ພິທີມອບ-ຮັບ ອາຄານອາເນກປະສົງ ແລະ ອຸປະກອນຫ້ອງທົດລອງ ໃຫ້ໂຄງການພັດທະນາ ແລະ ປັບປຸງເຕັກໂນໂລຊີການຜະລິດພືດຜັກ

Published December 30, 2021 | By Khemmalay SONDAVANH

ໂຄງການພັດທະນາ ແລະ ປັບປຸງເຕັກໂນໂລຊີການຜະລິດພືດຜັກ ຢູ່ເຂດເມືອງ ຫາດຊາຍຟອງ ແມ່ນໄດ້ຮັບທຶນສະໜັບສະໜູນຈາກ ກະຊວງກະສິກຳ, ອາຫານ ແລະ ພັດທະນາຊົນນະບົດ ຂອງ ສ.ເກົາຫຼີ ໂດຍຜ່ານລັດວິສາຫະກິດຊຸມຊົນ-ຊົນນະບົດ ສ.ເກົາຫຼີ (KRC), ຈຳນວນ 3.478.260 ໂດລາສະຫະລັດ ຫຼື ເທົ່າກັບ 4.000.000.000 ວອນ. ໄລຍະການຈັດຕັ້ງປະຕິບັດໂຄງການແມ່ນ 04 ປີ (2019-2022).

ຈຸດປະສົງຂອງໂຄງການແມ່ນ ເພື່ອຄົ້ນຄວ້າ ແລະ ພັດທະນາ ເຕັກໂນໂລຊີການຜະລິດພືດຜັກທີ່ເໝາະສົມ ໃນສະພາບແວດລ້ອມ ຂອງ ສປປ ລາວ; ເພື່ອສ້າງຄວາມເຂັ້ມແຂງໃຫ້ນັກຄົ້ນຄວ້າ, ນັກສົ່ງເສີມ, ນັກສຶກສາ ແລະ ຊາວກະສິກອນ ດ້ານເຕັກໂນໂລຊີການຜະລິດພືດຜັກ ແລະ ເພື່ອປັບປຸງໂຄງລ່າງພື້ນຖານຂອງສູນຄົ້ນຄວ້າພືດຜັກ ແລະ ໄມ້ໃຫ້ໝາກ, ເປັນບ່ອນຮຽນຮູ້ ແລະ ເປັນພື້ນທີ່ຕົວແບບ. ເຊິ່ງໂຄງການດັ່ງກ່າວນີ້ແມ່ນສູນຄົນຄວ້າພືດຜັກ ແລະ ໄມ້ໃຫ້ໝາກ, ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ, ກະຊວງກະສິກຳ ແລະ ປ່າໄມ້ ເປັນຜູ້ຈັດຕັ້ງປະຕິບັດໂຄງການ.

ໃນວັນທີ 24 ທັນວາ 2021 ໂຄງການພັດທະນາ ແລະ ປັບປຸງເຕັກໂນໂລຊີການຜະລິດພືດຜັກ, ໄດ້ຈັດພິທີ ມອບ-ຮັບ ອາຄານອາເນກປະສົງ ແລະ ອຸປະກອນຫ້ອງທົດລອງ ຈາກ KRC ໃຫ້ກັບໂຄງການການພັດທະນາ ແລະ ປັບປຸງເຕັກໂນໂລຊີການຜະລິດພືດຜັກ ຂຶ້ນ, ທີ່ສູນຄົ້ນຄວ້າພືດຜັກ ແລະ ໄມ້ໃຫ້ໝາກ, ບ້ານ ຫາດດອກແກ້ວ, ເມືອງ ຫາດຊາຍຟອງ, ນະຄອນຫຼວງວຽງຈັນ. ຕາງໜ້າ KRC ເຊັນມອບໂດຍ ທ່ານ ດຣ ຢ໋ອງ ອິນ ໂຮ ຫົວໜ້າຫ້ອງການ KRC ປະຈຳລາວ, ຕາງໜ້າກະຊວງກະສິກຳ ແລະ ປ່າໄມ້ ເຊັນຮັບໂດຍ ທ່ານ ນາງ ປອ ໃຈ ບຸນພະນຸໄຊ ຫົວໜ້າສະຖາບັນຄົນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ. ເຊິ່ງມີພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພະຍານ.

ສິ່ງອຳນວຍຄວາມສະດວກຕ່າງໆທີ່ມອບໃຫ້ໂຄງການໃນຄັ້ງນີ້ ແມ່ນຈະນຳໃຊ້ເຂົ້າໃນວຽກງານເພີ່ມຜົນຜະລິດ, ປັບປຸງຄຸນນະພາບ ແລະ ຄວາມປອດໄພ ຂອງຜະລິດຕະພັນພືດຜັກ ໃນ 04 ບ້ານເປົ້າໝາຍຂອງໂຄງການ ຄື: ບ້ານ ຫົວຫ້າ, ຊາຍຟອງເໜືອ, ທ່າແຂກ ແລະ ບ້ານ ສີມມະໂນ, ເມືອງ ຫາດຊາຍຟອງ, ນະຄອນຫຼວງວຽງຈັນ. ນອກນັ້ນ, ຍັງສ້າງສວນສາທິດ, ຄອບຄົວຕົວແບບ ແລະ ບ້ານຕົວແບບ ເພື່ອໃຫ້ຊາວກະສິກອນ, ນັກຮຽນ-ນັກສຶກສາ, ຜູ້ປະກອບການ ແລະ ພະນັກງານ ໄດ້ມາຮຽນຮູ້ ແລະ ຖອດຖອນບົດຮຽນ.

https://fb.watch/abOoixRJgW/