ການນຳພັກ-ລັດ ຮ່ວມພິທີປ່ອຍປາ ເນື່ອງໃນວັນປ່ອຍປາ ແລະ ອານຸລັກສັດນ້ຳ-ສັດປ່າ ແຫ່ງຊາດ
ດັ່ງທີ່ພວກເຮົາຮູ້ນຳກັນແລ້ວວ່າ ການອະນຸລັກສັດນ້ຳ ແລະ ສັດປ່າໃຫ້ຍືນຍົງ ເປັນການສ້າງຄວາມອຸດົມ ສົມບູນ, ຄວາມສົມດຸນຂອງລະບົບນິເວດທຳມະຊາດ, ປະກອບສ່ວນຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ດີຂຶ້ນ ແລະ ເປັນທ່າແຮງໃນການພັດທະນາເສດຖະກິດ-ສັງຄົມແຫ່ງຊາດ. ສະນັ້ນ, ລັດຈຶ່ງໄດ້ກຳນົດເອົາວັນທີ 13 ກໍລະກົດ ຂອງທຸກໆປີເປັນວັນປ່ອຍປາ ແລະ ວັນອານຸລັກສັດນ້ຳ-ສັດປ່າແຫ່ງຊາດ. ເຊິ່ງປີນີ້ໄດ້ໝູນວຽນມາຄົບຮອບ 21 ປີ (13 ກໍລະກົດ 1996 – 13 ກໍລະກົດ 2017).
ໃນວັນທີ 13 ກໍລະກົດນີ້ກະຊວງກະສິກໍາ ແລະ ປ່າໄມ້ ຮ່ວມກັບນະຄອນຫຼວງວຽງຈັນໄດ້ຈັດພິທີປ່ອຍປາ ແລະ ສັດນໍ້າ-ສັັດປ່າຢູ່ 3 ຈຸດຄື: ຈຸດບ້ານໄຮ່ ເມືອງ ໄຊທານີ ເຊິ່ງປ່ອຍປາລົງສູ່ນໍ້າງື່ມໂດຍການເປັນປະທານຂອງທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ, ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ແລະ ພາກສ່ວນກ່ຽວຂ້ອງເຂົ້າຮ່ວມ, ຈຸດທ່າເຮືອຫຼັກ 4, ບ້ານ ທ່າພະລານໄຊ ເມືອງ ສີສັດຕະນາກ, ປ່ອຍປາລົງສູ່ນໍ້າຂອງ ໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ແລະ ພາກສ່ວນກ່ຽວຂ້ອງເຂົ້າຮ່ວມ ແລະ ອີກຈຸດໜຶ່ງທີ່ອ່າງນໍ້າຊວງ ບ້ານ ສີວິໄລ ເມືອງ ນາຊາຍທອງ, ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ບຸນຂວາງ ຄຳບຸນເຮືອງ ແລະ ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. ກິດຈະກໍາການປ່ອຍປາຄືນສູ່ແຫຼ່ງນໍ້າທໍາມະຊາດໃນຄັ້ງນີ້ປະເພດປາທີ່ນໍາມາປ່ອຍປະກອບດ້ວຍປາປາກ, ປາເອິນ ແລະ ປາແກງ ຈຳນວນ 300.000 ກວ່າໂຕ ພ້ອມດ້ວຍກຸ້ງ ແລະ ນົກຈຳນວນໜື່ງ. ໂດຍໃນປີນີ້ກະຊວງກະສິກໍາ ແລະ ປ່າໄມ້ ຄາດຄະເນວ່າຈະປ່ອຍປາ ແລະ ສັດນໍ້າ-ສັດປ່າປີນີ້ແຕ່ເດືອນ ກໍລະກົດ-ເດືອນກັນຍາ ທົ່ວປະເທດຈະປ່ອຍປາ, ສັດນ້ຳ ແລະ ສັດປ່າ ໃຫ້ໄດ້ຫຼາຍກວ່າ 40 ລ້ານໂຕ ໂດຍເລັ່ງໃສ່ນໍ້າຂອງ, ສາຂາແມ່ນ້ຳຂອງ, ອ່າງເກັບນ້ຳ, ເຂື່ອນໄຟຟ້າ, ອ່າງເກັບນ້ຳຊົນລະປະ ທານ ແລະ ຫ້ວຍໜອງຄອງບຶງຕ່າງໆ ລວມທັງໜອງສະຂອງສ່ວນບຸກຄົນ. ກໍ່ເພື່ອເປັນການປົກຮັກສາຊີວະນາໆພັນໃຫ້ຍືນຍົງຕະລອດ.
ໂດຍ: ເຂັມມະໄລ ແລະ ສີອຳມອນ
ກວດແກ້: ທ່ານ ແສງປະເສີດ ມັດທຸຈັນ
