ຝຶກອົບຮົມ ສ້າງຄວາມເຂັ້ມແຂງ ເຕັກນິກການຜະລິດເຂົ້າ ແລະ ນໍາໃຊ້ກົນຈັກກະສິກໍາ ໃຫ້ກຸ່ມຊາວກະສິກອນ
ໂຄງການປັບປຸງກົນຈັກກະສິກຳ ເປັນໂຄງການທີ່ໄດ້ການຊ່ວຍເຫຼືອລ້າຈາກລັດຖະບານເກົາຫຼີ ໃນມູນຄ່າ 3.700.000 ໂດລາສະຫະລັດ, ໄລຍະການຈັດຕັ້ງປະຕິບັດໂຄງການແມ່ນນັບແຕ່ປີ 2020-2024, ສະຖານທີ່ຈັດຕັ້ງປະຕິບັດໂຄງການແມ່ນຢູ່ສູນພັດທະນາກະສິກຳໜອງແຫ້ວ, ນະຄອນຫຼວງວຽງ ແລະ ສູນພັດທະນາກະສິກຳປາກແຈ້ງ, ແຂວງ ວຽງຈັນ ແລະ ຈັດຕັ້ງປະຕິບັດໂດຍກົມສົ່ງເສີມເຕັກນິກ ແລະ ປຸງແຕ່ງກະສິກຳ.
ໂຄງການດັ່ງກ່າວນີ້ເພື່ອປັບປຸງຜົນຜະລິດເຂົ້າແນວພັນ ລຸ້ນ 3 ໂດຍການນຳໃຊ້ກົນຈັກ ເຂົ້າມາຊ່ວຍໃນວຽກງານການຜະລິດກະສິກຳ ເພື່ອຫຼຸດຜ່ອນແຮງງານຄົນ, ປັບປຸງລະບົບຊົນລະປະທານ ເພື່ອຕອບສະໜອງໃຫ້ແກ່ການຜະລິດແນວພັນເຂົ້າ ແລະ ຍົກສູງສະມັດຕະພາບຜົນຜະລິດເຂົ້າໃຫ້ເພີ່ມຂຶ້ນ ແລະ ສ້າງຄວາມເຂັ້ມແຂງໃຫ້ຊາວກະສິກອນ ແລະ ອົງການຈັດຕັ້ງຊາວກະສິກອນໃຫ້ດີຂຶ້ນ.
ໃນວັນທີ 31 ພຶດສະພາ 2023 ໂຄງການປັບປຸງກົນຈັກກະສິກໍາ, ກົມສົ່ງເສີມກະສິກໍາ ແລະ ສະຫະກອນ ໄດ້ຈັດພິທີປິດຝຶກອົບຮົມສ້າງຄວາມເຂັ້ມແຂງ ເຕັກນິກການຜະລິດເຂົ້າ ແລະ ນໍາໃຊ້ກົນຈັກກະສິກໍາ ໃຫ້ກຸ່ມຊາວກະສິກອນຂຶ້ນ, ທີ່ສູນພັດທະນາກະສິກໍາໜອງແຫ້ວ. ໂດຍການເປັນປະທານຮ່ວມຂອງ ທ່ານ ວຽງສະໄຫວ ແສງສຸລິວົງ ຮອງຫົວຫນ້າກົມສົ່ງເສີມກະສິກຳ ແລະ ສະຫະກອນ; ທ່ານ ດຣ ຈູ ສຶຫັນ ຜູ້ຊ່ວຍຊ່ຽວຊານປະຈຳໂຄງ ການ; ທ່ານ ນ. ແກ້ວອຸດອນ ພິລາງາມ ຫົວໜ້າສູນພັດທະນາກະສິກໍາໜອງແຫ້ວ.
ໃນພິທີ ທ່ານ ວິໄລສັກ ໄຊຍະສິດ ຮອງພະແນກສົ່ງເສີມເຕັກນິກການຜະລິດ ແລະ ກົນຈັກກະສິກໍາ, ຜູ້ປະ ສານງານໂຄງການປັບປຸງກົນຈັກ ກະສິກໍາ ໄດ້ລາຍງານໃຫ້ຮູ້ວ່າ: ການຝຶກອົບຮົມໃນຄັ້ງນີ້ ໄດ້ຈັດຂຶ້ນເປັນເວລາ 2 ວັນ, ໃນລະຫວ່າງວັນທີ 30-31 ພຶດສະພາ 2023. ເຊິ່ງມີຜູ້ເຂົ້າຮ່ວມໃນການຝຶກອົບຮົມທັງໝົດ 24 ທ່ານ, ຍິງ 11 ທ່ານ, ທີ່ມາຈາກ ກຸ່ມຜູ້ຜະລິດແນວພັນເຂົ້າ ລຸ້ນ 3 ແລະ ກຸ່ມຜະລິດເຂົ້າເປັນສິນຄ້າ ກຸ່ມຫາດດອກແກ້ວນາ ລ້ອງ, ນາໄຫ, ໜອງແຫ້ວ, ທ່າສະຫວ່າງ ແລະ ກຸ່ມທົ່ງຮາບທ່າງ່ອນ. ເຊິ່ງຫົວຂໍ້ທີ່ນໍາມາຝຶກໃນຄັ້ງນີ້ ປະກອບມີ: 1) ການຄວບຄຸມ-ກໍາຈັດຫຍ້າ, ການໃສ່ຝຸ່ນ, ການປ້ອງກັນ ແລະ ກໍາຈັດພະຍາດໃນນາເຂົ້າ, ການປ້ອງກັນ ແລະ ກໍາຈັດແມງໄມ້ໃນນາເຂົ້າ;2) ເຕັກນິກການກະກຽມດິນ, ການຄັດເລືອກແນວພັນ ແລະ ການຕົກກ້າ; 3)ຝຶກວິທີການນໍາໃຊ້ລົດໄຖນາ, ລົດ ດໍານາ, ລົດພວນດິນ ແລະ ລົດກ່ຽວເຂົ້າ ແລະ 4) ການຮັກສາເມັດພັນຫຼັງການເກັບກ່ຽວ ແລະ ວຽກອື່ນໆທີ່ກ່ຽວ ຂ້ອງກັບການຜະລິດ.
ໃນຕອນທ້າຍຂອງພິທີ ກໍ່ໄດ້ມີການມອບໃບຢັ້ງຢືນ ໃຫ້ກັບນັກສໍາມະນາກອນ ທີ່ເຂົ້າຮ່ວມໃນການຝຶກອົບ ຮົມໃນຄັ້ງນີ້ດ້ວຍ.