ຂ່າວ
ກອງປະຊຸມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ
ໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ ໄດ້ດຳເນີນໜ້າງວຽກໄປຈຳນວນໜຶ່ງແລ້ວ ເຊິ່ງຄະນະຮັບຜິດຊອບກະກຽມໂຄງການຂັ້ນສູນກາງ ໄດ້ປະສານສົມທົບ ແລະ ປຶກສາຫາລືກັບທະນາຄານພັດທະນາອາຊີ(ADB) ກໍ່ຄືບັນດາຄູ່ຮ່ວມພັດທະນາຕ່າງໆ ແລະ ບັນດາຂະແໜງການທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນ ແລະ ຊາວກະສິກອນໃນກຸ່ມເປົ້າໝາຍ.
ໃນວັນທີ 13 ມີນາ 2018 ກົມຊົນລະປະທານ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມລິເລີ່ມກະກຽມໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງຂຶ້ນ ທີ່ໂຮງແຮມຫຼວງພະບາງວິວ, ແຂວງ ຫຼວງພະບາງ ໂດຍການເປັນປະທານຂອງ ທ່ານ ປອ ພວງປາຣິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້, ເຊິ່ງມີທ່ານຮອງເຈົ້າແຂວງໆໄຊຍະບູລີ, ຊຽງຂວາງ ແລະ ແຂວງຫົວພັນ; ການນຳກົມອ້ອມຂ້າງກະຊວງ ກປ; ພະແນກ ກປ ແຂວງ; ຜູ້ໃຫ້ທຶນ, ອົງການຈັດຕັ້ງສາກົນ ແລະ ຊ່ຽວຊານທັງພາຍໃນ ແລະ ຕ່າງປະເທດ; ຜູ້ປະສານງານໂຄງການຂັ້ນສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ.
ກອງປະຊຸມລັດຖະບານເປີດກວ້າງຄັ້ງທີ 1 ປະຈຳປີ 2018
ກອງປະຊຸມລັດຖະບານເປີດກວ້າງ ຄັ້ງທີ 1 ປະຈໍາປີ 2018 ຈັດຂຶ້ນຢູ່ເມືອງ ວຽງໄຊ ແຂວງ ຫົວພັນ ໃນວັນທີ 22-23 ມີນາ 2018 ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສ ປປ ລາວ. ຊຶ່ງເປັນກອງປະຊຸມສັນຈອນເທື່ອທໍາອິດທີ່ມີລັກສະນະພິເສດຂອງຄະນະລັດຖະບານຊຸດທີ VIIIໂດຍຈັດຂຶ້ນໃນໄລຍະເວລາທີ່ພໍດີກັບວັນສ້າງຕັ້ງພັກປະຊາຊົນ ປະຕິວັດລາວ ວັນທີ 22 ມີນາ 2018 ຄົບຮອບ 63 ປີ (22 ມີນາ 1955-22 ມີນາ 2018)
ໃນທີ່ປະຊຸມ ຄະນະຜູ້ແທນໄດ້ຮັບຟັງການລາຍງານ ແລະ ປະກອບຄໍາເຫັນຢ່າງກົງໄປກົງມາຕໍ່ການເຜີຍແຜ່ແນະນໍາ ແລະ ຊຸກຍູ້ແຕ່ຫົວທີກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2018 ລວມມີ:
– ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2018, ບັນດາໂຄງການຈຸດສຸມພັດທະນາຂອງລັດຖະບານຢູ່ສູນກາງ ແລະ ທ້ອງຖິ່ນ, ການປັບປຸງຄວາມສະດວກໃນການດໍາເນີນທຸລະກິດ ແລະ ການລົງທຶນຜ່ານປະຕູດຽວ.
– ການຜັນຂະຫຍາຍຜົນ ແລະ ການຈັດຕັ້ງປະຕິບັດແຜນການຮ່ວມມືລາວ-ຫວຽດນາມ, ການຜັນຂະຫຍາຍ ແລະ ການຈັດຕັ້ງປະຕິບັດແຜນການຮ່ວມມືລາວ-ຈີນ.
– ສະພາບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 2 ເດືອນ, ຄາດຄະເນງວດ 1 ແລະ ຄາດຄະເນ 6 ເດືອນຕົ້ນປີ 2018 ແລະ ທິດທາງແຜນການ 6 ເດືອນທ້າຍປີ 2018.
– ການຈັດຕັ້ງປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ, ການສົ່ງເສີມການຜະລິດເປັນສິນຄ້າ ແລະ ຄໍ້າປະກັນສະບຽງອາຫານ.
– ການຄຸ້ມຄອງລາຄາສິນຄ້າ ແລະ ການບໍລິການ, ການດັດສົມໂຮງງານປຸງແຕ່ງໄມ້, ການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ.
– ສະພາບການຈັດຕັ້ງປະຕິບັດປີທ່ອງທ່ຽວລາວປີ 2018.ຄວາມຄືບໜ້າໃນການກະກຽມສະເຫຼີມສະຫຼອງວັນສ້າງຕັ້ງເມືອງວຽງໄຊ ຄົບຮອບ 50 ປີ.
