ຈຸດພິເສດ ແລະ ການນຳໃຊ້ຂໍ້ມູນພະຍາກອນ ອາກາດ ແລະ ລະດູການ ໃນລະບົບ LaCSA

Published February 24, 2022 | By Khemmalay SONDAVANH

ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ເຮັດວຽກປະສານງານກັບກົມຄຸ້ມຄອງ ແລະ ພັດທະນາທີ່ດິນກະສິກຳ, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນນະບົດ, ສູນປ້ອງກັນພືດ (ກົມປູກຝັງ). ໄດ້ຮວ່ມກັນພັດທະນາລະບົບ ບໍລິການຂໍ້ມູນອຸຕຸກະ ເສດ ຂອງ ສປປ ລາວ ພາຍໃຕ້ການສະໜັບສະໜູນທືນຮອນ ແລະ ເຕັກນິກ ຈາກອົງການອາຫານ ແລະ ການກະເສດແຫ່ງສະຫະປະຊາຊາດ ປະຈຳ ສປປ ລາວ.

ລະບົບອຸຕຸກະເສດ ຂອງ ສປປ ລາວ ແມ່ນລະບົບ ເວັບໄຊ໌ ແລະ ແອັບອອນລາຍ ທີ່ສາມາດເຂົ້າເຖິງໄດ້ທຸກສະຖານທີ່ໆມີອິນເຕີເນັດ ໂດຍຜ່ານທາງໂມບາຍໂຟນ ເອບ ແລະ ຄອມພິວເຕີ້. ໃນລະບົບແມ່ນປະກອບ ດ້ວຍອົງປະກອບຫຼັກທີ່ສຳຄັນດັ່ງນີ້: ແຜ່ນທີ່ສະແດງຈຸດສະຖານີພ້ອມທັງຂໍ້ມູນສັງເກດການໃກ້ເວລາຈິງ, ການບໍລິການສະພາບອາກາດ ແລະ ພູມອາກາດ, ການບໍລິການຂໍ້ມູນອຸຕຸກະເສດ ແລະ ການຕັ້ງຄ່າ-ຄຸ້ມຄອງລະບົບ.

ຂໍ້ມູນສັງເກດການປະຫວັດພູມອາກາດ, ຂໍ້ມູນພະຍາກອນອາກາດ ແລະ ພະຍາກອນລະດູການ ແມ່ນຂໍ້ມູນໜຶ່ງທີ່ສຳຄັນ ແລະ ຈຳເປັນທີ່ສຸດ ສຳລັບການຈັດຕັ້ງປະຕິບັດລະບົບອຸຕຸກະເສດຂອງ ສປປ ລາວ. ສູນກາງ ຖານຂໍ້ມູນກ່ຽວກັບສະພາບອາກາດ ແລະ ພູມອາກາດ ແມ່ນຢູ່ພາຍໃຕ້ການຄຸ້ມຄອງ ແລະ ຈັດຕັ້ງປະຕິບັດໂດຍກົມອຸຕຸນິຍົມ ແລະ ອຸທົກກະສາດ ບັນດາສະຖານີທີ່ແຈກຢາຍໃນບັນດາເມືອງ ແລະ ແຂວງທົ່ວ ປະເທດ ທີ່ລວມທັງແບບປະຖົມປະຖານ ແລະ ແບບອັດຕະໂນມັດ ທີ່ສົ່ງຜ່ານຂໍ້ມູນເຂົ້າມາສູນກາງ ຜ່ານສັນຍານອິນເຕີເນັດໂດຍກົງ, ລວມທັງໝົດປະມານ 90 ສະຖານີ. ລະບົບ LaCSA ໄດ້ເຊື່ອມຕໍ່ດຶງຂໍ້ມູນຈາກ ສະຖານີເຫຼົ່ານີ້ ເພື່ອນຳໃຊ້ໃນການພະລິດ ແລະ ປະມວນຜົນຂໍ້ມູນຂ່າວສານອຸຕຸກະເສດໃຫ້ແກ່ສັງຄົມ.

ການພະຍາກອນກ່ຽວກັບສະພາບອາກາດ ແມ່ນມີ 2 ຮູບລັກສະນະ ຄື: ການ ພະຍາກອນອາດກາດ ແລະ ການພະຍາກອນພູມອາກາດລະດູການ ທີ່ມີຄວາມແຕກຕ່າງກັນໃນລະດັບເວລາ ແລະ ຮູບແບບການນຳໃຊ້ໃນ ວຽກງານອຸຕຸກະເສດ. ການພະຍາກອນລະອຽດ ແມ່ນຈະມີ 02 ຮູບແບບ ຄື: ການພະຍາກອນອາກາດລາຍວັນ ແລະ ການພະຍາກອນອາກາດ 1 ອາທິດຂ້າງໜ້າ. ຊຶ່ງ ທ່ານສາມາດຮູ້ລ່ວງໜ້າສະພາບອາດກາດ 3 ຊົ່ວໂມງ ແລະ 1 ອາທິດລ່ວງໜ້າຈາກລະບົບ LaCSA; ການພະຍາກອນໄລຍະເວລາດັ່ງກ່າວໃນຂະແໜງອຸຕຸກະເສດ ແມ່ນນຳ ໃຊ້ໃນໄລຍະສັ້ນທຸກມື້ ຫາ 7 ມື້ຂ້າງໜ້າ ທີ່ກ່ຽວ ຂ້ອງກັບກິດຈະກຳບຳລຸງຮັກສາ ແລະ ບົວລະບັດ ເປັນຕົ້ນແມ່ນ: ການປູກ, ການໃຫ້ຝຸ່ນ, ການນຳໃຊ້ຢາປາບ ສັດຕູພືດ, ການເກັບກ່ຽວ, ການໃຫ້ນ້ຳຈາກລະບົບຊົນລະປະທານ ແລະ ການປ້ອງກັນພືດ ຈາກໄພອາກາດ ຮ້ອນເອົ້າ ແລະ ໜາວເຢັນ.

