພັດທະນາຊົນນະບົດ ໄດ້ຜັນຂະຫຍາຍຕາມມະຕິ ເລກທີ 25/ຄມສພ, ຄຳສັ່ງ ເລກທີ 34/ນຍ ແລະ ຄຳແນະນຳ ເລກທີ 02/ພນ. ໂດຍເລີ່ມຈາກການຈັດຕັ້ງເຊື່ອມຊຶມບັນດາມະຕິ, ຄຳສັ່ງ, ຄຳແນະນຳ ແລະ ນິຕິກຳກ່ຽວກັບວຽກງານ 03 ສ້າງ, ຜ່ານການຈັດຕັ້ງປະຕິບັດຕົວຈິງເຫັນວ່ານະໂຍບາຍ 03 ສ້າງ ແມ່ນຖືກທິດ ແລະ ໄດ້ນຳເອົາຜົນປະໂຫຍດມາສູ່ປະຊາຊົນລາວບັນດາເຜົ່າ ສາມາດຕີລາຄາໄດ້ວ່າມີຫຼາຍດ້ານທີ່ພົ້ນເດັ່ນຂຶ້ນ ເປັນຕົ້ນ: ໄດ້ຫັນປ່ຽນດ້ານຈິນຕະນາການຂອງສັງຄົມ ເພື່ອບຸກທະລຸທັງ 4 ດ້ານຂອງພັກເວົ້າລວມ, ເວົ້າສະເພາະແມ່ນໄດ້ຫັນປ່ຽນການທຳມາຫາກິນແບບດັ້ງເດີມຂອງປະຊາຊົນ ໄປສູ່ການຜະລິດເປັນສິນຄ້າ, ສ້າງລາຍຮັບເພີ່ມຂຶ້ນໃຫ້ແກ່ຄອບຄົວ, ເຮັດໃຫ້ຊີວິດການເປັນຢູ່ເຂົາເຈົ້າດີຂຶ້ນ, ປະຊາຊົນມີການຕື່ນຕົວກ້າກູ້ຢືມເງິນຈາກສະຖາບັນການເງິນໄປເຮັດການຜະລິດເປັນສິນຄ້າຫຼາຍຂຶ້ນ, ຊາວກະສິກອນໄດ້ຫັນມານຳໃຊ້ກົນຈັກເພີ່ມຂຶ້ນ, ສ້າງໄດ້ຄອບຄົວຕົວແບບດ້ານການປູກ-ການລ້ຽງນັບມື້ນັບຫຼາຍອັນໄດ້ສ້າງເງື່ອນໄຂໃຫ້ແກ່ການສ້າງຄອບຄົວກະສິກໍາ ແລະ ປ່າໄມ້ຕົວແບບ, ບ້ານແບບຢ່າງກະສິກຳ ແລະ ປ່າໄມ້ ແລະ ເມືອງກະສິກໍາ ແລະ ປ່າໄມ້ພັດທະນາຕາມທິດ 03 ສ້າງ.
ໃນຕອນທ້າຍທ່ານປະທານໄດ້ໃຫ້ທິດຊີ້ນໍາຕໍ່ກອງປະຊຸມວ່າ: ໄລຍະແຕ່ປີ 2012-2015 ເປັນໄລຍະເຮັດທົດລອງວຽກງານ 3ສ້າງ, ກະຊວງກະສິກໍາ ແລະ ປ່າໄມ້ໄດ້ຄົ້ນຄວ້າ, ປັບປຸງອອກກົດໝາຍ ແລະ ບັນດານິຕິກໍາລຸ່ມກົດໝາຍຫຼາຍສະບັບ. ຈາກນັ້ນ, ກໍ່ໄດ້ກໍານົດແບ່ງຄວາມຮັບຜິດຊອບລະຫວ່າງກະຊວງກັບພະແນກກະສິກໍາ ແລະ ປ່າໄມ້ປະຈໍາແຂວງ, ນະຄອນຫຼວງ ແລະ ຫ້ອງການກະສິກໍາ ແລະ ປ່າໄມ້ປະຈໍາເມືອງ, ໄດ້ໂຮມເອົາວຽກງານປ່າສະຫງວນ, ປ່າປ້ອງກັນ ແລະ ວຽກພັດທະນາຊົນນະບົດແກ້ໄຂຄວາມທຸກຍາກມາໂຮມກັນຢູ່ກະຊວງກະສິກໍາ ແລະ ປ່າໄມ້. ໃນຕໍ່ໜ້າໃຫ້ທຸກພາກສ່ວນກ່ຽວຂ້ອງແກ້ໄຂຂໍ້ຄົງຄ້າງໃນການພົວພັນປະສານງານລະຫວ່າງສູນກາງ ແລະ ທ້ອງຖີ່ນໃຫ້ມີຄວາມກົມກຽວກັນດີຂຶ້ນກວ່າເກົ່າ. ເອົາໃຈໃສ່ຊ່ວຍໜູນທາງດ້ານວິຊາການ ໃຫ້ບັນດາກົມ ແລະ ທຽບເທົ່າສືບຕໍ່ຊ່ວຍທ້ອງຖີ່ນຕາມທິດ 3 ສ້າງ. ຊ່ວຍສ້າງພະນັກງານວິຊາການ, ຈັດຝຶກອົບຮົມກັບທີ່, ຊ່ວຍດ້ານວັດຖຸ-ອຸປະກອນ ແລະ ເຕັກນິກ-ເຕັກໂນໂລຊີ ຕາມທິດຫັນເປັນທັນສະໃໝເທື່ອລະກ້າວ ແລະ ເອົາໃຈໃສ່ໃນການຕິດຕາມປະເມີນຜົນເປັນແຕ່ລະໄລຍະຢ່າງປົກະຕິ.