ໃນໂອກາດກ່າວເປີດກອງປະຊຸມຄັ້ງນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວບາງຕອນວ່າ: ຈຸດປະສົງຂອງການຈັດກອງປະຊຸມລັດຖະບານຢູ່ເມືອງວຽງໄຊໃນຄັ້ງນີ້ ເນື່ອງຈາກວ່າສະຖານທີ່ດັ່ງກ່າວ ເປັນສະຖານທີ່ໆມີຄວາມໝາຍ, ຄວາມສໍາຄັນຍິ່ງ, ເປັນຖິ່ນກໍາເນີດຂອງສູນບັນຊາສູ້ຮົບ ແລະ ຖານທີ່ໝັ້ນຂອງການປະຕິວັດ, ທັງເປັນຈຸດກໍາເນີດຂອງ ສປປ ລາວ. ປີນີ້ຍັງເປັນປີກະກຽມການສະເຫຼີມສະຫຼອງວັນສ້າງຕັ້ງເມືອງວຽງໄຊ ຄົບຮອບ 50 ປີ (30 ພະຈິກ 1968-30 ພະຈິກ 2018). ພ້ອມກັນນີ້ກໍ່ເປັນປີທີ່ພວກເຮົາຫາກໍ່ສະເຫຼີມສະຫຼອງວັນປົດປ່ອຍຜາຖີ່ ຄົບຮອບ 50 ປີ (11 ມີນາ 1968-11 ມີນາ 2018). ສິ່ງສໍາຄັນກວ່ານີ້ ແມ່ນການສ້າງເງື່ອນໄຂໃຫ້ພວກເຮົາໝົດທຸກຄົນໄດ້ທົບທວນ ແລະ ລໍ້າລຶກເຖິງບຸນຄຸນອັນໃຫຍ່ຫຼວງ ສູງສົ່ງຂອງຜູ້ນໍາການປະຕິວັດ, ບຸນຄຸນຂອງການປະຕິວັດ, ບຸນຄຸນອັນໃຫຍ່ຫຼວງທີ່ຝັງໄວ້ໃນຫົວໃຈຂອງປະຊາຊົນລາວຕະຫຼອດໄປ ໂດຍສະເພາະແມ່ນຜູ້ເສຍສະຫຼະເພື່ອພາລະກິດຂອງການປະຕິວັດ ປົດປ່ອຍຊາດ, ປົດປ່ອຍປະຊາຊົນອອກຈາກການຄອບຄອງຂອງຈັກກະພັດລ່າເມືອງຂຶ້ນ ເຊິ່ງນໍາມາເຖິງປັດຈຸບັນ ຄື: ການປົກປັກຮັກສາ ແລະ ພັດທະນາ ສປປ ລາວຂອງພວກເຮົາ, ພ້ອມນີ້ ທ່ານນາຍົກລັດຖະມົນຕີ ຍັງໄດ້ຮຽກຮ້ອງມາຍັງຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບຂອງຕົນເຂົ້າໃນການປະກອບຄໍາເຫັນຢ່າງກົງໄປກົງມາ, ກະທັດຮັດ ແລະ ມີຈຸດສຸມ ໂດຍລົງເລິກເຖິງຂໍ້ຄົງຄ້າງທີ່ຍັງປະຕິບັດບໍ່ທັນໄດ້ດີ, ວິເຄາະວິໄຈເຖິງສາຍເຫດ ແລະ ສະເໜີທິດທາງ, ມາດຕະການແກ້ໄຂຕົວຈິງ ເພື່ອຮັບປະກັນການຄຸ້ມຄອງ ແລະ ບໍລິຫານປະເທດດໍາເນີນໄປດ້ວຍປະສິດທິພາບ ແລະ ມີປະສິດທິຜົນສູງ.
ພາບແລະບົດໂດຍ: ພະແນກໂຄສະນາຂ່າວສານ ກະສິກຳ ແລະ ປ່າໄມ້.
ທ່ານຮອງລັດຖະມົນຕີລົງຢ້ຽມຢາມພື້ນທີ່ການຈັດສັນພູມລຳເນົາໃຫ້ປະຊາຊົນ
ການຍົກຍ້າຍຈັດສັນເມືອງກະລຶມເກົ່າມາຢູ່ເມືອງກະລຶມໃໝ່ ແມ່ນເປັນນະໂຍບາຍຂອງພັກ-ລັດຖະບານ ເພື່ອຈັດສັນທີ່ຢູ່ອາໃສທີ່ໝັ້ນຄົງໃຫ້ປະຊາຊົນ, ມີອາຊີບທີ່ໝັ້ນຄົງ, ມີຊີວິດການເປັນຢູ່ທີ່ດີຂຶ້ນກວ່າເກົ່າ. ໃນວັນທີ 19 ມີນາ 2018 ທ່ານ ຄຳບຸນນັດ ໄຊຍະນົນຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມພື້ນທີ່ຈັດສັນພູມລຳເນົາ ທີ່ເມືອງ ກະລຶມ, ແຂວງ ເຊກອງ ເຊິ່ງມີທ່ານຫົວໜ້າພະແນກກະສິກຳ ແລະ ປ່າໄມ້ແຂວງ ເຊກອງ, ທ່ານຮອງເຈົ້າເມືອງໆກະລຶມ ແລະ ພະນັກງານວິຊາການໄດ້ໃຫ້ການຕ້ອນຮັບ.
ທ່ານຮອງລັດຖະມົນຕີ ແລະ ຄະນະ ໄດ້ຮັບຟັງການລາຍງານຈາກຫ້ອງການກະສິກຳ ແລະ ປ່າໄມ້ເມືອງກະລຶມ ກ່ຽວກັບວຽກງານການຍົກຍ້າຍຈັດສັນພູມ ລຳເນົາເມືອງກະລຶມເກົ່າມາຢູ່ເມືອງກະລຶມໃໝ່ ເມືອງກະລຶມເກົ່າໄດ້ຖືກຜົນກະທົບຈາກໄພພິບັດທາງທໍາມະຊາດ ແລະ ການຂຸດຄົ້ນບໍ່ຖ່ານຫີນ, ບ້ານທີ່ຖືກຍົກຍ້າຍມີ 02 ບ້ານຄື: ບ້ານແກ້ງກຸຍ ແລະ ບ້ານ ແກ້ງກຽນ, ມີ 514 ຄອບຄົວ, ມີ 3.021 ຄົນ. ອາຊີບສ່ວນໃຫຍ່ຂອງປະຊາຊົນແມ່ນເຮັດໄຮ່, ເຮັດນາ ແລະ ລ້ຽງສັດ, ທົ່ວເມືອງມີເນື້ອທີ່ຜະລິດກະສິກຳທັງໝົດ 2.900 ກວ່າເຮັກຕາ, ຄາດຄະເນໃນປີ 2019 ແມ່ນຈະຍົກຍ້າຍບ້ານປະຊາຊົນມາຕື່ມອີກ 02 ບ້ານຄື: ບ້ານ ວັກເໜືອ ແລະ ບ້ານ ວັກໃຕ້ ໃນພື້ນທີ່ສັນຈັນໃໝ່ ຈຳນວນ 18 ເຮັກຕາ. ໄລຍະຜ່ານມາອໍານາດການປົກຄອງແຂວງ, ເມືອງ, ບ້ານ ພ້ອມດ້ວຍພາກສ່ວນກ່ຽວຂ້ອງໂດຍສະເພາະພະແນກ ກະສິກໍາ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງໄດ້ສົ່ງເສີມໃຫ້ປະຊົນມີອາຊີບທີ່ໝັ້ນຄົງດ້ວຍການເຮັດນາ (ບ່ອນທີ່ມີເງື່ອນໄຂ), ສົ່ງເສີມການລ້ຽງສັດ ແລະ ການປູກພືດສວນຄົວ, ພືດອຸດສາຫະ ກຳ. ນອກຈາກນັ້ນ, ຖ້າຝາຍນໍ້າລົ້ນສ້າງສຳເລັດ ຈະສົ່ງເສີມໃຫ້ປະຊາຊົນລ້ຽງປາໃນກະຊັງເປັນອາຊີບເສີມ, ເພື່ອເຮັດໃຫ້ຊີວິດການເປັນຢູ່ດີຂຶ້ນ ສາມາດຫຼຸດພົ້ນອອກຈາກບ້ານທຸກຍາກ ແລະ ຄອບຄົວທຸກຍາກ.
