ກອງປະຊຸມດຳເນີນຊີວິດການເມືອງ ປັບປຸງ ປົວແປງທົ່ວພັກ ປີ 2017
ກອງປະຊຸມດຳເນີນຊີວິດການເມືອງ ປັບປຸງ ປົວແປງທົ່ວພັກ ປີ 2017 ຂອງອົງຄະນະພັກກະຊວງກະສິກຳ ແລະ ປ່າໄມ້ ຊຸດທີ 1 ໄດ້ໄຂຂຶ້ນໃນລະຫວ່າງວັນທີ 6-7 ມີຖຸນາ 2017 ທີ່ສະຖາບັນຄົ້ນຄວ້າກະສິກຳ ແລະ ປ່າໄມ້ແຫ່ງຊາດ. ພາຍໃຕ້ການເປັນປະທານຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ຮອງຄະນະຮັບຜິດຊອບດຳເນີນຊີວິດການເມືອງ ປັບປຸງປົວແປງທົ່ວພັກ ປີ 2017; ສະຫາຍ ລຽນ ທີແກ້ວ ກຳມະການສູນກາງພັກ, ເລຂາຄະນະພັກກະຊວງ. ໂດຍມີຄະນະບໍລິຫານງານພັກກະຊວງ, ຄະນະພັກຂັ້ນຕ່າງໆ, ສະມາຊິກພັກຂັ້ນອາວຸໂສ, ສະມາຊິກພັກ-ພະນັກງານຫຼັກແຫຼ່ງ ເຂົ້າຮ່ວມທັງໝົດ 357 ສະຫາຍ, ຍິງ 65 ສະຫາຍ.
ໃນທີ່ປະຊຸມ ສະຫາຍ ລຽນ ທີແກ້ວ ກຳມະການສູນກາງພັກ, ເລຂາຄະນະພັກກະຊວງ ໄດ້ຂຶ້ນເຜີຍແຜ່ຄຳສັ່ງເລກທີ 01/ກມສພ, ລົງວັນທີ 01 ກຸມພາ 2017. ວ່າດ້ວຍການດຳເນີນຊີວິດການເມືອງປັບປຸງ ປົວແປງທົ່ວພັກ ປີ 2017; ເອກະສານ ເດັດດ່ຽວປັບປຸງປົວແປງທົ່ວພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ແລະ ຄຳແນະນຳການສ້າງຂະບວນການແຂ່ງຂັນຍ້ອງຍໍ 3 ເນື້ອໃນ 4 ຮັບປະ ກັນ. ໃນວັນຕໍ່ມາ, ສະຫາຍ ທອງພັດ ວົງມະນີ ຮອງເລຂາຄະນະພັກກະຊວງ ໄດ້ຂຶ້ນຜ່ານບົດສະຫຼຸບ ຕີລາຄາການຊີ້ນຳ-ນຳພາ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ 5 ຂອງອົງຄະນະພັກກະຊວງກະສິກຳ ແລະ ປ່າໄມ້. ຈາກນັ້ນ ຄະນະຮັບຜິດຊອບກອງປະຊຸມ ກໍ່ໄດ້ຢາຍບັດໃຫ້ບັນດາສະມະຊິກພັກທີ່ເຂົ້າຮ່ວມກອງປະຊຸມ ປ່ອນບັດປະກອບຄຳຄິດເຫັນຕໍ່ຄະນະພັກກະຊວງ.
ໃນຕອນທ້າຍກອງປະຊຸມ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ຮອງຄະນະຮັບຜິດຊອບດຳເນີນຊີວິດການເມືອງ ປັບປຸງປົວແປງທົ່ວພັກ ປີ 2017 ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍເນັ້ນໜັກໃຫ້ຄະນະພັກກະຊວງ, ຄະນະພັກຂັ້ນຕ່າງໆເປັນແບບຢ່າງຈິງໃຈ ຍົກ ແລະ ໄຈ້ແຍກຈຸດອ່ອນ, ຂໍ້ຄົງຄ້າງຂອງຕົນທີ່ຜ່ານມາ, ຈິງໃຈຮັບຟັງ ແລະ ພິຈາລະນາທຸກຄຳຄິດເຫັນ,ຕຳນິສົ່ງຂ່າວຂອງໝູ່ຄະນະ ແລະ ຂັ້ນລຸ່ມ ພາຍຫຼັງສຳເລັດຂັ້ນກະຊວງແລ້ວ ໃຫ້ສືບຕໍ່ດຳເນີນຊີວິດຢູ່ຂັ້ນຮາກຖານ ແລະ ໜ່ວຍຕ່າງໆອ້ອມຂ້າງກະຊວງໃຫ້ເລິກເຊິ່ງເຖິງຖອງເຊັ່ນກັນ.
– ປັບປຸງແບບແຜນນຳພາ ແລະ ວິທີເຮັດວຽກຂອງຄະນະພັກກະຊວງ, ຄະນະພັກຂັ້ນຕ່າງໆ ແລະ ສະມາຊິກພັກ ແກ້ໄຂພະຍາດອາດຍາສິດ, ເອກະຊົນ, ການສວຍໃຊ້ໜ້າທີ່ສໍ້ລາດບັງຫຼວງ ແລະ ອື່ນໆໃຫ້ເຂົ້າສູ່ລະບຽບຫຼັກການຢ່າງເຂັ້ມງວດ.
– ຕິດຕາມກວດກາພັກ, ກວດກາການຄຸ້ມຄອງບໍລິຫານລັດ, ສະກັດກັ້ນ ແລະ ຕ້ານການສໍ້ລາດບັງຫຼວງຂັ້ນກະຊວງ, ບັນດາກົມ, ສະຖາບັນ ແລະ ໜ່ວຍຮາກຖານຕ່າງໆ ຄະນະກວດກາພັກຕ້ອງມີການວາງແຜນລວມ, ມີແຜນງານ ແລະ ໂຄງການລະອຽດ, ກຳ ນົດເປົ້າໝາຍການຕິດຕາມກວດກາປົກກະຕິ ເພື່ອສະເໜີໃຫ້ຄະນະພັກ ແລະ ການນຳກະຊວງຮັບຮອງ ແລະ ຈັດຕັ້ງປະຕິບັດໃຫ້ເກີດຜົນ.
ກອງປະຊຸມໄດ້ດຳເນີນເປັນເວລາ 2 ວັນເຕັມ ແລະ ໄດ້ປິດລົງດ້ວຍຜົນສຳເລັດຕາມຄາດໝາຍ. ຫຼັງຈາກນັ້ນ, ຄະນະພັກກະຊວງ ແລະ ຄະນະພັກຂັ້ນຕ່າງໆ ກໍ່ໄດ້ໃຫ້ກຽດຮ່ວມກັນປູກຕົ້ນໄມ້ ຢູ່ເດີ່ນກິລາຂອງກົມຄຸ້ມຄອງ ແລະ ພັດທະນາທີ່ດິນກະສິກຳໃນຄັ້ງນີ້ດ້ວຍ.
ນະຄອນຫຼວງວຽງຈັນ, ວັນທີ 12 ມີຖຸນາ 2017.
ຂຽນໂດຍ: ເຂັມມະໄລ ສົນດາວັນ.
ກວດແກ້: ທ່ານ ນ. ປ້ອມ ພັນທະວົງ