ໂດຍ: ພະແນກຂ່າວສານກະສິກຳ ແລະ ປ່າໄມ້
ສະຫະພັນແມ່ຍິງກະຊວງ ກປ ຮ່ວມວາງສະແດງຜົນງານ ໃນງານມະຫາກໍາຊັບສິນທາງປັນຍາ 2018 ທີ່ສູນການຄ້າລາວໄອເຕັກ
ໃນວັນທີ 23 ເມສາ 2018, ທີ່ສູນການຄ້າລາວໄອເຕັກ, ສູນກາງສະຫະພັນແມ່ຍິງລາວ ຮ່ວມກັບກະຊວງວິທະຍາສາດ ແລະ ເຕັກໂນໂລຊີໄດ້ຈັດງານມະຫາກໍາຊັບສິນທາງປັນຍາ ແລະ ສະເຫຼີມສະຫຼອງວັນຊັບສິນທາງປັນຍາໂລກ 2018 ພາຍໃຕ້ຄໍາຂວັນ: ແມ່ຍິງສ້າງນະວັດຕະກໍາ ແລະ ປະດິດຄິດສ້າງ, ເປັນພະລັງງານແຫ່ງການປ່ຽນແປງ. ໃຫ້ກຽດເປັນປະທານເປີດງານຄັ້ງນີ້ໂດຍພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ມີທ່ານລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ລັດຖະມົນຕີກະຊວງກະສິກໍາ ແລະ ປ່າໄມ້, ປະທານ ຄະນະບໍລິຫານງານສະຫະພັນແມ່ຍິງລາວ ພ້ອມດ້ວຍແຂກຖືກເຊີນ ແລະ ພາກສ່ວນຕ່າງໆ ເຂົ້າຮ່ວມຢ່າງຄຶກຄື້ນ.
ໃນງານໄດ້ມີການ ວາງສະແດງ ຜົນງານດີເດັ່ນທີ່ເປັນຫົວຄິດປະດິດສ້າງຂອງແມ່ຍິງລາວ ແລະ ມີການຈໍາໜ່າຍຜະລິດຕະພັນຕ່າງໆຫຼາກຫຼາຍລາຍການ. ງານດັ່ງກ່າວຈັດຂື້ນເພື່ອແນ່ໃສ່ສົ່ງເສີມຂະບວນວິວັດແຫ່ງການເຄື່ອນໄຫວປະດິດຄິດຄົ້ນ, ໂດຍສະເພາະການອຸທິດມັນສະໝອງຂອງແມ່ຍິງປະກອບສ່ວນເພື່ອແກ້ໄຂຄວາມທຸກຍາກ ເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020, ຕາມແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາແມ່ຍິງລາວ ເປັນຕົ້ນແຜນພັດທະນາວິທະຍາສາດ-ເຕັກໂນໂລຊີເຮັດໃຫ້ກາຍເປັນກໍາລັງແຮງ, ມີປະສິດທິຜົນ, ສາມາດດັບປັບນໍາໃຊ້ເພື່ອຍູ້ໝູນໃຫ້ແກ່ການພັດທະນາເສດຖະກິດ ແລະ ບັນລຸເປົ້າໝາຍການພັດທະນາແບບຍືນຍົງ.
ໃນໂອກາດນີ້ ກະຊວງກະສິກໍາ ແລະ ປ່າໄມ້ ກໍ່ຄືສະຫະພັນແມ່ຍິງກະຊວງ ກປ ໄດ້ນໍາເອົາຜົນງານການຄົ້ນຄ້ວາວິໄຈຂອງບັນດາເອື້ອຍນ້ອງແມ່ຍິງທີ່ເປັນນັກຄົ້ນຄວ້າຈາກກົມກອງຕ່າໆທີ່ຂື້ນກັບກະຊວງກະສິກໍາ ແລະ ປ່າໄມ້ເຂົ້າຮ່ວມວາງສະແດງຜົນງານໃນງານຊຶ່ງມີຜົນງານທີ່ໂດດເດັ່ນຫຼາຍຢ່າງເຊັ່ນ: ຜົນງານການຄົ້ນຄວ້າເພື່ອອະນຸລັກແນວພັນພືດ, ການປັບປຸງແນວພັນເຂົ້າ, ການນໍາໃຊ້ຊີວະເທັກໂນໂລຊີເຂົ້າໃນການຂະຫຍາຍແນວພັນພືດດ້ວຍເນື້ອເຍື່ອ, ການຂະຫຍາຍເຊື້ອເຫັດ, ການວາງສະແດງເຊື້ອຊີວະວິທະຍາກໍາຈັດສັດຕູພືດທີ່ເປັນປະໂຫຍດຕ່າງໆ, ພ້ອມດຽວກັນໃນນີ້ທາງຄະນະຍັງໄດ້ມອບຜົນຜະລິດກະສິກໍາທີ່ເປັນຜົນງານໃຫ້ທ່ານນາຍົກລັດຖະມົນຕີໃນໂອກາດຢ້ຽມຢາມຊົມສະຖານທີ່ວາງສະແດງນີ້ອີກດ້ວຍ.