ໂອກາດນີ້, ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ເນັ້ນໜັກໃຫ້ເອົາໃຈໃສ່ບາງບັນຫາທີ່ສຳຄັນດັ່ງນີ້: ໃຫ້ຮັກສາພື້ນທີ່ນໍ້າ ເພື່ອເຮັດການຜະລິດກະສິກຳ ເພາະນໍ້າເປັນປັດໃຈໃນການຜະ ລິດ ແລະ ໃຫ້ສະຫງວນເນື້ອທີ່ນາບໍ່ໃຫ້ຫັນໄປເປັນພື້ນທີ່ທຳການຜະລິດອື່ນ; ໃຫ້ທາງພະແນກ ກປ ແຂວງ ແລະ ຫ້ອງການ ກປ ເມືອງ ສົ່ງພະນັກງານວິຊາການໄປແລກປ່ຽນບົດຮຽນກັບແຂວງອື່ນ ກ່ຽວກັບການປູກ ແລະ ການລ້ຽງ; ກ່ຽວກັບພືດອຸດສາຫະກຳໄມ້ໃຫ້ໝາກຕ່າງໆ ໃຫ້ເລືອກປູກພືດທີ່ເປັນສິນຄ້າ ແລະ ເໝາະສົມກັບພື້ນທີ່; ສ້າງຄອບຄົວຕົວແບບໃນການປູກ-ການລ້ຽງ ບ້ານໜຶ່ງໃຫ້ໄດ້ໜຶ່ງຕົວແບບ; ການຜະລິດເປັນສິນຄ້າໃຫ້ເບິ່ງທ່າແຮງທາງສິນຄ້າ ແລະ ທ່າແຮງສະບຽງ, ວຽກງານປ່າໄມ້ ເຂດເມືອງກະລຶມເປັນເຂດຮ້ອນຊຸ່ມຊື່ນບໍ່ປູກໄມ້ກໍ່ສາມາດເຮັດໃຫ້ປ່າກັບມາມີສີຂຽວຄືນໄດ້ ນີ້ຄືການຟື້ນຟູປ່າໄມ້ແບບທຳມະຊາດ ແລະໃຫ້ເອົາໃຈໃສ່ຮັກສາບໍ່ໃຫ້ໄຟໄໝ້ລາມປ່າຕາມຄໍາສັ່ງຂອງລັດຖະມົນຕີກະຊວງກະສິກໍາ ແລະ ປ່າໄມ້ ເລກທີ 08/ກປ, ລົງວັນທີ 14 ມີນາ 2018.
ພາບ ແລະ ຂ່າວໂດຍ: ພະແນກຂ່າວສານກະສິກຳ ແລະ ປ່າໄມ້.
ກອງປະຊຸມສະພາບໍລິຫານງານ-ຄັງແຮເຂົ້າ-ສຸກເສີນອາຊຽນ+3 ຄັ້ງທີ 6
ເພື່ອເປັນການສັງເກດ ແລະ ສະຫຼຸບຕີລາຄາຄືນ ກ່ຽວກັບການຈັດຕັ້ງປະຕິບັດວຽກງານ ຄັງແຮເຂົ້າ-ສຸກເສີນອາຊຽນ+3. ໃນລະຫວ່າງວັນທີ 13-14 ມີນາ 2018 ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບກຽດເປັນເຈົ້າພາບ ຈັດກອງປະຊຸມສະພາບໍລິຫານງານ-ຄັງແຮເຂົ້າ-ສຸກເສີນອາຊຽນ+3 ຄັ້ງທີ 6 ຂຶ້ນທີ່ຫ້ອງປະຊຸມໂຮງແຮມ ລາວພຼາຊາ, ນະຄອນຫຼວງວຽງຈັນ. ໃຫ້ກຽດເປັນປະທານໂດຍ ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້. ເຂົ້າຮ່ວມໃນຄັ້ງນີ້ມີ ບັນດາປະເທດ ສະມາຊິກອາຊຽນ ແລະ ອາຊຽນ+3 ຊຶ່ງເປັນປະເທດທີ່ໃຫ້ທຶນ ປະກອບມີ: ສປ.ຈີນ, ສ.ເກົາຫຼີ ແລະຍີ່ປຸນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງກອງປະຊຸມໃນຄັ້ງນີ້, ເພື່ອເປັນການທົບທວນຄືນການຈັດຕັ້ງປະຕິບັດບັນດາກິດຈະກໍາ ທີ່ໄດ້ຈັດຕັ້ງປະຕິບັດໃນໄລຍະໜຶ່ງປີຜ່ານມາ ແລະ ສະຫຼຸບຖອດຖອນບົດຮຽນການຈັດຕັ້ງປະຕິບັດຂອງວຽກງານດັ່ງກ່າວ. ໃນທີ່ປະຊຸມ ຍັງໄດ້ຮັບຟັງການລາຍງານສະພາບການແຈກຢາຍເຂົ້າ ໃຫ້ແກ່ບັນດາປະເທດສະມາຊິກອາຊຽນ ທີ່ໄດ້ຜົນກະທົບຈາກໄພພິບັດທາງທໍາມະຊາດໃນປີ 2017 ຜ່ານມາ. ສໍາລັບ ສປປລາວ ແມ່ນໄດ້ຮັບເຂົ້າຊ່ວຍເຫຼືອຈາກຄັງແຮເຂົ້າສຸກເສີນ ອາຊຽນ+3 ຈໍານວນ 225 ໂຕນ ຊື່ງເປັນການປະກອບສ່ວນຂອງປະຊາຊົນ ແລະລັດຖະບານຍີ່ປຸນ. ເພື່ອເຮັດໃຫ້ກອງປະຊຸມໄດ້ຮັບຜົນສໍາເລັດຕາມລະດັບຄາດໝາຍ ບັນດາຜູ້ແທນກອງປະຊຸມ ຍັງໄດ້ພ້ອມກັນປະກອບຄໍາຄິດເຫັນ ຕໍ່ບົດລາຍງານ ພ້ອມທັງ, ວາງທິດທາງແຜນການ ໃນຕໍ່ໜ້ານໍາອີກ. ກອງປະຊຸມດັ່ງກ່າວໄດ້ດໍາເນີນໄປເປັນເວລາ 2 ວັນເຕັມຈຶ່ງສໍາເລັດລົງ.
