ສະຫະພັນແມ່ຍິງກະຊວງກະສິກຳ ແລະ ປ່າໄມ້ ເຄື່ອນໄຫວແລກປ່ຽນບົດຮຽນ ກັບສະຫະພັນແມ່ຍິງພະແນກກະສິກຳ ແລະ ປ່າໄມ້ແຂວງ ອັດຕະປຶ
ເພື່ອສ້າງຂະບວນການຂໍ່ານັບຮັບຕ້ອນ ວັນສ້າງຕັ້ງສະຫະພັນແມ່ຍິງລາວ ຄົບຮອບ 62 ປີ (20 ກໍລະກົດ 1955 – 20 ກໍລະ ກົດ 2017) ໃຫ້ເປັນຂະບວນຟົດຟື້ນ. ໃນລະຫວ່າງວັນທີ 20-23 ກໍລະກົດ 2017 ທ່ານ ນ. ບຸນທຽນ ວົງໄກສອນ ປະທານສະຫະພັນແມ່ຍິງກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ ໄດ້ລົງເຄື່ອນໄຫວແລກປ່ຽນບົດຮຽນ ກັບສະຫະພັນແມ່ຍິງພະແນກກະສິກຳ ແລະ ປ່າໄມ້ ແຂວງ ອັດຕະປື ໃຫ້ການຕ້ອນຮັບໂດຍທ່ານ ນ. ວິໄລພອນ ວໍລະພິມ ຫົວໜ້າພະແນກກະສິກຳ ແລະ ປ່າໄມ້ແຂວງ ອັດຕະປື.
ໃນການລົງໄປເຄື່ອນໄຫວແລກປ່ຽບົດຮຽນໃນຄັ້ງນີ້ສະຫະພັນແມ່ຍິງກະຊວງກະສິກຳ ແລະ ປ່າໄມ້ ໄດ້ມອບເຄື່ອງຊ່ວຍເຫຼືອໃຫ້ແກ່ພະແນກກະສິກຳ ແລະ ປ່າໄມ້ແຂວງ ອັດຕະປື ເຊິ່ງປະກອບມີ: ປຶ້ມແບບຮຽນ, ປຶ້ມຂຽນ, ປຶ້ມເຕັກນິກກະສິກຳ ແລະ ປ່າໄມ້, ປຶ້ມກົດໝາຍ, ເຄື່ອງນຸ່ງຫົ່ມ ເພື່ອປະກອບສ່ວນຊ່ວຍເຫຼືອສັງຄົມໂດຍສິ່ງຂອງເຫຼົ່ານີ້ ທາງພະແນກກະສິກຳ ແລະ ປ່າໄມ້ແຂວງ ອັດຕະປື ຈະນຳໄປມອບໃຫ້ບັນດາໂຮງຮຽນ ແລະ ປະຊາຊົນທີ່ຢູ່ເຂດຫ່າງໄກສອກຫຼີກ. ພ້ອມດຽວກັນນີ້ຍັງໄດ້ລົງຢ້ຽມ ຢາມສວນປູກຢາງພາລາ ແລະ ໝາກໄມ້ສົ່ງອອກຂອງບໍລິສັດຮວ່າງແອງຍາລາຍ ເຊິ່ງທາງບໍລິສັດໄດ້ປູກໝາກມັງກອນ, ໝາກກ້ຽງໃຫຍ່, ໝາກນອດ, ໝາກກ້ວຍ ແລະ ອື່ນໆ. ຊຶ່ງສາມາດສ້າງວຽກເຮັດງານທຳໃຫ້ແກ່ປະຊາຊົນ ປະມານ 10.000 ກວ່າຄົນ, ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ.
ຂຽນໂດຍ: ເຂັມມະໄລ ສົນດາວັນ.
ກວດແກ້: ປ້ອມ ພັນທະວົງ.