ພາບ ແລະ ຂ່າວໂດຍ: ພະແນກຂ່າວສານກະສິກຳ ແລະ ປ່າໄມ້.
ທ່ານ ຄຳບຸນນັດ ໄຊຍະນົນ ຢ້ຽມຢາມໂຄງການລຶບລ້າງຄວາມທຸກຍາກຂອງປະຊາຊົນ ບ້ານ ຄຳປ່າແໜ ແລະ ບ້ານ ປ່າກ້ວຍ
ໃນວັນທີ 22 ມີນາ 2018 ນີ້ ທ່ານ ຄໍາບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແ ລະ ປ່າໄມ້ , ທ່ານຮອງເຈົ້າແຂວງໆສະຫວັນນະເຂດ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ໂຄງການລຶບລ້າງຄວາມທຸກຍາກຂອງປະຊາຊົນບ້ານຄຳປ່າແໜ ແລະບ້ານປ່າກ້ວຍ, ເມືອງ ຈຳພອນ, ແຂວງ ສະຫວັນນະເຂດ ໂດຍມີ ທ່ານ ເກຍ ອູ໋ສິດທິເດດ ເຈົ້າຂອງໂຮງງານນ້ຳດື່ມ ແລະ ນ້ຳກ້ອນປາໂລມາຄຳ (ຜູ້ຈັດຕັ້ງປະຕິບັດໂຄງການ) , ອຳນາດການປົກຄອງບ້ານ ແລະ ພໍ່ແມ່ປະຊາຊົນ ໃຫ້ການຕ້ອນຮັບຢ່າງອົບອຸ່ນ.
ໂຄງການລຶບລ້າງຄວາມທຸກຍາກຂອງປະຊາຊົນບ້ານຄຳປ່າແໜ ແລະບ້ານປ່າກ້ວຍເລີ່ມຈັດຕັ້ງປະຕິບັດໃນວັນທີ 14 ມັງກອນ 2016 ໂດຍການເຊັນບົດບັນທຶກຮ່ວມກັນລະຫວ່າງ ທ່ານ ເກຍ ອູ໋ສິດທິເດດ ກັບອຳນາດການປົກຄອງເມືອງ ຈຳພອນ ໂດຍການເຂົ້າຮ່ວມຂອງທ່ານເຈົ້າແຂວງໆສະຫວັນນະເຂດ ໄລຍະເວລາການຈັດຕັ້ງປະຕິບັດໂຄງການແມ່ນ 1 ປີ, ໃນເບື້ອງຕົ້ນ ທ່ານ ເກຍ ອູ໋ສິດທິເດດ ໄດ້ນຳພາປະຊາຊົນປູກຜັກສວນຄົວ, ເຈາະນ້ຳບາດານ, ສະໜອງແນວພັນພືດ, ອຸປະກອນຮັບໃຊ້ການຜະລິດຈຳນວນໜຶ່ງ ແລະ ມີຄອບຄົວເຂົ້າຮ່ວມກິດຈະກຳຂອງໂຄງການ 27 ຄອບຄົວ. Continue reading
ກອງປະຊຸມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ
ໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ ໄດ້ດຳເນີນໜ້າງວຽກໄປຈຳນວນໜຶ່ງແລ້ວ ເຊິ່ງຄະນະຮັບຜິດຊອບກະກຽມໂຄງການຂັ້ນສູນກາງ ໄດ້ປະສານສົມທົບ ແລະ ປຶກສາຫາລືກັບທະນາຄານພັດທະນາອາຊີ(ADB) ກໍ່ຄືບັນດາຄູ່ຮ່ວມພັດທະນາຕ່າງໆ ແລະ ບັນດາຂະແໜງການທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນ ແລະ ຊາວກະສິກອນໃນກຸ່ມເປົ້າໝາຍ.
ໃນວັນທີ 13 ມີນາ 2018 ກົມຊົນລະປະທານ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມລິເລີ່ມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງຂຶ້ນ ທີ່ໂຮງແຮມຫຼວງພະບາງວິວ, ແຂວງ ຫຼວງພະບາງ ໂດຍການເປັນປະທານຂອງ ທ່ານ ປອ ພວງປາຣິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້, ເຊິ່ງມີທ່ານຮອງເຈົ້າແຂວງໆໄຊຍະບູລີ, ຊຽງຂວາງ ແລະ ແຂວງຫົວພັນ; ການນຳກົມອ້ອມຂ້າງກະຊວງ ກປ; ພະແນກ ກປ ແຂວງ; ຜູ້ໃຫ້ທຶນ, ອົງການຈັດຕັ້ງສາກົນ ແລະ ຊ່ຽວຊານທັງພາຍໃນ ແລະ ຕ່າງປະເທດ; ຜູ້ປະສານງານໂຄງການຂັ້ນສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ.
