ກອງປະຊຸມວຽກງານສົ່ງເສີມກະສິກຳ ແລະ ສະຫະກອນທົ່ວປະເທດ ປະຈໍາປີ 2023
ກອງປະຊຸມວຽກງານສົ່ງເສີມກະສິກຳ ແລະ ສະຫະກອນທົ່ວປະເທດ ປະຈໍາປີ 2023
ວຽກງານສົ່ງເສີມກະສິກໍາ ແລະ ສະຫະກອນ ເປັນວຽກງານໜຶ່ງທີ່ສໍາຄັນຫຼາຍ ເພາະເປັນວຽກສົ່ງເສີມການຜະລິດກະສິກໍາໃຫ້ມີຄວາມເຂັ້ມແຂງ, ມີສະບຽງອາຫານຢ່າງພຽງພໍ ແລະ ມີໂພສະນາການ, ມີຜະລິດຕະພັນກະສິກໍາຢ່າງຫຼາກຫຼາຍ ແລະ ກາຍເປັນສິນຄ້າ. ໃນລະຫວ່າງວັນທີ 19-20 ກຸມພາ 2024 ກົມສົ່ງເສີມກະສິກໍາ ແລະ ສະຫະກອນ ໄດ້ຈັດກອງປະຊຸມ ວຽກງານສົ່ງເສີມກະສິກໍາ ແລະ ສະຫະກອນທົ່ວປະເທດ ປະຈໍາປີ 2023 ຂຶ້ນ, ທີ່ກົມຂອງຕົນ. ໂດຍການເປັນປະທານຂອງ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ຊຶ່ງມີ ທ່ານຫົວໜ້າ-ຮອງຫົວໜ້າຫ້ອງການ, ກົມ, ພາກສ່ວນທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມທັງໝົດ 83 ທ່ານ, ຍິງ 11 ທ່ານ. ຈຸດປະສົງຂອງກອງປະຊຸມ ເພື່ອສະຫຼູບຕີລາຄາການຈັດຕັ້ງປະຕິບັດ ວຽກງານສົ່ງເສີມກະສິກໍາ ແລະ ສະຫະກອນ ທົ່ວປະເທດ ປີ 2023 ແລະ ທິດທາງແຜນ ການປີ 2024, ຮັບຟັງການນໍາສະເໜີ, ຄໍາຄິດຄໍາເຫັນ ແລະ ບົດຮຽນ ຈາກບັນດາພະແນກ ແລະ ສູນອ້ອມຂ້າງກົມ, ພະແນກກະສິກໍາ ແລະ ປ່າໄມ້ແຂວງ, ກຸ່ມການຜະລິດ, ສະຫະກອນ, ສະມາຄົມ, ຜູ້ປະກອບການ ແລະ ການຈັດຕັ້ງທີ່ກ່ຽວຂ້ອງ.
ໃນທີ່ປະຊຸມ ທ່ານ ສົມພອນ ແກ້ວຫາວົງ ຫົວໜ້າກົມສົ່ງເສີມກະສິກໍາ ແລະ ສະຫະກອນ ໄດ້ຂຶ້ນນໍາສະເໜີ ບົດສະຫຼຸບລາຍງານຕີລາຄາ ການຈັດຕັ້ງປະຕິບັດວຽກງານສົ່ງເສີມກະສິກໍາ ແລະ ສະຫະກອນ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຊຶ່ງໄດ້ໃຫ້ຮູ້ວ່າ: ໃນໜຶ່ງປີຜ່ານມາ ເຫັນໄດ້ວ່າ ຈຳນວນກຸ່ມຜະລິດເພີ່ມຂຶ້ນ 170 ກຸ່ມ (4.193 ກຸ່ມ) ທຽບໃສ່ຂໍ້ມູນປີ 2022 (4.023 ກຸ່ມ) ແລະ ສະຫະກອນກະສິກຳ ເພີ່ມຂຶ້ນ 8 ສະຫະກອນ ( 35 ສະຫະກອນ) ທຽບໃສ່ຂໍ້ມູນປີ 2022 (ມີ 27 ສະຫະກອນ); ສຳເລັດການຝຶກອົບຮົມເຕັກນິກກ່ອນ ແລະ ຫລັງການເກັບກ່ຽວ ໃນການປູກພືດຜັກ ແລະ ການປູກເຂົ້າ ແລະ ການນໍາໃຊ້ກົນຈັກກະສິກຳເຂົ້າໃນການຜະລິດເຂົ້າ ຈໍານວນ 15 ຄັ້ງ ມີຜູ້ເຂົ້າຮ່ວມທັງໝົດ 459 ເທືອຄົນ ແລະ ຍີງ 184 ເທືອຄົນ; ຝຶກອົບຮົມທາງດ້ານເຕັກການຜະລິດ ແລະ ການນຳໃຊ້ແນວພັນເຂົ້າລຸ້ນ3 ແລະ ລົງແນະນໍາກັບທີ່ ກຸ່ມຜະລິດແນວພັນເຂົ້າລຸ້ນ 3 ຈໍານວນ 12 ຄັ້ງ ມີຜູ້ເຂົ້າຮ່ວມ 1,061 ເທືອຄົນ, ຍິງ 344 ເທືອຄົນ ຊຶ່ງສະແດງໃຫ້ເຫັນວ່າ ມີຈໍານວນ 243 ກຸ່ມ, 2,018 ຄອບຄົວ ແລະ ມີເນື້ອທີ່ 1.476,1 ເຮັກຕາ ທີ່ຜະລິດ ແລະ ນໍ້າໃຊ້ແນວພັນເຂົ້າລຸນ 3 ໂດຍສະເລ່ຍຜົນການຜະລິດແນວພັນເຂົ້າລຸນ 3 ປະມານ 4,5 ໂຕນ/ເຮັກຕາ; ພັດທະນາຂີດຄວາມສາມາດໃຫ້ພະນັກງານສົ່ງເສີມ ນັບແຕ່ສູນກາງຮອດທ້ອງຖີ່ນ ໄດ້ທັງໝົດ 7.799 ເທື່ອຄົນ, ຍິງ 2.178 ເທື່ອຄົນ ແລະ ຜະລິດຂໍ້ມູນຂ່າວສານດ້ານການສົ່ງເສີມໃນຮູບແບບຕ່າງໆ ເພື່ອໂຄສະນາ ແລະ ແຈກຢາຍໃຫ້ຊາວກະສິກອນ ແລະ ຜູ້ທີ່ສົນໃຈ; ເພື່ອສົ່ງເສີມການເພີ່ມມຸນລະຄ່າຜົນຜະລິດກະສິກຳ ແລະ ເປັນການສົ່ງເສີມໃຫ້ຊາວກະສິກອນໄດ້ບໍລິໂພກອາຫານທີ່ມີໂພຊະນາການ ດ້ວຍການແປຮູບ ຫຼື ປຸງແຕ່ງ ແລະ ການປຸງລົດ ໃຫ້ມີຄວາມສົນໃຈຂອງຕະຫລາດ ແລະ ຜູ້ບໍລິໂພກ ເຊັ່ນ: ການເຮັດສົ້ມປາ, ກວນໝາກນັດ, ກວນໝາກຂາມ, ນໍ້າປູ, ກ້ວຍສາບ, ກ້ວຍອົບເນີຍ, ເຂົ້າຂຽບຖົ່ວເຫລືອງ, ນໍ້າເຕົ້າຮູ້ ແລະ ສົ້ມຜັກ ໃຫ້ກັບກຸ່ມຜະລິດ ແລະ ຄອບຄົວຊາວກະສິກອນ 10 ຄັ້ງ ມີຜູ້ເຂົ້າຮ່ວມ 250 ເທື່ອຄົນ, ຍິງ 105 ເທື່ອຄົນ ແລະ ສ້າງເປັນຄູ່ມືເຕັກນິກການປຸງແຕ່ງຜົນຜະລິດກະສິກໍາ ໄດ້ 45 ຄູ່ມື (ແປຮູບຊີ້ນໝູ 12ລາຍການ; ແປຮູບໝາກນັດ 5 ລາຍການ; ແປຮູບປາ 18 ລາຍການ; ແປຮູບພືດຜັກ ໝາກໄມ້ 10 ລາຍການ); ສາມາດສ້າງເປັນສູນພັດທະນາຕົວແບບທັນສະໄໝ ໂດຍການນຳໃຊ້ກົນຈັກເຂົ້າໃນການຜະລິດກະສິກຳ ໄດ້ 2 ສູນ ຄື: ສູນພັດທະນາກະສິກຳໜອງແຫ້ວ ແລະ ສູນພັດທະນາກະສິກຳປາກແຈ້ງ; ສໍາເລັດການຈັດຕັ້ງເຜີຍແຜ່ດຳລັດ ສະບັບເລກທີ 606/ລບ ວ່າດ້ວຍກຸ່ມ ແລະ ສະຫະກອນ ໃນ 4 ແຂວງ ແລະ ສໍາເລັດການສ້າງຮ່າງກົດໝາຍ ວ່າດ້ວຍສະຫະກອນ ແລະ ໄດ້ຜ່ານກອງປະຊຸມລັດຖະບານ ໃນເດືອນມັງກອນ 2024 ແລ້ວ; ໄດ້ມີການປະສານ ແລະ ພົວພັນ ກັບຫຼາຍພາກສ່ວນ ເຊັ່ນ: ທະນະຄານພັດທະນາອາຊີ; ທະນະຄານໂລກ; ອົງການຮ່ວມມືສາກົນຍີປຸນ; ອົງການຮ່ວມມືສາກົນເກົາຫຼີ; ສະຫະ ພັນສະຫະກອນລາຍໄຟເຊັນເຢຍລະມັນ ແລະ ຄູ່ຮ່ວມພັດທະນາອື່ນໆ. ເພື່ອລະດົມການຊ່ວຍເຫລືອ ທາງດ້ານທຶນຮອນ; ວັດຖຸອຸປະກອນ ແລະ ເຕັກນິກວິຊາການ ເພື່ອມາຮັບໃຊ້ເຂົ້າ ໃນວຽກງານການສົ່ງເສີມກະສິກຳ ແລະ ສະຫະກອນ.
ນອກຈາກນີ້, ໃນທີ່ປະຊຸມ ຍັງໄດ້ຮັບຟັງການນໍາສະເໜີກ່ຽວກັບ: ສະພາບການສ້າງຕັ້ງ ແລະ ພັດທະນາກຸ່ມ, ສະຫະກອນ ແລະ ກອງທຶນ; ການເຊື່ອມໂຍງຕະຫຼາດ ລະຫວ່າງຜູ້ຜະລິດ ແລະ ຜູ້ປະກອບການ; ການສົ່ງເສີມການນໍາໃຊ້ກົນຈັກ ເຂົ້າໃນການຜະລິດກະສິກໍາ ເພື່ອຫັນເປັນທັນສະໄໝ; ການສົ່ງເສີມການປຸງແຕ່ງເພື່ອສ້າງມູນຄ່າເພີ່ມ; ການສົ່ງເສີມການຜະລິດ ແລະ ນໍາໃຊ້ແນວພັນພືດ ແລະ ແນວພັນສັດ; ການພັດທະນາສູນບໍລິການເຕັກນິກກະສິກໍາຂັນແຂວງ, ສະຖານີບໍລິການເຕັກນິກຂັ້ນເມືອງ ເຮັດໜ້າທີ່ສົ່ງເສີມກະສິກໍາ ແລະ ສະຫະກອນ; ບົດຮຽນການຄຸ້ມຄອງ ແລະ ນໍາໃຊ້ກົນຈັກເຂົ້າໃນການຜະລິດກະສິກໍາ; ການສົ່ງເສີມປູກພືດ 3 ຮອບວຽນ; ບົດຮຽນການສ້າງຕັ້ງ ແລະ ການພັດທະນາສະຫະກອນຜູ້ຜະລິດກາເຟພູພຽງບໍລິເວນ (CPC); ບົດຮຽນໃນການຜະລິດແນວພັນເຂົ້າລຸ້ນ 3 ເປັນສິນຄ້າ ບ້ານຕຶງ, ເມືອງເຊບັ້ງໄຟ, ແຂວງຄໍາມ່ວນ); ບົດຮຽນການສ້າງຕັ້ງ ແລະ ພັດທະນາສະຫະກອນທ່າຊ້າງ; ຜົນສໍາເລັດການສ້າງຕັ້ງສະມາຄົມຊາວກະສິກອນລາວ; ການສະໜອງສິນເຊື່ອ ໃຫ້ແກ່ກຸ່ມຜະລິດກະສິກໍາ ປູກຝັງ ແລະ ລ້ຽງສັດ ແລະ ອື່ນໆ.