ການພະຍາກອນລະດູການດ້ານໄລຍະເວລາ ແມ່ນນັບເປັນຫຼາຍເດືອນຫາເປັນປີ ແລະ ຫຼາຍປີ ໃນລະບົບອຸຕຸກະເສດຂອງ ສປປ ລາວ (LaCSA) ສາມາດໃຫ້ຂໍ້ມູນພະຍາກອນລະດູການໄລຍະ 3 ຫາ 6 ເດືອນ ລ່ວງໜ້າ ສະເພາະອຸນຫະພູມ ແລະ ນ້ຳຝົນ. ຂໍ້ມູນດັ່ງກ່າວແມ່ນນຳໃຊ້ໃນການຕັດສິນໃຈ ໃນການວາງ ແຜນການປູກຝັງປະຈຳລະດູການ ເປັນຕົ້ນແມ່ນ: ການເລືອກຊະນິດແນວພັນທີ່ເໜາະສົມ, ການກຳນົດມື້ເລີ່ມ ກິດຈະກຳປູກຝັງ, ການ ກະກຽມງົບປະມານ ແລະ ຈັດຊື້ອຸບປະກອນສິ່ງຈຳເປັນໃນການປູກຝັງ, ການວາງແຜນການຕະຫຼາດ ສຳລັບການ ຈຳໜ່າຍຜະລິດຕະພັນກະສິກຳ, ການວາງແຜນນຳໃຊ້ຢາປາບສັດຕູພືດ ແລະ ການ ວາງແຜນການຈັດການ ແລະ ຄຸ້ມຄອງ ກ່ຽວກັບສັດຕູພືດ ແລະ ແມງໄມ້ເປັນຕົ້ນ.

ການພະຍາກອນສະພາບອາກາດ ແລະ ການພະຍາກອນລະດູການ ແມ່ນມີຄວາມແຕກຕ່າງກັນຢ່າງຊັດ ເຈນ ດ້ານໄລຍະເວລາ ແລະ ຮູບການນຳໃຊ້ຂໍ້ມູນ, ບັນດາຊາວກະສິກອນ, ຊ່ຽວຊານກະສິກຳ ແລະ ພາກສ່ວນລົງ ທຶນໃນຂົງເຂດວຽກງານກະສິກຳ ແມ່ນສາມາດເຂົ້າເຖິງຂໍ້ມູນການພະຍາກອນ ຜ່ານທາງອິນເຕີເນັດ-ເວັບໄຊ໌ ຕາມ ທີ່ຢູ່ຂ້າງລຸ່ມນີ້ ປະກອບມີ: ການພະຍາກອນອາກາດ 3 ຊົ່ວໂມງລ່ວງໜ້າ, ການພະຍາກອນອາກາດ 7 ວັນ ລ່ວງ ໜ້າ, ການພະຍາກອນລະດູການ 3-6 ເດືອນລ່ວງໜ້າ, ພ້ອມທັງບັນດາຂໍ້ມູນອຸຕຸກະເສດທີ່ຢູ່ໃນລະບົບ ໂດຍບໍ່ໄດ້ ເສຍຄ່າທຳນຽມໃດໆ.

ຂໍ້ມູນເພີ້ມເຕີມ:

ລະບົບຫຼັກຊາແມ່ນໄດ້ຮັບທືນຊ່ວຍເຫຼືອຈາກ ໂຄງການໃຫ້ທືນໂດຍກອງທືນສິ່ງແວດລອ້ມໂລກ ຂອງອົງການ FAO ຜ່ານໂຄງການ ສ້າງຄວາມເຂັ້ມແຂງ ລະບົບຕິດຕາມ ແລະ ຂໍ້ມູນຂ່າວສານ ອຸຕຸກະເສດ ເພື່ອການປັບໂຕກັບການປ່ຽນແປງພູມອາກາດ ແລະ ຄ້ຳປະກັນສະບຽງອາຫານໃນ ສປປ ລາວ (SAMIS).

ທີ່ຢູ່ເວັບໄຊ້ຫຼັກຊາ: www.lacsa.net

ລະບົບເອບປຼີເກເຊີນ ແອນດຼອຍ: https://play.google.com/store/apps/details?id=com.fao.lacsa_app

ລະບົບເອບປຼີເກເຊີນ ແອບໂປ້: https://apps.apple.com/sg/app/lacsa/id1573693442

ຂໍ້ມູນປັບປູງເປັນປະຈຳສາມາດເຂົ້າເບິ່ງໄດ້ທີ່: https://www.facebook.com/samisdmh.