ກອງປະຊຸມ ຜ່ານຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2040
ກອງປະຊຸມ ຜ່ານຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2040
ໃນຕອນເຊົ້າຂອງວັນທີ 09 ມີຖຸນາ 2022, ກົມຄຸ້ມຄອງ ແລະ ພັດທະນາທີ່ດິນກະສິກຳ, ກະຊວງກະສິກຳ ແລະ ປ່າໄມ້ ຢູ່ທີສະໂມສອນກະຊວງກະສິກໍາ ແລະ ປ່າໄມ້, ໄດ້ຈັດກອງປະຊຸມຂັ້ນກະຊວງຄັ້ງທີ 2 ຂື້ນ ເພືອຜ່ານຍຸດທະສາດວຽກງານການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2040 (ສະບັບຮ່າງປັບປຸງ) ຂຶ້ນ, ໂດຍການເປັນປະທານຂອງ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທັງເປັນຜູ້ຊີ້ນໍາວຽກງານຄຸ້ມຄອງ ແລະ ພັດທະນາທີ່ດິນກະສິກຳ. ຊຶ່ງມີກົມ, ສະຖາບັນອອ້ມຂ້າງກະຊວງກະສິກໍາ ແລະ ປ່າໄມ້, ພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ, ກະຊວງທີ່ກ່ຽວຂ້ອງ (ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່ ແລະ ກະຊວງອຸດສາຫະກໍາ ແລະ ການຄ້າ), ພາກສວ່ນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມທັງໝົດ ຈໍານວນ 49 ທ່ານ , ຍີງ 11 ທ່ານ.
ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ແມ່ນໄດ້ລິເລິ່ມຮ່າງ ມາແຕ່ປີ 2015 ເປັນຕົ້ນມາ ແລະ ໄດ້ມີການພັດທະນາມາ ຈົນຮອດປີ 2019 ຈຶ່ງໄດ້ສຳເລັດເປັນຍຸດທະສາດສະບັບ (ຮ່າງ) ປັບປຸງດັ່ງກ່າວນີ້ ໂດຍການເຮັດວຽກຮ່ວມກັບບັນດາກົມ, ພະແນກການກ່ຽວຂ້ອງທຸກພາກສ່ວນຢ່າງໃກ້ສິດ ເປັນຕົ້ນແມ່ນ: ບັນດາສາຍຕັ້ງຂອງຂະແໜງກະສິກໍາ ແລະ ປ່າໄມ້ຂັ້ນແຂວງ, ນະຄອນຫຼວງ, ຂະແໜງຄຸ້ມຄອງ ແລະ ພັດທະນາທີ່ດິນກະສິກໍາ ຕະຫຼອດຮອດຂັ້ນເມືອງ ລວມທັງຫມົດມີ 15 ແຂວງ ຄື: ແຂວງ ຈໍາປາສັກ, ສາລະວັນ, ເຊກອງ, ອັດຕະປື, ສະຫວັນນະເຂດ, ຄໍາມ່ວນ, ບໍລິຄໍາໄຊ, ໄຊສົມບູນ, ຊຽງຂວາງ, ໄຊຍະບູລີ, ຫົວພັນ, ຜົ້ງສາລີ, ຫລວງນໍ້າທາ, ອຸດົມໄຊ ແລະ ແຂວງ ບໍ່ແກ້ວ.
ໃນໄລຍະປີ 2020-2021 ແມ່ນໄດ້ເລັ່ງໃສ່ການທາບທາມຕໍ່ກັບຍຸດທະສາດນີ້້ ຊື່ງໄດ້ເຮັດສໍຳເລັດ ການຈັດກອງປະຊຸມຂັ້ນກົມ 5 ຄັ້ງ, ສະເໜີຜ່ານບັນດາກົມອ້ອມຂ້າງກະຊວງ 2 ຄັ້ງ, ສະເໜີຜ່ານບັນດາກົມ ຂອງ 3 ກະຊວງທີ່ຕິດພັນ 1 ຄັ້ງ, ສະເໜີຜ່ານພະແນກກະສິກໍາ ແລະ ປ່າໄມ້ ທົ່ວປະເທດ 1 ຄັ້ງ ແລະ ສະເໜີຜ່ານ ຂັ້ນກະຊວງ 1 ຄັ້ງ.
ກອງປະຊຸມ ຜ່ານຮ່າງດຳລັດໃນຄັ້ງນີ້ ແມ່ນ ໄດ້ຮັບຜົນສໍາເລັດອັນຈົບງາມ ໄດ້ມີການເປັນເອກະພາບທາງດ້ານໂຄງຮ່າງ, ເນື້ອໃນ ແລະ ໄດ້ຮັບຄຳຄິດ ຄຳຄິດເຫັນ ຈາກຜູ້ເຂົ້າຮ່ວມກອງປະຊຸມ ທີ່ເປັນທັງຄຳແນະນໍາ ແລະ ຂໍ້ຄິດເຫັນ ທີ່ມີປະໂຫຍດແກ່ກົມຄຸ້ມຄອງ ແລະ ພັດທະນາທີ່ດິນກະສິກໍາ ໃນການນຳມາຄົ້ນຄວ້າ ແລະ ປັບປຸງ ຄັ້ງສຸດທ້າຍ ເພື່ອກ້າວໄປສູ່ຂັ້ນຕອນຕໍ່ໄປ ກໍ່ຄືການຜ່ານເອກະສານຈາກພາກສ່ວນທີ່ກ່ຽວຂ້ອງຕາມລະບົບ ແລະ ການນຳສະເໜີເຂົ້າກອງປະຊຸມລັດຖະບານ ໃນອານາຄົດ. ກອງປະຊຸມໄດ້ດໍາເນີນມາຮອດເວລາ 12:00 ແລະ ໄດ້ປິດລົງດ້ວຍຄວາມຈົບງາມ.
