ກອງປະຊຸມປຶກສາຫາລືເນື້ອໃນ “ຮ່າງ” ກົດໝາຍວ່າດ້ວຍປ່າໄມ້ ສະບັບປັບປຸງ
ເພື່ອປະຕິບັດຕາມຂໍ້ຕົກລົງສະບັບເລກທີ 1113/ກປ, ລົງວັນທີ 21 ພຶດສະພາ 2018. ວ່າດ້ວຍການອະນຸມັດເປີດກອງປະຊຸມ ທາບທາມຮ່າງກົດໝາຍວ່າດ້ວຍປ່າໄມ້ ສະບັບປັບປຸງ, ໃນວັນທີ 23 ພຶດ ສະພາ 2018 ກົມປ່າໄມ້ໄດ້ຈັດກອງປະຊຸມປຶກສາຫາລືເນື້ອໃນ “ຮ່າງ” ກົດໝາຍວ່າດ້ວຍປ່າໄມ້ ສະບັບປັບປຸງ ຂຶ້ນ ທີ່ສະໂມສອນກະຊວງກະສິກຳ ແລະ ປ່າໄມ້ ໃຫ້ກຽດເປັນປະທານໂດຍ ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ມີ່ທານຮອງລັດຖະມົນຕີກະຊວງ ກປ, ບັນດາທ່ານ ຮອງລັດຖະມົນຕີຈາກກະຊວງທີ່ກ່ຽວຂ້ອງ, ຕາງໜ້າຄະນະກຳມະທິການສະພາແຫ່ງຊາດ, ທ່ານຫົວ ໜ້າ-ຮອງຫົວໜ້າ ຫ້ອງການ, ກົມ, ສະຖາບັນ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມ ເພື່ອທາບທາມ, ປຶກສາຫາລື ແລະ ປະກອບຄຳຄິດຄຳເຫັນ ໃສ່ຮ່າງ ກົດໝາຍວ່າດ້ວຍປ່າໄມ້ ສະບັບເລກທີ 06/ສພຊ, ລົງວັນທີ 24 ທັນວາ 2007 ໃຫ້ມີຄວາມສົມບູນ, ຄົບຖ້ວນ ແລະ ສອດຄ່ອງກັບສະພາບຄວາມເປັນຈິງ ແລະ ການພັດທະນາເສດຖະກິດ-ສັງຄົມແຫ່ງຊາດ ໃນປັດຈຸບັນ.
ໃນທີ່ປະຊຸມ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ຂຶ້ນ ສະເໜີ “ຮ່າງ” ກົດໝາຍວ່າດ້ວຍປ່າໄມ້ ສະບັບປັບປຸງ ເຊິ່ງປະກອບມີ 13 ພາກ, 17 ໝວດ ແລະ ມີ 160 ມາດຕາ ໃນນີ້ ເພີ່ມຕື່ມ 1 ພາກ, 4 ໝວດ, ປັບປຸງ 61 ມາດຕາ ແລະ ເພີ່ມໃໝ່ 36 ມາດຕາ (ຮັກສາເດີມ 58 ມາດຕາ, ຕັດອອກ 5 ມາດຕາ). ຫຼັງຈາກນັ້ນ, ຜູ້ແທນເຂົ້າຮ່ວມກອງປະຊຸມກໍ່ໄດ້ປະກອບຄຳຄິດຄຳເຫັນໃສ່ຮ່າງກົດໝາຍວ່າດ້ວຍປ່າໄມ້ ສະບັບປັບປຸງ ເພື່ອໃຫ້ຮ່າງກົດໝາຍດັ່ງກ່າວມີເນື້ອໃນຄົບຖ້ວນ ແລະ ສົມບູນ. ກອງປະຊຸມໄດ້ດຳເນີນເປັນເວລາ 1 ວັນເຕັມ ກໍ່ໄດ້ປິດລົງດ້ວຍຜົນສຳເລັດຕາມລະດັບຄາດໝາຍ.
ພາບ ແລະ ຂ່າວ ໂດຍ: ພະແນກຂ່າວສານ ກປ.