ທ່ານຮອງລັດຖະມົນຕີລົງຢ້ຽມຢາມພື້ນທີ່ການຈັດສັນພູມລຳເນົາໃຫ້ປະຊາຊົນ
ການຍົກຍ້າຍຈັດສັນເມືອງກະລຶມເກົ່າມາຢູ່ເມືອງກະລຶມໃໝ່ ແມ່ນເປັນນະໂຍບາຍຂອງພັກ-ລັດຖະບານ ເພື່ອຈັດສັນທີ່ຢູ່ອາໃສທີ່ໝັ້ນຄົງໃຫ້ປະຊາຊົນ, ມີອາຊີບທີ່ໝັ້ນຄົງ, ມີຊີວິດການເປັນຢູ່ທີ່ດີຂຶ້ນກວ່າເກົ່າ. ໃນວັນທີ 19 ມີນາ 2018 ທ່ານ ຄຳບຸນນັດ ໄຊຍະນົນຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມພື້ນທີ່ຈັດສັນພູມລຳເນົາ ທີ່ເມືອງ ກະລຶມ, ແຂວງ ເຊກອງ ເຊິ່ງມີທ່ານຫົວໜ້າພະແນກກະສິກຳ ແລະ ປ່າໄມ້ແຂວງ ເຊກອງ, ທ່ານຮອງເຈົ້າເມືອງໆກະລຶມ ແລະ ພະນັກງານວິຊາການໄດ້ໃຫ້ການຕ້ອນຮັບ.
ທ່ານຮອງລັດຖະມົນຕີ ແລະ ຄະນະ ໄດ້ຮັບຟັງການລາຍງານຈາກຫ້ອງການກະສິກຳ ແລະ ປ່າໄມ້ເມືອງກະລຶມ ກ່ຽວກັບວຽກງານການຍົກຍ້າຍຈັດສັນພູມ ລຳເນົາເມືອງກະລຶມເກົ່າມາຢູ່ເມືອງກະລຶມໃໝ່ ເມືອງກະລຶມເກົ່າໄດ້ຖືກຜົນກະທົບຈາກໄພພິບັດທາງທໍາມະຊາດ ແລະ ການຂຸດຄົ້ນບໍ່ຖ່ານຫີນ, ບ້ານທີ່ຖືກຍົກຍ້າຍມີ 02 ບ້ານຄື: ບ້ານແກ້ງກຸຍ ແລະ ບ້ານ ແກ້ງກຽນ, ມີ 514 ຄອບຄົວ, ມີ 3.021 ຄົນ. ອາຊີບສ່ວນໃຫຍ່ຂອງປະຊາຊົນແມ່ນເຮັດໄຮ່, ເຮັດນາ ແລະ ລ້ຽງສັດ, ທົ່ວເມືອງມີເນື້ອທີ່ຜະລິດກະສິກຳທັງໝົດ 2.900 ກວ່າເຮັກຕາ, ຄາດຄະເນໃນປີ 2019 ແມ່ນຈະຍົກຍ້າຍບ້ານປະຊາຊົນມາຕື່ມອີກ 02 ບ້ານຄື: ບ້ານ ວັກເໜືອ ແລະ ບ້ານ ວັກໃຕ້ ໃນພື້ນທີ່ສັນຈັນໃໝ່ ຈຳນວນ 18 ເຮັກຕາ. ໄລຍະຜ່ານມາອໍານາດການປົກຄອງແຂວງ, ເມືອງ, ບ້ານ ພ້ອມດ້ວຍພາກສ່ວນກ່ຽວຂ້ອງໂດຍສະເພາະພະແນກ ກະສິກໍາ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງໄດ້ສົ່ງເສີມໃຫ້ປະຊົນມີອາຊີບທີ່ໝັ້ນຄົງດ້ວຍການເຮັດນາ (ບ່ອນທີ່ມີເງື່ອນໄຂ), ສົ່ງເສີມການລ້ຽງສັດ ແລະ ການປູກພືດສວນຄົວ, ພືດອຸດສາຫະ ກຳ. ນອກຈາກນັ້ນ, ຖ້າຝາຍນໍ້າລົ້ນສ້າງສຳເລັດ ຈະສົ່ງເສີມໃຫ້ປະຊາຊົນລ້ຽງປາໃນກະຊັງເປັນອາຊີບເສີມ, ເພື່ອເຮັດໃຫ້ຊີວິດການເປັນຢູ່ດີຂຶ້ນ ສາມາດຫຼຸດພົ້ນອອກຈາກບ້ານທຸກຍາກ ແລະ ຄອບຄົວທຸກຍາກ.
ໂອກາດນີ້, ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ເນັ້ນໜັກໃຫ້ເອົາໃຈໃສ່ບາງບັນຫາທີ່ສຳຄັນດັ່ງນີ້: ໃຫ້ຮັກສາພື້ນທີ່ນໍ້າ ເພື່ອເຮັດການຜະລິດກະສິກຳ ເພາະນໍ້າເປັນປັດໃຈໃນການຜະ ລິດ ແລະ ໃຫ້ສະຫງວນເນື້ອທີ່ນາບໍ່ໃຫ້ຫັນໄປເປັນພື້ນທີ່ທຳການຜະລິດອື່ນ; ໃຫ້ທາງພະແນກ ກປ ແຂວງ ແລະ ຫ້ອງການ ກປ ເມືອງ ສົ່ງພະນັກງານວິຊາການໄປແລກປ່ຽນບົດຮຽນກັບແຂວງອື່ນ ກ່ຽວກັບການປູກ ແລະ ການລ້ຽງ; ກ່ຽວກັບພືດອຸດສາຫະກຳໄມ້ໃຫ້ໝາກຕ່າງໆ ໃຫ້ເລືອກປູກພືດທີ່ເປັນສິນຄ້າ ແລະ ເໝາະສົມກັບພື້ນທີ່; ສ້າງຄອບຄົວຕົວແບບໃນການປູກ-ການລ້ຽງ ບ້ານໜຶ່ງໃຫ້ໄດ້ໜຶ່ງຕົວແບບ; ການຜະລິດເປັນສິນຄ້າໃຫ້ເບິ່ງທ່າແຮງທາງສິນຄ້າ ແລະ ທ່າແຮງສະບຽງ, ວຽກງານປ່າໄມ້ ເຂດເມືອງກະລຶມເປັນເຂດຮ້ອນຊຸ່ມຊື່ນບໍ່ປູກໄມ້ກໍ່ສາມາດເຮັດໃຫ້ປ່າກັບມາມີສີຂຽວຄືນໄດ້ ນີ້ຄືການຟື້ນຟູປ່າໄມ້ແບບທຳມະຊາດ ແລະໃຫ້ເອົາໃຈໃສ່ຮັກສາບໍ່ໃຫ້ໄຟໄໝ້ລາມປ່າຕາມຄໍາສັ່ງຂອງລັດຖະມົນຕີກະຊວງກະສິກໍາ ແລະ ປ່າໄມ້ ເລກທີ 08/ກປ, ລົງວັນທີ 14 ມີນາ 2018.
ພາບ ແລະ ຂ່າວໂດຍ: ພະແນກຂ່າວສານກະສິກຳ ແລະ ປ່າໄມ້.
ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ແລະ ທິດທາງແຜນການປີ 2018
ທ່າມກາງບັນຍາກາດທີ່ທົ່ວພັກທົ່ວກອງທັບ ແລະ ທົ່ວປວງຊົນລາວ ກໍາລັງກະກຽມສະຫຼຸບການຈັດຕັ້ງປະຕິບັດວຽກງານຕາມມະຕິກອງປະຊຸມໃຫຍ່ຄັ້ງທີ X ຂອງພັກໃນໄລຍະກາງສະໄໝກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ແລະ ແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ 2016 ຫາ 2020, ກະຊວງກະສິກໍາ ແລະ ປ່າໄມ້ ໄດ້ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ຂື້ນ ໃນວັນທີ 6 ມີນາ 2018, ທີ່ຫໍປະຊຸມແຫ່ງຊາດ ໃຫ້ກຽດເປັນປະທານກ່າວເປີດ ໂດຍທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມດ້ວຍທ່ານຮອງລັດຖະມົນຕີກະຊວງ, ມີທ່ານຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ຮອງຫົວໜ້າອົງການ ແລະ ທຽບເທົ່າ, ຮອງເຈົ້າແຂວງ, ເຈົ້າຄອງນະຄອນຫຼວງວຽງຈັນ, ທ່ານຫົວໜ້າຫ້ອງການກະຊວງ, ບັນດາກົມ, ສະຖາບັນ, ຫົວໜ໊າພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອເປັນການສະຫຼຸບຜົນການຈັດຕັ້ງປະຕິບັດວຽກງານປະຈໍາປີ 2017 ແລະ ທິດທາງແຜນການປີ 2018 ເພື່ອສັງເກດຕີລາຄາຜົນງານ, ຜົນສໍາເລັດດ້ານດີ, ດ້ານອ່ອນ, ຂໍ້ຄົງຄ້າງ ແລະ ເພື່ອກໍານົດທິດທາງ, ໜ້າທີ, ມາດຕະການ ແລະ ນະໂຍບາຍໃຫ້ແທດເໝາະກັບສະພາບຄວາມເປັນຈິງ, ເປົ້າໝາຍເພື່ອກໍານົດມາດຕະການຈັດຕັ້ງປະຕິບັດແຕ່ສູນກາງລົງຮອດທ້ອງຖິ່ນ ໃຫ້ມີຈຸດສຸມທີ່ເປັນເອກະພາບກັນເພື່ອເຮັດໃຫ້ 4 ແຜນງານໃຫຍ່ຄື: ແຜນງານຄໍ້າປະກັນສະບຽງອາຫານ, ແຜນງານຜະລິດກະສິກໍາເປັນສິນຄ້າຕິດພັນກັບການປຸງແຕ່ງ, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ແລະ ແຜນງານພັດທະນາຊົນນະບົດ ແລະ ລຶບລ້າງຄວາມທຸກຍາກທົ່ວປະເທດ ແລະ ສູ້ຊົນຈັດຕັ້ງປະຕິບັດຄາດໝາຍປີ 2018 ຂອງຂະແໜງກະສິກໍາ ແລະ ປ່າໄມ້ ທີ່ມະຕິສະພາແຫ່ງຊາດ ແລະ ດໍາລັດນາຍົກລັດຖະມົນຕີກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດປີ 2018 ໃຫ້ປາກົດຜົນເປັນຈິງ, ເຊິ່ງກອງປະຊຸມດັ່ງກ່າວຈະໄດ້ດໍາເນີນໄປເປັນເວລາ 2 ວັນ ແລະ ຈະໄດ້ປິດລົງໃນວັນທີ 7 ມີນາ 2018 ນີ້.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020
ໃນວັນທີ 5 ມີນາ 2018 ກະຊວງ ກະສິກໍາ ແລະ ປ່າໄມ້, ໄດ້ເປີດກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020 ຂື້ນ, ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມນີ້ມີທ່ານ ປອ ລຽນ ທີແກ້ວ ລັດຖະມົນຕີກະຊວງ ກປ, ທ່ານ ຮອງລັດຖະມົນຕີກະຊວງ ກປ, ທ່ານ ຮອງເຈົ້າແຂວງ, ພະແນກ ກປ ແຂວງ, ນະຄອນຫຼວງ, ຫົວໜ້າ-ຮອງຫົວໜ້າ ຫ້ອງການ, ກົມ, ສະຖາບັນອ້ອມຂ້າງກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອປຶກສາຫາລືກໍານົດມາດຕະການ ແລະ ນະໂຍບາຍເພື່ອກະຕຸກຊຸກຍູ້ການປູກໄມ້ ແລະ ຟື້ນຟູປ່າໃຫ້ມີຄວາມສອດຄ່ອງ ແລະ ແທດເໝາະກັບສະພາບຈຸດພິເສດຂອງປະເທດເຮົາ ພ້ອມນັ້ນກໍ່ແນ່ໃສ່ແກ້ໄຂບັນຫາປະກົດການຫຍໍ້ທໍ້ ແລະ ຂໍ້ຄົງຄ້າງຕ່າງໆໃນວຽກງານປູກໄມ້ ແລະ ຟື້ນຟູປ່າໃນທົ່ວປະເທດ. ໃນທີ່ປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດຍຸດທະສາດປ່າໄມ້ກ່ຽວກັບການປູກໄມ້ ແລະ ຟື້ນຟູປ່າ ແລະ ທິດທາງແຜນການໃນຕໍ່ໜ້າ; ບາງບົດຮຽນກ່ຽວກັບການສົ່ງເສີມການປູກໄມ້ຕິດພັນກັບການປຸງແຕ່ງໄມ້ທີ່ຣາຊະອານາຈັກຊູແອດ; ບາງບົດຮຽນ, ທິດທາງ ແລະ ແຜນການກ່ຽວກັບການປູກ ແລະ ການຕະຫຼາດຊະນິດພັນໄມ້ໃຫຍ່ໄວ; ການປູກ ແລະ ການຕະຫຼາດໄມ້ປູກ ແລະ ໄມ້ພື້ນເມືອງໃນ ສປປ ລາວ. ຫຼັງຈາກນັ້ນ, ທ່ານປະທານກໍ່ໄດ້ເຈາະຈີ້ມບາງບັນຫາດັ່ງນີ້: 1. ນະໂຍບາຍ ແລະ ນິຕິກໍາກ່ຽວກັບການສົ່ງເສີມການປູກໄມ້ ແລະ ຟື້ນຟູປ່າທີ່ຈັດຕັ້ງປະຕິບັດໃນປັດຈຸບັນເຫັນວ່າມີອັນໃດສອດຄ່ອງ ຫຼື ມີອັນໃດທີ່ຈະຕ້ອງໄດ້ປັບປຸງແກ້ໄຂ; 2.ຂໍ້ຫຍຸ້ງຍາກ ຫຼື ອຸປະສັກທີ່ເປັນສິ່ງກົດໜ່ວງຖ່ວງດຶງການລົງທຶນການປູກໄມ້ໃນໄລຍະຜ່ານມາມີຫຍັງແດ່ທີ່ຈະນໍາສະເໜີຕໍ່ລັດຖະບານເພື່ອແກ້ໄຂຢ່າງຂາດຕົວ; 3.ນະໂຍບາຍກ່ຽວກັບການສົ່ງເສີມການປຸງແຕ່ງໄມ້ປູກ ແລະ ການຕະຫຼາດມີອັນໃດແດ່ທີ່ຈະຕ້ອງໄດ້ຮັບການປັບປຸງ; 4. ການພັດທະນາເຕັກນິກ ແລະ ເຕັກໂນໂລຊີ ລວມທັງການພັດທະນາສີມືແຮງງານໃນການປຸງແຕ່ງໄມ້ປູກໃນໄລຍະຜ່ານມາໄດ້ຮັບການປັບປຸງ ແລະ ພັດທະນາຄືແນວໃດ. ຕໍ່ກັບການເຈາະຈີ້ມດັ່ງກ່າວໄດ້ເປີດກ້ວາງປຶກສາຫາລື ແລະ ປະກອບຄໍາເຫັນຈາກບັນດາຜູ້ແທນໃນກອງປະຊຸມດ້ວຍບັນຍາກາດອັນຟົດຟື້ນ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ທິດທາງແຜນການປີ 2018 ຂອງສະຫະພັນແມ່ຍິງກະຊວງ ກະສິກໍາ ແລະ ປ່າໄມ້
ເພື່ອສະເຫຼີມສະຫຼອງວັນແມ່ຍິງສາກົນ 8 ມີນາ 2018 ຄົບຮອບ 108 ປີຢ່າງເປັນຂະບວນຟົດຟື້ນສະຫະພັນແມ່ຍິງກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດຂໍ້ແຂ່ງຂັນ 3 ດີ, ໄລຍະ 3 ປີ ເຄິ່ງສະໄໝ 2015 ຫາ2017 ແລະ ວາງທິດທາງແຜນການປີ 2018 ຂື້ນ ໃນວັນທີ 02 ມີນາ 2018 ທີ່ສະໂມສອນກະຊວງກະສິກໍາ ແລະ ປ່າໄມ້, ໂດຍໃຫ້ກຽດເປັນປະທານຂອງ ທ່ານ ທອງພັດ ວົງມະນີ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ, ທ່ານ ນາງ ບຸນທຽນ ວົງໄກສອນ ປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້ ພ້ອມນີ້ມີຄະນະພັກຮາກຖານບັນດາກົມ, ສະຖາບັນ, ອົງການຈັດຕັ້ງຊາວໜຸ່ມ, ກໍາມະບານ, ຄະນະຮາກຖານ ແລະ ໜ່ວຍສະຫະພັນແມ່ຍີງອ້ອມຂ້າງກະຊວງ ພ້ອມດ້ວຍເອື້ອຍນ້ອງສະມາຊີກເຂົ້າຮ່ວມ 100 ກວ່າທ່ານ.
