ກອງປະຊຸມຄະນະກຳມະການ ຮ່ວມມືປ່າໄມ້ ສ.ເກົາຫຼີ-ແມ່ນໍ້າຂອງ, ຄັ້ງທີ 11 (KMFoCo)

Published October 13, 2022 | By Khemmalay SONDAVANH

ກອງປະຊຸມຄະນະກຳມະການ ຮ່ວມມືປ່າໄມ້ ສ.ເກົາຫຼີ–ແມ່ນໍ້າຂອງ, ຄັ້ງທີ 11 (KMFoCo)

ໃນວັນທີ 5 ຕຸລາ 2022, ກົມປ່າໄມ້, ກະຊວງກະສິກໍາ ແລະ ປ່າໄມ້ ຕາງໜ້າໃຫ້ ສປປ ລາວ ເປັນເຈົ້າພາບຈັດກອງປະຊຸມ ຄະນະກຳມະການຮ່ວມມືປ່າໄມ້ ສ.ເກົາຫຼີ-ແມ່ນໍ້າຂອງ, ຄັ້ງທີ 11 ຂຶ້ນ ຢ່າງເປັນທາງການທີ່ຫ້ອງປະຊຸມໂຮງແຮມແກຣນຫຼວງພະບາງ, ເມືອງ ແລະ ແຂວງຫຼວງພະບາງ. ໂດຍການເປັນປະທານຮ່ວມເປີດກອງປະຊຸມຂອງ ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້, ທ່ານ ນາງ ຢູ ຊາງ ອານ ຮອງຫົວໜ້າພະ ແນກຊັບພະຍາກອນປ່າໄມ້ສາກົນ, ກົມປ່າໄມ້ ສ.ເກົາຫຼີ, ທ່ານ ດຣ ຄົງ ຢ໋ອງ ຮູ ຜູ້ອໍານວຍການສູນຮ່ວມມືປ່າໄມ້ ສ.ເກົາຫລີ-ແມ່ນໍ້າຂອງ ແລະ ການເປັນປະທານຮ່ວມດຳເນີນກອງປະຊຸມຂອງ ທ່ານ ປອ ອຸປະກອນ ອາລຸນສະຫວັດ ຮອງຫົວໜ້າກົມປ່າ ໄມ້. ເຊິ່ງມີຄະນະຜູ້ແທນທີ່ມາຈາກປະເທດກຳປູເຈຍ, ສ.ເກົາຫຼີ, ລາວ, ມຽນມາ ແລະ ປະເທດຫວຽດນາມ ເຂົ້າຮ່ວທັງໝົດ 31 ທ່ານ, ຍິງ 6 ທ່ານ.

ໃນທີ່ປະຊຸມໄດ້ຮັບຟັງການລາຍງານ ກ່ຽວກັບການຈັດຕັ້ງປະຕບັດວຽກງານຂອງໂຄງການ ການປັບປຸງຊີວິດການເປັນຢູ່ຂອງທ້ອງ ຖິ່ນເພື່ອການພັດທະນາການຄຸ້ມຄອງປ່າຊຸມຊົນ (CBFM) ໃນເຂດ ບາໂກ (Bago), ປະເທດພະມ້າ; ການສົ່ງເສີມການຜະລິດໄມ້ໄຜ່ແບບຍືນຍົງໃນຊຸມຊົນ ປະກອບສ່ວນຍົກສູງຊີວິດການເປັນຢູ່ ແລະ ການບໍລິການລະບົບນິເວດປ່າໄມ້ ໃນ 3 ປ່າຊຸມຊົນ ໃນແຂວງພຣະວິຫາ, ປະເທດກຳປູເຈຍ; ໂຄງການພັດທະນາຕົວແບບການຄຸ້ມຄອງປ່າໄມ້ບ້ານ ໂດຍການຂັບເຄື່ອນຂອງປະຊາຊົນ ບ້ານໂພນສູງ ເມືອງວັງວຽງ ແຂວງວຽງຈັນ ສປປ ລາວ; ວິທີການແກ້ບັນຫາທາງດ້ານວິຊາການເພື່ອການອະນຸລັກ ແລະ ການພັດທະນາແບບຍືນຍົງຂອງໄມ້ດູ່ ( pterocarpus macrocarpus kurz) ໃນເຂດເນີນສູງພາກກາງຂອງຫວຽດນາມ; ການອະນຸລັກ ແລະ ພັດ ທະນາພັນໄມ້ທີ່ມີຄຸນຄ່າສູງ ໃນເຂດພູດອຍພາກກາງຂອງຫວຽດນາມ.

