ພິທີພົບປະແຮກສ່ຽວ ລະຫວ່າງ ອົງການປົກຄອງແຂວງໄຊຍະບູລີ ກັບ ກະຊວງກະສິກຳ ແລະ ປ່າໄມ້
ໃນວັນທີ 14 ຕຸລາ 2016 ທີ່ຜ່ານມາ ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ໄຊຍະບູລີ ໄດ້ຈັດພິທີພົບປະແຮກສ່ຽວ ລະຫວ່າງ ອົງການປົກຄອງແຂວງ ກັບ ກະຊວງກະສິກຳ ແລະ ປ່າໄມ້ຂຶ້ນ ໂດຍການເປັນປະທ່ານ ຂອງ ທ່ານ ປະລິນຍາເອກ ລຽນ ທີແກ້ວ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງກະສິກຳ ແລະ ປ່າໄມ້; ທ່ານ ພົງສະຫວັນ ສິດທະວົງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆໄຊຍະບູລີ. ມີບັນດາພະແນກການ ແລະ ທຽບເທົ່າອ້ອມຂ້າງແຂວງ ແລະ ບັນດາກົມອ້ອມຂ້າງກະຊວງ ພ້ອມດ້ວຍຜູ້ຕາງໜ້າ 3 ອົງການຈັດຕັ້ງມະຫາຊົນຂອງສອງພາກສ່ວນ ເຂົ້າຮ່ວມຢ່າງພ້ອມພຽງ.
ທ່ານ ຄຳພັນ ເໝືອນສິດທິດາ ຫົວໜ້າຫ້ອງການກະຊວງກະສິກຳ ແລະ ປ່າໄມ້ ໄດ້ຂຶ້ນຜ່ານຮ່າງບົດບັນທຶກແຮກສ່ຽວ ເຊິ່ງມີເນື້ອໃນດັ່ງນີ້:
- ຊ່ວຍສ້າງຄວາມເຂັ້ມແຂງດ້ານວິຊາການ ໂດຍການຍົກລະດັບຄວາມຮູ້ຄວາມສາມາດໃຫ້ພະນັກງານຂະແໜງການກະສິກຳ, ປ່າໄມ້ ແລະ ພັດທະນາຊົນນະບົດ ແລະ ລຶບລ້າງຄວາມທຸກຍາກ.
- ຊ່ວຍຊອກຫາແຫຼ່ງທຶນມາຈັດຕັ້ງປະຕິບັດໂຄງການຄ້ຳປະກັນສະບຽງອາຫານ ເຊັ່ນ: ການກໍ່ສ້າງ ແລະ ສ້ອມແປງຊົນລະປະທານ ຢູ່ 3 ເມືອງ ຄື: ເມືອງພຽງ, ເມືອງໄຊຍະບູລີ ແລະ ເມືອງ ຊຽງຮ່ອນ; ການປູກຝັງ, ການລ້ຽງສັດ ແລະ ປູກຊາຢູ່ເມືອງ ໄຊສະຖານ ຕາມຄວາມອາດສາມາດ.
- ປັບປຸງ, ຍົກລະດັບສູນ ແລະ ສະຖານີບໍລິການເຕັກນິກກະສິກຳ, ປ່າໄມ້ ແລະ ພັດທະນາຊົນນະບົດໃຫ້ມີຄວາມເຂັ້ມແຂງ ໂດຍສະເພາະແມ່ນສູນ 30 ເຮັກຕາ ຢູ່ເມືອງ ພຽງ ແລະ ສະຖານີຢູ່ເມືອງ ຊຽງຮ່ອນ.
- ສົມທົບກັບແຂວງ ເພື່ອແກ້ໄຂຄວາມທຸກຍາກ ຂອງປະຊາຊົນເມືອງໄຊສະຖານ ເພື່ອໃຫ້ຫຼຸດພົ້ນອອກຈາກເມືອງ ທຸກຍາກ.
- ປະກອບວັດຖຸຸອຸປະກອນກວດກາມາດຖານຜະລິດຕະພັນກະສິກຳ ໃຫ້ແກ່ດ່ານກັກກັນພືດ ແລະ ສັດ; ຊ່ວຍປັບປຸງດ້ານຄຸນນະພາບຜະລິດຕະຜົນ ແລະ ຜະລິດຕະພັນດ້ານກະສິກຳ ໃຫ້ໄດ້ມາດຕະຖານ ເພື່ອສາມາດສົ່ງອອກໄດ້.
- ສອງຝ່າຍ ເຫັນດີໃຫ້ 3 ອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ ແລະ ຊາວໜຸ່ມ) ຈັດຕັ້ງການພົບປະແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບການເຄື່ອນໄຫວວຽກງານກະສິກຳ, ປ່າໄມ້ ແລະ ພັດທະນາຊົນນະບົດ; ຮ່ວມມືສ້າງກິດຈະກຳເປັນຕົ້ນແມ່ນ: ການຊຸກຍູ້ສົ່ງເສີມດ້ານວິຊາການ, ຂະບວນການກິລາ, ສິລະປະວັນນະຄະດີ, ການສ້າງຕັ້ງກອງທຶນຊ່ວຍເຫຼືອຄອບຄົວທຸກຍາກ, ການສ້າງຄອບຄົວຕົວແບບ, ບ້ານຕົວແບບກະສິກຳ, ປ່າໄມ້ ແລະ ພັດທະນາຊົນນະບົດ ແລະ ກິດຈະກຳອື່ນໆ ທີ່ເຫັນວ່າເໝາະສົມ.
ຫຼັງຈາກນັ້ນ ອົງການປົກຄອງແຂວງ ກັບ ກະຊວງກະສິກຳ ແລະ ປ່າໄມ້, ອົງການມະຫາຊົນແຂວງ ກັບອົງການມະຫາຊົນກະຊວງກະສິກຳ ແລະ ປ່າໄມ້ ກໍ່ໄດ້ເຊັນບົດບັນທຶກແຮກສ່ຽວ.
ນະຄອນຫຼວງວຽງຈັນ, ວັນທີ 19/10/2016.
ຂຽນໂດຍ: ນ. ເຂັມມະໄລ ສົນດາວັນ
ພາບ: ອາລົງກອນ.
ກວດແກ້: ເຂັມພອນ ທິພົມມະຈັນ.