ພາບ ແລະ ຂ່າວໂດຍ: ພະແນກໂຄສະນາຂ່າວສານກະສິກຳ ແລະ ປ່າໄມ້
ກອງປະຊຸມວິຊາການ ກ່ຽວກັບການປ້ອງກັນ ແລະກໍາຈັດ ການລະບາດຂອງຕັກແຕນຝຸງໄມ້ປ່ອງ ປະຈໍາປີ 2017
ໃນທ້າຍອາທິດຜ່ານມາ, ກົມປູກຝັງ, ກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມວິຊາການ ກ່ຽວກັບການປ້ອງກັນ ແລະກໍາຈັດ ການລະບາດ ຂອງຕັກແຕນຝຸງໄມ້ປ່ອງ ປະຈໍາປີ 2017 ຂຶ້ນທີ່ ສະໂມສອນກະຊວງ. ໃຫ້ກຽດເປັນປະທານໂດຍ ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້. ເຂົ້າຮ່ວມມີ ທ່ານ ຮອງເຈົ້າແຂວງ, ຮອງເຈົ້າເມືອງ ຈາກ 5 ແຂວງພາກເໝືອ, ຫົົວໜ້າຫ້ອງການກະຊວງ, ຫົວໜ້າກົມ-ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ໄດ້ຂຶ້ນຜ່ານບົດສະຫຼຸບ ເພື່ອຕີລາຄາຄືນ ຈຸດດີ, ຈຸດອ່ອນ,ຂໍ້ຄົງຄ້າງ ແລະບາງບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານໃນປີ 2017 ຜ່ານມາ. ແລະພ້ອມດຽວກັນນີ້, ໃນທີ່ປະຊຸມຍັງຈະໄດ້ກໍານົດແຜນການ ແລະໜ້າວຽກຈຸດສຸມ ປະຈໍາປີ 2018 ເພື່ອເປັນບ່ອນອີງ ໃນການຜັນຂະຫຍາຍຈັດຕັ້ງປະຕິບັດ ວຽກງານປ້ອງກັນ ແລະກໍາຈັດ ການລະບາດຂອງຕັກແຕນຝຸງໄມ້ປ່ອງ ຢູ່ໃນແຕ່ລະທ້ອງຖິ່ນ. ໃນທີ່ປະຊຸມ, ບັນດາຜູ້ແທນກອງປະຊຸມ ໄດ້ຂຶ້ນຜ່ານບົດສະຫຼຸບ ຂອງແຕ່ລະແຂວງ ພ້ອມທັງແລກປ່ຽນບົດຮຽນໃນການຈັດຕັ້ງ
ປະຕິບັດວຽກງານຜ່ານມາ ລະຫວ່າງແຂວງ ທີ່ມີການແຜ່ລະບາດຂອງຕັກແຕນຝຸງໄມ້ປ່ອງ ຢ່າງກົງໄປກົງມາ. ເພື່ອເຮັດໃຫ້ກອງປະຊຸມດັ່ງກ່າວ ມີຄວາມໝາຍສໍາຄັນ ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ທິດຊີ້ນໍາໂດຍຮຽກຮ້ອງໃຫ້ທຸກຂະແໜງການ ເລີ່ມແຕ່ຂັ້ນສູນກາງ ແລະ ອົງການປົກຄອວທ້ອງຖິ່ນທຸກຂັ້ນ ຈົ່ງເພີມທະວີຄວາມເປັນເຈົ້າການ ແລະ ມີຄວາມຮັບຜິດຊອບສູງ ໃນການຊີ້ນໍາ-ນໍາພາ ການຈັດຕັ້ງປະຕິບັດ ໃຫ້ຖືເອົາວຽກງານດັ່ງກ່າວເປັນບັ້ນຮົບ ໃນການປ້ອງກັນ ແລະ ກໍາຈັດ ການລະບາດຂອງຕັກແຕນຝຸງໄມ້ປ່ອງ ໃນຕໍ່ໜ້າໃຫ້ໄດ້ຜົນດີເປັນກ້າວໆ
ພາບ ແລະ ຂ່າວໂດຍ: ພະແນກໂຄສະນາຂ່າວສານກະສິກຳ ແລະ ປ່າໄມ້
ຜົນສໍາເລັດຂອງກອງປະຊຸມ ກະສິກໍາ, ປ່າໄມ້ ແລະພັດທະນາຊົນນະບົດ ປະຈໍາປີ 2017
ເພື່ອເຮັດໃຫ້ 4 ແຜນງານໃຫຍ່ຄື: 1, ແຜນງານຄໍ້າປະກັນຄວາມໝັ້ນຄົງທາງດ້ານສະບຽງອາຫານ. 2, ແຜນງານຜະລິດ ກະສິກໍາເປັນສິນຄ້າ ຕິດພັນກັບການປຸງແຕ່ງ. 3, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ແລະ 4, ແຜນງານ ພັດທະນາຊົນນະບົດ ແລະ ລຶບລ້າງຄວາມທຸກຍາກທົ່ວປະເທດ ໃຫ້ປະກົດຜົນເປັນຈິງ. ໃນວັນທີ 07 ມີນາ ຜ່ານມາ, ກະຊວງກະສິກໍາ ແລະປ່າໄມ້ ໄດ້ຈັດພິທີປິດ ກອງປະຊຸມ ກະສິກໍາ, ປ່າໄມ້ ແລະພັດທະນາຊົນນະບົດ. ໃຫ້ກຽດເປັນ ປະທານໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ. ເຂົ້າຮ່ວມໃນຄັ້ງນີ້ມີ ກົມການເມືອງສູນກາງພັກ, ກໍາມະການສູນກາງພັກ, ລັດຖະມົນຕີ-ຮອງລັດຖະມົນຕີ, ຮອງເຈົ້າແຂວງ, ຫົວໜ້າຫ້ອງການກະຊວງ, ຫົວໜ້າກົມ-ຮອງກົມ, ຫົວໜ້າພະແນກກະສິກໍາ ແລະປ່າໄມ້ ປະຈໍາແຂວງ ທົ່ວປະເທດ ພ້ອມດ້ວຍ ພາກສ່ວນທີ່ກຽ່ວຂອງ ເຂົ້າຮ່ວມຢ່າງພ້ອມພຽງ.