ໃນກອງປະຊຸມໄດ້ມີການຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ວາງທິດທາງແຜນການ ປີ 2018 ໂດຍປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້, ພ້ອມທັງມອບໃບຍ້ອງຍໍ 3 ດີໃຫ້ຮາກຖານ, ໜ່ວຍ ແລະ ບຸກຄົນ 3 ດີ ປະເພດ 1 ຈໍານວນ 603 ຄົນ ແລະ ປະເພດ 2 ຈໍານວນ 20 ຄົນ ຈາກນັ້ນແຕ່ລະຮາກຖານກໍ່ໄດ້ຂຶ້ນຈັບມືແຂ່ງຂັນ 3 ດີ ຮວ່ມກັນ. ໃນໂອກາດດຽວກັນ ບັນດາຜູ້ເຂົ້າຮ່ວມຍັງໄດ້ຮັບຟັງປາຖະກະຖາ ແລະ ໂອ້ລົມຈາກ ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ ແລະ ໄດ້ມີການມອບໃບກຽດຕິຄຸນໃຫ້ເລຂາຄະນະພັກແຕ່ລະຮາກຖານ, ມອບຂອງຂວັນໃຫ້ປ້າອາວຸໂສບໍານານ, ຄອບ ຄົວການນໍາຄະນະສະຫະພັນແມ່ຍີງກະຊວງ ແລະ ມອບດອກໄມ້ໃຫ້ເອື້ອຍນອ້ງສະມາຊິກໃນທີ່ປະຊຸມ. ໃນຕອນທ້າຍ ທ່ານປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍໃນການສູ້ຊົນຂອງເອື້ອຍນ້ອງຍິງທີ່ສາມາດຍາດໄດ້ໝາກຜົນ ແລະ ຜົນສໍາເລັດ ຈາກການເຄື່ອນໄຫວໃນໄລຍະ 3 ປີຜ່ານມາ, ພ້ອມທັງເອົາໃຈໃສ່ຕິດຕາມກວດກາການຮ່ວມຊີວິດປະຈໍາ 1 ເດືອນ, 3 ເດືອນ, 6 ເດືອນ ແລະ 1 ປີ ເພື່ອສະຫຼຸບຕີລາຄາ, ຖອດຖອນບົດຮຽນ ແລະ ວາງແຜນການໃນຕໍ່ໜ້າ, ຍົກລະດັບຄວາມຮູ້ທາງດ້ານວິຊາສະເພາະ, ທິດສະດີການເມືອງ ແລະ ຄຸນສົມບັດ ສິນ ທຳປະຕິວັດໃຫ້ສູງຂຶ້ນ, ເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີອັນດີງາມ, ບຸກບືນສືບຕໍ່ປະຕິບັດບົດ ບາດ ຄວາມສະເໝີພາບລະຫວ່າງຍິງ-ຊາຍ ໃນການພັດທະນາຄວາມກ້າວໜ້າຂອງແມ່ຍິງ, ຕັ້ງໜ້າປະກອບສ່ວນເຂົ້າໃນພາລະກິດລວມຂອງຊາດເວົ້າລວມເວົ້າສະເພາະກໍ່ຄືປະກອບສ່ວນສຸມໃສ່ປະຕິບັດຂໍ້ແຂ່ງຂັນຂອງຂະແໜງກະສິກໍາ ແລະ ປ່າໄມ້ ຕາມ 3 ເນື້ອໃນ ແລະ 4 ເປົ້າໝາຍ, ສືບຕໍ່ເຊື່ອມຊືມ ແລະ ຕັ້ງໜ້າປະຕິບັດຂໍ້ແຂ່ງຂັ້ນ 3 ດີ ຂອງສູນກາງສະຫະພັນແມ່ຍີງລາວຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີ ໃຫ້ໄດ້ຕາມຄາດໝາຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ພິທີມອບ-ຮັບ ກິດຈະກໍາ, ງົບປະມານ ແລະ ຄວາມຮັບຜິດຊອບຂອງ ”ແຜນງານຊຸມຊົນຊື່ນໃຈ” ຢູ່ 2 ແຂວງ ພາກເໜືອ
ແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ” ແຜນງານຊຸມຊົນຊື່ນໃຈ”, ທີ່ຂື້ນກັບກົມແຜນການ ແລະ ການເງິນ, ກະຊວງກະສິກໍາ ແລະ ປ່າໄມ້. ເປັນແຜນງານໜຶ່ງທີ່ໄດ້ຈັດຕັ້ງປະຕິບັດ ແລະ ຜັນຂະຫຍາຍແຜນພັດທະນາເສດຖະກິດສັງຄົມແຫ່ງຊາດທີ່ພັກ ແລະ ລັດຖະບານ ແຫ່ງ ສປປ ລາວ ໄດ້ວາງອອກ, ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າຢູ່ໃນເຂດຊົນນະບົດຫ່າງໄກສອກຫຼີກ 09 