ກອງປະຊຸມປຶກສາຫາລືຂະບວນການໂຕະມົນ ແລະ ກອງປະຊຸມແຫ່ງຊາດດ້ານໂພຊະນາການ ຄັ້ງທີ 2.
ເພື່ອຢ້ຳເຖິງຄວາມມຸ້ງໝັ້ນຂອງ ສາທາລະນະລັດ ປະຊາທິປະໄຕ ປະຊາຊົນລາວ ໃນການເສີມຂະຫຍາຍເຂົ້າຊ່ວຍເຫຼືອຢ່າງຮີບດ່ວນ ແລະ ທັນການໃນການລົບລ້າງພາວະຂາດສານອາຫານພາຍໃນປະເທດ. ໃນຕອນເຊົ້າຂອງວັນທີ 17 ພະຈິກ 2016 ທີ່ຜ່ານມາ ກອງເລຂາຄະນະກຳມະການວຽກງານໂພຊະນາການແຫ່ງຊາດ ໄດ້ຈັດກອງປະຊຸມປຶກສາຫາລືຂະບວນການໂຕະມົນ ແລະ ກອງປະຊຸມແຫ່ງຊາດດ້ານໂພຊະນາການ ຄັ້ງທີ 2 ຂຶ້ນ ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ສົມດີ ດວງດີ ຮອງນາຍົກ ລັດຖະມົນຕີ, ລັດຖະມົນຕີກະຊວງການເງິນ, ມີທ່ານ ຮສ.ດຣ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ, ທັງເປັນປະທານຄະນະກຳມະການ ໂພຊະນາການແຫ່ງຊາດ, ທ່ານ ປະລິນຍາເອກ ພວງປາຣິສັກ ປຣະວົງວຽງຄຳ, ລັດຖະມົນຕີກະຊວງກະສິກຳ ແລະ ປ່າໄມ້, ທ່ານຮອງລັດຖະມົນຕີ, ຮອງປະທານອົງການຈັດຕັ້ງສາກົນ, ທ່ານຮອງເຈົ້າແຂວງ 18 ແຂວງ, ຜູ້ຕາງໜ້າອົງການ UNICEF, ເອກອັກຄະລັດຖະທູດ ສະຫະພາບເອີ ຣົບ ປະຈຳ ສປປ ລາວ, ທ່ານຫົວໜ້າ ແລະ ຄະນະພະແນກການທີ່ກ່ຽວຂ້ອງ 18 ແຂວງ ເຂົ້າຮ່ວມຢ່າງພ້ອມພຽງ.
ກອງປະຊຸມດັ່ງກ່າວໄດ້ຈັດຂຶ້ນເພື່ອຕິດຕາມຄວາມຄືບໜ້າ ໃນການຈັດຕັ້ງປະຕິບັດນະໂຍບາຍວຽກງານໂພສະນາການ ແລະ ແຜນປະຕິບັດງານແຫ່ງຊາດ ແລະ ກຳນົດບຸລິມະສິດທີ່ສຳຄັນ ປີ 2017 ແລະ ໃນຕໍ່ໜ້າ.
ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ກ່າວວ່າ: ພັກ ແລະ ລັດຖະບານ ສປປ ລາວ ໄດ້ຖືເອົາວຽກງານໂພສະນາການ ເປັນໜຶ່ງໃນບູລິມະສິດ ແລະ ວາລະຂອງຊາດ ເຊິ່ງໄດ້ມີການຈັດຕັ້ງກົນໄກການປະສານງານຫຼາຍພາກ ສ່ວນ, ພ້ອມທັງໄດ້ເອົາໃຈໃສ່ເປັນຢ່າງສູງໃນການຈັດສັນງົບປະມານ, ຂົນຂວາຍການສະໜັບສະໜູນຈາກສັງຄົມ ແລະ ສາກົນ ເຂົ້າໃນການຈັດຕັ້ງປະຕິບັດວຽກງານດັ່ງກ່າວ.
ຈາກຂໍ້ມູນການສຳຫຼວດລ່າສຸດ ປີ 2015 ໃຫ້ຮູ້ວ່າ: ອັດຕາການຂາດສານອາຫານຊ້ຳເຮື້ອ ປະເພດລວງສູງຫຼຸດມາດຕະຖານໃນເດັກຕ່ຳກວ່າ 5 ປີ ໄດ້ຫຼຸດລົງ ຍັງເຫຼືອ 35,6% ເຊິ່ງໄດ້ຫຼຸດລົງເກືອບ 10% ຖາທຽບໃສ່ 44% ໃນປີ 2011, ອັດຕາການຂາດສານອາຫານປະເພດນ້ຳໜັກຕ່ຳກໍ່ຫຼຸດລົງເລັກນ້ອຍ ຍັງເຫຼືອ 25,5% ທຽບໃສ່ 27% ໃນປີ 2011. ແຕ່ອັດຕາການຂາດສານອາຫານກະທັນຫັນແບບຈ່ອຍ ໄດ້ເພີ່ມຂຶ້ນ 9,6% ທຽບໃສ່ 5,9% ໃນປີ 2011.
ໃນໂອກາດດຽວກັນນີ້ ທ່ານ ປອ ພວງປະຣິສັກ ປຣະວົງວຽງຄຳ ໄດ້ກ່າວວ່າ: ສໍາລັບກະຊວງກະສິກຳ ແລະ ປ່າໄມ້ ແມ່ນໄດ້ລົງເລິກ 4 ວຽກງານຕົ້ນຕໍຄື: ວຽກງານສົ່ງເສີມການປູກ, ການລ້ຽງ, ວຽກງານປຸງແຕ່ງອາຫານ ແລະ ວຽກງານສ້າງລາຍໄດ້. ນອກ ຈາກນີ້, ຍັງໄດ້ແຕ່ງຕັ້ງຄະນະປະສານງານ ເຮັດວຽກກ່ຽວກັບການຄ້ຳປະກັນສະບຽງອາຫານ ແລະ ຜະລິດເປັນສິນຄ້າ.
ໃນຕອນທ້າຍກອງປະຊຸມ ທ່ານປະທານໄດ້ຮຽກຮ້ອງໃຫ້ທຸກພາກສ່ວນ ຈົ່ງໄດ້ເອົາໃຈໃສ່ຮ່ວມກັນ, ລະດົມຂົນຂວາຍຊັບພະຍາກອນ, ສະໜັບສະໜູນຮ່ວມກັນ ແລະ ປະສານງານຢ່າງກົມກຽວໃນທຸກຂັ້ນ. ໃຫ້ຄວາມມຸ່ງໝັ້ນໃນການບັນລຸເປົ້າໝາຍຫຼຸດຜ່ອນ ການຂາດອາຫານໃນ ປີ 2020 ອັນເປັນພື້ນຖານໃນການລົບລ້າງທຸກຮູບແບບ ຂອງການຂາດສານອາຫານໃນ ສປປ ລາວ ເປົ້າໝາຍ SDGs ປີ2030 ໃຫ້ປະກົດຜົນເປັນຈິງ.
ນະຄອນຫຼວງວຽງຈັນ, ວັນທີ 21 ພະຈິກ 2016.
ໂດຍ: ເຂັມມະໄລ ສົນດາວັນ
ກວດແກ້: ເຂັມພອນ ທິພົມມະຈັນ