ໂອກາດນີ້, ສະຫາຍ ປອ ລຽນ ທີແກ້ວ ກໍາມະການສູນກາງພັກ, ລັດຖະມົນຕີກະຊວງກະສິກໍາ ແລະປ່າໄມ້ ໄດ້ຂຶ້ນລາຍ ງານຫຍໍ້ກ່ຽວກັບຜົນຂອງກອງປະຊຸມ. ເຊິ່ງໄດ້ພ້ອມກັນສັງເກດຕີລາຄາຢ່າງຮອບດ້ານ ຕໍ່ການຈັດຕັ້ງປະຕິບັດແຜນການ ໃນໜຶ່ງ ປິຜ່ານມາ ຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ສາຍເຫດທີ່ພາໃຫ້ມີດ້ານອ່ອນ. ພ້ອມກັນນັ້ນ, ໄດ້ກໍານົດທິດທາງແຜນ ການ, ໜ້າທີ່, ມາດຕະການ ແລະ ນະໂຍບາຍ ການຈັດຕັ້ງປະຕິບັດໃຫ້ແທດເໝາະກັບຕົວຈິງເປັນຕົ້ນ: ນະໂຍບາຍສົ່ງເສີມການ ຄ້າ, ນະໂຍບາຍດ້ານພະລັງງານໄຟຟ້າ, ດ້ານສິນເຊື່ອ ແລະ ອັດຕາດອກເບ້ຍ ຕໍ່ກັບການຈັດຕັ້ງປະຕິບັດ ໂຄງການສົ່ງເສີມ ການຜະລິດກະສິກໍາເປັນສິນຄ້າ ແລະ ໂຄງການຄໍ້າປະກັນດ້ານສະບຽງອາຫານແຫ່ງຊາດ ຕາມລາຍການສິນຄ້າທີ່ລັດຖະບານ ກໍານົດ. ນອກນີ້, ໄດ້ນໍາສະເໜີບົດຮຽນການຍົກຜະລິດຕະພາບ ແລະຫຼຸດຜ່ອນຕົ້ນ ທຶນໃນການຜະລິດເຂົ້າ, ການລ້ຽງໝູ ແລະ ສະຫຼຸບຕີລາຄາການຄຸ້ມຄອງໄມ້ ປະຕິບັດຄໍາສັ່ງເລກທີ 15/ນຍ. ພິເສດກອງປະຊຸມ ໄດ້ທາບທາມປະກອບຄໍາເຫັນຕໍ່ຮ່າງ ບົດແນະນໍາ ການຈັດຕັ້ງປະຕິບັດດໍາລັດເລກທີ 348/ລບ, ລົງວັນທີ 16 ພະຈິກ 2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ນໍາອີກ.
ເພື່ອເຮັດໃຫ້ກອງປະຊຸມດັ່ງກ່າວມີຄວາມໝາຍສໍາຄັນ ສະຫາຍ ເລຂາທິການໃຫຍ່ ໄດ້ໃຫ້ທິດຊີ້ນໍາໂດຍ ສະເໜີໃຫ້ ຄະນະພັກ, ຄະນະນໍາກະຊວງເອົາໃຈໃສ່ໃນແຕ່ລະດ້ານຄື: ວຽກງານຄໍ້າປະກັນຄວາມໝັ້ນຄົງທາງ ດ້ານສະບຽງອາຫານ ຕ້ອງຮັບ ປະກັນໃຫ້ປະຊາຊົນບັນດາເຜົ່າ ຢູ່ເຂດຫ່າງໄກສອກຫຼີກທີ່ເຮັດວຽກງານກະສິກໍາລ້ວນໆ ສາມາດຮັບປະກັນໃຫ້ຕົນເອງມີເຂົ້າກິນ ແລະ ມີສະບຽງອາຫານທີ່ພຽງພໍ, ວຽກງານຜະລິດກະສິກໍາເປັນສິນຄ້າ ຕ້ອງເປັນເຈົ້າການປະສານສົມທົບກັບຂະແໜງການ ທີ່ກ້ຽວຂ້ອງ ເພື່ອຄົ້ນຄວ້າຫາທາງອອກຊ່ວຍປະຊາຊົນ ຕິດພັນກັບການຊຸກຍູ້ການຜະລິດກະສິກໍາເປັນສິນຄ້າ ຢ່າງມີຈຸດສຸມ, ວຽກງານຟື້ນຟູປ່າ ແລະ ຂະຫຍາຍປ່າ ຕ້ອງປັບປຸງຍຸດທະສາດປ່າໄມ້ແບບຍືນຍົງ, ກົດໝາຍປ່າໄມ້ ເພື່ອໃຊ້ເປັນເຄື່ອງມືຄຸ້ມຄອງ ມະຫາພາກທີ່ຮັດກຸມ ແລະ ສໍາລັບວຽກງານພັດທະນາຊົນນະບົດ ຕິດພັນກັບການລຶບລ້າງຄວາມທຸກຍາກ ຕ້ອງສ້້າງອາຊີບ ທີ່ໝັ້ນຄົງໃຫ້ກັບຊາວຊົນນະບົດ ດ້ວຍການຊຸກຍູ້ໃຫ້ເຂົາເຈົ້າມີສ່ວນຮ່ວມໃນກິດຈະກໍາຕ່າງໆ, ເປັນເຈົ້າການໃນການເຂົ້າຮ່ວມ ການຜະລິດອຸດສາຫະກໍາປຸງແຕ່ງ ແລະ ການບໍລິການອື່ນໆ ເພື່ອຫຼຸດຜ່ອນການລັ່ງໄຫຼໄປຊອກວຽກເຮັດງານທໍາຢູ່ໃນຕົວເມືອງ ຂອງຊາວຊົນນະບົດ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ແລະ ທິດທາງແຜນການປີ 2018
ທ່າມກາງບັນຍາກາດທີ່ທົ່ວພັກທົ່ວກອງທັບ ແລະ ທົ່ວປວງຊົນລາວ ກໍາລັງກະກຽມສະຫຼຸບການຈັດຕັ້ງປະຕິບັດວຽກງານຕາມມະຕິກອງປະຊຸມໃຫຍ່ຄັ້ງທີ X ຂອງພັກໃນໄລຍະກາງສະໄໝກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ແລະ ແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ 2016 ຫາ 2020, ກະຊວງກະສິກໍາ ແລະ ປ່າໄມ້ ໄດ້ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ຂື້ນ ໃນວັນທີ 6 ມີນາ 2018, ທີ່ຫໍປະຊຸມແຫ່ງຊາດ ໃຫ້ກຽດເປັນປະທານກ່າວເປີດ ໂດຍທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມດ້ວຍທ່ານຮອງລັດຖະມົນຕີກະຊວງ, ມີທ່ານຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ຮອງຫົວໜ້າອົງການ ແລະ ທຽບເທົ່າ, ຮອງເຈົ້າແຂວງ, ເຈົ້າຄອງນະຄອນຫຼວງວຽງຈັນ, ທ່ານຫົວໜ້າຫ້ອງການກະຊວງ, ບັນດາກົມ, ສະຖາບັນ, ຫົວໜ໊າພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອເປັນການສະຫຼຸບຜົນການຈັດຕັ້ງປະຕິບັດວຽກງານປະຈໍາປີ 2017 ແລະ ທິດທາງແຜນການປີ 2018 ເພື່ອສັງເກດຕີລາຄາຜົນງານ, ຜົນສໍາເລັດດ້ານດີ, ດ້ານອ່ອນ, ຂໍ້ຄົງຄ້າງ ແລະ ເພື່ອກໍານົດທິດທາງ, ໜ້າທີ, ມາດຕະການ ແລະ ນະໂຍບາຍໃຫ້ແທດເໝາະກັບສະພາບຄວາມເປັນຈິງ, ເປົ້າໝາຍເພື່ອກໍານົດມາດຕະການຈັດຕັ້ງປະຕິບັດແຕ່ສູນກາງລົງຮອດທ້ອງຖິ່ນ ໃຫ້ມີຈຸດສຸມທີ່ເປັນເອກະພາບກັນເພື່ອເຮັດໃຫ້ 4 ແຜນງານໃຫຍ່ຄື: ແຜນງານຄໍ້າປະກັນສະບຽງອາຫານ, ແຜນງານຜະລິດກະສິກໍາເປັນສິນຄ້າຕິດພັນກັບການປຸງແຕ່ງ, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ແລະ ແຜນງານພັດທະນາຊົນນະບົດ ແລະ ລຶບລ້າງຄວາມທຸກຍາກທົ່ວປະເທດ ແລະ ສູ້ຊົນຈັດຕັ້ງປະຕິບັດຄາດໝາຍປີ 2018 ຂອງຂະແໜງກະສິກໍາ ແລະ ປ່າໄມ້ ທີ່ມະຕິສະພາແຫ່ງຊາດ ແລະ ດໍາລັດນາຍົກລັດຖະມົນຕີກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດປີ 2018 ໃຫ້ປາກົດຜົນເປັນຈິງ, ເຊິ່ງກອງປະຊຸມດັ່ງກ່າວຈະໄດ້ດໍາເນີນໄປເປັນເວລາ 2 ວັນ ແລະ ຈະໄດ້ປິດລົງໃນວັນທີ 7 ມີນາ 2018 ນີ້.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020
ໃນວັນທີ 5 ມີນາ 2018 ກະຊວງ ກະສິກໍາ ແລະ ປ່າໄມ້, ໄດ້ເປີດກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020 ຂື້ນ, ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມນີ້ມີທ່ານ ປອ ລຽນ ທີແກ້ວ ລັດຖະມົນຕີກະຊວງ ກປ, ທ່ານ ຮອງລັດຖະມົນຕີກະຊວງ ກປ, ທ່ານ ຮອງເຈົ້າແຂວງ, ພະແນກ ກປ ແຂວງ, ນະຄອນຫຼວງ, ຫົວໜ້າ-ຮອງຫົວໜ້າ ຫ້ອງການ, ກົມ, ສະຖາບັນອ້ອມຂ້າງກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອປຶກສາຫາລືກໍານົດມາດຕະການ ແລະ ນະໂຍບາຍເພື່ອກະຕຸກຊຸກຍູ້ການປູກໄມ້ ແລະ ຟື້ນຟູປ່າໃຫ້ມີຄວາມສອດຄ່ອງ ແລະ ແທດເໝາະກັບສະພາບຈຸດພິເສດຂອງປະເທດເຮົາ ພ້ອມນັ້ນກໍ່ແນ່ໃສ່ແກ້ໄຂບັນຫາປະກົດການຫຍໍ້ທໍ້ ແລະ ຂໍ້ຄົງຄ້າງຕ່າງໆໃນວຽກງານປູກໄມ້ ແລະ ຟື້ນຟູປ່າໃນທົ່ວປະເທດ. ໃນທີ່ປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດຍຸດທະສາດປ່າໄມ້ກ່ຽວກັບການປູກໄມ້ ແລະ ຟື້ນຟູປ່າ ແລະ ທິດທາງແຜນການໃນຕໍ່ໜ້າ; ບາງບົດຮຽນກ່ຽວກັບການສົ່ງເສີມການປູກໄມ້ຕິດພັນກັບການປຸງແຕ່ງໄມ້ທີ່ຣາຊະອານາຈັກຊູແອດ; ບາງບົດຮຽນ, ທິດທາງ ແລະ ແຜນການກ່ຽວກັບການປູກ ແລະ ການຕະຫຼາດຊະນິດພັນໄມ້ໃຫຍ່ໄວ; ການປູກ ແລະ ການຕະຫຼາດໄມ້ປູກ ແລະ ໄມ້ພື້ນເມືອງໃນ ສປປ ລາວ. ຫຼັງຈາກນັ້ນ, ທ່ານປະທານກໍ່ໄດ້ເຈາະຈີ້ມບາງບັນຫາດັ່ງນີ້: 1. ນະໂຍບາຍ ແລະ ນິຕິກໍາກ່ຽວກັບການສົ່ງເສີມການປູກໄມ້ ແລະ ຟື້ນຟູປ່າທີ່ຈັດຕັ້ງປະຕິບັດໃນປັດຈຸບັນເຫັນວ່າມີອັນໃດສອດຄ່ອງ ຫຼື ມີອັນໃດທີ່ຈະຕ້ອງໄດ້ປັບປຸງແກ້ໄຂ; 2.ຂໍ້ຫຍຸ້ງຍາກ ຫຼື ອຸປະສັກທີ່ເປັນສິ່ງກົດໜ່ວງຖ່ວງດຶງການລົງທຶນການປູກໄມ້ໃນໄລຍະຜ່ານມາມີຫຍັງແດ່ທີ່ຈະນໍາສະເໜີຕໍ່ລັດຖະບານເພື່ອແກ້ໄຂຢ່າງຂາດຕົວ; 3.