ເມືອງ, 255 ບ້ານຂອງສອງແຂວງຄື: ໄຊຍະບູລີ ແລະ ອຸດົມໄຊ, ແຜນງານດັ່ງກ່າວໄດ້ເລີ່ມຈັດຕັ້ງປະຕິບັດແຕ່ປີ 2012 ແລະ ຈະໄດ້ສີ້ນສຸດລົງໃນທ້າຍເດືອນກຸມພາ 2018 ນີ້ ລວມໄລຍະເວລາຂອງແຜນງານ 6 ປີ, ໂດຍໄດ້ຮັບການສະໜັບສະໜູນທຶນຊ່ວຍເຫຼືອລ້າຈາກອົງການພັດທະນາກະສິກໍາ ສາກົນ, ອົງການພັດທະນາປະເທດ ລຸກຊໍາບວກ ແລະ ອົງການອາຫານໂລກ, ເພື່ອໃຫ້ບັນດາກິດຈະກໍາຕ່າງໆທີ່ທາງແຜນງານໄດ້ກໍ່ຕັ້ງຂື້ນມາແລ້ວນັ້ນໃຫ້ມີຄວາມຍືນຍົງ, ມີການເຄື່ອນໄຫວຢ່າງຕໍ່ເນື່ອງ ແລະ ເຮັດໃຫ້ຊຸມຊົນມີຄວາມເຂັ້ມແຂງໄປເລື່ອຍໆນັ້ນ. ໃນວັນທີ 20 ແລະ 22 ກຸມພາ 2018 ທີ່ຫ້ອງປະຊຸມຂອງພະແນກກະສິກໍາ ແລະ ປ່າໄມ້ ແຂວງ ໄຊຍະບູລີ ແລະ ອຸດົມໄຊ ແຜນງານຊຸມຊົນຊື່ນໃຈໄດ້ຈັດພິທີເຊັນບົດບັນທຶກມອບ-ຮັບ ບັນດາກິດຈະກໍາ, ອຸປະກອນ ແລະ ການຄຸ້ມຄອງ ໃຫ້ແຂວງເປົ້າໝາຍເຊິ່ງປະກອບດ້ວຍກິດຈະກໍາການສົ່ງເສີມການຜະລິດ, ການປູກ, ການລ້ຽງ ຫຼາຍກ່ວາ 20 ກິດຈະກໍາ, ກອງທຶນໃນການພັດທະນາບ້ານ, ທະນາຄານເຂົ້າ, ງົບປະມານໃນການຝຶກອົບຮົມ ແລະ ສ້າງຄວາມສາມາດໃຫ້ທ້ອງຖິ່ນ, ພາຫະນະ ແລະ ອຸປະກອນຮັບໃຊ້ລວມທັງພື້ນຖານໂຄງລ່າງ ລວມມູນຄ່າເກືອບ 70 ຕື້ກີບ.
ກ່ອນການເຊັນມອບ-ຮັບຜູ້ເຂົ້າຮ່ວມໄດ້ຮັບຟັງການລາຍງານການຈັດຕັ້ງປະຕິບັດວຽກແຜນງານຈາກຜູ້ປະສານງານປະຈໍາແຂວງ ແລະ ຮັບຟັງການຜ່ານໜັງສືມອບ-ຮັບກິດຈະກໍາຂອງແຜນງານ ໂດຍ ທ່ານ ຄອນສະຫວັນ ວົງໄຊ ຫົວໜ້າປະສານງານແຜນງານຂັ້ນສູນກາງ, ພິທີມອບ-ຮັບແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ ໃຫ້ແຂວງເປັນຜູ້ຄຸ້ມຄອງນີ້ ເປັນກຽດກ່າວມອບໂດຍທ່ານ ສະຫວັນຫານພົມ ຮອງຫົວໜ້າກົມແຜນການ ແລະ ການເງິນ ຄະນະກໍາມະການຊີ້ນໍາໂຄງການຂັ້ນສູນກາງ ຕ່າງໜ້າກະຊວງກະສິກໍາ ແລະ ປ່າໄມ້ ແລະ ຕ່າງໜ້າກ່າວຮັບຂອງແຂວງ ໄຊຍະບູລີ ໂດຍທ່ານ ຄໍາຫຼ້າ ຜີ້ວນາວັນ ຫົວໜ້າພະແນກ ກະສິກໍາ ແລະ ປ່າໄມ້ ແຂວງແລະ ແຂວງ ອຸດົມໄຊ ໂດຍ ທ່ານ ບຸນຍືມ ໄຊຍະເວັນ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ. ພິທີມອບ-ຮັບໃນຄັ້ງນີ້ເປັນກຽດເຂົ້າຮ່ວມຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໆ ໄຊຍະບູລີ, ມີຫົວໜ້າປະສານງານແຜນງານຂັ້ນສູນກາງ, ຊຽວຊານຄຸ້ມຄອງໂຄງການ ແລະ ຄະນະທີມງານຈາກບັນດາກົມທີ່ຂື້ນກັບຊວງກະສິກໍາ ແລະ ປ່າໄມ້, ເຈົ້າເມືອງ, ຮອງເຈົ້າເມືອງຈາກເມືອງເປົ້າໝາຍ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ຜູ້ປະສານງານຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານໃນຄັ້ງນີ້ດ້ວຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