ການປຶກສາຫາລື ກ່ຽວກັບສະພາບການເພີ່ມຂຶ້ນຂອງລາຄາສິນຄ້ານໍາເຂົ້າກະສິກໍາ ແລະ ພະລັງງານ, ການສົ່ງເສີມກາເຟລາວໃຫ້ ເປັນໜຶ່ງປະເທດ,ໜຶ່່ງຜະລິດຕະພັນ ລະຫວ່າງລັດຖະມົນຕີ ກະຊວງກະສິກຳ ແລະ ປ່າໄມ້ ກັບ ຜູ້ຕາງໜ້າອົງການອາຫານ ແລະ ການກະເສດ ແຫ່ງສະຫະປະຊາຊາດ(FAO) ປະຈໍາ ສປປ ລາວ.

Published April 26, 2022 | By Khemmalay SONDAVANH

ຜູ້ຕາງໜ້າອົງການ FAO ປະຈຳ ສປປ ລາວ, ທ່ານ ນາຊາ ຮາຢັດ ໄດ້ເຂົ້າພົບ ທ່ານ ປອ ເພັດ ພົມພີພັກ ລັດຖະມົນຕີກະຊວງກະສິກຳ ແລະ ປ່າໄມ້ (MAF) ໃນວັນທີ 21 ເມສາ 2022. ທ່ານ ນາຊາ ຮາຢັດໄດ້ຖືກມອບໝາຍຈາກ ເອກອະທິບໍດີ ຂອງອົງການ FAO ເຊິ່ງໃຫ້ຄວາມສົນໃຈໃນການພັດທະນາ “ການເຕີບໂຕທາງເສດຖະກິດສີຂຽວຕາມແລວທາງລົດໄຟ” ຂໍ້ລິເລີ່ມ Hand-in-Hand (HIHI); ໂອກາດນີ້ ທ່ານລັດຖະມົນຕີ ໄດ້ເຫັນດີເປັນເອກກະພາບໃນການສະເໜີ ເລືອກກາເຟເປັນຜະລິດຕະພັນ ເປັນການລິເລີ່ມຂອງ ອົງການ FAO ເຊິ່ງຈະໄດ້ເປີດໂຕຂຶ້ນຢ່າງເປັນທາງການ ໃນວັນທີ 10 ພຶດສະພາ 2022. ນອກນັ້ນ, ທ່ານຍັງໄດ້ຍົກບັນຫາຜົນກະທົບ ຂອງການເພີ່ມຂຶ້ນຂອງລາຄາອາຫານ, ນ້ຳມັນເຊື້ອໄຟ ແລະ ຝຸ່ນ ທີ່ເພີ່ມຂຶ້ນສູງ ເຊິ່ງເປັນຜົນກະທົບຕໍ່ກັບການຄ້ຳປະກັນສະບຽງອາຫານໃນ ສປປ ລາວ.

ທ່ານ ນາຊາ ຮາຢັດ ໄດ້ມອບສົ່ງຈົດໝາຍຂອງເອກອະທິບໍດີຂອງອົງການ FAO ກ່ຽວກັບແຜນງານ HIHI ໂດຍທ່ານໄດ້ຮັບຊາບ ແລະ ໄດ້ພົບປະກັບຄະນະຜູ້ແທນ ຂອງ ສປປ ລາວ ໃນກອງປະຊຸມພາກພື້ນອາຊີ ແລະ ປາຊີຟິກ ຄັ້ງທີ 36 ທີ່ຜ່ານມາ. ທ່ານລັດຖະມົນຕີ ໄດ້ກ່າວຂອບໃຈ ຕໍ່ທ່ານ ນາຊາ ຮາຢັດ ແລະ ຢືນຢັນເຖິງຄວາມສຳຄັນ ຕໍ່ ສປປ ລາວ ກໍ່ຄືກະຊວງກະສິກໍາ ແລະ ປ່າໄມ້ ທີ່ຈະສືບຕໍ່ປະສານສົມທົບກັນຢ່າງໃກ້ຊິດກັບ ອົງການ FAO.