ນະໂຍບາຍກ່ຽວກັບການສົ່ງເສີມການປຸງແຕ່ງໄມ້ປູກ ແລະ ການຕະຫຼາດມີອັນໃດແດ່ທີ່ຈະຕ້ອງໄດ້ຮັບການປັບປຸງ; 4. ການພັດທະນາເຕັກນິກ ແລະ ເຕັກໂນໂລຊີ ລວມທັງການພັດທະນາສີມືແຮງງານໃນການປຸງແຕ່ງໄມ້ປູກໃນໄລຍະຜ່ານມາໄດ້ຮັບການປັບປຸງ ແລະ ພັດທະນາຄືແນວໃດ. ຕໍ່ກັບການເຈາະຈີ້ມດັ່ງກ່າວໄດ້ເປີດກ້ວາງປຶກສາຫາລື ແລະ ປະກອບຄໍາເຫັນຈາກບັນດາຜູ້ແທນໃນກອງປະຊຸມດ້ວຍບັນຍາກາດອັນຟົດຟື້ນ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ທິດທາງແຜນການປີ 2018 ຂອງສະຫະພັນແມ່ຍິງກະຊວງ ກະສິກໍາ ແລະ ປ່າໄມ້
ເພື່ອສະເຫຼີມສະຫຼອງວັນແມ່ຍິງສາກົນ 8 ມີນາ 2018 ຄົບຮອບ 108 ປີຢ່າງເປັນຂະບວນຟົດຟື້ນສະຫະພັນແມ່ຍິງກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດຂໍ້ແຂ່ງຂັນ 3 ດີ, ໄລຍະ 3 ປີ ເຄິ່ງສະໄໝ 2015 ຫາ2017 ແລະ ວາງທິດທາງແຜນການປີ 2018 ຂື້ນ ໃນວັນທີ 02 ມີນາ 2018 ທີ່ສະໂມສອນກະຊວງກະສິກໍາ ແລະ ປ່າໄມ້, ໂດຍໃຫ້ກຽດເປັນປະທານຂອງ ທ່ານ ທອງພັດ ວົງມະນີ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ, ທ່ານ ນາງ ບຸນທຽນ ວົງໄກສອນ ປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້ ພ້ອມນີ້ມີຄະນະພັກຮາກຖານບັນດາກົມ, ສະຖາບັນ, ອົງການຈັດຕັ້ງຊາວໜຸ່ມ, ກໍາມະບານ, ຄະນະຮາກຖານ ແລະ ໜ່ວຍສະຫະພັນແມ່ຍີງອ້ອມຂ້າງກະຊວງ ພ້ອມດ້ວຍເອື້ອຍນ້ອງສະມາຊີກເຂົ້າຮ່ວມ 100 ກວ່າທ່ານ.
ໃນກອງປະຊຸມໄດ້ມີການຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ວາງທິດທາງແຜນການ ປີ 2018 ໂດຍປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້, ພ້ອມທັງມອບໃບຍ້ອງຍໍ 3 ດີໃຫ້ຮາກຖານ, ໜ່ວຍ ແລະ ບຸກຄົນ 3 ດີ ປະເພດ 1 ຈໍານວນ 603 ຄົນ ແລະ ປະເພດ 2 ຈໍານວນ 20 ຄົນ ຈາກນັ້ນແຕ່ລະຮາກຖານກໍ່ໄດ້ຂຶ້ນຈັບມືແຂ່ງຂັນ 3 ດີ ຮວ່ມກັນ. ໃນໂອກາດດຽວກັນ ບັນດາຜູ້ເຂົ້າຮ່ວມຍັງໄດ້ຮັບຟັງປາຖະກະຖາ ແລະ ໂອ້ລົມຈາກ ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ ແລະ ໄດ້ມີການມອບໃບກຽດຕິຄຸນໃຫ້ເລຂາຄະນະພັກແຕ່ລະຮາກຖານ, ມອບຂອງຂວັນໃຫ້ປ້າອາວຸໂສບໍານານ, ຄອບ ຄົວການນໍາຄະນະສະຫະພັນແມ່ຍີງກະຊວງ ແລະ ມອບດອກໄມ້ໃຫ້ເອື້ອຍນອ້ງສະມາຊິກໃນທີ່ປະຊຸມ. ໃນຕອນທ້າຍ ທ່ານປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍໃນການສູ້ຊົນຂອງເອື້ອຍນ້ອງຍິງທີ່ສາມາດຍາດໄດ້ໝາກຜົນ ແລະ ຜົນສໍາເລັດ ຈາກການເຄື່ອນໄຫວໃນໄລຍະ 3 ປີຜ່ານມາ, ພ້ອມທັງເອົາໃຈໃສ່ຕິດຕາມກວດກາການຮ່ວມຊີວິດປະຈໍາ 1 ເດືອນ, 3 ເດືອນ, 6 ເດືອນ ແລະ 1 ປີ ເພື່ອສະຫຼຸບຕີລາຄາ, ຖອດຖອນບົດຮຽນ ແລະ ວາງແຜນການໃນຕໍ່ໜ້າ, ຍົກລະດັບຄວາມຮູ້ທາງດ້ານວິຊາສະເພາະ, ທິດສະດີການເມືອງ ແລະ ຄຸນສົມບັດ ສິນ ທຳປະຕິວັດໃຫ້ສູງຂຶ້ນ, ເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີອັນດີງາມ, ບຸກບືນສືບຕໍ່ປະຕິບັດບົດ ບາດ ຄວາມສະເໝີພາບລະຫວ່າງຍິງ-ຊາຍ ໃນການພັດທະນາຄວາມກ້າວໜ້າຂອງແມ່ຍິງ, ຕັ້ງໜ້າປະກອບສ່ວນເຂົ້າໃນພາລະກິດລວມຂອງຊາດເວົ້າລວມເວົ້າສະເພາະກໍ່ຄືປະກອບສ່ວນສຸມໃສ່ປະຕິບັດຂໍ້ແຂ່ງຂັນຂອງຂະແໜງກະສິກໍາ ແລະ ປ່າໄມ້ ຕາມ 3 ເນື້ອໃນ ແລະ 4 ເປົ້າໝາຍ, ສືບຕໍ່ເຊື່ອມຊືມ ແລະ ຕັ້ງໜ້າປະຕິບັດຂໍ້ແຂ່ງຂັ້ນ 3 ດີ ຂອງສູນກາງສະຫະພັນແມ່ຍີງລາວຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີ ໃຫ້ໄດ້ຕາມຄາດໝາຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ພິທີມອບ-ຮັບ ກິດຈະກໍາ, ງົບປະມານ ແລະ ຄວາມຮັບຜິດຊອບຂອງ ”ແຜນງານຊຸມຊົນຊື່ນໃຈ” ຢູ່ 2 ແຂວງ ພາກເໜືອ
ແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ” ແຜນງານຊຸມຊົນຊື່ນໃຈ”, ທີ່ຂື້ນກັບກົມແຜນການ ແລະ ການເງິນ, ກະຊວງກະສິກໍາ ແລະ ປ່າໄມ້. ເປັນແຜນງານໜຶ່ງທີ່ໄດ້ຈັດຕັ້ງປະຕິບັດ ແລະ ຜັນຂະຫຍາຍແຜນພັດທະນາເສດຖະກິດສັງຄົມແຫ່ງຊາດທີ່ພັກ ແລະ ລັດຖະບານ ແຫ່ງ ສປປ ລາວ ໄດ້ວາງອອກ, ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າຢູ່ໃນເຂດຊົນນະບົດຫ່າງໄກສອກຫຼີກ 09 ເມືອງ, 255 ບ້ານຂອງສອງແຂວງຄື: ໄຊຍະບູລີ ແລະ ອຸດົມໄຊ, ແຜນງານດັ່ງກ່າວໄດ້ເລີ່ມຈັດຕັ້ງປະຕິບັດແຕ່ປີ 2012 ແລະ ຈະໄດ້ສີ້ນສຸດລົງໃນທ້າຍເດືອນກຸມພາ 2018 ນີ້ ລວມໄລຍະເວລາຂອງແຜນງານ 6 ປີ, ໂດຍໄດ້ຮັບການສະໜັບສະໜູນທຶນຊ່ວຍເຫຼືອລ້າຈາກອົງການພັດທະນາກະສິກໍາ ສາກົນ, ອົງການພັດທະນາປະເທດ ລຸກຊໍາບວກ ແລະ ອົງການອາຫານໂລກ, ເພື່ອໃຫ້ບັນດາກິດຈະກໍາຕ່າງໆທີ່ທາງແຜນງານໄດ້ກໍ່ຕັ້ງຂື້ນມາແລ້ວນັ້ນໃຫ້ມີຄວາມຍືນຍົງ, ມີການເຄື່ອນໄຫວຢ່າງຕໍ່ເນື່ອງ ແລະ ເຮັດໃຫ້ຊຸມຊົນມີຄວາມເຂັ້ມແຂງໄປເລື່ອຍໆນັ້ນ. ໃນວັນທີ 20 ແລະ 22 ກຸມພາ 2018 ທີ່ຫ້ອງປະຊຸມຂອງພະແນກກະສິກໍາ ແລະ ປ່າໄມ້ ແຂວງ ໄຊຍະບູລີ ແລະ ອຸດົມໄຊ ແຜນງານຊຸມຊົນຊື່ນໃຈໄດ້ຈັດພິທີເຊັນບົດບັນທຶກມອບ-ຮັບ ບັນດາກິດຈະກໍາ, ອຸປະກອນ ແລະ ການຄຸ້ມຄອງ ໃຫ້ແຂວງເປົ້າໝາຍເຊິ່ງປະກອບດ້ວຍກິດຈະກໍາການສົ່ງເສີມການຜະລິດ, ການປູກ, ການລ້ຽງ ຫຼາຍກ່ວາ 20 ກິດຈະກໍາ, ກອງທຶນໃນການພັດທະນາບ້ານ, ທະນາຄານເຂົ້າ, ງົບປະມານໃນການຝຶກອົບຮົມ ແລະ ສ້າງຄວາມສາມາດໃຫ້ທ້ອງຖິ່ນ, ພາຫະນະ ແລະ ອຸປະກອນຮັບໃຊ້ລວມທັງພື້ນຖານໂຄງລ່າງ ລວມມູນຄ່າເກືອບ 70 ຕື້ກີບ.
ກ່ອນການເຊັນມອບ-ຮັບຜູ້ເຂົ້າຮ່ວມໄດ້ຮັບຟັງການລາຍງານການຈັດຕັ້ງປະຕິບັດວຽກແຜນງານຈາກຜູ້ປະສານງານປະຈໍາແຂວງ ແລະ ຮັບຟັງການຜ່ານໜັງສືມອບ-ຮັບກິດຈະກໍາຂອງແຜນງານ ໂດຍ ທ່ານ ຄອນສະຫວັນ ວົງໄຊ ຫົວໜ້າປະສານງານແຜນງານຂັ້ນສູນກາງ, ພິທີມອບ-ຮັບແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ ໃຫ້ແຂວງເປັນຜູ້ຄຸ້ມຄອງນີ້ ເປັນກຽດກ່າວມອບໂດຍທ່ານ ສະຫວັນຫານພົມ ຮອງຫົວໜ້າກົມແຜນການ ແລະ ການເງິນ ຄະນະກໍາມະການຊີ້ນໍາໂຄງການຂັ້ນສູນກາງ ຕ່າງໜ້າກະຊວງກະສິກໍາ ແລະ ປ່າໄມ້ ແລະ ຕ່າງໜ້າກ່າວຮັບຂອງແຂວງ ໄຊຍະບູລີ ໂດຍທ່ານ ຄໍາຫຼ້າ ຜີ້ວນາວັນ ຫົວໜ້າພະແນກ ກະສິກໍາ ແລະ ປ່າໄມ້ ແຂວງແລະ ແຂວງ ອຸດົມໄຊ ໂດຍ ທ່ານ ບຸນຍືມ ໄຊຍະເວັນ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ. ພິທີມອບ-ຮັບໃນຄັ້ງນີ້ເປັນກຽດເຂົ້າຮ່ວມຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໆ ໄຊຍະບູລີ, ມີຫົວໜ້າປະສານງານແຜນງານຂັ້ນສູນກາງ, ຊຽວຊານຄຸ້ມຄອງໂຄງການ ແລະ ຄະນະທີມງານຈາກບັນດາກົມທີ່ຂື້ນກັບຊວງກະສິກໍາ ແລະ ປ່າໄມ້, ເຈົ້າເມືອງ, ຮອງເຈົ້າເມືອງຈາກເມືອງເປົ້າໝາຍ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ຜູ້ປະສານງານຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານໃນຄັ້ງນີ້ດ້ວຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