ໃນນີ້, ທ່ານ ພາວະນາ ສົມບານເພັງ ຮັກສາການຫົວໜ້າພະແນກຄຸ້ມຄອງປ່າໄມ້ບ້ານ, ກົມປ່າໄມ້, ກະຊວງກະສິກຳ ແລະ ປ່າໄມ້ ໃນນາມຫົວໜ້າໂຄງການ ຕາງໜ້າໃຫ້ລັດຖະບານລາວ ໄດ້ລາຍງານໃຫ້ຮູ້ ກ່ຽວກັບຄວາມຄືບໜ້າ ການຈັດຕັ້ງປະຕິບັດວຽກງານໃນໄລຍະ 6 ເດືອນ ຜ່ານມາ ແລະ ແຜນການ 6 ເດືອນໃນຕໍ່ໜ້າ ຂອງໂຄງການພັດທະນາຕົວແບບການຄຸ້ມຄອງປ່າໄມ້ບ້ານ ໂດຍການຂັບເຄື່ອນຂອງປະຊາຊົນ ບ້ານໂພນສູງ ເມືອງວັງວຽງ ແຂວງວຽງຈັນ ເຊິ່ງທ່ານໄດ້ໃຫ້ຮູ້ວ່າ: ໄລຍະການຈັດຕັ້ງປະຕິບັດໂຄງການແມ່ນ 2 ປີ (ວັນທີ 1 ມິ ຖຸນາ 2022 – ວັນທີ31 ພຶດສະພາ 2024) ເຊິ່ງຈັດຕັ້ງປະຕິບັດໂດຍພະແນກຄຸ້ມຄອງປ່າໄມ້ບ້ານ, ສູນຝຶກອົບຮົມປ່າໄມ້ຫ້ວຍປາມ້ອມ, ຫ້ອງການກະສິກຳ ແລະ ປ່າໄມ້ເມືອວັງວຽງ ແລະ ບ້ານໂພນສູງ, ເມືອງວັງວຽງ, ແຂວງວຽງຈັນ. ງົບປະມານໃນການຈັດຕັ້ງປະຕິບັດໂຄງ ການທັງໝົດ ຈຳນວນ 142.800 ໂດລາສະຫະລັດ. ໃນນີ້, ລັດຖະບານລາວປະກອບສ່ວນ ຈຳນວນ 22.800 ໂດລາສະຫະລັດ ແລະ ຈຳ ນວນ 120.000 ໂດລາສະຫະລັດ ແມ່ນງົບປະມານຊ່ວຍເຫຼືອລ້າຈາກ ສ.ເກົາຫຼີ. ສຳລັບເປົ້າໝາຍຂອງໂຄງການ ແມ່ນເພື່ອປັບ ປຸງຊັບພະ ຍາກອນປ່າໄມ້ ແລະ ຊີວິດການເປັນຢູ່ຂອງປະຊາຊົນ ທີ່ເພິ່ງພາອາໃສປ່າໄມ້ ໂດຍການຄຸ້ມຄອງຊັບພະຍາກອນປ່າໄມ້ແບບຍືນຍົງໃນລະດັບບ້ານ ແລະ ສ້າງບ້ານໂພນສູງໃຫ້ກາຍເປັນບ້ານຕົວແບບ ໃນການຈັດສັນ, ຄຸ້ມຄອງ, ປົກປັກຮັກສາປ່າໄມ້ ແລະ ມີຈຸດປະສົງ ເພື່ອສ້າງຮູບແບບການຄຸ້ມຄອງປ່າໄມ້ບ້ານແບບຍືນຍົງ ເພື່ອສ້າງຄວາມເຂັ້ມແຂງໃຫ້ປະຊາຊົນທ້ອງຖິ່ນ ໃນການຄຸ້ມຄອງຊັບພະຍາກອນປ່າໄມ້ແບບຍືນຍົງ ໃນຂອບເຂດການຄຸ້ມຄອງຂອງບ້ານ.