ນອກນັ້ນ, ທ່ານ ນາຊາ ຮາຢັດ ຍັງໄດ້ອະທິບາຍວ່າ: ກາເຟ ແມ່ນສະເໜີໃຫ້ຖືກຄັດເລືອກເປັນຜະລິດຕະພັນຂອງ ສປປ ລາວ ການລິເລີ່ມ ວຽກງານ “ໜຶ່ງປະເທດ ໜຶ່ງບຸລິມະສິດ ຜະລິດຕະພັນ” ເຊິ່ງຈະໄດ້ເປີດໂຕຂຶ້ນ ທາງອອນໄລ໌ ໃນລະດັບພາກພື້ນ ຄັ້ງວັນທີ 10 ພຶດສະພາ 2022. ຈຸດປະສົງຂອງການລິເລີ່ມໃນລະດັບສາກົນນີ້ ແມ່ນເພື່ອຄັດເລືອກ ແລະ ສົ່ງເສີມຜະລິດຕະພັນໜຶ່ງດຽວ ຈາກແຕ່ລະປະເທດທີ່ໄດ້ຮັບການຍອມຮັບວ່າມີທ່າແຮງທີ່ສໍາຄັນ. ທ່ານລັດຖະມົນຕີກະຊວງກະສິກຳ ແລະ ປ່າໄມ້ ທ່ານ ປອ ເພັດ ພົມພີພັກ ກໍໄດ້ສະແດງຄວາມດີໃຈຕໍ່ຂໍ້ລິເລີ່ມ ແລະ ການຄັດເລືອກກາເຟ ເປັນຜະລິດຕະພັນ ແລະ ທ່ານຍັງເນັ້ນໜັກຕື່ມອີກວ່າ: ຈະສະໜັບສະໜູນໃຫ້ມີຜູ້ບໍລິຫານລະດັບສູງ ເຂົ້າຮ່ວມກອງປະຊຸມລິເລີ່ມຂອງອົງການ FAO ໃນຄັ້ງນີ້.

ໃນລະຫວ່າງກອງປະຊຸມ, ທ່ານ ນາຊາ ຮາຢັດ ໄດ້ຍົກບາງປະເດັນກ່ຽວກັບການເພີ່ມຂຶ້ນ ກ່ຽວກັບການນຳເຂົ້າສະ ບຽງອາຫານ ແລະ ຜະລິດຕະພັນກະສິກຳ. ນອກນັ້ນ, ທ່ານໄດ້ຍົກບາງໜ້າວຽກຂອງອົງການ FAO ທີ່ຈະໄດ້ດຳເນີນການວິເຄາະປະເມີນ ເພື່ອເຂົ້າໃຈເຖິງຜົນກະທົບ ຕໍ່ຄວາມໝັ້ນຄົງດ້ານສະບຽງອາຫານພາຍໃນປະເທດ. ໃນນາມກະຊວງກະສິກຳ ແລະ ປ່າໄມ້ ທ່ານ ປອ ເພັດ ພົມພີພັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ຢືນຢັນການສະໜັບສະໜູນ ໃນການປະເມີນຜົນດັ່ງກ່າວນີ້, ໃນອະນາຄົດຂ້າງໜ້າຮຽກຮ້ອງໃຫ້ອົງການ FAO ສືບຕໍ່ການສະໜັບສະໜູນຮັກສາການຮ່ວມໃຫ້ທາງກະຊວງມີສ່ວນຮ່ວມ, ພ້ອມທັງສະແດງຄວາມຂອບໃຈ, ເຫັນດີກັບບັນດາຂໍ້ສະເໜີແນະນຳ, ໃນໄລຍະສັ້ນ, ໄລຍະກາງ ແລະ ໄລຍະຍາວຈາກວຽກງານ.