ໃນໄລຍະ 6 ເດືອນ ຕົ້ນປີ 2022 ທີ່ຜ່ານມາ ສຳລັບໝາກຜົນທີ 1: ການສ້າງຕັ້ງສູນການຮຽນຮູ້ການຄຸ້ມຄອງປ່າໄມ້ບ້ານ (ການປຶກສາຫາລືກັບບ້ານເພື່ອສ້າງຕັ້ງສູນການຮຽນຮູ້ຊຸມຊົນ ສຳເລັດ 100%, ການກະກຽມເອກະສານ ແລະ ລາຍລະອຽດແຜນງານກໍ່ສ້າງສູນການຮຽນຮູ້ຊຸມຊົນ ສຳເລັດ 100% ແລະ ການກໍ່ສ້າງສູນການຮຽນຮູ້ຊຸມຊົນ ສຳເລັດ 40%); ໝາກຜົນທີ 2: ປັບປຸງຈຸດຊົມວິວ ແລະ ເສັ້ນທາງຕິດຕາມ (ແຫຼ່ງທ່ອງທ່ຽວແບບນິເວດທີ່ມີທ່າແຮງ) ເທິງເຂດພູດອຍ 600 ແມັດ ໄດ້ສຳເລັດການຈັດກອງປະຊຸມປຶກສາຫາລືຂັ້ນບ້ານ ແລະ ແຜນຈັດສັນຄຸ້ມຄອງປ່າໄມ້ຂັ້ນບ້ານ VFMP ຮ່ວມກັບ ສູນຝຶກອົບຮົມປ່າໄມ້ ແລະ ຊາວບ້ານໆໂພນສູງ ເພື່ອສ້າງຈຸດຊົມວິວ ແລະ ເສັ້ນທາງຕິດຕາມ. ສຳລັບແຜນການໃນ 6 ເດືອນທ້າຍປີ 2022 ນີ້ ຈະໄດ້ສືບຕໍ່ວຽກງານການກໍ່ສ້າງສູນຮຽນຮູ້ ແລະ ສືບຕໍ່ກິດຈະກຳຕ່າງໆທີ່ຕິດພັນກັບການສ້າງຈຸດຊົມວິວ.

ນອກຈາກນີ້, ໃນທີ່ປະຊຸມຍັງໄດ້ຮັບຟັງການນຳສະເໜີ ກ່ຽວກັບ: ນະໂຍບາຍການຄຸ້ມຄອງຊັບພະຍາ ກອນປ່າໄມ້ຂອງ ສປປ ລາວ, ການປັບປຸງການເຄື່ອນໄຫວຂອງອົງການຮ່ວມມືປ່າໄມ້ ອາຊຽນ-ເກົາຫຼີ AFoCO ໃນພາກພື້ນແມ່ນໍ້າຂອງ ແລະ ບົດ ບາດຂອງສະມາຊິກເຄືອຂ່າຍແລກປ່ຽນຄວາມຮູ້ ກ່ຽວກັບວຽກງານງານປ່າໄມ້ ລະຫວ່າງ ສ.ເກົາຫຼີ ກັບບັນດາປະເທດລຸ່ມແມ່ນໍ້າຂອງ KMFNet ແລະ ຫົວຂໍ້ເພື່ອແລກປ່ຽນໃນກອງປະຊຸມຄັ້ງຕໍ່ໄປ. ສຳລັບກອງປະຊຸມຄະນະກຳມະການຮ່ວມມືປ່າໄມ້ ສ.ເກົາຫຼີ-ແມ່ນໍ້າຂອງ, ຄັ້ງທີ 12 ແມ່ນຈະໄດ້ຈັດຂຶ້ນທີ່ປະເທດຫວຽດນາມ.